5 Lu taune werese marepi luwaru aꞌi towafi lowe lo wanu tote umasiteye ape, lowe yo seni luwaru aꞌi erasi aꞌi totenamisiya. Sosu lowe yo seni luwaru aꞌi umasinamisiya. Ahowa, lu taune werese Owane Sitewi lo Hepene Waraꞌi lo marepi tote umasinamisiya ape, lowe werese Owane Sitewi lo Waraꞌi aꞌi lo marepi pefine aꞌi wanu tote umasinamisiya. 6 Sosu meni ta menitani ta lo marepi luwaru aꞌi topo lo wanu tote umasiyei su, hepene lowe lo temeniyerowa. Ahowa, meni ta, menitani ta Owane Sitewi lo Hepene Waraꞌi aꞌi marepi erasi aꞌi totenamisiya su, lowe marepi hepene heꞌi aꞌi ape sahe ironamitorowa. Aiwawe aꞌi lowe marepi fetane aꞌi ironamisiya. 7 Peri ape pefine aꞌi tene! Marepi luwaru aꞌi lai yo seni luwaru aꞌi meni ta maꞌe au atuatu areiyeyei su, meni ape Owane Sitewi lo airame meni irosiya. Le Owane Sitewi lo yo peri werese arisinamitorowa. Ahowa, le Owane Sitewi lo yo peri werese wanu tote umasirowata. 8 Lu taune werese marepi luwaru aꞌi towafi lowe lo wanu tote umasiyei su, Owane Sitewi lai lowe maꞌe au wisereyerowata.

9 Ahowa, fene werese lai marepi luwaru aꞌi fene lo wanu tote umasisiya taꞌama. Ahowa, Owane Sitewi lo Hepene Waraꞌi aꞌi lo fene papu ironamisiya su, fene marepi pefine aꞌi lo wanu tote umasinamisiya. Krais lo Hepene Waraꞌi aꞌi lu taune tamo lo marepi papu iro taꞌame su, lowe Krais mase se nate taꞌame. Lowe Owane Sitewi lo lu feni taꞌama.^b 10 Fene yo seni luwaru aꞌi ironamiteye su, tahe paꞌare fene lo temeniyerowa. Ahowa, Meni Owane Krais fene papu iroteye su, Owane Sitewi apou eiye, “Nihe ano se, fene lu taune waraꞌi aꞌi ironamisiya. Serai fene mi mi pasi pasi ironamitorowa.”^c 11 Owane Sitewi lai Jisas si tame au taꞌane norohuwe sineye. Serai Owane Sitewi lo Hepene Waraꞌi aꞌi fene papu ironamisiya su, Owane Sitewi tahe paꞌare fene lo temeniyesiya ape, le tahe paꞌare fene lo au taꞌane norohuwerowa. Owane Sitewi lai Krais si tame au taꞌane norohuwe sineye. Serai le aꞌi lai Hepene Waraꞌi lo se tahe paꞌare fene lo au taꞌane norohuwerowa.

12 Sosu serai kaiyemo ano. Nomo yo seni luwaru meni owane weriyei ape unahi owe ape irote. Ahowa, nomo Owane Sitewi lo Hepene Waraꞌi marepi nomo lo papu ironamisiya ape, nomo marepi lo wanu tote umasinamite. 13 Fene yo seni luwaru meni owane weriyei lo marepi umasiyei su, fene temeniyerowa. Ahowa, fene Owane Sitewi lo Hepene Waraꞌi lo marepi wanu tote umasinamiyei su, fene lai Meni Owane weriyei lo yo seni luwaru aꞌi ani aro poꞌutenamirowa. Fene marepi heꞌi ape weriyei weriyei ironamitorowa.^d

