4 Ane mi mi weriyei Owane Sitewi ano maꞌe fene ne au teꞌe wisereyenamisiya. Owane Sitewi lo ferafereiyei, Krais Jisas maꞌe fai ape, le fene maꞌe auwe. 5 Fene Krais mase nate tawesiteye su, etiri werese fene irowe ape, le fene maꞌe au pati taꞌaneye. Peri werese fene au teꞌeye ape, le lai au pati taꞌaneye. Sosu aiwawe aꞌi, etiri werese fene wanu soꞌoruwe ape, le lai fene maꞌe au atuatu areiyeteye. 6 Nomo Krais ne fene maꞌe au teꞌe fiyariteye su, fene lai yo seni farere aꞌi fene lo lu taune maꞌe au teꞌe atuatu areiyenamiteye. Serai lowe yo seni farere aꞌi fene lo siyeye su, lowe Krais lo peri pefine aꞌi siye soꞌoruwerowa. 7 Serai etiri werese ape mo, Owane Sitewi lo Hepene Waraꞌi neri aꞌi, fene maꞌe auwe ape, fene etiri ape mo poꞌute te taꞌame. Serai etiri ape mo, lowe wiyawi lo irowei ne pati taꞌanerowa. Owane Sitewi lai fene Owane Jisas Krais au atuatu areiyerowa. Serai fene le ne marepi erasi nineꞌi ninawenamisiya. 8 Jisas Krais marepi hepene fene lo au ani ti kairefiye tawesinamitorowa. Serai nowe yeꞌewi henerairowa su, le si tame itorairowa su, fene marepi hepene fene lo, Owane Sitewi lo nihe se, waraꞌi aꞌi ironamirowa.^a 9 Owane Sitewi lai nomo maꞌe teꞌe naneiyei tamo auwe. Serai teꞌe naneiyei ape mo wiyeme aꞌi henerairowa. Le lai fene ei aniye. Serai fene taꞌi taꞌi aꞌi le maꞌe aiyeteye su, fene meni eime lo nati wafei pefine aꞌi henerai. Meni eime lo ape le Jisas Krais, Meni Owane Pefine aꞌi nomo lo ne.^b

10 Sosu aꞌi pe kaiyemo mo, ane peri kairefi aꞌi fene maꞌe au teꞌesiya. Owane Jisas Krais nomo lo, lo iyape se, ane fene maꞌe au teꞌesiya. Fene werese marepi taꞌi aꞌi totenamite. Fene marepi taꞌi aꞌi totenamiyei su, fene marepi hesi hesi ai marepi tote tiyatirowata. Fene marepi taꞌi aꞌi tote tiyatiteyei su, marepi hepene fene lo pefine aꞌi henerairowa. Sosu marepi werese fene lo marepi pefine aꞌi au atuatu areiyerowa.^c 11 Kaiyemo mo ano, lu tamo, menitani Kloe lo lu tewi maꞌe fai ape, lowe yo seni fene lo ne ane maꞌe au teꞌesai. Lowe ane maꞌe apou au teꞌesai, “Fene ai marepi tote teꞌe tiyatinamisiya.” 12 Peri ape, ane fene ne wanuteye ape, lu tamo apou aꞌi teꞌesiya. “Nomo lai Pol lo marepi umasisiya.” Lu tereꞌe tamo apou teꞌesiya, “Ahowa, nomo lai Apolos lo marepi umasisiya.” Lu tereꞌe tamo apou teꞌesiya, “Nomo Sifas lo marepi umasinamisiya.” Lu tereꞌe tamo apou teꞌesiya, “Nomo Krais lo marepi umasinamisiya.”^d 13 Ane peri ta fene maꞌe ei towerisiya. Krais lo marepi, nomo faraꞌu tewi aꞌi tewi aꞌi au ani erauweyei awere? Ane fene ne me tapeꞌi sahe au temeniyeye awere? Ahowa, meni ta fene saꞌi se au huwe su, le Pol lo iyape se fene maꞌe au huwe awere? Opiyete!

