Nomo Meni Owane Krais lo marepi yo seni tote umasinamite.
15
Sosu aꞌi ape nomo tote tawesiyei kairefi aꞌi irosiya ape, nomo lu taune tereꞌe lo tote tawesiyei uwate kairefiye se taꞌame ape, marepi eresene momotei aꞌi irote. Yo seni lowe irosiya ape, nomo lowe ne marepi eresene momotei aꞌi irote. Nomo yo seni marepi towafi nomo lo ne owe ape wisereye nineꞌinamite. 2 Nomo werese lu taune tiyati tereꞌe maꞌe au wisere nineꞌinamite. Nomo tote tawesiyei lowe lo au ani kairefi fareraiyenamite.a 3 Fene owane Krais ne totere. Le awei sato iroteye su, le marepi topo lo tote umasi nineꞌiteye taꞌama. Le Owane Sitewi lo peri ape one towe sahe leseye ape umasinamiteye. Owane Sitewi lo peri ape apou teꞌeye,“Lu taune tamo fene maꞌe au teꞌe naruteyei su, lowe ane maꞌe aiwawe aꞌi peri teꞌe narurowa.” Sng 69:9
4 Peri werese one towe sahe tu naifa weriyei leseye ape, lu ape lai peri werese ape mo nomo fa siye soꞌoruweyei ne lese ausai. Serai marepi hepene nomo lo tei kairefi aꞌi teinamitorowa. Owane Sitewi lai nomo noweinoweiyei nowe ape, ninawenamisiya. Owane Sitewi lo peri ape nomo maꞌe marepi momotei aꞌi auwe. Serai nomo marepi wisere aꞌi tote kairefiyenamirowa.b 5 Owane Sitewi lai marepi momotei aꞌi sosu marepi wisere aꞌi nomo maꞌe auwe. Serai ane fene ne Owane Sitewi maꞌe apou ei towerisiya, “Fene lu taune tiyati Krais Jisas lo marepi pei tote umasite. Sosu fene lu taune tiyati maꞌe marepi taꞌi aꞌi totenamite.” 6 Serai fene lu taune tiyati maꞌe marepi taꞌi aꞌi totenamirowa su, fene lu taune tiyati werese maꞌe lu nairipi weneri taꞌi aꞌi henerairowa. Fene werese lai Owane Sitewi pefine aꞌi meni owane Jisas Krais lo Tai, iyape pefine aꞌi au teꞌe nineꞌi arowete.
7 Meni owane Krais lai fene hene taꞌuwe aniye. Serai fene lu taune tiyati maꞌe aiwawe hene taꞌuwe anite. Fene yo seni ape umasiyei su, lu taune tereꞌe tamo yo seni fene lo siyerowawe, lowe Owane Sitewi lo iyape erasi aꞌi ei ani arowerowa.c 8 Ane fene maꞌe peri ta teꞌesiya. Wanure! Meni Owane Krais, le wiyawi yahowaꞌi taꞌane siye meni henerai. Le Israel lo lu tewi au ferafereiyei ne fai. Owane Sitewi lai peri teꞌe naneiyei tamo Israel lo yaꞌariyei lu tewi maꞌe au teꞌeye. Sosu Owane Jisas Krais henerai su, le Israel lo lu tewi maꞌe Owane Sitewi lo peri teꞌe naneiyei werese ape lowe maꞌe au teꞌe areiyeyei ne fai.d 9 Owane Sitewi lo peri teꞌe naneiyei werese ape lu tewi tereꞌe tereꞌe maꞌe aiwawe aꞌi au teꞌeye. Owane Krais lowe maꞌe Owane Sitewi lo ferafereiyei au atuatu areiyeyei ne fai. Serai lowe Owane Sitewi lo iyape pefine aꞌi ape ne teꞌe nineꞌi arowetorowa. Meni owane Devit, Owane Sitewi lo peri one towe sahe aiwawe aꞌi leseye,
“Wanure! Ane lu tewi tereꞌe mase iroterowawe, Owane Sitewi Pefine maꞌe au teꞌe wisereye nineꞌinamirowa. Ane iyape no maꞌe peri wisere aꞌi au teꞌe wisereyerowa.” Sng 18:49
10 Owane Sitewi lo peri one towe sahe irosiya ape, aiwawe aꞌi apou leseye,
“Fene werese lu tewi tereꞌe omo tereꞌe tereꞌe maꞌe fai ape, fene Owane Sitewi lo lu feni aiwawe aꞌi marepi wisere aꞌi tote nineꞌinamite.” Lo 32:43