14 Lu taune werese Owane Sitewi lo Hepene Waraꞌi aꞌi lo marepi wanu tote umasinamiteyei su, lowe Owane Sitewi lo eimane pefine aꞌi heneraiyei. 15 Owane Sitewi lai Hepene Waraꞌi aꞌi lo fene maꞌe eimawe arosai su, fene wiyawi yahowaꞌi taꞌane siye lu aiwawe wou taꞌama. Sosu fene wiyawi yahowaꞌi taꞌane siye lu ape wou heneraiyei su, fene Owane Sitewi Pefine aꞌi ne atoweiye erasi ironamirowa. Ahowa, fene lu taune atauwe wou aꞌi ne. Owane Sitewi lai Hepene Waraꞌi aꞌi lo fene maꞌe auwe su, fene eimane pefine aꞌi henerai. Serai fene Owane Sitewi Pefine aꞌi maꞌe au teꞌesiya, “Tai ano, Ne tai ano pefine aꞌi ne.”^e 16 Sosu aiwawe aꞌi Owane Sitewi lo Hepene Waraꞌi aꞌi lai hepene nomo lo maꞌe teꞌenamisiya. Le apou einamisiya, “Fene Owane Sitewi lo eimane pefine aꞌi ne.” Hepene nomo lo Owane Sitewi lo Hepene Waraꞌi aꞌi mase nateye su, nomo Owane Sitewi lo eimane pefine wou henerai.^f 17 Sosu serai nomo Owane Sitewi lo eimane pefine aꞌi henerai su, Owane Sitewi lai marepi etiri wisere neꞌese aꞌi nomo au ariariyeye ape, nomo maꞌe aurowa. Etiri werese Owane Sitewi lai Jisas maꞌe auwe ape, le nomo maꞌe aiwawe aꞌi aurowa. Ahowa, nomo marepi orese erasi aꞌi teritenamisiya. Krais Jisas lo marepi orese aꞌi aiwawe aꞌi teriteye. Nomo marepi orese erasi aꞌi teriteyei su, Owane Sitewi lai, nowe meꞌiye su, nomo maꞌe marepi wisere aꞌi lo aunamirowa.^g

18 Nomo hi awei sato irosiya su, nomo fofowei erasi aꞌi teriterowa. Etiri werese Owane Sitewi nomo maꞌe auwei ne ariariyeye ape, etiri werese ape mo wisere pefine aꞌi tene! Serai pereye nowe eite se nomo fofowei erasi teritesiya su, nomo marepi owe ape tote ewitete. Ahowa, nomo Owane Sitewi lo marepi wisere aꞌi ape ne, nomo maꞌe aunamiyei ape, nomo erasi aꞌi totenamitorowa. Fofowei etiri erasi aꞌi nomo teriteyei ape mo, etiri yahowaꞌi ne. 19 Etiri werese hi awei sahe, etiri werese niꞌarawe sahe irosiya ape, Owane Sitewi lai taꞌaneye. Lowe werese, marepi erasi aꞌi totenamisiya ape, Owane Sitewi lo nowe ariariyeye ape ne ninawesiya. Owane Sitewi lai etiri ape mo maꞌe omo ipo pani werese maꞌe irosiya ape mo, apou au teꞌerowa. “Fene eimane pefine aꞌi werese ano siyere!” Serai etiri werese Owane Sitewi lai taꞌaneye ape, lowe nowe ape ne ninawesiya. 20 Etiri werese Owane Sitewi lai taꞌaneye ape, le etiri ape mo wisere aꞌi heneraiyei ne toteye. Ahowa, lowe werese wisere aꞌi henerai taꞌama. Etiri werese ape mo marepi towafi lowe lo wisere aꞌi henerai taꞌame. Ahowa, aiwawe aꞌi Owane Sitewi lo marepi se lowe wisere aꞌi henerai taꞌama. Serai etiri werese ape mo Owane Sitewi lo nowe au ariariyeye ape ne ninawesiya. Sosu nowe ape se lowe werese wisere aꞌi henerairowa.^h 21 Owane Sitewi lai etiri werese ape mo uwaseyei ne tote taꞌame. Ahowa, le etiri werese ape mo marepi wisere pefine aꞌi lo heneraiyei ne toteye. Apou aiwawe aꞌi eimane pefine werese lo marepi wisere fetane aꞌi wou ironamisiya.

22 Ane fene maꞌe tame au teꞌesiya. Etiri ta nomo lai soꞌoruwe tene! Etiri werese, Owane Sitewi lai taꞌaneye ape, fofowei erasi aꞌi teritesiya, apou wou aꞌi menitani ta eimane ta auteiyei su, menitani ape fofowei erasi aꞌi teriteyei. Pereye nowe eite se, lowe fofowei erasi aꞌi teritenamisiya. Serai etiri werese ape mo Owane Sitewi lo nowe ape ne ninawesiya. 23 Etiri werese omo pani werese sahe fofowei erasi ironamisiya. Sosu aiwawe aꞌi nomo werese marepi papu fofowei erasi aꞌi teritesiya. Serai nomo nowe yeꞌewi ne ninawesiya. Nowe yeꞌewi heneraiyei su, fofowei werese nomo lo poꞌuterowa. Owane Sitewi lai nomo maꞌe peri ta teꞌe naneiye. Serai Owane Sitewi lai Hepene Waraꞌi aꞌi lo nomo maꞌe eimawe arosai su, Hepene Waraꞌi aꞌi lo teꞌe naneiyei ape, tewi tutawe teꞌe naneiye ape, henerai. Serai nomo nowe ape ne ninawesiya. Nowe ape se nomo werese Owane Sitewi lo eimane pefine aꞌi su, nomo etiri werese le nomo maꞌe au teꞌe naneiyei ape, anirowa. Sosu le tahe paꞌare nomo lo ete hene anirowa.ⁱ 24 Nomo Owane Sitewi ne tote tawesiye su, Owane Sitewi nomo maꞌe peri ta au teꞌe naneiye. Serai nomo teꞌe naneiyei pefine aꞌi heneraiyei ape, ninawesiya. Owane Sitewi lo teꞌe naneiyei ape pefine aꞌi henerai tepaꞌasiye su, piyene nomo yahowaꞌi ninawesiya awere? Lu taune werese etiri wisere aꞌi ereti lo se ani tepaꞌasiye su, lowe etiri wisere aꞌi ape mo, ninawerowata. 25 Wanure! Owane Sitewi lo teꞌe naneiyei nomo maꞌe au teꞌeye ape, nomo maꞌe henerai se taꞌame. Serai nomo Owane Sitewi lo peri teꞌe naneiyei ape eresene momotei aꞌi tei ninawenamisiya.

