5 Meni ta lai apou totesiya, “Poweiye eite wisere pefine aꞌi tene. Poweiye eite poweiye tereꞌe werese hi ani ararosiya.” Sosu aiwawe aꞌi meni tereꞌe ta apou totesiya, “Poweiye werese werese aiwawe aꞌi tene! Poweiye ta lai poweiye tereꞌe hi ani ararorowata.” Serai lu taune werese marepi towafi lowe lo au teꞌe hese ereite.^e 6 Meni ape, apou totesiya ape, “Poweiye ta poweiye tereꞌe werese hi ani ararowe.” Etiri werese poweiye sahe iroteye ape, le lai Owane Sitewi Pefine aꞌi ne au taꞌanesiya. Sosu aiwawe aꞌi meni ape fe loꞌu werese asiya ape, le apou totesiya, “Ane Owane Sitewi lo marepi tote umasisiya.” Ei. Le Owane Sitewi maꞌe fe loꞌu ne fa au nineꞌi wisereyete. Sosu meni ape nau, one, sawi, haiye aꞌi ene asiya ape, le aiwawe aꞌi apou totesiya, “Ane Owane Sitewi lo marepi tote umasisiya.” Serai le aiwawe aꞌi Owane Sitewi maꞌe fa au teꞌe nineꞌi wisereyete. 7 Nomo soꞌoruwesiya tene! Nomo lu taune werese marepi norohuwe irosiya ape, nomo marepi towafi nomo lo aꞌi tote se taꞌama. Aiwawe aꞌi nomo temeniyeyei ne toteyei su, nomo apou totere. Nomo temeniyeyei su, nomo marepi erasi aꞌi nineꞌi wisereyerowa. Ahowa, fene owe ape totere! 8 Apou aꞌi nomo hepene norohuwe irosiya ape, hepene norohuwe ape meni Owane Sitewi Pefine lo ne. Sosu nomo temeniyeyei su, etiri ape aiwawe aꞌi Owane Sitewi Pefine lo ne. Serai nomo awei sato norohuwe irosiya ape mo, sosu nomo temeniyeye ape su, nomo werese Meni Owane Pefine aꞌi lo ne.^f

9 Serai Meni Owane Krais temeniyeyewe, si tame norohuwe sineye su, lu taune temeniyeye ape mo, sosu lu taune marepi norohuwe irosiya ape mo, le aꞌi lai lowe werese lowe lo Meni Owane Pefine aꞌi tene! 10 Serai fene piyene kaiyemo fene lo lo yo seni au teꞌe hese ereisiya awere? Fene piyene lowe ne teꞌe hi ani ararosiya awere? Wanure! Nomo werese Owane Sitewi lo nihe sahe teirirowa. Le aꞌi lai yo seni werese nomo lo au teꞌe hese ereirowa.^g 11 Owane Sitewi lo peri one towe sahe aiwawe aꞌi apou lesesiya,

13 Serai nomo lu taune, Krais ne tote tawesisiya ape, nomo yo seni nomo lo owe ape au teꞌe hese erei tiyatite. Ahowa, nomo marepi apou ape pei totere. Nomo yo ape kaiyemo nomo lo iteyei ape, owe ape einamite. 14 Ane lai Owane Jisas Krais mase me paite fi wou nate tawesisiya. Serai ane faraꞌu ayei werese apou ape arowa. Amou se taꞌama. Ahowa, meni ta apou toteyei su, “Ane fe loꞌu ape ayei su, ane yo seni luwaru aꞌi irowe.” Serai meni ape peri ape tote tawesisiya su, le fe loꞌu ape arowata. Eite amou tene!^h 15 Fene ayei etiri ta ene ayei su, sosu fene meni ta lo tote tawesiyei au luwaruweyei. Fene Owane Sitewi lo marepi tote umasi se taꞌame. Fene meni ape maꞌe marepi wisere erasi aꞌi au atuatu taꞌame. Fene ayei amou ta ene ayei su, sosu fene meni ape lo tote tawesiyei au luwaruweyei su, fene ayei amou ape owe ene are. Meni Owane Krais lai meni ape ne temeniyeye.ⁱ 16 Fene apou toteyei su, “Ane yo seni aseyaro irorowa.” Ahowa, lu taune nairipi tereꞌe apou toteyei su, “Yo seni ape fene lo irowe ape, luwaru aꞌi ne.” Serai fene yo seni ape owe ape irote. 17 Nowe ape se Owane Sitewi lai lu taune werese au noweinoweirowa ape, etiri ape ene arowa ape, etiri ape saꞌi arowa ape, etiri werese ape mo yahowaꞌi ne. Ahowa, etiri ape mo Owane Sitewi lo nihe sahe erasi aꞌi ironamisiya ape ne. Yo seni aseyaro aꞌi ne, marepi fetane wisere aꞌi ne, sosu Owane Sitewi lo Hepene Waraꞌi aꞌi sahe marepi nineꞌi wisereyetorowa. Etiri ape mo erasi pefine aꞌi Owane Sitewi lo nihe se totenamisiya. 18 Lu taune tamo yo seni apou ape umasinamiyei su, lowe Owane Krais lo marepi tote umasiyei. Serai Owane Sitewi lowe ne au nineꞌiyei. Aiwawe aꞌi lu taune tereꞌe lowe ne marepi wisere aꞌi tote nineꞌiyei.

19 Serai nomo werese yo seni farere aꞌi ironamite. Nomo yo seni farere aꞌi irowei su, nomo lu taune werese marepi fetane aꞌi tote tiyatirowawe, nomo lu taune tereꞌe lo tote tawesiyei au kairefiyerowa.^j 20 Fene lu taune tereꞌe lo tote tawesiyei au luwaruweyei su, fene Owane Sitewi lo wiyawi aiwawe aꞌi au luwaruwerowa. Serai fene ayei amou ape owe ape ene are. Owane Sitewi lo nihe sahe ayei etiri werese faraꞌu ene arowa. Ahowa, fene ayei amou ta ene ayei su, lu tiyati lo tote tawesiyei au luwaruweyei su, fene yo seni luwaru aꞌi iroteyei.^k 21 Serai fene ayei amou ta, sosu saꞌi amou ta, ene a taꞌame su, yo seni fene lo wisere aꞌi ne. Aiwawe aꞌi fene yo seni luwaru aꞌi owe ape irote. Serai lu taune nairipi fene lo, lo yo seni luwaru aꞌi au wiyeinerowata. 22 Marepi fene lo ne, etiri ape mo fene ene ayei ape, sosu etiri ape mo, fene ene taꞌane ape, fene Owane Sitewi aꞌi maꞌe teꞌere! “Ane yo seni ape faraꞌu irowei. Marepi ano wisere aꞌi teriteyei.” Serai ane marepi ano ani ararorowata. Ane marepi wisere erasi aꞌi nineꞌisiya. 23 Ahowa, meni tereꞌe ta apou totesiya, “Ane soꞌoru taꞌama. Ayei etiri ape unou aꞌi awere? Piyete awere? Ane soꞌoru taꞌama. Serai ane faraꞌu etiri ape arowa.” Meni ape etiri ape ayei su, le yo seni luwaru aꞌi irowei. Piyene awere? Le apou toteyei. “Ane soꞌoru taꞌama. Ayei ape unou aꞌi awere?” Serai etiri werese aꞌi tote tawesiyei pefine aꞌi maꞌe henerai taꞌame ape, etiri ape luwaru aꞌi tene.