Abraham Owane Sitewi tote tawesiteye su, le waraꞌi aꞌi ne.
4
Yaꞌariyei pefine aꞌi nomo lo, Abraham, nomo eiwerou le ne totesiya awere? Owane Sitewi lo nihe se Abraham lo yo seni aseyaro waraꞌi aꞌi siye soꞌoruweteye awere? 2 Abraham wiyawi wisere aꞌi ironamiteye su, le iyape topo lo ei ani aroweye. Le apou au teꞌe areiyeteye, “Ane meni aseyaro waraꞌi aꞌi tene!” Ahowa, le Owane Sitewi maꞌe apou teꞌe taꞌame. 3 Tu naifa weriyei meni ta Owane Sitewi lo peri one towe sahe leseye.“Meni Abraham, Owane Sitewi ne marepi erasi aꞌi tote tawesinamiteye. Serai Owane Sitewi lai le maꞌe yo seni aseyaro waraꞌi aꞌi au iroteye. Owane Sitewi lo nihe se Abraham meni waraꞌi aꞌi ironamiteye.” Stt 15:6
4 Fene wiyawi taꞌane siye meni ta totere! Meni ape wiyawi ta taꞌaneyei su, le maꞌaru ta aniyei. Maꞌaru ape neri aꞌi au taꞌame. Ahowa, meni ape wiyawi ta taꞌaneyei su, meni owane lo le maꞌe maꞌaru ta itiyaꞌu fa aurowa! 5 Ahowa, meni ta meni waraꞌi aꞌi Owane Sitewi lo nihe se heneraiyei ne toteye su, le eiwerou irowei awere? Le wiyawi wisere aꞌi taꞌanerowata. Le Owane Sitewi lo marepi heꞌi aꞌi fa wanu tote tawesi umasinamite. Owane Sitewi lai meni ape lo tote tawesiyei siyeyei su, Owane Sitewi le maꞌe yo seni aseyaro aꞌi au irorowa. Lu taune werese yo seni luwaru aꞌi ironamiteye ape, lowe Owane Sitewi ne tote tawesiyei su, le aꞌi lai lowe maꞌe yo seni waraꞌi aꞌi au irorowa. 6 Yaꞌariyei meni owane iyape Devit, le peri ape aiwawe aꞌi leseye. “Meni ta Owane Sitewi ne tote tawesiyei su, Owane Sitewi lai yo seni aseyaro aꞌi le maꞌe neri aꞌi au irowei. Meni ape wiyawi wisere aꞌi etiri ape aniyei ne iro taꞌame. Serai meni ape marepi nineꞌi wisereye ironamitorowa.” Meni owane Devit apou leseye,
7 “Lu taune, yo seni luwaru aꞌi ironamiteye ape, Owane Sitewi lai yo seni luwaru werese aꞌi lowe lo au ani pamowe sasarisawi su, lowe marepi wisere aꞌi tote nineꞌinamiteye. Ei, etiri luwaru aꞌi lowe iroteye ape, le yo seni luwaru aꞌi lowe lo ape mo tote iꞌane poꞌuteye.” Sng 32:1
8 “Meni ta apou totesiya su, ꞌMeni Owane Pefine aꞌi lo nihe se ane meni waraꞌi aꞌi irosiya. Meni Owane Pefine aꞌi lai yo seni luwaru werese aꞌi ano tote iꞌane poꞌuteye. Le marepi wisere aꞌi tote nineꞌinamisiya.’”a 9 Owane Sitewi lai lu taune lo yo seni luwaru aꞌi au ani sasarisawiyewe, sosu tote iꞌane poꞌuteye su, etiri ape Juda lo lu tewi aꞌi maꞌe henerai awere? Ahowa, etiri ape lu tewi tereꞌe aiheiyei aꞌi aiwawe henerai tepaꞌasiye. Nomo tu peri ape au teꞌe tepaꞌasiye. Meni Abraham Owane Sitewi ne tote tawesiteye su, Owane Sitewi lai yo seni aseyaro waraꞌi aꞌi au irowe. 10 Eiwerou su, meni Abraham, Owane Sitewi ne tote tawesiye awere?