26 Aiwawe aꞌi Owane Sitewi lo Hepene Waraꞌi aꞌi le nomo maꞌe au pati ferafereinamisiya. Tahe paꞌare marepi nomo lo kairefi se taꞌame. Serai nomo Owane Sitewi maꞌe au teꞌeyei su, nomo piye peri werese soꞌoru taꞌama. Ahowa, Hepene Waraꞌi aꞌi lo Owane Sitewi Pefine maꞌe nomo ne le maꞌe au teꞌenamisiya. Nomo peri teꞌe tepaꞌasiye su, le marepi pefine aꞌi nomo lo Owane Sitewi maꞌe au teꞌesiya. 27 Owane Sitewi Pefine aꞌi lu taune werese lo marepi papu siye eti areiyesiya. Aiwawe aꞌi le Hepene Waraꞌi aꞌi lo, lo marepi soꞌoruwe tepaꞌasiye. Owane Sitewi lo Hepene Waraꞌi aꞌi lai Owane Sitewi lo marepi pefine se le maꞌe lu taune werese lo ape ne au teꞌesiya.^j

28 Nomo peri ape soꞌoruwesiya tene! Lu taune werese Owane Sitewi Pefine aꞌi maꞌe marepi erasi aꞌi tote wawesiyesiya ape, le lai etiri werese au ani fareraiyerowawe, serai etiri werese aꞌi lowe ne wisere pefine aꞌi henerairowa. Lu taune ape mo Owane Sitewi lai ariariyeyewe, le maꞌe ei aniye. Owane Sitewi lo marepi apou aꞌi totenamisiya.^k 29 Tu naifa weriyei weriyei Owane Sitewi etiri werese taꞌaneye ape henerai taꞌama su, le lu taune werese le ariariyeye ape, soꞌoruwe tepaꞌasiye. Nowe ape se tu naifa weriyei Owane Sitewi lai apou toteye, “Lu taune werese ano ariariye tepaꞌasiye ape, lowe meni eime ano wou aꞌi henerairowa.” Serai Jisas airu tutawe nomo lo henerairowa. Nomo werese paꞌise lo henerairowa.^l 30 Owane Sitewi lo marepi apou aꞌi totenamiteye, “Lu taune werese peri ano wanu umasinamirowa ape, lowe werese meni eimane wou aꞌi henerairowa. Sosu aiwawe aꞌi lu taune ape mo eimane ano wou henerairowa su, ane lowe ane maꞌe aiyeyei ne ei aniye. Sosu lu taune werese, ane ei aniye ape, nihe ano se lu taune aseyaro waraꞌi aꞌi henerairowa. Sosu lu taune werese nihe ano se aseyaro waraꞌi aꞌi heneraiyei ape, ane tahe paꞌare, marepi lowe maꞌe heꞌi aꞌi aurowa.”

