Israel lo lu tewi Krais ne meꞌiyeni maꞌe atati arunati.
10
Kaiyemo, etiri tutawe marepi ano totenamisiya ape apou aꞌi ne. Juda lo lu taune werese Owane Sitewi maꞌe si fa aiye ne. Serai lowe Owane Sitewi lo nihe se yo seni lowe lo aseyaro waraꞌi aꞌi fa henerai ne. Ane Owane Sitewi maꞌe etiri ape ne au teꞌe ei towerinamisiya. 2 Ane lowe ne peri ta apou au teꞌesiya, “Lowe Owane Sitewi Pefine aꞌi lo wiyawi werese au taꞌane tohoteye. Ahowa, marepi lowe lo Owane Sitewi ne tote haꞌatinatiteye.” 3 Owane Sitewi lai yo taꞌi aꞌi ariariyeye. Serai lu taune werese nihe lo se lu taune aseyaro waraꞌi aꞌi henerairowa. Juda lo lu tewi ape yo ape mo soꞌoru taꞌama. Serai lowe Owane Sitewi lo nihe se lu taune aseyaro waraꞌi aꞌi heneraiyei ne toteye su, lowe marepi towafi lowe lo umasinamiteye. Lowe Owane Sitewi lo yo seni pefine aꞌi meꞌiyeni maꞌe atati aruwewe, Owane Sitewi lo yo seni waraꞌi aꞌi aweraꞌiyenati. Sosu lowe werese Owane Sitewi lo nihe se yo seni luwaru aꞌi ironamiteye. 4 Meni ape, Owane Sitewi lai hi awei maꞌe eimawe arosai ape, le Moses lo yo peri poꞌutenamiye. Serai lu taune werese meni ape ne tote tawesiyei su, lowe Owane Sitewi lo nihe se lu taune waraꞌi aꞌi ironamitorowa.5 Tu naifa weriyei Moses yo seni aseyaro aꞌi ne, apou leseye, “Fene Owane Sitewi lo yo peri tote umasiyei su, fene yo seni aseyaro heneraiyei. Serai le apou leseye, ꞌOwane Sitewi lo yo peri ane fene maꞌe auwe ape, fene yo peri ape umasiyei su, fene marepi hepene heꞌi aꞌi weriyei weriyei ironamitorowa. Owane Sitewi lo yo peri ape fene maꞌe marepi hepene heꞌi aꞌi aurowa.’”a 6 Ahowa, Owane Sitewi lai one towe sahe peri ta apou lesesiya, “Fene Owane Sitewi ne tote tawesiyei su, Owane Sitewi lo nihe se fene lu taune aseyaro waraꞌi ironamitorowa. Serai fene marepi fene lo sahe apou owe ape totere, ‘Eiwerai Owane Sitewi lo omo hire maꞌe wiyei awere?’”bc 7 Sosu aiwawe aꞌi fene apou owe ape teꞌere. “Eiwerai fisiye yo papu hi itorirowa awere?” Peri eti lo ape apou aꞌi ne. “Eiwerai fisiye yo papu itorirowa awere? Eiwerai meni Krais si taꞌane norohuwe sinerowawe, hene wirairowa awere?”d 8 Owane Sitewi lo one towe sahe apou leseye,
“Owane Sitewi lo peri pefine aꞌi fene maꞌe atahe aꞌi ironamisiya. Peri pefine ape ahi fene lo papu irosiya. Aiwawe aꞌi Owane Sitewi lo peri pefine aꞌi marepi fene lo papu ironamisiya.” Lo 30:14
Owane Sitewi lo peri pefine aꞌi ape ne nomo fene maꞌe au teꞌe areiyenamisiya. Owane Sitewi lo peri pefine ape apou ape lu taune werese Krais ne tote tawesinamisiya. 9 Nomo peri pefine aꞌi apou au teꞌesiya, “Fene peri ahi fene lo se apou teꞌesiya su, ꞌMeni Jisas, le meni owane pefine ano ne.’” Sosu aiwawe aꞌi fene marepi fene lo papu apou tote tawesinamisiya su, “Owane Sitewi lai meni Jisas, temeniyeye ape, si tame taꞌane norohuwe sineye.” Serai fene marepi hepene heꞌi aꞌi weriyei weriyei ironamitorowa. 10 Nomo le ne marepi papu tote tawesisiya. Serai Owane Sitewi lo nihe se nomo lu taune aseyaro waraꞌi aꞌi ironamitorowa. Sosu nomo peri ahi nomo lo se apou teꞌeyei su, “Nomo meni owane Jisas ne tote tawesinamisiya.” Serai Owane Sitewi lo ferafereiyei nomo maꞌe ironamirowawe, nomo marepi hepene heꞌi aꞌi weriyei weriyei ironamitorowa. 11 Owane Sitewi lo one towe sahe apou leseye.