Abraham, Owane Sitewi ne nowe tutawe pefine aꞌi tote tawesiye. Sosu nowe meꞌiye su, le Juda lo meni ta henerai. Serai Abraham, Owane Sitewi ne tote tawesinamiteye su, le meni aiheiyei aꞌi iroteye. 11 Nowe meꞌiye su, Owane Sitewi lai meni Abraham yaru ta tahe lo sahe touwei ne au teꞌeye. Tahe touwei yaru lo sitewi apou aꞌi teꞌesiya, “Abraham, Owane Sitewi ne tote tawesiyewe, Owane Sitewi le maꞌe aseyaro aꞌi au irowe.” Abraham tahe topo lo yaru touwe su, le lu taune werese maꞌe Owane Sitewi lo yo seni aseyaro aꞌi lo au teꞌeyei ne atuatu areiyeye. Serai meni Abraham yaꞌariyei aite lu taune werese tahe tou taꞌame ape, Owane Sitewi ne tote tawesiyei ape henerai. Lu taune werese Owane Sitewi ne tote tawesiteye ape, Owane Sitewi lai lowe maꞌe aseyaro waraꞌi aꞌi au ironamiteye.b 12 Sosu aiwawe aꞌi meni Abraham Juda lo lu taune lo yaꞌariyei aite henerai. Lowe werese tahe lowe lo lese touwe. Sosu Juda lo lu tewi meni Abraham lo yo seni aseyaro aꞌi umasiyewe, Owane Sitewi ne tote tawesiyei su, Abraham lai yaꞌariyei aite pefine aꞌi lowe lo henerai. Meni Abraham, Owane Sitewi ne tote tawesiye su, le tahe lo touwe taꞌama. Nowe meꞌiye su, Owane Sitewi lai le maꞌe tahe lo touwei ne au teꞌeye.
Owane Sitewi Abraham, teꞌe naneiyei ta au teꞌeye.
13 Serai Owane Sitewi lai meni Abraham lu tewi lo maꞌe aiwawe aꞌi peri ta au teꞌe naneiye. Peri teꞌe naneiyei ape apou teꞌeye, “Meni Abraham lo lu tewi, lowe omo omo werese mi mi weriyei weriyei au noweinoweinamitorowa.” Peri teꞌe naneiyei ape lu taune maꞌe Moses lo yo peri wanu umasiteye ape, au teꞌe taꞌame. Ahowa, peri teꞌe naneiyei ape lu taune Owane Sitewi pefine aꞌi ne tote tawesi umasinamiteye ape, sosu le yo seni aseyaro aꞌi lowe lo au teꞌeye.c 14 Wanure! Owane Sitewi lai lu taune maꞌe Moses lo yo peri umasiteye ape omo omo werese au noweinoweiyei ne auwei su, tote tawesiyei ape Owane Sitewi ne yahowaꞌi heneraiyei. Sosu aiwawe aꞌi Owane Sitewi lo peri teꞌe naneiyei ape areareteye.d 15 Owane Sitewi lo yo peri Moses leseye ape, iroteye su, lu taune werese yo ape wanu arisinamiteye. Serai Owane Sitewi lai lowe maꞌe ai marepi erasi aꞌi toteteye. Owane Sitewi lo yo peri ape iro taꞌame su, eiwerou lu taune wanu arisirowata.e 16 Sosu aꞌi ape lu taune werese Owane Sitewi ne tote tawesiyei su, Owane Sitewi lo peri teꞌe naneiyei ape lowe werese maꞌe neri aꞌi henerairowa. Sosu Owane Sitewi lo peri teꞌe naneiyei ape Juda lo lu tewi aꞌi yo peri umasiteye ape, henerai taꞌame. Ahowa, peri teꞌe naneiyei lu taune werese aiwawe aꞌi Owane Sitewi ne tote tawesiyei ape henerairowa. Lu taune werese Owane Sitewi Pefine aꞌi ne Abraham lo tote tawesiyei aiwawe aꞌi, lowe Abraham lo lu tewi pefine aꞌi ne. Meni Abraham yaꞌariyei sitewi nomo lo wiyeme aꞌi.f 17 Nomo peri ape wiyeme aꞌi soꞌoruwesiya. Meni ta Owane Sitewi lo peri one towe sahe apou leseye. Owane Sitewi apou eiye,
“Ne lu taune tomu neꞌese lo yaꞌariyei sitewi henerairowa.” Stt 17:5
Owane Sitewi lo nihe se peri teꞌe naneiyei ape pefine aꞌi henerai. Owane Sitewi ape, meni Abraham le ne tote tawesiteye ape, le lai lu taune, temeniyeye irosiya ape, au taꞌane norohu sineteye. Etiri werese awei sahe henerai taꞌame irosiya ape, Owane Sitewi Pefine aꞌi lai au taꞌane henerairowa.
