Owane Sitewi lai lu taune werese maꞌe au ferafereisiya.
11
Serai ane fene maꞌe peri ta ei towerisiya. Owane Sitewi pefine aꞌi lai Israel lo lu tewi ape mo lo meꞌiyeni maꞌe atati aruwe awere? Ahowa, ane aꞌi lai Israel lo lu tewi maꞌe fai. Ane yaꞌariyei sitewi Abraham lo lu tewi maꞌe fai. Niyene ano iyape Benjamin. Ane lu tewi niyene ape maꞌe fai. Sosu Owane Sitewi lai ane meꞌiyeni maꞌe atati arunati taꞌame.a 2 Tu naifa weriyei Israel lo lu tewi henerai taꞌama su, Owane Sitewi lai lowe werese lu feni lo heneriyei ne ariariyeye. Aiwawe aꞌi Owane Sitewi lai lu feni lo arunati taꞌame. Fene Owane Sitewi lo peri wanu soꞌoruwe tepaꞌasiye. Owane Sitewi lo one towe sahe meni Elaija ne teꞌeye. Le Owane Sitewi maꞌe Israel lo lu taune ne apou ei toweriye, “Owane Sitewi, Israel lo lu tewi no lowe lai peri no arisinamisiya. Serai ne yo seni luwaru aꞌi lowe lo au hese ereire.” Israel lo lu tewi werese meni Elaija maꞌe ai marepi toteteye. Serai meni Elaija apou eiye, 3 “Meni Owane, lowe lu werese peri no au teꞌe areiyeteye ape aine teraꞌe ereteye. Lowe tapiye wari yaru fe sipsip ne maꞌe au heseteye ape, aine tapeti fiyarisawi. Ane aꞌi lai peri no au teꞌe siye meni taꞌi aꞌi norohuwe aꞌi se irosiya. Wanure! Lowe ane aiwawe aꞌi aine teraꞌeyei ne totesiya.”b 4 Ahowa, Owane Sitewi piye peri ta itiyaꞌu eiye awere? Owane Sitewi le maꞌe apou eiye, “Ahowa, ne taꞌi aꞌi taꞌame. Ane Israel lo lu taune tomu neꞌese aꞌi (7,000) awei sahe au ferafereisiya. Lowe god wawero ta iyape Bal maꞌe lowe uporo apeꞌi onu se taꞌame.”c 5 Nowe pereye eite se aiwawe aꞌi ne. Owane Sitewi lai lu taune tewi taꞌi taꞌi aꞌi ape mo ne ariariye ferafereisiya. 6 Serai Owane Sitewi lu taune tewi ape mo ariariye ferafereiye su, le lowe maꞌe marepi hepene heꞌi aꞌi weriyei weriyei iroteyei ape, neri aꞌi aurowa. Lowe marepi towafi lowe lo apou totesiya su, “Nomo wiyawi tomu neꞌese wisere aꞌi taꞌaneteyei su, serai nomo Owane Sitewi lo nihe se lu taune waraꞌi aꞌi henerairowa. Lowe wiyawi tamo taꞌaneteyei su, serai marepi hepene heꞌi aꞌi Owane Sitewi lowe maꞌe auwei ape, neri aꞌi aurowata.d7 Serai Owane Sitewi lai piye ta irowe awere? Wanure! Israel lo lu taune werese Moses lo yo peri umasiyei ne toteteye. Lowe Owane Sitewi lo nihe se marepi waraꞌi aꞌi heneraiyei ne toteteye. Ahowa, lowe yo areareyei aꞌi umasinamiteye. Lowe Owane Sitewi lo nihe se waraꞌi aꞌi henerai taꞌama. Owane Sitewi lai lu taune taꞌi taꞌi aꞌi Israel lo lu tewi maꞌe fai ape, ariariyeye. Lowe aꞌi lai Owane Sitewi lo nihe se waraꞌi aꞌi iroteye. Israel lo lu taune tereꞌe werese ne Owane Sitewi ariariye taꞌame ape, Owane Sitewi lai marepi kairefi luwaru aꞌi lowe lo maꞌe au iroteye. Serai lowe Owane Sitewi lo peri werese wanu arisinamiteye. 8 Owane Sitewi lo one towe sahe apou teꞌe areiyeye,
