Fene meni ta tani lo naituwei ne totere.
7
Kaiyemo, fene werese yo peri ne, soꞌoruwe tepaꞌasiye. Meni ta norohuwe iroteyei su, le yo peri ape unahi iroteyei. Sosu meni ape temeniyeye su, le yo peri ape unahi iro se taꞌame. 2 Ane peri anowe ta fene maꞌe au teꞌesiya. Menitani ta meni lo mase mi mi werese lefeifonamisiya. Sosu meni ape temeniyeyei su, tani lo naituwei lo yo peri arunatiyei. Lowesi aiwawe lefeifoteye ape erau fiyariye. Ahowa, menitani weiname faraꞌu aꞌi meni heꞌi naitu ene arowa. 3 Sosu aiwawe aꞌi menitani ta meni lo naituwei su, lowesi naitu lefeifonamirowa. Ahowa, meni lo norohuwe irowei su, sosu menitani ape lai meni tereꞌe ta naituwei su, menitani ape lai tafaꞌe yo seni luwaru aꞌi irorowa. Sosu meni lo ape temeniyeyei su, sosu menitani ape meni tereꞌe ta naituwei su, menitani ape tafaꞌe yo seni luwaru aꞌi iro taꞌame. Menitani ape naitu lo yo peri arunatiyei.4 Sosu aiwawe aꞌi kaiyemo ano, Meni Owane Jisas Krais me tapeꞌi sahe temeniyeye su, meni owane weriyei marepi nomo lo papu iroteye ape aiwawe aꞌi temeniyeye. Serai fene Moses lo yo peri unahi iro taꞌame. Fene meni owane waraꞌi heꞌi hene aniye. Meni owane ape Owane Sitewi lai si tame taꞌane norohuwe sineye ape, le meni owane fene lo henerai. Serai nomo meni owane waraꞌi aꞌi ape lo unahi iroteyei su, nomo Owane Sitewi lo marepi tote umasinamirowawe, yo seni aseyaro ironamirowa.a 5 Tu naifa nomo yo seni luwaru aꞌi lo marepi unahi iroteye. Moses lo yo peri lai nomo maꞌe yo seni luwaru werese aꞌi au atuatuteye. Nomo yo seni luwaru aꞌi siyeteye su, nomo yo seni luwaru aꞌi ape siye wisereyeteye. Serai nomo yo seni luwaru aꞌi ape tote umasiteye. Nomo yo seni luwaru aꞌi iroteye su, tahe paꞌare tewi aꞌi nomo lo yo seni luwaru aꞌi irowei ne auwe. Etiri luwaru werese aꞌi nomo iroteye ape lai, nomo maꞌe temeniyeyei heneraiteye. 6 Aiwawe aꞌi tu naifa, Moses lo yo peri nomo werese anite tawesiteye. Nomo kalabus lu wou aꞌi ne. Sosu meni owane weriyei, nomo papu iroteye ape, temeniyeye su, Owane Sitewi lai Moses lo yo peri nomo sahe napetu tawesiteye ape, au ani erau fiyari sasarisawi tepaꞌasiye. Serai pereye nowe eite se nomo marepi heꞌi aꞌi eite se Owane Sitewi lo wiyawi au taꞌanesiya. Tu naifa nomo Owane Sitewi lo wiyawi taꞌane irowe su, nomo Moses lo yo peri werese umasinamiteye. Mi mi werese nomo Moses lo yo peri arisinamiteye. Serai Owane Sitewi lai nomo Moses lo yo peri au ani erau fiyarisawi su, nomo Owane Sitewi lo Hepene Waraꞌi aꞌi se Owane Sitewi lo wiyawi taꞌane irosiya.b
Nomo yo seni luwaru aꞌi maꞌe ai atusiya.
