Fene tahe paꞌare fene lo Owane Sitewi maꞌe au hesere.
12
Serai kaiyemo lu feni ano, Owane Sitewi lai fene maꞌe erasi pefine aꞌi au ferafereinamiteye su, ane fene maꞌe ei towerisiya. Fene tahe paꞌare towafi fene lo Owane Sitewi taꞌi pefine aꞌi maꞌe aunamite. Apou wou aꞌi tahe paꞌare hepene se Owane Sitewi maꞌe au hesere! Owane Sitewi lai tahe paꞌare fene le maꞌe au heseye ape, siyeye su, nihe lo se yo seni fene lo wisere aꞌi tene. Fene tahe paꞌare fene lo Owane Sitewi maꞌe au heseyei su, fene le ne pefine aꞌi au nineꞌi wisereyerowa.a 2 Fene awei lo yo seni lo marepi owe ape atati tote umasite. Ahowa, fene marepi heꞌi aꞌi ape atati tote umasinamite. Fene marepi heꞌi aꞌi ape atati tote umasiyei su, fene faraꞌu Owane Sitewi lo marepi siye soꞌoruwerowa. Fene marepi lo wisere aꞌi siye soꞌoruwerowa. Sosu fene etiri werese Owane Sitewi lai nineꞌisiya ape, siye soꞌoruwerowa. Fene yo seni wisere pefine aꞌi siye soꞌoruwe umasinamite. 3 Owane Sitewi lai ane maꞌe wiyawi erasi pefine aꞌi neri aꞌi auwe. Le kairefi ta lu taune werese maꞌe au teꞌe areiyeyei ne auwe. Serai ane fene maꞌe eisiya, iyape fene lo aꞌi owe ape ei ani arowete. Fene yo seni towafi fene lo au hese ereire. Owane Sitewi lai tote tawesiyei erasi aꞌi lu taune tamo maꞌe auwe. Sosu aiwawe aꞌi le lai tote tawesiyei oso aꞌi lu taune tamo auwe. Serai fene yo seni fene lo tote tawesiyei. Owane Sitewi fene maꞌe auwe ape se, au hese ereite.b 4 Nomo werese taꞌi taꞌi aꞌi tahe paꞌare irosiya. Tahe paꞌare nomo lo tewi aiwawe aꞌi tereꞌe tereꞌe irosiya. Tahe paꞌare tewi tereꞌe lai wiyawi tereꞌe taꞌi taꞌi taꞌanesiya. 5 Sosu aiwawe aꞌi nomo werese lu taune taꞌi taꞌi aꞌi irosiya. Serai nomo Krais mase nateye su, nomo tahe paꞌare taꞌi lo wou aꞌi henerai. Nomo tahe paꞌare lo tewi tereꞌe tereꞌe irosiya. Sosu aiwawe aꞌi nomo tahe paꞌare tewi tereꞌe tereꞌe irosiya su, etiri tewi tereꞌe tereꞌe tahe paꞌare nati tawesisiya. Apou wou aꞌi nomo Krais mase tahe paꞌare taꞌi aꞌi lo irosiya. Ahowa, nomo lu taune tereꞌe se tiyati nate tawesisiya.c 6 Owane Sitewi lai nomo maꞌe au ferafereiye. Serai le nomo werese taꞌi taꞌi maꞌe kairefi tereꞌe tereꞌe tamo neri aꞌi auwe. Fene peri pefine lo, lu taune maꞌe au teꞌeyei ape, totere! Owane Sitewi lai fene maꞌe wiyawi apou ape auwei su, fene tote tawesiyei towafi fene lo se lu taune maꞌe fa au teꞌe areiyete! 7 Owane Sitewi lai meni ta maꞌe wiyawi ta lu taune au ferafereiyei ne auwei su, meni ape tote tawesiyei lo se wiyawi ape fa au taꞌanete! Aiwawe aꞌi Owane Sitewi lai meni ta peri lo au teꞌe atuatuwei ne auwei su, meni ape tote tawesiyei topo lo lu taune tiyati maꞌe fa au teꞌe atuatunamite. 8 Owane Sitewi lai meni ta peri wisere fetane aꞌi lu taune maꞌe au teꞌeyei ne auwei su, meni ape lu taune marepi orese aꞌi iroteye ape, fa au teꞌe wirepuwete. Fene maꞌaru lu taune tereꞌe maꞌe auwei ne totere! Owane Sitewi lai meni ta wiyawi apou ape auwei su, meni ape maꞌaru tomu neꞌese aꞌi lowe maꞌe fa aure! Owane Sitewi lai meni ta maꞌe kairefi meni owane heneraiyei ne auwei su, meni ape lu taune werese fa au teꞌe noweinowei erete. Owane Sitewi lai meni ta lu taune tiyati maꞌe marepi ferafereiyei ne auwei su, meni ape lu taune maꞌe fa au feraferei nineꞌinamite.d9 Fene lai lu taune werese maꞌe marepi erasi aꞌi fu tote wawesiyenamite. Tote wawesiyenamiyei fene lo wiyeme pefine aꞌi fa ironamite. Yo seni luwaru werese ape ne, fene ai marepi totenamite. Yo seni wisere aseyaro aꞌi ape ne, fene tote tawesi umasinamite. 