Pol lo lu feni maꞌe au teꞌe nineꞌisawisiya.
16
Sosu aꞌi pe ane one towe eite fene maꞌe ausawiyei. Menitani ta iyape Fibi one towe eite fene maꞌe ereti topo lo se aitirowa. Menitani ape Owane Sitewi lo wesi omo Senkria irosiya ape, le wiyawi erasi aꞌi taꞌaneteye. Le Owane Sitewi lo yo seni umasinamisiya. 2 Menitani ape fene maꞌe heneraiyei su, fene Meni Owane Pefine lo iyape se le maꞌe eritere. Fene le ne eriteyei su, fene le ne apou aiwawe aꞌi fene lu taune tereꞌe Krais lo peri umasisiya ape, eritesiya. Menitani ape lai lu taune tomu neꞌese ane aiwawe aꞌi, le wiyawi erasi aꞌi au pati taꞌaneteye. Serai etiri tamo le ne ariye iroteye su, fene le maꞌe neri aꞌi aure.3 Ane nohuwe hesi iyape Prisila sosu Akwila maꞌe au teꞌe nineꞌi wisereyesawisiya. Lowesi ane mase Owane Jisas Krais lo wiyawi aiwawe taꞌanesiya.a 4 Lu tamo ane maꞌe aine teraꞌeyei ne toteye su, nohuwe hesi ape lai ane ne au ferafereiye. Serai ane lowesi maꞌe peri wisere aꞌi au teꞌe nineꞌisawisiya. Lu taune tewi tereꞌe tomu neꞌese aꞌi Owane Sitewi lo wesi papu irosiya ape, lowesi ne au teꞌe nineꞌi wisereyesiya.
5 Ane lu taune werese maꞌe wesi lowesi lo sahe taꞌuweraisiya ape, au teꞌe nineꞌi wisereyesiya. Sosu ane meni Epainetus maꞌe au teꞌe nineꞌi wisereyesiya. Meni ape nati wafei wiyeme ano ne. Le omo pani Esia saro iroteye su, le meni tutawe Owane Krais lo yo umasiteye.
6 Ane menitani Maria maꞌe au teꞌe nineꞌi wisereyesiya. Menitani ape fene maꞌe wiyawi taꞌane tohotenamiteye.
7 Ane meni Andronikus maꞌe sosu menitani Junias au teꞌe nineꞌi wisereyesiya. Lowesi kalabus wesi sahe ane mase iroteye ape, lowesi lu tewi ano ne. Lu Aposel ape Jisas ariariyeye ape, lowe lai lowesi iyape erasi se totesiya. Tu naifa lowesi Meni Owane Krais lo peri wanu tote tawesi umasiteye. Sosu ane moꞌo tote tawesiye.
8 Ane meni Ampliatus maꞌe au teꞌe nineꞌi wisereyesiya. Ane le Meni Owane Pefine aꞌi se tote wawesiyenamisiya.
9 Ane meni Urbanus maꞌe au teꞌe nineꞌi wisereyesiya. Le ane mase Meni Owane Krais lo wiyawi taꞌaneteye. Ane meni Stakis maꞌe aiwawe aꞌi au teꞌe nineꞌi wisereyesiya. Le nati wafei pefine aꞌi ano ne.
10 Ane meni Apeles maꞌe au teꞌe nineꞌi wisereyesiya. Tu naifa lu tamo le maꞌe au luwaruweye su, le Meni Owane Krais sahe tei kairefiyeteye. Meni Owane Krais lai le marepi erasi aꞌi totenamisiya. Ane meni Aristobulus lo lu tewi werese maꞌe au teꞌe nineꞌi wisereyesiya.
11 Ane meni Herodion maꞌe lu tewi ano ne, au teꞌe nineꞌi wisereyesiya. Narsisus lo lu tewi lai Meni Owane Pefine aꞌi umasisiya ape, ane lowe maꞌe au teꞌe nineꞌi wisereyesiya.
12 Taune hesi iyape Trifina sosu Trifosa, lowesi Meni Owane Pefine lo wiyawi taꞌane tohotesiya. Serai ane lowesi maꞌe au teꞌe nineꞌi wisereyesiya. Ane menitani Persis maꞌe, nati wafei pefine aꞌi ano ape, au teꞌe nineꞌi wisereyesiya. Menitani ape Owane Pefine ne wiyawi taꞌane tohotesiya.
13 Ane meni Rufus maꞌe au teꞌe nineꞌi wisereyesiya. Le meni waraꞌi aꞌi ne. Le Owane pefine aꞌi umasinamisiya. Rufus lo mai aiwawe aꞌi ane le maꞌe au teꞌe nineꞌi wisereyesiya. Le mai ano pefine wou aꞌi ne.b
14 Ane lu tomu neꞌese maꞌe au teꞌe nineꞌi wisereyesiya. Meni Asinkritus, meni Flegon, meni Hermes, meni Patrobas, meni Hermas. Sosu lu tewi lowe lo lowe mase irosiya ape, ane lowe werese maꞌe au teꞌe nineꞌi wisereyesiya.
15 Ane meni Filologus, menitani Julia, meni Nereus aiwawe aꞌi einei lo, sosu menitani Olimpas, ane lowe werese sosu lu feni tereꞌe lowe mase irosiya ape, ane lowe werese maꞌe au teꞌe nineꞌi wisereyesiya.