7 Fene piye totesiya awere? Ane Moses lo yo peri sosu yo seni luwaru aꞌi lowesi taꞌi aiwawe aꞌi irosiya awere? Ahowa, peri ape wawero aꞌi tene! Serai Moses lo yo peri ape lai ane maꞌe yo seni luwaru ape mo, au atuatu areiyeye. Moses lo yo peri apou teꞌesiya, “Fene lu taune tereꞌe lo etiri tamo owe ape siye wisereyete.” Serai Moses lo yo peri henerai taꞌame su, eiwerai ane maꞌe yo seni ape luwaru aꞌi au atuatutereme awere?c 8 Serai ane Moses lo yo peri ape siye teꞌeye su, ane apou toteye. “Piyene yo seni ape luwaru aꞌi awere? Ane yo seni ape irowei ne totesiya. Aiwawe aꞌi yo seni luwaru werese aꞌi ane faraꞌu tote umasirowa.” Sosu Moses lo yo peri ane maꞌe yo seni luwaru werese aꞌi au atuatuteye. Serai ane yo seni luwaru aꞌi ironamiteye. Moses lo yo peri henerai taꞌame su, yo seni luwaru aꞌi nomo maꞌe kairefi se taꞌame. Yo seni luwaru aꞌi nomo irowei ape, nomo siye soꞌoru taꞌama. 9 Tu naifa ane Moses lo yo peri soꞌoru taꞌama su, hepene ano norohuwe iroteye. Aiwawe aꞌi Moses lo yo peri ane maꞌe kairefi se taꞌame. Ahowa, Moses lo yo peri ane maꞌe henerai su, ane yo seni luwaru aꞌi siye soꞌoruweteye. 10 Serai ane yo seni luwaru aꞌi iroteye su, ane aiwawe aꞌi temeniyeye. Owane Sitewi lai apou toteye, “Yo peri ano lu taune werese maꞌe marepi hepene heꞌi aꞌi aurowa.” Ahowa, ane Moses lo yo peri umasiyei ne toteye su, ane yo peri ape umasirowata. Serai yo peri ape lai ane aine teraꞌe temeniyeyei wou teriteye. 11 Sosu yo seni luwaru aꞌi Moses lo yo peri se ane maꞌe au areareteye. Serai yo seni luwaru aꞌi ape lai hepene ano maꞌe aine teraꞌe temeniyeye.d
12 Sosu aiwawe aꞌi Moses lo yo peri werese waraꞌi aꞌi ne. Peri werese Moses lo yo peri maꞌe fai ape, peri werese ape aseyaro waraꞌi pefine aꞌi ne.e 13 Fene piye totesiya awere? Serai etiri ta aseyaro waraꞌi pefine aꞌi ane maꞌe aine teraꞌeye awere? Opiyai! Yo seni luwaru aꞌi ane maꞌe aine teraꞌe temeniyeye. Moses lo yo peri se, yo seni luwaru aꞌi ane maꞌe amerame aꞌi au atuatuteye. Owane Sitewi apou toteteye, “Moses lo yo peri aseyaro wisere aꞌi tene! Moses lo yo peri lai nomo werese maꞌe etiri tamo au atuatu areiyeye. Yo seni luwaru aꞌi ape luwaru aꞌi tene.”
Yo seni luwaru aꞌi marepi hepene nomo lo hi ani araronamisiya.
