Pol lai Juda lo lu taune ne tote ewiteteye.
9
Ane lai Owane Jisas Krais papu ironamisiya. Serai ane fene maꞌe peri pefine aꞌi au teꞌesiya. Ane fene maꞌe peri wawero au teꞌe se taꞌame. Marepi ano pefine aꞌi totesiya. Owane Sitewi lo Hepene Waraꞌi aꞌi lai marepi toteyei werese ano soꞌoruwe tene! Le lu taune maꞌe apou au teꞌe areiyesiya, “Pol lo peri werese wiyeme pefine aꞌi tene!” 2 Peri pefine aꞌi apou wou aꞌi ne. Ane Juda lu taune werese ne marepi erasi aꞌi tote ewitesiya. Lowe tomu neꞌese lai Krais pefine meꞌiyeni maꞌe atati arunamiteye. Serai ane marepi orese erasi aꞌi lowe ne teritesiya. 3 Ane aꞌi lai Juda lo lu tewi ne. Ane lowe maꞌe au ferafereiyei ne totereme. Juda lo lu tewi ape mo Owane Sitewi lai lowe yehe omo maꞌe ani fu arosawirowa. Serai ane Owane Sitewi maꞌe apou ei towerisiya, “Ne faraꞌu Krais maꞌe nate tawesiyei ano ani eraure! Ne faraꞌu yaru ano niꞌarawe hire sahe ani pamowere. Yaro ano lowe maꞌe aurowa su, ane faraꞌu yehe omo maꞌe eimawesawirowa. Sosu Juda lo lu tewi werese omo hire maꞌe wirowa. Marepi ano wisereye nineꞌirowa.a 4 Lowe werese yaꞌariyei meni Israel lo lu tewi aꞌi ne. Tu naifa weriyei Owane Sitewi lai lowe eimane pefine lo fa henerai ne ariariyeye. Owane Sitewi lai lowe maꞌe marepi wisere pefine aꞌi lo au atuatu areiyeteye. Le nowe taꞌi taꞌi tamo se marepi taꞌi topo lo ape lowe maꞌe au teꞌeye. Le yo peri pefine lo Moses leseye ape, lowe maꞌe auwe. Le lowe maꞌe apou au atuatu areiyeteye, “Fene Owane Sitewi lo wesi tutawe sahe ane maꞌe au nineꞌi wisereyete. Le lowe maꞌe peri teꞌe naneiyei tomu neꞌese au teꞌeye.”b 5 Juda lo lu taune ape mo, lowe iyape erasi yaꞌariyei maꞌe fai. Aiwawe aꞌi Owane Jisas Krais lu tewi ape maꞌe fai. Krais lai lu taune werese lo Meni Owane Pefine aꞌi tene. Serai nomo Owane Sitewi Pefine maꞌe weriyei weriyei au nineꞌi wisereyenamitorowa.Owane Sitewi lai Juda lo lu taune maꞌe yo seni lo au atuatuteye.
6 Ahowa, Owane Sitewi lo peri teꞌe naneiyei pefine aꞌi lai lowe maꞌe winetai taꞌame. Ahowa, Owane Sitewi lo peri teꞌe naneiyei weriyei weriyei iro kairefiyenamitorowa. Israel lo lu tewi tamo, lowe yaꞌariyei Israel pefine wou aꞌi henerai taꞌame. 7 Lu tewi tamo apou teꞌeye, “Nomo yaꞌariyei Abraham lo lu tewi maꞌe fai. Serai nomo Owane Sitewi lo eimane pefine wou henerai.” Owane Sitewi meni Abraham maꞌe au teꞌe naneiye,
“Meni eime no ape, Aisak, aꞌi lai yaꞌariyei lu tewi no henerairowa.” Stt 21:12
8 Abraham lo lu tewi fisaꞌi lo se henerai ape, lowe werese Owane Sitewi lo eimane pefine taꞌama. Ahowa, Owane Sitewi lu tewi tamo meꞌiyeni maꞌe atati arunati.
