Fene awei lo lu owane werese unahi tei ironamite.
13
Fene werese awei lo lu owane werese lo peri wanu umasinamite. Owane Sitewi lai lu owane werese lu taune maꞌe au noweinoweiyei ne ariariyeye. Owane Sitewi lai lowe kairefi erasi auwe. Lu owane werese lai lu taune au noweinoweiyei su, lowe Owane Sitewi lo kairefi se lowe maꞌe au noweinoweirowa.a 2 Serai lu taune tamo lu owane lo peri arisinamiteyei su, lowe etiri werese Owane Sitewi awei sahe fuwe ape, ai atu tiyatiteye. Serai Owane Sitewi lai lowe maꞌe etiri luwaru aꞌi itiyaꞌu aurowa. 3 Lu taune tamo yo seni aseyaro waraꞌi aꞌi ironamiyei su, lowe awei lo meni owane ape ne atoweiyerowata. Ahowa, lu taune tamo yo seni luwaru aꞌi ironamiyei su, lowe awei lo meni owane ape ne atoweiye erasi ironamirowa. Fene marepi fetane aꞌi awei meni owane mase irotereme su, fene yo seni aseyaro waraꞌi aꞌi fa ironamite. Serai awei meni owane lai yo seni aseyaro waraꞌi aꞌi siye areiyeyei su, le fene maꞌe au nineꞌi wisereyerowa.b 4 Awei lo meni owane ape, le Owane Sitewi lo wiyawi yahowaꞌi taꞌane siye meni ne. Owane Sitewi lai le fene maꞌe au pati aniyei ne ariariyeye. Ahowa, fene yo seni luwaru aꞌi ironamiyei su, serai fene le ne atoweiye erasi aꞌi irotorowa. Awei lo meni owane ape, le faraꞌu fene maꞌe etiri luwaru aꞌi itiyaꞌu aurowa. Le Owane Sitewi lo wiyawi yahowaꞌi taꞌane siye meni tene! Lu taune tamo yo seni luwaru aꞌi irowei su, Owane Sitewi lai awei lo meni owane maꞌe kairefi auwe. Serai le faraꞌu yo seni luwaru aꞌi lu taune ape mo ne etiri luwaru aꞌi ta fene maꞌe itiyaꞌu aurowa. 5 Serai fene werese awei lo meni owane lo yo peri werese fa wanu umasinamite. Fene awei lo meni owane lo yo peri wanu arisiyei su, le etiri luwaru aꞌi fene maꞌe itiyaꞌu aurowa. Serai fene awei lo yo peri werese fa wanu umasinamite. Aiwawe aꞌi fene awei lo yo peri wanu tote umasiyei su, fene marepi wisere aꞌi fene lo umasinamiyei.6 Ane fene maꞌe takis maꞌaru ne au teꞌesiya. Fene takis maꞌaru fene lo awei lo meni owane maꞌe aure! Piyene awere? Awei lo lu owane werese, lowe Owane Sitewi lo wiyawi taꞌanesiya. Lowe nowe towafi lowe lo wiyawi ape taꞌaneyei ne aunamisiya. 7 Serai fene werese takis maꞌaru fene lo lowe maꞌe aure. Lowe fene maꞌe apou teꞌeyei su, “Fene takis maꞌaru tamo ane maꞌe ausa!” Serai fene takis maꞌaru apou ape lowe maꞌe fa aure. Fene lowe maꞌe marepi wisere aꞌi atuatunamite. Sosu iyape lowe lo ei ani arowete.c
Fene lu taune tereꞌe maꞌe tote wawesiye tiyatinamite.
8 Fene maꞌaru etiri tamo lu taune maꞌe aniyei su, fene lowe maꞌe witane aꞌi itiyaꞌu aure. Fene etiri ta tiyani aꞌi irowei ne toteyei su, tiyaniyei ape apou aꞌi ne. Fene lu taune ne marepi erasi aꞌi tote wawesiye tiyatite. Fene lu taune tereꞌe maꞌe marepi wisere erasi aꞌi tote wawesiye tiyatinamite. Meni ape lu taune tereꞌe maꞌe marepi erasi aꞌi tote wawesiyenamisiya su, lowe Owane Sitewi lo yo peri werese wanu tote umasisiya.d 9 Owane Sitewi lo yo peri apou teꞌeye,
“Fene tafaꞌe yo seni owe ape irote. Fene meni ta owe ape aine teraꞌere. Fene lu tereꞌe lo etiri tamo taꞌarei owe ape anite. Fene lu taune lo etiri werese owe ape siye wisereyete.” Kis 20:13-15,17
Owane Sitewi lo peri werese ape mo lai peri sitewi taꞌi aꞌi irosiya.
“Fene lai lu taune tereꞌe tiyati maꞌe marepi wisere erasi aꞌi au tote wawesiyenamite. Fene lu taune tereꞌe tiyati maꞌe tahe paꞌare towafi fene lo noweinoweisiya apou ape aꞌi lowe maꞌe au tote wawesiyenamite.” Wkp 19:18
10 Fene lu taune tereꞌe tiyati maꞌe marepi erasi aꞌi tote wawesiyeteyei su, fene lowe maꞌe au luwaruwerowata. Serai fene lu taune tereꞌe tamo maꞌe marepi erasi aꞌi tote wawesiyenamisiya su, fene Owane Sitewi lo yo peri werese tote umasisiya.e
11 Serai fene etiri werese ape ironamite. Fene nowe eite, nomo irosiya ape, siye soꞌoruwesiya. Nowe pefine aꞌi Owane Sitewi lo ariariyeye ape heneraiwa. Serai fene nihe fene lo petenere. Nihe fene lo owe ape nisoꞌute! Nowe ape se nomo Jisas Krais ne tote tawesiye su, nomo marepi hepene heꞌi aꞌi aniyei ne ataheyeraiwa.f 12 Peri anowe ta apou teꞌesiya. Nowe esi pasi heneraiwa. Nowe mitaiyeyei ataheye heneraiwa. Serai yo seni luwaru werese aꞌi nomo pasi aꞌi sahe iroteye ape mo, arunatite. Ahowa, nomo yo seni aseyaro aꞌi ani asi arote, ipari tahe wou ani asisiya.g 13 Nomo yo seni aseyaro aꞌi umasinamite. Lu taune tamo etiri mitaiyeyei sahe irosiya ape, yo seni lowe umasisiya ape, nomo aiwawe aꞌi tote umasinamirowa. Nomo ene a taꞌuwe hereiyei luwaru aꞌi tamo irorowata. Nomo saꞌi meremereyeyei ape ene arowata. Nomo tafaꞌe yo seni werese apou ape irorowata. Nomo lu taune tereꞌe tiyati maꞌe ai aturowata. Aiwawe aꞌi nomo lu taune tiyati maꞌe ai marepi luwaru aꞌi toterowata.h 14 Ahowa, fene meni Owane Jisas Krais lo yo seni waraꞌi aꞌi ape fene sahe weriyei fa natenamite. Ipari tahe wou ani asi natenamite. Fene marepi weriyei luwaru aꞌi ape mo tote iꞌanenamite. Fene marepi weriyei luwaru aꞌi owe ape tote umasite.i