“Owane Sitewi lai lowe maꞌe marepi au taꞌane meremereyeye. Serai lowe Owane Sitewi lo peri pefine aꞌi lo sitewi siye soꞌoruwerowata. Owane Sitewi lai nihe lowe lo au ani nisoꞌuwe tawesiye. Serai lowe Owane Sitewi lo etiri wisere aꞌi siyerowata. Aiwawe aꞌi Owane Sitewi lai apaniye lowe lo au taꞌane wiyapuwe tawesiye. Serai lowe Owane Sitewi lo peri wanurowata. Nowe pereye eite se lu tewi ape mo aiwawe aꞌi irosiya.” Lo 29:4; Ais 29:10
9 Yaꞌariyei meni owane Devit apou teꞌe leseye,
“Lu tewi ape mo taꞌuwe hereiyei lowe lo au taꞌane irowei su, taꞌuwe hereiyei ape fe laꞌinau wou aꞌi ne. Taꞌuwe hereiyei ape lowe werese maꞌe au luwaruwerowa. Taꞌuwe hereiyei lowe lo lai lowe maꞌe yo seni luwaru aꞌi irowei ne henetirowa. Serai Owane Sitewi lai yo seni luwaru aꞌi lowe lo au hese ereirowawe, lowe maꞌe fofowei erasi aurowa. Sng 69:22
10 “Owane Sitewi lai nihe lowe lo au ani nisoꞌuwe tawesirowa. Serai lowe Owane Sitewi lo marepi wisere aꞌi siyerowata. Le lowe wiyawi lu taune yahowaꞌi heneraiyei ne irorowa. Serai lowe meꞌiyeni lowe lo sahe fofowei erasi teriterowawe, lowe weriyei weriyei aiwawe aꞌi ironamitorowa.” Sng 69:23
Owane Sitewi lai lu tewi tereꞌe Jisas maꞌe au nate tawesirowa.
11 Serai ane fene maꞌe apou ei towerisiya, “Israel lo lu tewi ape mo Owane Sitewi lo nihe se winetaiye su, Owane Sitewi lai lu tewi ape mo aine tapo poꞌuteye awere? Piyete! Lowe Owane Sitewi lo nihe se winetaiye su, Owane Sitewi lai lu tewi tereꞌe werese peri lo au teꞌeye. Serai lu tewi tereꞌe ape mo Owane Sitewi lo peri wanuwe su, Owane Sitewi lowe maꞌe au ferafereiye. Sosu lowe marepi hepene norohuwe aꞌi mi mi pasi pasi weriyei ironamitorowa. Owane Sitewi lai wiyawi ape taꞌaneye su, le Israel lo lu tewi werese etiri werese, Owane Sitewi lu tewi tereꞌe auwe ape, siyeyei ne iroteye.e 12 Serai Israel lo lu tewi werese Owane Sitewi meꞌiyeni maꞌe atati aruwe su, Owane Sitewi lai lu taune omo werese sahe marepi wisere aꞌi lo auteye. Etiri wisere werese aꞌi Israel lo lu tewi aweraꞌiyenati ape, Owane Sitewi lai etiri wisere ape mo lo lu tewi tereꞌe maꞌe auwe. Serai Israel lo lu tewi werese Owane Sitewi maꞌe si tame tote umasiyei su, le lowe werese maꞌe etiri wisere erasi aꞌi aurowa. 13 Sosu aꞌi ape lu taune lu tewi tereꞌe maꞌe fai ape, ane fene maꞌe apou teꞌesiya. Owane Sitewi lai ane lu tewi tereꞌe maꞌe eimawesawiyei ne ariariyeye. Serai Owane Sitewi lo wiyawi ane maꞌe auwe ape, wiyawi ape erasi aꞌi taꞌanerowa. 