18 Meni Abraham nohuwe lowesi eimane tamo autei taꞌame. Abraham, Owane Sitewi ne tote tawesiteye. Owane Sitewi lo teꞌe naneiyei ape ne, le yo se le lu tewi neꞌese lo yaꞌariyei sitewi henerairowa ape, soꞌoru taꞌama. Ahowa, le Owane Sitewi ne marepi erasi aꞌi tote tawesinamiteye. Owane Sitewi lai le maꞌe teꞌe naneiyei ape apou au teꞌeye,
“Ne lu tewi neꞌese lo yaꞌariyei sitewi henerairowa.” Stt 15:5
19 Abraham iyu menei tomu neꞌese (100 aiwawe aꞌi) iroteye. Tani lo aiwawe aꞌi waiyari ironamiteye. Piye nowe se lowesi nohuweri eimane auteirowa awere? Ahowa, tani lo, Sara eimane autei taꞌame. Abraham lo tote tawesiyei Owane Sitewi ne kairefi aꞌi tote tawesinamiteye.g 20 Le marepi lo sahe apou tote taꞌame. “Owane Sitewi lai notosi meꞌiyeni maꞌe atati arurowa.” Ahowa, le teꞌe naneiyei ape wiyeme aꞌi lowesi sahe henerairowa. Mi mi werese Abraham, Owane Sitewi ne tote tawesinamiteye. Le Owane Sitewi maꞌe marepi wisere aꞌi au teꞌe wisereye nineꞌinamiteye. 21 Meni Abraham etiri ape soꞌoruwe aꞌi ne, “Owane Sitewi lai notosi maꞌe teꞌe naneiyei lo ape au teꞌeye. Serai le aꞌi lai etiri ape notosi maꞌe pefine aꞌi henerairowa.” 22 Serai Owane Sitewi lai Abraham lo tote tawesiyei siyeye su, le meni Abraham maꞌe apou eiye,
“Tote tawesiyei no kairefi wisere aꞌi ne. Ane ne maꞌe meni aseyaro waraꞌi aꞌi au eiwa.” Stt 15:6
23 Owane Sitewi lo peri ape one towe sahe iroteye ape, “Abraham, Owane Sitewi ne tote tawesinamiteye. Serai Owane Sitewi lai Abraham meni waraꞌi aꞌi au eiye.” Le taꞌi ne ei taꞌame. 24 Aiwawe aꞌi nomo werese Owane Sitewi ne tote tawesinamirowa su, Owane Sitewi lai nomo aiwawe aꞌi lu taune waraꞌi aꞌi au eirowa. Le aꞌi lai meni owane nomo lo Jisas si tame norohuwe sineye. 25 Pefine aꞌi Owane Sitewi lai meni eime lo, Jisas, hi awei maꞌe yo seni luwaru aꞌi nomo lo iroteye ape ne fa temeniyeyei ne eimawe arosai. Aiwawe aꞌi Owane Sitewi lai Jisas si tame norohuwe sineye su, le nomo maꞌe faraꞌu lu taune waraꞌi aꞌi au eirowa.h