14 Moses lo yo peri eiwerou maꞌe fai awere? Nomo soꞌoruwe tene! Moses lo yo peri ape Owane Sitewi lo Hepene Waraꞌi aꞌi maꞌe aitai. Ane Owane Sitewi lo Hepene Waraꞌi aꞌi tote umasirowata. Ane yo seni luwaru aꞌi lo kairefi aꞌi unahi ironamisiya. Meni owane weriyei ape lai ane yo seni waraꞌi aꞌi irowei ne einamisiya. 15 Yo seni werese ane ironamisiya ape, ane yo seni sitewi ape soꞌoru taꞌama. Ane etiri yo seni aseyaro tamo irowei ne totesiya. Ahowa, ane yo seni wisere waraꞌi ape irorowata. Marepi papu ano sahe irosiya, ane apou totesiya, “Ane etiri yo seni luwaru aꞌi iro se taꞌame.” Ahowa, ane etiri yo seni luwaru aꞌi ape ironamisiya.f 16 Sosu marepi ano apou aꞌi totesiya, “Ane yo seni luwaru aꞌi irorowata.” Ahowa, ane yo seni luwaru aꞌi ape ironamisiya. Serai ane Moses lo yo peri aiwawe marepi taꞌi aꞌi totesiya. Ei, Moses lo yo peri wiyeme pefine aꞌi tene. 17 Ane yo seni luwaru aꞌi irowei su, marepi ano lai iro taꞌame. Ahowa, yo seni luwaru weriyei marepi ano papu irosiya ape, le aꞌi lai yo seni luwaru aꞌi ape ane maꞌe tewi ite iteteye. 18 Ei, ane peri ta soꞌoruwe tene! Etiri yo seni waraꞌi aꞌi ane papu iro se taꞌame. Ane peri teꞌesiya. Etiri yo seni waraꞌi aꞌi marepi weriyei sahe iro taꞌame. Weiya! Ane yo seni waraꞌi aꞌi ape iroreme. Ane yo seni waraꞌi aꞌi irowei ne totesiya su, ane yo seni aseyaro irorowata. 19 Ane etiri yo seni waraꞌi marepi ano sahe irowei ne totesiya. Ahowa, ane yo seni waraꞌi aꞌi ape mo irorowata. Sosu aiwawe aꞌi etiri yo seni luwaru aꞌi ane irowei ne tote taꞌoresiya ape, yo seni luwaru aꞌi ape mo ane irosiya. 20 Serai yo seni luwaru aꞌi ape mo ane irowei ne tote taꞌoresiya ape, ane yo seni ape mo ironamisiya. Ahowa, yo seni luwaru weriyei marepi ano papu irosiya ape, le aꞌi lai yo seni luwaru aꞌi marepi ano sahe tewi ite iteteye. 21 Serai ane peri ape lo sitewi wanu soꞌoruweye. Ane yo seni waraꞌi aꞌi irowei ne toteyei su, yo seni luwaru weriyei marepi ano papu irosiya. Serai yo seni luwaru aꞌi marepi ano papu ironamisiya. 22 Marepi heꞌi aꞌi ano sahe, ane Owane Sitewi lo yo peri werese ne marepi wisere aꞌi totesiya. 23 Ahowa, ane yo peri tereꞌe, tahe paꞌare ano sahe irosiya ape, siye soꞌoruwesiya. Yo peri tereꞌe ape lai Owane Sitewi lo yo peri pefine aꞌi marepi ano sahe irosiya ape se, atu tiyatinamisiya. Yo peri tereꞌe ape tahe paꞌare sahe irosiya ape, yo seni luwaru aꞌi ne. Serai yo peri tereꞌe ape marepi ano yo seni waraꞌi aꞌi irowei ne einamisiya.g 24 Sawi amou! Yo seni topo ano sahe irosiya ape, ne tote wirepuwesiya. Yo seni luwaru weriyei lai, tahe paꞌare ano papu irosiya ape, marepi ano au luwaruwenamisiya. Yo seni luwaru weriyei temeniyeyei lo yo seni ape ane maꞌe henerai. Eiwerai nomo ne au ferafereirowa awere? 25 Owane Jisas Krais nomo lo lai ane ne au ferafereirowa. Serai ane Owane Sitewi maꞌe au ei wisereyenamisiya.
Serai marepi papu ano sahe ane Owane Sitewi lo yo peri pefine aꞌi wanu tote umasinamirowa. Ahowa, yo seni luwaru weriyei tahe paꞌare ano irosiya ape ane maꞌe apou au teꞌesiya, “Ne marepi toteyei werese ano fu wanu umasinamite. Fene yo seni luwaru aꞌi ironamite.”h