Abraham lo lu tewi tamo, lowe Owane Sitewi lo teꞌe naneiyei ape umasinamiteye. Serai Abraham lo lu tewi ape lai Owane Sitewi lo eimane pefine henerairowa. Piyene awere? Peri teꞌe naneiyei ape, Owane Sitewi Abraham maꞌe au teꞌeye ape, lowe teꞌe naneiyei ape, tote tawesiteye.c 9 Owane Sitewi lo teꞌe naneiyei ape Abraham maꞌe apou au teꞌeye,
“Nowe ane ariariye ape se, ane si tame aiyerowa su, tani no, Sara, meni eime ta auteirowa.” Stt 18:14
10 Peri tereꞌe tamo apou teꞌesiya. Owane Sitewi lai marepi topo lo se meni ta au ariariyesiya. Nowe poweiye taꞌi ta se menitani ta iyape, Rebeka, eimane hesi auteiye. Eimane hesi ape tai lowesi lo taꞌi aꞌi iroteye. Meni ape lo iyape Aisak. Le yaꞌariyei sitewi nomo lo ne. 11-12 Nowe ape se eimane hesi mai lo lire papu iroteye su, Owane Sitewi lai Rebeka maꞌe apou eiye,
“Meni eime poto ate meni eime Pewe lo wiyawi tesi yahowaꞌi irorowa. Eimane toꞌuresi ape yo seni luwaru aꞌi iro taꞌame.”
Ahowa, Owane Sitewi lai peri ape Rebeka maꞌe au teꞌeye su, le apou toteye. Ane aꞌi lai marepi topo ano fu umasirowa. Ane meni taꞌi ariariyeye. Ane meni ape ariariyeye su, le yo seni waraꞌi aꞌi iro te taꞌame. Ahowa, ane marepi topo ano tote umasirowa.d 13 Tu naifa weriyei meni ta Owane Sitewi lo one towe sahe eimane hesi ape ne apou leseye,
“Ane meni Jekop ne marepi erasi aꞌi tote wawesiyenamisiya. Ahowa, ane meni Iso le maꞌe ai marepi totenamisiya.” Mal 1:2-3
14 Piye nomo teꞌesiya awere? Owane Sitewi meni Jakop ariariyeye. Sosu le meni Iso meꞌiyeni maꞌe atati arunati. Owane Sitewi lai yo seni luwaru aꞌi irowe awere? Piyete! Opiyai! Owane Sitewi lai wiyeme pefine aꞌi ne. 15 Owane Sitewi lai meni Moses maꞌe apou eiye,
“Ane marepi topo ano tote umasirowa. Meni ta ane ariariyeye ape, ane le maꞌe au ferafereirowa. Meni tereꞌe ta, ane le meꞌiyeni maꞌe atati tei aweraꞌiyenatirowa. Sosu ane meni tereꞌe ta siyeyei su, ane le ne ewiterowa. Meni tereꞌe ape ane faraꞌu tote iꞌanerowa.” Kis 33:19
16 Serai Owane Sitewi lai marepi topo lo tote umasirowa. Le meni ta au ferafereiyei ne ariariyerowa. Meni ta apou toteyei su, “Marepi ano aseyaro waraꞌi aꞌi ne. Owane Sitewi ane ne au ferafereite.” Ahowa, Owane Sitewi lai marepi topo lo meni ape ne umasirowa. Aiwawe aꞌi meni ta apou toteyei su, ane yo seni wisere waraꞌi aꞌi ironamiteye. Serai Owane Sitewi lai ane ne ferafereirowa.” Ahowa, Owane Sitewi lai marepi topo lo meni ape ne umasirowa. Owane Sitewi lai marepi topo lo aꞌi tote eti umasirowa.e 17 Ane fene maꞌe peri tereꞌe ta au teꞌesiya. Tu naifa weriyei Owane Sitewi lo one towe sahe Owane Sitewi lai meni Isip lo owane tutawe lo meni owane pefine aꞌi maꞌe apou eiye, “Ane ne awei lo meni owane pefine aꞌi fa heneraiyei ne ariariyeye. Ne awei lo meni owane heneraiyei su, ane etiri luwaru aꞌi tamo ne maꞌe irowei. Etiri ape mo henerairowa su, ane lu taune werese maꞌe kairefi erasi pefine aꞌi ano au atuatu areiyerowa. Lu taune werese omo werese sahe kairefi ano wanurowa su, lowe iyape ano omo werese werese maꞌe au teꞌe areiye fiyarirowa.”f 18 Owane Sitewi lai meni ta au ferafereirowa su, le meni ape ne au ferafereirowa. Aiwawe aꞌi le meni ta marepi tote kairefiyeyei ne irowei su, le meni ape marepi kairefi irorowa. 