Nomo Krais aiwawe aꞌi temeniyeye.
6
Sosu aꞌi ape ane peri ta piye teꞌesiya awere? Nomo yo seni luwaru neꞌese faraꞌu ironamiyei awere? Nomo yo seni luwaru neꞌese aꞌi irowei su, serai Owane Sitewi lai ferafereiyei pefine aꞌi lo nomo maꞌe erasi aꞌi au atuaturowa awere? Yo seni nomo lo wisere aꞌi awere? 2 Opiyai! Fene owe ape totere! Meni Owane Jisas Krais temeniyeye su, yo seni luwaru aꞌi nomo lo iroteye ape, le mase temeniyeye. Nomo yo seni luwaru aꞌi nomo lo ne temeniyeye su, serai nomo yo seni luwaru aꞌi ironamirowata. 3 Ane peri tereꞌe ta fene maꞌe au teꞌesiya. Fene peri ano wanu tote tawesinamite! Lowe fene saꞌi se au huwe su, saꞌi huwei yaru ape lai lu taune werese maꞌe apou au atuatuwe. Fene Krais ne tote tawesi umasinamiteyewe, le maꞌe nate tawesinamisiya. Lowe nomo saꞌi se au huwe su, nomo le mase temeniyeye.a 4 Serai lowe nomo saꞌi se au huwe su, nomo le mase fisiye yo papu fu arowe. Marepi weriyei nomo lo le mase temeniyeye. Serai Owane Sitewi lai kairefi wisere erasi se, Krais si tame norohu sineye su, le nomo maꞌe marepi hepene heꞌi aꞌi irowei ne auwe.b5 Serai Jisas temeniyeye su, nomo lu taune Jisas ne tote tawesisiya ape, nomo Jisas lo temeniyeyei aiwawe aꞌi iroteye. Nomo le maꞌe natenamirowa. Sosu Owane Sitewi lai Jisas si tame taꞌane norohuwe sineye su, nomo le maꞌe aiwawe aꞌi natenamirowa. 6 Wanure! Nomo peri pefine aꞌi ape soꞌoruwe tepaꞌasiye. Jisas Krais me tapeꞌi sahe temeniyeye su, marepi weriyei nomo lo le mase temeniye poꞌuteye. Le yo seni luwaru werese nomo lo fisiye yo papu au sasari arunatinamiye. Serai nomo marepi weriyei nomo lo tote umasi taꞌame. Sosu nomo yo seni luwaru aꞌi ape iro taꞌame.c 7 Lu taune temeniyeye su, lowe yo seni luwaru aꞌi irorowata. Serai yo seni luwaru aꞌi ape lai meni ape ani fu ararorowata.
8 Sosu pefine aꞌi nomo Krais aiwawe aꞌi temeniyeye su, nomo peri ape soꞌoruwe tepaꞌasiye. Nomo mi mi weriyei weriyei marepi hepene heꞌi aꞌi le mase ironamitorowa. 9 Nomo peri ape aiwawe aꞌi soꞌoruwe tepaꞌasiye. Owane Sitewi lai Jisas Krais si tame taꞌane norohuwe sineye su, le meꞌiye si tame temeniyerowata. Ahowa, temeniyeyei ape le ani ararorowata. 10 Le temeniyeye su, le aꞌi lai nowe taꞌi se yo seni luwaru aꞌi nomo lo ne au temeniyeye. Le si tame temeniyerowata. Sosu aiwawe aꞌi le mi mi weriyei weriyei norohuwe ironamitorowa su, le Owane Sitewi lo marepi werese tote umasinamitorowawe, le maꞌe au wisereye nineꞌinamitorowa. 11 Sosu aiwawe aꞌi fene Jisas lo marepi totere. Fene Krais Jisas maꞌe natenamiye su, fene yo seni luwaru werese aꞌi ani fu ararote. Yo seni luwaru aꞌi lai fene maꞌe ani fu ararorowata. Fene yo seni luwaru aꞌi ape temeniyeye su, fene marepi hepene heꞌi aꞌi Owane Sitewi mase ironamitorowa.d 12 Serai fene yo seni luwaru aꞌi lo marepi hepene fene lo sahe ani fu ararote. Sosu fene yo seni luwaru aꞌi lo marepi wanu tote umasirowata.e 13 Fene ereti lowe fene lo yo seni luwaru aꞌi irowei ne owe ape aure. Ahowa, fene ereti lowe tahe werese Owane Sitewi maꞌe yo seni aseyaro irowei ne aure. Lu taune werese Krais mase temeniyeye ape sosu marepi hepene heꞌi aꞌi le mase ironamisiya ape, fene aiwawe aꞌi yo seni aseyaro aꞌi lowe lo umasite. Sosu tahe paꞌare marepi toteyei fene lo Owane Sitewi maꞌe au wisereye nineꞌinamite.f 14 Sosu fene Owane Sitewi lo yo peri Moses leseye ape, unahi sahe iroteye su, yo seni luwaru aꞌi ape lai fene maꞌe ani fu araroteye. Ahowa, pereye nowe eite se fene Owane Sitewi lo ferafereiyei ape unahi ironamisiya su, yo seni luwaru werese aꞌi lai fene ani fu ararorowata.g
Nomo werese yo seni aseyaro aꞌi fa ironamite.