14 Ane marepi apou totesiya, ane lu tewi tereꞌe maꞌe wiyawi taꞌaneyei su, Israel lo lu tewi lai etiri werese, Owane Sitewi lu tewi tereꞌe maꞌe auwe ape, siye wisereyerai. Lowe apou toteyei. Piyene le lu tewi tereꞌe maꞌe wiyawi ape taꞌanesiya awere? Le nomo sahe wiyawi ape au taꞌanete.” Israel lo lu tewi ape marepi aiwawe aꞌi toteyei su, lu taune tewi aꞌi Krais ne tote tawesi umasirowa. Serai Owane Sitewi lowe maꞌe ferafereirowawe, marepi hepene heꞌi aꞌi aurowa. 15 Owane Sitewi lai Israel lo lu tewi meꞌiyeni maꞌe atati aruwe. Sosu Owane Sitewi lowe meꞌiyeni maꞌe atati aruwe su, le lu tewi tereꞌe tereꞌe kaiyemo pefine aꞌi heneraiyei ne irowe. Serai Israel lo lu tewi Krais ne tote tawesiyei su, Owane Sitewi lowe si tame taꞌane norohuwe sinerowawe, marepi hepene heꞌi aꞌi weriyei weriyei aurowa. 16 Fene ene nau tewi aꞌi Owane Sitewi maꞌe au hese ereiyei su, fene nau aseyaro aꞌi wahu papu aro fuwei. Ene towei su, ene nau werese aiwawe aꞌi aseyaro aꞌi henerairowa. Aiwawe aꞌi me napi aseyaro waraꞌi aꞌi iroteye su, me nei werese aiwawe aꞌi aseyaro waraꞌi aꞌi iroteye.
17 Sosu Owane Sitewi lai me oliv nei feni tamo ani towesi ani ereye. Sosu ipo me oliv lo nei lapu sahe nate tawesiyei su, ipo me oliv nei me oliv pefine lo fito tore anirowa. Serai me nei heꞌi ape kairefi aꞌi ironamirowa. Lu tewi tereꞌe fene ipo me oliv nei wou aꞌi ne. Fene Owane Sitewi Pefine sahe nateri su, fene Owane Sitewi lo wisereyeyei erasi aniye.f 18 Serai me nei ape mo Owane Sitewi lai aine tou ani erateye ape, fene lowe maꞌe owe ape teꞌe narute. Fene lowe ne teꞌe naruwei su, fene marepi ape totere. Fene hepene norohuwe ape, Owane Sitewi maꞌe aurowata. Ahowa, Owane Sitewi lai hepene norohuwe aꞌi fene maꞌe aunamisiya. Serai fene Israel lo lu tewi ape mo maꞌe owe ape teꞌe narute. 19 Fene peri ta apou teꞌeteye, “Owane Sitewi lai Israel lo lu tewi tamo aine tou sasarisawi. Sosu nomo Owane Sitewi sahe nate tawesirai.” 20 Ei. Peri ape wiyeme pefine aꞌi ne. Juda lo lu tewi ape, lowe Owane Sitewi ne tote tawesi taꞌame. Lowe Owane Sitewi meꞌiyeni maꞌe atati aruwe. Serai Owane Sitewi lai lowe aine tou sasarinamiye. Ahowa, fene le ne tote tawesinamisiya. Fene marepi luwaru aꞌi lowe owe ape totete. Serai fene atoweiye erasi Owane Sitewi ne aꞌi maꞌe atoweiyete. 21 Ei. Le lu tewi pefine lo ape aine towesi ereye su, le fene aiwawe aꞌi faraꞌu aine tou sasarisawirowa. Fene Owane Sitewi ne tote tawesi taꞌame su, le faraꞌu aꞌi fene ani sasarisawirowa.