19 Meni ta, fene mase irosiya ape, ane maꞌe apou ei toweriyei, “Owane Sitewi lai etiri werese lu taune werese irowei ape au irosiya su, le piyene yo seni luwaru aꞌi nomo lo au hese ereisiya awere? Eiwerai marepi lo maꞌe faraꞌu ai atu tiyatirowa awere? Owe meni ta lai marepi lo ai aturowata.” 20 Ne peri ape owe ape ei towerire. Ne awei lo meni tene! Ne awei lo marepi wou totenamisiya. Lu taune werese Owane Sitewi Pefine aꞌi ne eiwerou ei towerirowata. Wanure! Owane Sitewi lai nomo werese au taꞌaneye. Serai nomo le maꞌe apou owe ape ei towerire, “Ne ane apou ape piyene taꞌaneye awere?”g 21 Meni ta paꞌare peperi awe taꞌaneyei ne toteyei su, le eiwerou taꞌaneyei awere? Le awei peperi se wapo aꞌi aniyewe, paꞌare awe erasi aꞌi faraꞌu taꞌanerowa. Le awei peperi tereꞌe ta aniyewe, le saꞌi aitaiyei paꞌare ta peperi se taꞌanerowa. Aiwawe aꞌi le faraꞌu paꞌare awe peperi tereꞌe mawiyei itu leseyei erasi se taꞌane anirowa. Apou aiwawe aꞌi Owane Sitewi faraꞌu marepi topo lo se umasirowawe, lu taune maꞌe eiwerou irorowa.h 22 Owane Sitewi lo yo seni waraꞌi aꞌi ironamisiya su, le faraꞌu marepi topo lo tote umasinamisiya. Sosu Owane Sitewi lai marepi topo lo se ai marepi lu taune maꞌe au atuaturowa su, sosu lowe maꞌe kairefi erasi aꞌi lo au atuaturowa su, le lai lu taune werese ne marepi eresene momotei erasi aꞌi ninaweteye. Lu taune ape mo le maꞌe ai marepi heneraiyei ne irowe ape, lowe temeniye poꞌuteyei ne au taꞌuweye. 23 Lu taune ape mo, Owane Sitewi lai ai marepi iroteye ape, le nowe pitase aꞌi onu ninawesiya. Piyene awere? Lu taune ape mo maꞌe, Owane Sitewi lowe maꞌe au ferafereiye ape le lowe maꞌe wisere erasi aꞌi topo lo au atuatuwei ne totesiya. Tu naifa weriyei le lai lu taune ape mo wisere erasi aꞌi lo au atuatuwei ne taꞌuwe naneiteye. 24 Owane Sitewi lai nomo taꞌi taꞌi tamo teꞌe ariariyeye Le Juda lo lu tewi tamo teꞌe ariariyeye. Aiwawe aꞌi le lu tewi tereꞌe tamo teꞌe ariariyeye. Nomo lu taune ape mo ne. 25 Tu naifa weriyei Owane Sitewi meni Hosea maꞌe apou eiye. Sosu le peri lo apou leseye.
“Ane fene maꞌe apou au teꞌerowa. Lu tewi tereꞌe ape mo lowe iyape ano umasi taꞌame ape, ane lowe ei anirowawe, serai lowe lu feni pefine aꞌi ano henerairowa. Lu tewi ape mo, ane marepi erasi aꞌi tote wawesiye taꞌame ape, ane lowe maꞌe marepi erasi aꞌi tote wawesiyenamitorowa.” Hos 2:23
26 Sosu lu tewi tereꞌe maꞌe apou teꞌeye,
“Fene lu tewi pefine aꞌi nomo lo taꞌama. Ahowa, nowe meꞌiye su, Owane Sitewi lai lowe maꞌe eiye, ꞌAne Owane Sitewi Pefine aꞌi mi mi pasi pasi ironamitorowa. Fene eimane pefine aꞌi ano henerirowa.’” Hos 1:10
27 Sosu meni Aisaia lai Israel lo lu tewi ape ne apou uteye,
“Fene lu taune tomu neꞌese irosiya. Fene saꞌi eneri aiwawe aꞌi ne. Ahowa, ane fene lu taune tewi oso poꞌo aꞌi yo seni luwaru aꞌi lowe lo au sasari pamowerowa, marepi hepene heꞌi aꞌi aurowa.
