Owane Sitewi lai nomo lu taune waraꞌi aꞌi au eisiya.
5
Serai nomo Owane Sitewi ne tote tawesiyei su, le nomo werese lu taune waraꞌi aꞌi au eirowa. Owane Sitewi lai nomo lu taune waraꞌi aꞌi au eirowa su, nomo marepi fetane aꞌi Owane Sitewi mase ironamitorowa. Owane Jisas Krais lai marepi fetane aꞌi Owane Sitewi ne tote tawesiyei ape ani itorairowawe, nomo maꞌe aurowa. 2 Nomo Jisas lo wiyawi ne tote tawesiye su, le nomo Owane Sitewi lo ferafereiyei ape papu hene wirai tepaꞌasiye. Serai nomo marepi wisere aꞌi mi mi weriyei ironamirowa. Nomo etiri ta soꞌoruwe aꞌi ne. Jisas Krais si tame itorairowa su, le nomo Owane Sitewi lo omo hire maꞌe hene wirowa. Serai nomo le ne ninawesiya. Le nomo omo hire maꞌe hene wiyei su, nomo Owane Sitewi lo wisereyeyei pefine aꞌi maꞌe ironamitorowa. Serai nomo marepi wisere aꞌi totenamitorowa. 3 Nomo Jisas Krais tote tawesiyei su, etiri luwaru aꞌi tamo nomo maꞌe henerairowa. Ahowa, etiri luwaru aꞌi werese ape mo nomo maꞌe henerairowa su, nomo aiwawe marepi wisereye nineꞌi ironamitorowa. Piyene awere? Awei yo seni luwaru aꞌi ape nomo maꞌe heneraiyei su, marepi hepene nomo lo au ani tei kairefiyerowa.a 4 Marepi hepene nomo lo tei kairefiyeyei su, Owane Sitewi nomo ne marepi au wisereye nineꞌirowa. Owane Sitewi nomo ne au wisereye nineꞌirowa su, nomo Jisas lo si tame itoraiyei ape, ninawesiya. 5 Serai nomo Jisas lo si tame itoraiyei ape, ninawesiya su, nomo marepi orese aꞌi iro se taꞌame. Owane Sitewi lai teꞌe naneiyei lo nomo maꞌe auwe. Le nomo maꞌe teꞌe naneiyei ape pefine aꞌi henerairowa. Owane Sitewi lai marepi tote wawesiyeyei lo nomo maꞌe ani teroso arosai. Le marepi nomo lo papu au temeꞌeriyeye. Owane Sitewi lai waraꞌi aꞌi lo nomo maꞌe eimawe arosai su, le Owane Sitewi lo marepi tote wawesiyeyei erasi aꞌi nomo maꞌe auwe. 6 Nomo lai marepi hepene towafi nomo lo au feraferei taꞌame su, Meni Krais Jisas nomo ne, yo seni luwaru aꞌi ironamiteye ape, au temeniyeye. Owane Sitewi lai nowe ta ariariyeyewe, meni eime lo Krais Jisas hi awei sahe nomo ne fa temeniyeye ne eimawe arosai. 7 Owe nomo piye meni ta lai meni waraꞌi aꞌi ne au ferafereiyei ne temeniyerowa. Ahowa, lu tamo lai faraꞌu meni wisere au ferafereiyei ne temeniyerowa. 8 Ahowa, Owane Sitewi lai nomo maꞌe marepi tote wawesiyeyei erasi aꞌi au atuatunamisiya. Nomo yo seni luwaru aꞌi ironamiteye su, meni ape Krais Jisas nomo ne temeniyeye.b 9 Krais Jisas nomo ne temeniyeye su, nomo Owane Sitewi lo nihe se lu taune waraꞌi aꞌi irosiya. Serai peri ape wiyeme aꞌi tene! Wiyawi lo ape se, Owane Sitewi lai nomo maꞌe ai marepi toterowata.c 10 Ane fene maꞌe peri eti au teꞌesiya. Tu naifa nomo yo seni luwaru aꞌi ironamiteye su, nomo Owane Sitewi lo airame lu taune iroteye. Serai Owane Sitewi lai meni eime lo nomo ne temeniyeyei ne eimawe arosai. Serai nomo nati wafei pefine aꞌi lo henerai. Nomo nati wafei pefine aꞌi lo henerai su, nomo etiri ape soꞌoruwesiya. Owane Sitewi lai Jisas Krais si fisiye yo sahe au taꞌane norohuwe sineye su, nomo Owane Sitewi lo ai marepi teriterowata. 11 Ane peri tereꞌe fene maꞌe au teꞌesiya. Owane Jisas Krais wiyawi lo ape nomo ne iroteye su, marepi nomo lo Owane Sitewi maꞌe wisere erasi aꞌi au nineꞌinamitorowa. Sosu aiwawe aꞌi nomo Owane Sitewi maꞌe nati wafei pefine aꞌi henerai.Adam temeniyeyei henetai, Jisas marepi hepene heꞌi aitai.