22 Owane Sitewi ate yo seni hesi aꞌi irosiya. Yo seni ta marepi wisere aꞌi lu taune maꞌe au ferafereirowa. Yo seni tereꞌe ta marepi kairefi aꞌi lu taune maꞌe winetai ape henerairowa. Israel lo lu taune winetai su, Owane Sitewi lai witane aꞌi yo seni luwaru aꞌi lowe lo ape au hese ereiye. Aiwawe aꞌi lu tewi tereꞌe, fene le ne tote tawesinamiye su, Owane Sitewi lai fene maꞌe au ferafereiye. Ahowa, fene ferafereiyei lo ani taꞌame su, Owane Sitewi lai fene aine tou eraterowa.g 23 Sosu Juda lo lu taune Owane Sitewi maꞌe si tame aiyerowawe, Owane Sitewi ne si tame tote tawesinamiyei su, Owane Sitewi lai lowe maꞌe si tame au ferafereirowa. Owane Sitewi lai lowe yaru towafi lowe lo tu iroteye ape sahe, si tame nate tawesirairowa. 24 Fene soꞌoruwesiye tene! Fene tu naifa ipo me oliv wou iroteye. Owane Sitewi lai fene aine touwewe, me wisere aꞌi lo lapu sahe si nate tawesiyei su, yo seni ape lu taune, yo seni ape le irowe ape, tote taꞌame. Ahowa, Owane Sitewi lai fene le mase nate tawesiyei su, fene marepi hepene heꞌi aꞌi anirowa. Israel lo lu tewi, lowe me wisere aꞌi lo nei wou aꞌi tene. Serai Owane Sitewi lai lowe me wisere aꞌi sahe si tame nate tawesirowa su, lowe kairefi aꞌi teinamirowa.
Owane Sitewi lai Israel lo lu taune werese au ferafereirowa.
25 Kaiyemo mo lu feni ano, Owane Sitewi lo peri pefine aꞌi fareyareteye ape, ane fene maꞌe au teꞌe areiyesiya. Fene wanure! Fene peri pefine aꞌi ape apou toteyei su, “Nomo peri pefine ape mo soꞌoruwesiya tene!” Fene apou owe ape totete! Fene Owane Sitewi lo peri werese ape soꞌoru taꞌama. Owane Sitewi lo peri pefine aꞌi apou teꞌesiya, Israel lo lu tewi tamo lowe marepi kairefi luwaru aꞌi totenamisiya. Serai moꞌo Owane Sitewi lai lu tewi tereꞌe werese, le ariariyeye ape, le mase nate tawesi tepaꞌasiyei su, sosu Israel lo lu tewi ape mo Owane Sitewi maꞌe si tame aiyerowa. 26 Serai Israel lo lu tewi werese lai Owane Sitewi maꞌe si tame aiyerowawe, le mase nate tawesirowa su, Owane Sitewi lai lowe werese maꞌe marepi hepene heꞌi aꞌi aurowa. Owane Sitewi lo peri pefine aꞌi one towe sahe apou leseye,
“Meni ape Owane Sitewi lai hi awei maꞌe au ferafereiyei ne eimawe arosaiyei ape, le omo Jerusalem maꞌe fai. Lu tewi ape mo le maꞌe aiyerowa su, le yaꞌariyei meni Jekop lo lu tewi werese le meꞌiyeni maꞌe atati arunatiyei lowe lo ape au sasari arosawirowa.