28 Ei, Owane Sitewi Pefine aꞌi le aꞌi lai lu taune omo werese maꞌe iroteye ape mo, le witane aꞌi lowe werese au hese ereirowawe, lowe maꞌe fofowei erasi pefine aꞌi aurowa.” Ais 10:22-23
29 Meni Aisaia peri tereꞌe apou teꞌeye,
“Owane Sitewi lai ai lu tomu neꞌese lo hi awei maꞌe eimawe arosairowa. Lowe yaꞌariyei lu tewi tomu neꞌese nomo lo aine teraꞌe ererowa. Ahowa, le yaꞌariyei tewi oso poꞌo aꞌi maꞌe au ferafereirowa. Serai lu tewi taꞌi taꞌi aꞌi norohuwe iroteye. Owane Sitewi lo ai lu tomu neꞌese aꞌi yaꞌariyei werese werese nomo lo aine teraꞌereme su, sosu lu tewi nomo lo poꞌutereme, nomo omo Sodom, omo Gomora lo lu taune aiwawe aꞌi ne. Owane Sitewi lai tu naifa weriyei omo weniyei hesi ape maꞌe yehe eimawe arosaiyewe, lu taune werese ti seroꞌo poꞌuteye.” Ais 1:9
Israel lo lu taune Owane Sitewi ne arisinamiteye.
30 Peri eti lo ape piye teꞌesiya awere? Peri lo eti ape apou teꞌesiya. Lu tewi tereꞌe ape mo Moses lo yo peri umasi taꞌame ape, lowe Owane Sitewi lo nihe se lu taune aseyaro aꞌi heneraiyei ne toteteye. Ahowa, lowe Krais ne tote tawesinamiteye su, Owane Sitewi lai lowe aseyaro waraꞌi aꞌi au taꞌaneye. 31 Ahowa, Israel lo lu tewi ape lowe Moses lo yo peri werese umasiyei ne toteteye. Lowe apou toteye, “Nomo Moses lo yo peri werese umasinamiyei su, sosu nomo Owane Sitewi lo nihe se aseyaro waraꞌi aꞌi henerairowa.” Ahowa, lowe aseyaro waraꞌi aꞌi henerairowata. Marepi lowe lo meremereye aꞌi ne. 32 Lowe Moses lo yo peri werese umasiyei ne toteteye su, lowe apou toteye, Owane Sitewi lo nihe se nomo waraꞌi aꞌi henerai. Ahowa, serai lowe Owane Sitewi ne tote tawesi te taꞌame. Sosu Owane Sitewi lo nihe se lowe yo seni luwaru aꞌi ironamiteye. Owane Sitewi lai tapiye pefine aꞌi, yo mai lowe lo uweisiya ape, maꞌe fuwe. Tapiye pefine ape Jisas wou aꞌi ne. Lowe Jisas ne tote tawesi taꞌame su, lu tewi ape mo lowe tapiye ape lowe lowe lo tapiye ape sahe atu tipateriteyewe, winetai ereteye.i 33 Owane Sitewi lo one towe sahe apou leseye,
“Ane tapiye ta omo Saion sahe au fuwe. Lu taune tomu neꞌese tapiye ape sahe lowe lowe lo tewiyeyewe, winetai erenamisiya. Tapiye ape lai lu taune ape mo atu tipaterisiyawe, winetai eresiya. Sosu aiwawe aꞌi lu taune tamo tapiye ape ne tote tawesi umasinamitorowa su, lowe marepi neritaseyerowata.” Ais 28:16