10 Fene lai Owane Sitewi lo lu taune werese maꞌe marepi erasi aꞌi nati wafei wou totenamite. Fene nati wafei fene lo, lo iyape erasi wisere aꞌi ei ani arowete. Aiwawe aꞌi fene iyape fene lo hi ani ararote.e 11 Fene onotaꞌano aꞌi owe ape ironamite. Ahowa, wiyawi werese fene lo au taꞌane tohotenamite. Wiyawi ape Owane Sitewi lai fene maꞌe auwe ape, fene marepi werese fene lo se au taꞌanenamite. 12 Owane Sitewi lai teꞌe naneiyei lo fene maꞌe auwe su, fene mi mi pasi pasi weriyei nineꞌinamite. Etiri luwaru aꞌi ta fene maꞌe heneraiyei su, fene Owane Sitewi ne ninawenamite. Fene mi mi pasi pasi weriyei Owane Sitewi maꞌe au teꞌe towerinamite.f 13 Lu taune neꞌese Owane Sitewi lo marepi tote umasisiya ape, lowe maꞌaru tamo ariye aꞌi. Serai fene maꞌaru etiri tamo fene lo lowe maꞌe none isafiyenamite. Lu taune tamo omo eyeri maꞌe fai ape, fene lowe maꞌe isafiye noweinoweite.g
14 Lu taune tamo fene maꞌe au luwaruweyei su, fene lowe maꞌe au teꞌe wisereyete. Fene lowe maꞌe owe sinarire.h 15 Lu taune tamo marepi wisere aꞌi tote teritesiya su, fene aiwawe aꞌi lowe mase marepi tote wisereyete. Lu taune tamo marepi orese aꞌi teritenamisiya su, fene aiwawe aꞌi lowe mase marepi wirepuwete. 16 Fene lai lu taune werese mase marepi fetane momotei aꞌi ironamite. Fene lowe ne ai marepi owe totenamite. Fene yo seni kuseriyei owe ape ironamite. Lu taune iyape taꞌame ape maꞌe, fene lowe maꞌe nati wafei wou tinamite. Aiwawe aꞌi fene lai marepi fene lo hi ani araronamite.i
17 Lu taune tamo yo seni luwaru aꞌi fene maꞌe irowei su, fene lowe maꞌe etiri luwaru aꞌi ta itiyaꞌu owe ape au luwaruwere. Fene lu taune werese lo nihe se yo seni aseyaro aꞌi ironamite.j 18 Fene nowe eiwerou faraꞌu irowei su, fene lu taune werese mase marepi wisere fetane aꞌi tote ironamite. 19 Kaiyemo ano, lu taune tamo yo seni luwaru aꞌi fene maꞌe irowei su, fene lowe maꞌe etiri luwaru aꞌi itiyaꞌu owe ape irore. Owane Sitewi lai yo seni luwaru aꞌi lowe lo siye areiye tepaꞌasiye. Serai le aꞌi lai ai marepi erasi etiri luwaru aꞌi lowe maꞌe itiyaꞌu aurowa. Fene Owane Sitewi ne ninawete. Meni ta Meni Owane Pefine aꞌi lo peri one towe lo sahe apou leseye,
“Ane aꞌi lai etiri luwaru aꞌi itiyaꞌu aunamisiya. Lu taune tamo fene maꞌe yo seni luwaru aꞌi irowei su, ane aꞌi lai lowe maꞌe itiyaꞌu au luwaruwenamirowa.” Lo 32:35
20 Ahowa, fene yo seni apou ape ironamite. Owane Sitewi lo one towe sahe apou teꞌesiya,
“Airame fene lo lau teritesiya su, fene ayei ta lowe maꞌe au ene are. Airame fene lo saꞌi wawe teritesiya su, fene saꞌi waraꞌi aꞌi lowe maꞌe au are. Fene yo seni apou ape ironamiyei su, yo seni luwaru aꞌi lowe lo fene maꞌe irowe ape, lowe marepi neritase aꞌi teriterowa.” Snd 25:21-22
21 Yo seni luwaru aꞌi ape lai fene owe ape hi ani ararote. Ahowa, fene yo seni aseyaro waraꞌi aꞌi ironamiyei su, fene yo seni luwaru werese aꞌi hi ani araronamirowa.