11 Fene Owane Sitewi lo peri tereꞌe wanure!
“Lu tewi tereꞌe werese, fene Meni Owane Pefine aꞌi maꞌe au teꞌe wisereye nineꞌinamite. Lu taune werese werese aꞌi Meni Owane Pefine maꞌe au teꞌe wisereyenamite.” Sng 117:1
12 Tu naifa weriyei meni Aisaia apou leseye,
“Meni Owane tutawe heꞌi aꞌi yaꞌariyei meni owane Jesi maꞌe aiyerowa. Le lu taune werese, lu tewi tereꞌe maꞌe fai ape, au noweinoweiyei ne aiyerowa. Meni Owane tutawe ape aiyerowa su, le lu tewi tereꞌe werese maꞌe marepi hepene heꞌi aꞌi aurowa. Serai lowe werese le ne ninawetorowa.” Ais 11:10
13 Sosu aꞌi pe ane fene ne Owane Sitewi maꞌe, fene ninawesiya ape, ei towerisiya. Serai fene le maꞌe tote tawesinamisiya su, le marepi erasi aꞌi fene maꞌe au nineꞌirowa. Sosu le fene maꞌe marepi momotei fetane aꞌi aiwawe aurowa. Sosu Owane Sitewi lo Hepene Waraꞌi aꞌi fene maꞌe kairefi lo napetu tawesinamirowawe, fene le ne ninawesiya.
Pol lai wiyawi topo lo ne au teꞌeye.
14 Kaiyemo ano, fene werese marepi yo seni wisere aꞌi temeꞌeriyesiya. Ane soꞌoruwe tene! Fene Owane Sitewi lo peri pefine marepi fene lo papu irosiya. Serai fene Owane Sitewi lo peri ape faraꞌu lu taune tereꞌe tiyati maꞌe au teꞌe atuatu areiyerowa. 15 Ei. Ane fene maꞌe peri kairefi aꞌi one towe eite sahe leseye. Ane peri ta fene maꞌe au teꞌe fareraiyeyei wou taꞌama. Ane fene maꞌe tame au teꞌe areiyesiya. Peri werese eite wanure! Fene peri eite marepi fene lo papu tote tawesi umasinamite. Owane Sitewi lai ane maꞌe wiyawi ape auwe. Serai ane fene maꞌe peri werese eite au teꞌe areiyesiya. 16 Wiyawi ape le ane maꞌe auwe ape, apou aꞌi ne, “Ane lu tewi tereꞌe maꞌe Owane Sitewi lo peri au teꞌe fiyari areiyesiya. Ane Owane Jisas Krais lo wiyawi pei ironamitorowa. Ane Owane Sitewi lo peri heneruwe wisere aꞌi lu tewi tereꞌe maꞌe au teꞌe fiyari areiyete.” Serai lowe Owane Sitewi lo peri wanu tote tawesi umasiyei su, lowe Owane Sitewi maꞌe tahe paꞌare towafi lowe lo au heserowa. Sosu Owane Sitewi, au heseyei ape, siyeyei su, le marepi erasi aꞌi nineꞌinamirowa. Owane Sitewi lo Hepene Waraꞌi aꞌi lai tahe paꞌare lowe lo aseyaro waraꞌi taꞌane henerairowa.e
17 Sosu aꞌi pe Krais Jisas lai ane mase Owane Sitewi lo wiyawi irowei ne ferafereiye. Serai wiyawi ape ane taꞌaneteye ape, ane marepi erasi aꞌi tote nineꞌisiya. 18 Wiyawi tereꞌe ano ape ane fene maꞌe au teꞌe areiyerowata. Ahowa, wiyawi ape Krais ane papu au taꞌaneteye ape, wiyawi ape ne ane faraꞌu au teꞌe areiyerowa. Le aꞌi lai lu taune tomu neꞌese, lu feni tereꞌe maꞌe fai ape, Owane Sitewi lo yo seni maꞌe henetai. Lowe peri ano wanuwe su, sosu wiyawi ano ape siyeye su, lowe werese Owane Sitewi lo peri tote tawesi umasinamiteye. 