31 Sosu aꞌi ape nomo piye peri fene maꞌe au teꞌesiya awere? Owane Sitewi lai nomo mase ironamisiya su, lu taune tereꞌe ape mo nomo maꞌe ai aturowata.^m 32 Owane Sitewi Pefine aꞌi marepi apou totenamisiya. “Meni eime ano lowe ne fofowei erasi aꞌi teritere! Ane le ne fofowei erasi ape einamirowata.” Le meni eime topo lo nomo werese ne au temeniyeyei ne eimawe arosai. Serai le nomo maꞌe etiri wisere tomu neꞌese aꞌi, sosu meni eime lo aiwawe aꞌi neri aꞌi aurowa. 33 Lu taune Owane Sitewi ariariyeye ape, eiwerai lowe maꞌe au fu teꞌeyei awere? Ahowa, owe meni ta lai lowe maꞌe au fu teꞌerowata. Owane Sitewi aꞌi lai lu taune werese lo aseyaro waraꞌi aꞌi au taꞌane henerairowa.ⁿ 34 Eiwerai Owane Sitewi lo eimane werese maꞌe apou teꞌerowa awere? “Fene yo seni luwaru aꞌi ironamisiya. Serai fene yehe omo maꞌe fu ire.” Ahowa, owe lu taune tamo. Peri apou ape owe ape teꞌere. Meni Krais Jisas lowe ne au temeniyeye. Aiwawe aꞌi Owane Sitewi lai le si tame taꞌane norohuwe sineye. Serai le aꞌi lai Owane Sitewi lo ereti eyate feni maꞌe onunamisiya. Mi mi weriyei weriyei le nomo ne Owane Sitewi maꞌe au ei towerinamisiya. 35 Krais Jisas nomo ne marepi erasi pefine aꞌi tote wawesiyenamisiya. Serai nomo le sahe natenamisiya. Eiwerai nomo Krais Jisas lo marepi tote wawesiyesiya ape, ani erau fiyarirowa awere? Ahowa, owe lu taune tamo Jisas mase tote nomo piye lu taune tamo lai ani lo natesiya ape erau fiyarirowata. Yo seni luwaru aꞌi ape mo lai nomo ani erau fiyarirowata. Fofowei erasi ape mo ani erau fiyarirowata. Lu tamo nomo maꞌe au luwaruweyei su, lowe nomo ani erau fiyarirowata. Nomo lau erasi aꞌi teriteyei su, nomo ipari tahe ariye aꞌi su, lu tamo tahe nomo lo ipari meneꞌe se tewiyeyei ne toteyei su, tahe nomo lo maꞌe me au se aineyei su, etiri werese ape mo Krais Jisas lo marepi tote wawesiyesiya ape, nomo ani erau fiyarirowata. 36 Nomo lu feni no ironamisiya su, Owane Sitewi lo one towe sahe meni ta tu naifa weriyei apou leseye, Lu tamo nowe werese nomo au luwaruwenamisiya. Nowe neꞌese lowe nomo aine teraꞌeyei ne totesiya. Lu taune tomu neꞌese nomo ne apou totesiya,

37 Ahowa, lu taune ape mo nomo maꞌe au luwaruweyei su, Krais lai nomo werese marepi erasi pefine aꞌi au atuatunamisiya. Serai etiri luwaru werese aꞌi lowe nomo maꞌe au irowei ape, nomo etiri luwaru werese ape mo erasi pefine aꞌi ani fu ararosiya. 38-39 Ei Wanure! Etiri werese werese Owane Sitewi lo marepi erasi pefine aꞌi nomo maꞌe ani erau fiyarisawirowata. Nomo temeniyeyei su, Owane Sitewi lai nomo maꞌe marepi erasi pefine aꞌi lo au atuatu fiyarinamirowa. Nomo marepi hepene norohuwe irosiya ape, nomo aiwawe aꞌi Owane Sitewi lo marepi tote wawesiyesiya ape sahe, ironamisiya. Owane Sitewi lo ipari wisere aꞌi, sosu aiwawe aꞌi Satan lo sepei luwaru aꞌi, lowe werese Owane Sitewi lo marepi tote wawesiyesiya ape, nomo ani erau fiyarirowata. Etiri werese pereye nowe eite se irosiya ape, etiri werese nowe meꞌiye henerairowa ape, etiri werese ape mo Owane Sitewi lo marepi tote wawesiyesiya ape, nomo maꞌe totesiya ape, ani erau fiyarirowata. Kairefiyei apou ape Owane Sitewi lo marepi tote wawesiyesiya ape, nomo maꞌe totesiya ape, ani erau fiyarirowata. Etiri werese niꞌarawe hire maꞌe irosiya ape, etiri werese awei unahi irosiya ape, lowe aiwawe aꞌi Owane Sitewi lo marepi tote wawesiyesiya ape, nomo maꞌe totesiya ape, ani erau fiyarirowata. Aiwawe aꞌi etiri werese werese omo pani werese irosiya ape, Owane Sitewi lo marepi erasi pefine aꞌi nomo maꞌe ani erau fiyarisawirowata. Nomo Meni Owane Jisas Krais ne tote tawesi umasinamisiya su, Owane Sitewi lo marepi tote wawesiyenamisiya ape, nomo mase mi mi pasi pasi weriyei ironamitorowa.