27 Ane tu naifa weriyei lu tewi ape mo peri ta au teꞌe naneiye. Serai ane yo seni luwaru aꞌi lowe lo au ani sasarisawirowa su, teꞌe naneiyei ape wiyeme aꞌi henerairowa.” Ais 59:20-21
28 Israel lo lu tewi werese ape mo, lowe Owane Sitewi lo peri heneruwe wisere aꞌi meꞌiyeni maꞌe atati arunamiteye. Serai lowe Owane Sitewi lo airame lu ironamiteye. Israel lo lu tewi Owane Sitewi lo airame lu iroteye su, Owane Sitewi lai lu tewi ape mo meꞌiyeni maꞌe atati aruwewe, fene maꞌe au ferafereiye. Wanure! Israel lo lu tewi ape mo Owane Sitewi lai ariariyeye ape, le lowe ne marepi erasi aꞌi tote wawesiyenamisiya. Tu naifa weriyei le yaꞌariyei ape mo lowe lo maꞌe peri ta au teꞌe naneiye. Serai le peri ta au teꞌe naneiyei su, le lai peri ape au taꞌanerowa. 29 Tu naifa weriyei Owane Sitewi lai Israel lo lu tewi ape mo ariariyeye. Le lowe maꞌe etiri tomu neꞌese auteye. Serai le lowe ne marepi topo lo atati toterowata. 30 Fene aiwawe aꞌi. Tu naifa fene Owane Sitewi lo peri meꞌiyeni maꞌe atati arunati. Ahowa, Israel lo lu tewi ape Owane Sitewi lo peri arisinamiteye su, Owane Sitewi fene maꞌe au ferafereinamiteye. 31 Serai Israel lo lu tewi ape lai Owane Sitewi lo peri arisinamisiya. Nowe meꞌiye su, lowe Owane Sitewi lo ferafereiyei, le fene maꞌe auwe ape, siyerowa su, lowe Owane Sitewi maꞌe si tame atati aiyerowa. Sosu Owane Sitewi lai lowe maꞌe au ferafereirowa. 32 Lu taune werese omo pani werese sahe iroteye ape mo, lowe Owane Sitewi lo peri arisinamiteye. Sosu Owane Sitewi lai lowe werese yo seni luwaru aꞌi ironamiteye ape, arunamiteye. Serai lowe yo seni luwaru aꞌi ironamiteye su, Owane Sitewi lai lu taune werese maꞌe faraꞌu au ferafereirowa.
Fene Owane Sitewi maꞌe peri au teꞌe wisereye nineꞌite.
33 Ei, Owane Sitewi lo etiri werese ne, etiri ape mo erasi pefine aꞌi tene! Owane Sitewi lo marepi wisere aꞌi poꞌuterowata. Owane Sitewi lai etiri werese werese siye soꞌoruwe tepaꞌasiye. Lu taune werese lai Owane Sitewi lo marepi sitewi siye soꞌoruwerowata. Lowe werese Owane Sitewi lo yo seni waraꞌi siye soꞌoruwerowata. Ais 55:8-9
34 Owane Sitewi lai one towe sahe apou leseye,
“Eiwerai Owane Sitewi lo marepi siye soꞌoruwesiya awere? Eiwerai Owane Sitewi maꞌe marepi wisere aꞌi ta au teꞌe areiyesiya awere? Wanure! Owe lu taune tamo Owane Sitewi maꞌe marepi wisere aꞌi ta au teꞌerowata. Ais 40:13
35 Lu taune werese lai etiri ta Owane Sitewi maꞌe neri aꞌi aunami taꞌame. Ahowa, meni ta Owane Sitewi maꞌe etiri ta auwei ne toteyei su, Owane Sitewi lai le maꞌe etiri ta si itiyaꞌu au taꞌame.” Le lu taune maꞌe etiri werese au tepaꞌasiye. Jop 41:11
36 Ei. Owane Sitewi lai etiri werese taꞌaneye. Etiri werese le taꞌaneye ape, lowe werese mi mi pasi pasi ironamitorowa. Etiri werese ape mo Owane Sitewi pefine aꞌi topo lo ne. Serai nomo werese le ne au teꞌe nineꞌi wisereyenamite. Wiyeme pefine aꞌi tene!