16 Fene lu taune tiyati maꞌe marepi aseyaro aꞌi se erite nineꞌire. Lu taune werese Meni Owane Krais umasinamisiya ape, lowe fene maꞌe au teꞌe nineꞌi wisereyesiya.c 17 Kaiyemo mo ano, ane fene maꞌe peri kairefi ta au teꞌesawisiya. Lu taune tamo lai, lowe Owane Sitewi lo lu feni ne aꞌi atu tiyatiyei ne totesiya. Lowe lu taune Meni Owane Krais umasisiya ape, lowe tote tawesiyei lowe lo hi ani ararowei ne totesiya. Fene werese lu tewi ape ne, weiyai! Owane Sitewi lo peri pefine aꞌi, fene wanu tote tawesi umasisiya ape, lowe peri ape au teꞌe narunamisiya. Serai fene lowe werese meꞌiyeni maꞌe atati arunatire.d 18 Lu taune ape mo, lowe Meni Owane Krais lo wiyawi taꞌane se taꞌama. Marepi luwaru aꞌi towafi lowe lo ape mo tote umasinamisiya. Lowe peri ta au teꞌesiya su, lowe kuseriyei peri wawero aꞌi, sosu peri yahowaꞌi teꞌe arearesiya. Lowe lu taune aiheiye aꞌi lo marepi au luwaruweyei ne totesiya.e 19 Lu taune werese Meni Owane Krais lo yo umasisiya ape, lowe fene ne apou wanuteye, “Fene Krais lo yo peri wanu tote tawesi umasisiya.” Marepi ano fene ne nineꞌi wisereyesiya. Ahowa, wanure! Marepi ano apou totesiya, “Yo seni werese wisere aꞌi ne, fene marepi wisere aꞌi se totenamite. Aiwawe aꞌi fene mi mi weriyei yo seni luwaru aꞌi owe ape ironamite.”f
20 Sosu aꞌi pe Owane Sitewi Pefine aꞌi marepi momotei fetane aꞌi ausiya ape, le aꞌi lai nowe iꞌero aꞌi sepei luwaru aꞌi Satan hi ani fu ararorowa. Le aꞌi lai fene maꞌe kairefi erasi aꞌi aurowa. Serai fene aiwawe aꞌi sepei Satan hi ani ararorowa.g Ane fene ne Owane Sitewi maꞌe au ei towerisiya, Meni Owane Krais lo ferafereiyei fene maꞌe ironamitorowa.
21 Meni Timoti, ane mase Krais lo wiyawi au taꞌanesiya ape, le fene maꞌe au teꞌe nineꞌi wisereyesawisiya. Meni Lusius, meni Jeson, meni Sosipater, lowe lu tewi ano ne. Lowe fene maꞌe aiwawe aꞌi au teꞌe nineꞌi wisereyesawisiya.h
22 Iyape ano Tertius, Pol one towe eite au teꞌeteye su, ane aꞌi lai one towe sahe leseteye. Ane aiwawe aꞌi fene maꞌe meni owane pefine aꞌi se au teꞌe nineꞌi wisereyesawisiya.
23 Nomo werese meni Gaius lo wesi saro irosiya. Lu taune tomu neꞌese aꞌi wesi lo sahe Owane Sitewi maꞌe au nineꞌi wisereyenamiyei ne taꞌuweraiteye. Gaius lai aiwawe aꞌi fene maꞌe au teꞌe nineꞌi wisereyesawisiya.
Meni Erastus, omo weniyei lo maꞌaru au noweinoweisiya ape, sosu meni Kwartus kaiyemo nomo lo, lowesi fene maꞌe au teꞌe nineꞌi wisereyesawisiya.i 24 {Meni Owane Jisas Krais lo ferafereiyei fene werese mase ironamitorowa.}j
25 Fene Owane Sitewi lo iyape pefine aꞌi teꞌe ani arowete. Fene Owane Sitewi lo peri heneruwe wisere aꞌi, ane lu taune maꞌe au teꞌe areiye fiyarisiya ape, Owane Sitewi lai tote tawesiyei fene lo au kairefiyesiya. Peri heneruwe ape Jisas Krais ne teꞌesiya. Iyu menei tomu neꞌese aꞌi Owane Sitewi lai Krais lo peri heneruwe wiyeme aꞌi fareareteye. Ahowa, nowe eite se Owane Sitewi lai lu taune werese maꞌe amerame aꞌi au atuatu areiyesiya.k 26 Owane Sitewi lo peri au teꞌe siye lu werese, lowe Meni Owane Krais lo peri heneruwe ape ne au teꞌe areiyeteye. Serai Owane Sitewi Owane Pefine aꞌi weriyei weriyei ironamitorowa ape, le lowe maꞌe peri kairefi aꞌi se au teꞌeye. Serai lowe Owane Sitewi lo peri pefine aꞌi lu taune werese maꞌe omo omo werese sahe au teꞌe areiyeteye. Serai lu taune ape mo Owane Sitewi lo peri pefine aꞌi wanuwe su, lowe peri ape wanu tote tawesi umasinamirowa.
27 Serai Owane Sitewi, marepi wisere aꞌi totenamisiya ape, nomo werese iyape erasi lo Meni Owane Jisas Krais se teꞌe ani arowenamitorowa. Peri werese ape mo wiyeme pefine aꞌi tene! One towe eite papera.