12 Tu naifa weriyei meni tutawe lai yo seni luwaru aꞌi irowe. Serai lu taune werese werese meni ape lo yo seni luwaru aꞌi moꞌo umasiteye. Meni tutawe yo seni luwaru aꞌi irowe su, hepene lo temeniyeye. Serai lu taune werese werese yo seni luwaru aꞌi iroteye su, hepene lowe werese lo aiwawe aꞌi temeniyeye. Piyene awere? Lu taune werese werese aꞌi yo seni luwaru aꞌi ironamiteye.d 13 Serai yo seni luwaru aꞌi awei sahe iroteye. Sosu moꞌo Owane Sitewi lai meni Moses maꞌe yo peri pefine aꞌi lo au teꞌeye. Ahowa, nowe ape se Owane Sitewi lo yo peri pefine aꞌi henerai taꞌama. Owane Sitewi lai lu taune lo yo seni luwaru aꞌi au hese ereirowata.e 14 Adam lo nowe se aiwawe aꞌi Moses henerai su, lu taune werese temeniyeteye. Adam Owane Sitewi maꞌe yo seni luwaru aꞌi irowe. Le Owane Sitewi lo peri wanu arisiye. Lu taune tereꞌe werese lowe yo seni luwaru aꞌi tereꞌe apou ape iroteye su, lowe werese aiwawe aꞌi temeniyeteye. Meni ape, Adam, yo seni luwaru aꞌi irowe su, lu taune werese yo seni lo umasiteyewe, yo seni luwaru aꞌi iroteye. Aiwawe aꞌi Jisas, Owane Sitewi lai hi awei maꞌe eimawe arosai ape, me tapeꞌi sahe temeniyeye su, le lu taune werese ne temeniyeye. 15 Lu hesi ape, Adam sosu Krais Jisas lowesi tereꞌe tereꞌe se. Meni Adam yo seni luwaru aꞌi irowe su, lu taune werese werese aiwawe aꞌi yo seni luwaru aꞌi iroteye. Serai lowe werese lo marepi hepene temeniyeteye. Ahowa, nomo apou soꞌoruwe tene! Meni ape Jisas Krais, le Owane Sitewi lo ferafereiyei lu taune tomu neꞌese maꞌe neri aꞌi auwe. 16 Adam yo seni luwaru aꞌi tutawe irowe su, Owane Sitewi lai meni ape au hese ereiye. Owane Sitewi le maꞌe apou eiye, “Ne yo seni luwaru aꞌi irowe su, ne fa temeniyere.” Ahowa, etiri ape Owane Sitewi neri aꞌi auwe ape, tereꞌe tereꞌe ne. Lu taune werese werese aꞌi yo seni luwaru aꞌi ironamiteye su, Owane Sitewi lai ferafereiyei lo lu taune werese maꞌe neri aꞌi au atuatu areiyeye. Lu taune Owane Sitewi lo ferafereiyei tote tawesiyei su, le lowe werese maꞌe lu taune aseyaro waraꞌi aꞌi au eirowa. 17 Meni tutawe ape yo seni luwaru aꞌi irowe su, temeniyeyei ape lu taune werese maꞌe henerai. Ahowa, nomo apou soꞌoruwesiya tene! Lu taune tamo Owane Sitewi lo ferafereiyei pefine aꞌi tote tawesisiya su, lowe Owane Sitewi lo nihe se lu taune aseyaro waraꞌi aꞌi henerai tepaꞌasiye. Serai Owane Sitewi lai lowe maꞌe marepi hepene heꞌi pefine aꞌi aurowa. Meni Owane Jisas Krais temeniyeye su, lu taune werese le ne tote tawesinamisiya ape, lowe mi mi weriyei weriyei yo seni waraꞌi aꞌi ironamitorowa. 18 Serai meni tutawe Adam yo seni luwaru aꞌi irowe su, Adam lo yo seni luwaru aꞌi ape lai temeniyeyei ape lu taune werese maꞌe henerai. Aiwawe aꞌi Meni Owane Jisas Krais yo seni waraꞌi aꞌi irowe su, lu taune werese Owane Sitewi lo nihe se lu taune waraꞌi aꞌi iroteye. Serai Meni Owane Jisas Krais nomo werese maꞌe marepi hepene heꞌi pefine aꞌi aurowa.f 19 Sosu aiwawe aꞌi meni Adam Owane Sitewi lo peri arisiye su, lu taune werese yo seni luwaru aꞌi lo umasinamiteye. Serai lowe werese lu taune yo seni luwaru aꞌi ironamitorowa. Ahowa, Meni Owane Jisas Krais lai Owane Sitewi lo marepi wanu tote umasiye su, lu taune tomu neꞌese Owane Sitewi lo nihe se lu taune waraꞌi aꞌi henerairowa.g 20 Nowe tu naifa, Owane Sitewi lai meni Moses maꞌe yo peri pefine aꞌi au teꞌeye. Owane Sitewi lo yo peri iroteye su, Owane Sitewi lai lu taune werese maꞌe yo seni luwaru aꞌi amerame aꞌi au atuatuteye. Serai lu taune werese yo seni luwaru aꞌi tomu neꞌese aꞌi, lowe iroteye ape, soꞌoruweteye. Sosu lu taune yo seni luwaru aꞌi tomu neꞌese ironamiteye su, Owane Sitewi lai lowe werese maꞌe ferafereiyei pefine aꞌi lo, erasi aꞌi henerai ape, amerame aꞌi au atuatuteye. 21 Lu taune werese yo seni luwaru aꞌi ironamiteye su, lowe werese temeniyeteye. Sosu aiwawe aꞌi Owane Sitewi lai lu taune werese maꞌe ferafereiyei pefine aꞌi lo au atuatu fiyari areiyeteye. Lowe werese Owane Sitewi lo ferafereiyei ape tote tawesiye su, lowe waraꞌi aꞌi iroteye. Owane Sitewi lo nihe se lu taune waraꞌi aꞌi ironamisiya su, le aꞌi lai Owane Jisas Krais lo yo seni waraꞌi aꞌi se lowe maꞌe marepi hepene heꞌi pefine aꞌi aurowa.h