15 Nomo piye peri ta teꞌesiya awere? Nomo Owane Sitewi lo yo peri Moses leseye ape, unahi iro se taꞌame. Serai nomo Owane Sitewi lo ferafereiyei ironamisiya su, nomo yo seni luwaru aꞌi faraꞌu irowei awere? Opiyai! Nomo marepi apou ape owe totete. 16 Fene wiyawi yahowaꞌi taꞌane siye lu tamo heneraiyei su, fene meni owane fene lo, lo peri wanu tote umasinamite. Serai fene Owane Sitewi lo yo seni luwaru aꞌi unahi irowei su, fene yo seni luwaru aꞌi unahi ironamirowa. Aiwawe aꞌi yo seni aseyaro aꞌi irowei su, fene yo seni aseyaro aꞌi unahi ironamite. Fene yo seni luwaru aꞌi unahi irowe su, fene temeniyerowa. Sosu fene marepi waraꞌi aꞌi umasiyei su, fene yo seni waraꞌi aꞌi ironamitorowa.h 17 Tu naifa yo seni luwaru aꞌi ape lai meni owane fene lo wou henerai. Ahowa, nomo Owane Sitewi maꞌe au teꞌe wisereyesiya. Fene Owane Sitewi lo marepi heꞌi aꞌi nomo lai fene maꞌe au atuatu areiyeteye ape, fene Owane Sitewi lo marepi heꞌi aꞌi ape marepi fene lo papu tote tawesi umasiteye. Serai nomo Owane Sitewi lo marepi heꞌi aꞌi ape unahi papu iro fareyarenamisiya. 18 Fene Owane Sitewi lo marepi heꞌi aꞌi tote tawesi umasiye su, Owane Sitewi lai meni owane luwaru aꞌi fene sahe iroteye ape, sasarisawiyewe, meni owane aseyaro aꞌi ape fene lo marepi papu ironamisiya. Serai yo seni luwaru aꞌi ape lai fene maꞌe ani fu ararorowata. Sosu pereye nowe eite se fene yo seni waraꞌi aꞌi unahi fareyarenamisiya. Serai fene yo seni waraꞌi aꞌi fu umasinamite.
19 Piyene ane peri anowe ape fene maꞌe au teꞌeye awere? Fene marepi weriyei irosiya su, fene lai peri wiyeme aꞌi soꞌoru taꞌama. Serai ane peri anowe ape au teꞌeye. Nowe ape se, yo seni luwaru aꞌi unahi iroteye su, fene lai tahe paꞌare tewi aꞌi fene lo yo seni luwaru aꞌi ape mo maꞌe irowei ne auteye. Serai yo seni luwaru aꞌi lai meni owane fene lo henerai. Fene mi mi weriyei yo seni luwaru aꞌi ironamiteye. Sosu aiwawe aꞌi Owane Sitewi lai meni owane luwaru aꞌi ape au sasarisawiyewe, meni owane aseyaro fene maꞌe auwe. Fene yo seni waraꞌi wisere aꞌi ape unahi farerenamisiya. Serai Owane Sitewi lo yo seni waraꞌi aꞌi fu umasinamite. 20 Fene yo seni luwaru aꞌi unahi fareyarenamiteye su, fene meni owane luwaru aꞌi fene lo wanu tote umasinamiteye. Owane Sitewi lo yo seni waraꞌi aꞌi fene papu iro te taꞌame. 21 Fene yo seni luwaru aꞌi apou ape iroteye. Pereye nowe eite se, fene Owane Sitewi lo meni owane waraꞌi aꞌi unahi irosiya su, fene etiri yo seni luwaru aꞌi ape mo neritase aꞌi totesiya. Fene yo seni luwaru aꞌi ape iroteye su, sosu fene werese temeniyerowa. 22 Sosu pereye nowe eite se Owane Sitewi lai meni owane luwaru aꞌi fene lo au sasari poꞌutesawi. Serai fene yo seni aseyaro waraꞌi aꞌi unahi fareyarenamisiya. Owane Sitewi Pefine aꞌi lai meni owane tutawe fene maꞌe henerai tepaꞌasiye. Owane Sitewi Pefine aꞌi meni owane fene lo ironamiteyei su, fene marepi hepene heꞌi aꞌi mi mi weriyei weriyei ironamitorowa. 23 Lu taune tamo yo seni luwaru aꞌi iroteye su, meni owane weriyei lowe lo lowe maꞌe itiyaꞌu temeniyerowa. Ahowa, Owane Sitewi Pefine aꞌi lai nomo maꞌe etiri ta neri aꞌi auwe. Etiri ape lai nomo marepi hepene heꞌi aꞌi mi mi weriyei weriyei ironamitorowa. Serai nomo Owane Krais Jisas nate tawesisiya su, nomo mi mi pasi pasi weriyei ironamitorowa.i