19 Lu tewi tereꞌe lai Owane Sitewi lo kairefiyeyei erasi pefine aꞌi siyeteye. Le wiyawi erasi pefine aꞌi iroteye ape, lowe aiwawe aꞌi kairefi lo siyeteye. Lowe Owane Sitewi lo Hepene Waraꞌi aꞌi lo kairefi siyeteye. Lu tewi tereꞌe lai etiri werese siyeteye su, lowe Owane Sitewi lo peri wanu tote tawesi umasinamiteye. Ane Krais lo peri heneruwe wisere aꞌi lu taune maꞌe omo Jerusalem sahe au teꞌe fiyari areiyeteye. Sosu ane omo Jerusalem arunatiyewe, omo omo tereꞌe werese maꞌe Owane Sitewi lo peri au teꞌe fiyariteye. Sosu ane omo pani Ilirikum lo lu taune maꞌe aiwawe aꞌi Owane Sitewi lo peri au teꞌe areiyeye. Wiyawi tewi ape, Owane Sitewi ane maꞌe auwe ape, ane taꞌane tepaꞌasiye. 20 Omo nepawe neꞌese aꞌi sahe lu taune Krais lo peri heneruwe wisere aꞌi wanu se taꞌama. Serai marepi ano apou aꞌi totenamisiya, “Ane lu taune maꞌe omo nepawe ape sahe Owane Sitewi lo peri au teꞌe fiyari areiyereme. Omo nepawe sahe lu tamo Owane Sitewi lo peri au teꞌeteye. Lu taune tamo lai Owane Sitewi lo peri wanu umasisiya. Serai ane omo ape mo maꞌe lu taune maꞌe Owane Sitewi lo peri au teꞌeyei ne iyei wou taꞌama. Ane lu tereꞌe lo wiyawi napetuwei wou taꞌama.”f 21 Ahowa, Owane Sitewi lo peri one towe sahe leseye. Wanure!
“Meni ta le ne lu taune maꞌe au teꞌe taꞌame ape, lowe le ne siye areiyerowa. Lu taune tamo le ne wanu se taꞌama ape mo, lowe le siye soꞌoruwerowa.” Serai ane yo seni ape wou aꞌi irorowa. Ais 52:15
Pol lu taune omo Rom iroteye ape sewiyeyei ne toteye.
22 Nowe tomu neꞌese ane fene maꞌe sewiyeyei ne toteteye. Ahowa, Ane omo ape mo maꞌe Owane Sitewi lo peri au teꞌe fiyariteye. Serai wiyawi ape Owane Sitewi lo peri au teꞌeteye ape, yo ano fene maꞌe sewiyeyei ne einamiteye.g 23 Nowe eite se ane wiyawi tewi ano omo weniyei ape mo sahe taꞌane tepaꞌasiye. Iyu menei tomu neꞌese aꞌi se ane fene maꞌe sewiyeyei ne toteteye. 24 Serai ane omo pani Spen maꞌe Owane Sitewi lo peri au teꞌeyei ne totesiya. Sosu ane omo pani Spen iyei su, ane fene maꞌe sewiyeyei ne. Ane fene siyeyei su, marepi ano nineꞌi wisereyerowa. Aiwawe aꞌi ane fene maꞌe arunatirowawe, omo pani Spen maꞌe irowa su, fene ane au ferafereire! 25 Nowe eite se ane omo Jerusalem maꞌe si tame iyei ne toteye. Ane omo Jerusalem maꞌe heneraiyei su, ane lu taune werese, Jisas lo peri umasiteye ape, werese au ferafereirowa. 