“Lu taune werese meni ape ne tote tawesi umasinamirowa su, lowe marepi orese aꞌi teriterowata.” Ais 28:16
12 Peri ape Owane Sitewi nomo maꞌe au teꞌeye ape apou teꞌesiya, “Lu taune werese.” Peri ape wiyeme aꞌi tene! Le Juda lo lu taune maꞌe au teꞌe areiyeye. Sosu aiwawe aꞌi le lu tewi tereꞌe tereꞌe maꞌe au teꞌesiya. Meni Owane Pefine aꞌi ape, le lu taune werese lo Meni Owane Pefine aꞌi tene! Lu taune werese le ne tote tawesi umasinamisiya ape, le lowe maꞌe etiri tomu neꞌese wisere aꞌi aurowa.e 13 Owane Sitewi lo one towe sahe apou leseye,
“Lu taune werese lai Meni Owane Pefine aꞌi maꞌe ferafereiyei lo ne teꞌe towerirowa su, Owane Sitewi lai lowe maꞌe au ferafereirowawe, sosu marepi hepene heꞌi aꞌi weriyei weriyei aurowa.” Jol 2:32
14 Meni ta Krais ne marepi tote tawesi taꞌame ape, le piyene Owane Sitewi maꞌe ferafereiyei ne ei towerisiya awere? Le Owane Sitewi lo peri wanu taꞌame su, sosu le Krais ne wanu tote tawesirowata. Aiwawe aꞌi meni ta Owane Sitewi lo peri au teꞌe fiyari areiye taꞌame su, sosu lu taune werese Owane Sitewi lo peri wanu umasirowata. 15 Meni ta Owane Sitewi lo peri au teꞌe areiye fiyarirowa su, Owane Sitewi lai meni ape peri pefine aꞌi lo fa au teꞌe areiye ne eimawerowa. Wanure! Owane Sitewi lo one towe sahe apou leseye,
“Meni ape lai Owane Sitewi lo peri heneruwe wisere aꞌi au teꞌe fiyarisiya ape, meni ape meni wisere aꞌi tene!” Ais 52:7
16 Ahowa, Juda lo lu taune tomu neꞌese lowe Owane Sitewi lo peri heneruwe wisere aꞌi ape wanu tote tawesi taꞌame. Meni ape Aisaia Owane Sitewi lo one towe sahe apou leseye, “Meni Owane Pefine, peri no ape ne, eiwerai wanu tote tawesi umasiteye awere?”f 17 Serai nomo Owane Sitewi lo peri heneruwe wisere aꞌi ape wanurowa su, nomo faraꞌu Owane Sitewi ne tote tawesi umasirowa. Sosu meni ta Owane Sitewi lo peri heneruwe wisere aꞌi au teꞌe fiyarirowa su, lu taune Krais ne peri wanu areiyerowa. 18 Ahowa, ane fene maꞌe ei towerisiya. Israel lo lu taune werese lowe Owane Sitewi lo peri heneruwe wisere aꞌi wanu aniteye awere? Ei. Lowe werese Owane Sitewi lo peri wanu tepaꞌasiye. Owane Sitewi lo one towe sahe apou teꞌesiya.
“Owane Sitewi lo peri heneruwe wisere aꞌi lu taune werese maꞌe au teꞌe areiye fiyariteye. Lowe Owane Sitewi lo peri werese omo omo werese maꞌe au teꞌe areiye fiyariteye.” Sng 19:4
19 Ane fene maꞌe peri tereꞌe ei towerisiya. Israel lo lu taune werese lowe Owane Sitewi lo peri heneruwe wisere aꞌi wanu soꞌoruwe awere? Ei. Lowe Owane Sitewi lo peri heneruwe wisere aꞌi wanu soꞌoruwe tepaꞌasiye. Peri tutawe wanure. Moses Owane Sitewi lo peri apou teꞌeye,
“Ane peri ano lu tewi tereꞌe iyape taꞌame ape mo maꞌe aurowa. Serai etiri fene siyerowa ape, fene marepi luwaru aꞌi teriterowa. Aiwawe aꞌi ane lu tewi tereꞌe soꞌoruwe yahowaꞌi taꞌame ape mo maꞌe, peri ano aurowa. Serai fene lowe siyerowa su, fene ai marepi erasi aꞌi toterowa.” Lo 32:21
20 Nowe meꞌiye su, meni Aisaia marepi kairefi aꞌi se lu tewi tereꞌe ne apou au teꞌeye,
“Owane Sitewi apou eiye, ꞌLu taune ape mo ane siye nehi taꞌame ape, lowe ane siye areiyeye. Lu taune tamo ane teꞌe ne teꞌe toweri taꞌame ape, ane lowe maꞌe yaru amerame aꞌi henerai.’” Ais 65:1
21 Ahowa, meni Aisaia Owane Sitewi lo peri Israel lo lu tewi ape ne apou leseye.
“Fene peri ano arisinamiteye.
Sosu marepi fene lo luwaru kairefi aꞌi iroteye. Mi mi weriyei, ane fene ne ninawenamiteye. Ahowa, fene werese ane meꞌiyeni maꞌe atati arunatinamiteye.” Ais 65:2