26 Ane omo pani Masedonia, omo pani Akaia iroteye su, Owane Sitewi lo lu feni tamo maꞌaru towafi lowe lo tewi aꞌi ane maꞌe auwe. Ane maꞌaru lowe lo aniteyewe, lu taune, Jisas lo peri umasiteye ape, omo Jerusalem irosiya ape aurowa. Lu taune tomu neꞌese ape mo maꞌaru etiri se taꞌama.h 27 Lu tewi ape maꞌaru towafi lo auwe su, lowe marepi wisere aꞌi teriteteye. Aiwawe aꞌi Juda lo lu tewi ape, lowe lu tewi tereꞌe maꞌe Owane Sitewi lo teꞌe naneiyei werese aꞌi au teꞌe fiyariteye. Serai lu tewi tereꞌe apou toteye, “Lowe nomo maꞌe Owane Sitewi lo teꞌe naneiyei werese aꞌi auwe. Serai nomo etiri tamo lowe maꞌe itiyaꞌu aurowa.” Serai lowe maꞌaru etiri towafi lowe lo taꞌuweraiyewe, Juda lo lu tewi maꞌe au ferafereiyei ne auwe.i 28 Serai lowe maꞌaru, etiri towafi lowe lo ane maꞌe auwe. Sosu ane omo Jerusalem maꞌe irowa. Ane Juda lo lu tewi maꞌe maꞌaru etiri ariye ape aurowa. Ane maꞌaru werese lowe maꞌe au tepaꞌasiyei su, ane omo pani Spen maꞌe iyei ne. Ane omo pani Spen iyei su, ane omo Rom maꞌe heneraiyei. Ane omo Rom heneraiyei su, ane fene maꞌe sewiyeyei ne. 29 Etiri ta ane soꞌoruwe tepaꞌasiye. Ane fene maꞌe sewiyeyei su, ane Meni Owane Krais lo wisereyeyei erasi aꞌi fene maꞌe aitairowa. Krais lo wisereyeyei ape, fene papu ani asi temeꞌeriyerowa.j
30 Kaiyemo mo werese ano, ane fene maꞌe etiri ta ei towerisiya. Fene ane ne Owane Sitewi maꞌe teꞌe towerinamite. Fene ane ne Owane Sitewi maꞌe teꞌe toweriteyei su, fene wiyawi ano au ferafereirowa. Meni Owane Krais le fene papu ironamisiya su, sosu Owane Sitewi lo Hepene Waraꞌi aꞌi fene maꞌe marepi erasi wisere aꞌi auwe su, fene ane ne Owane Sitewi maꞌe teꞌe towerite.k 31 Ane Judia lo omo pani iyei su, fene ane ne Owane Sitewi maꞌe teꞌe towerite. Juda lo lu tewi ape lai ane maꞌe au luwaruweyei ne totesiya. Serai fene Owane Sitewi maꞌe apou teꞌe towerite, “Juda lo lu tewi luwaru aꞌi tamo lai Pol au luwaruwerowata.” Aiwawe aꞌi fene Owane Sitewi maꞌe apou teꞌe towerite, “Maꞌaru etiri ape ane omo Jerusalem maꞌe aitirowa ape, lowe maꞌaru ape mo marepi nineꞌi anisiya.” 32 Sosu Owane Sitewi lo marepi ane ne apou toterowa, “Ne maꞌaru etiri ape mo, omo Jerusalem maꞌe aiti tepaꞌasirowa su, ne omo Spen maꞌe ire!” Owane Sitewi lo marepi ane ne toteyei su, ane fene maꞌe sewiyeyei ne irowa. Ane marepi erasi wisere aꞌi fene maꞌe nineꞌitairowa. Ane fene maꞌe henerairowa su, fene ane marepi fetane aꞌi iro tiyatinamirowa. 33 Ane Owane Sitewi maꞌe fene ne ei towerisiya. Owane Sitewi lai, marepi wisere fetane aꞌi auwe ape, fene werese mase ironamitorowa. Peri werese pefine aꞌi tene!