14 Ane Owane Sitewi maꞌe au teꞌe wisereyesiya. Ane lu hesi saꞌi au huwe. Ane meni Krispas, sosu meni Kaias aiwawe aꞌi, saꞌi au huwe. Lu taune tereꞌe werese ane saꞌi au hu taꞌame. Serai lu taune tomu neꞌese ane ne peri teꞌerowata, “Nomo Pol lo lu feni henerai.”^e 15 Serai owe meni ta apou eisiya. “Ane Pol lo iyape se saꞌi ani huwe.” 16 Ahowa, weiya! Ane Stefanas lo lu tewi tamo saꞌi au huwe. Lu taune tereꞌe tamo ane lai saꞌi au hu taꞌame. Ane lu taune tamo tereꞌe saꞌi au huwe su, ane soꞌoru taꞌama.^f 17 Krais ane lu taune maꞌe au huwei ne eimawesawi taꞌame. Ahowa, le ane Krais lo peri heneruwe wisere aꞌi lu taune maꞌe au teꞌe fiyariyei ne eimawesawi. Le awei lo marepi wisere aꞌi ane maꞌe au taꞌame. Ahowa, ane peri ta au teꞌeyei su, ane Krais lo me tapeꞌi lo peri aꞌi ne au teꞌe fiyariyei. Serai Krais lo me tapeꞌi yahowaꞌi aꞌi henerairowata.

18 Peri ano pefine aꞌi ne. Lu taune werese, Jisas lo peri umasi taꞌame ape, lowe apou totesiya, “Jisas lo me tapeꞌi lo peri, meremereye aꞌi ne.” Lowe mi mi pasi pasi weriyei temeniye poꞌuterowa. Ahowa, nomo werese Jisas lo peri wanu tote umasinamisiya ape, Jisas lo me tapeꞌi lo peri nomo maꞌe Owane Sitewi lo kairefi aꞌi heneraisiya.^g 19 Tu naifa weriyei meni ta Owane Sitewi lo peri one towe sahe apou leseye, Owane Sitewi lai apou eisiya,

21 Owane Sitewi lai marepi pefine aꞌi se toteteye su, lu taune werese, marepi towafi lowe lo se, Owane Sitewi maꞌe aiyerowata. Lu taune tamo, marepi towafi lowe lo se, Owane Sitewi maꞌe aiyeyei su, lowe Owane Sitewi soꞌoru taꞌama. Lu taune tamo apou totesiya, “Krais lo me tapeꞌi lo peri meremereye aiwawe aꞌi ne.” Ahowa, Owane Sitewi lo marepi sitewi apou totesiya, “Krais lo me tapeꞌi lu taune werese maꞌe marepi hepene heꞌi aꞌi aurowa. Serai Owane Sitewi lai marepi tote wisere nineꞌinamisiya.”ⁱ 22 Peri eite pefine aꞌi ne. Juda lo lu taune werese, lowe Owane Sitewi lo wiyawi erasi pefine aꞌi siyeyei ne ani nehireme. Sosu aiwawe aꞌi Grik lo lu taune werese, lowe marepi wisere pefine aꞌi siye soꞌoruweyei ne ani nehireme. 23 Ahowa, nomo lai Jisas, me tapeꞌi sahe temeniyeye ape, au teꞌe fiyari areiyesiya. Nomo Juda lo lu taune werese maꞌe au teꞌesiya su, lowe marepi towafi lowe lo ti tawesinamisiya. Sosu aiwawe nomo Grik lo lu taune maꞌe au teꞌesiya su, lowe marepi nomo lo ne meremereye aꞌi totesiya.^j 24 Ahowa, lu taune werese Owane Sitewi lai ei ani ariariyeye ape, Juda lo lu taune tamo, sosu Grik lo lu taune tamo, Krais Owane Sitewi lo kairefi se lowe maꞌe heneraiyei. Krais aiwawe aꞌi Owane Sitewi lo marepi wisere pefine aꞌi ne.^k 25 Owane Sitewi lo marepi meremereye aꞌi iroteyei su, Owane Sitewi lo marepi meremereye aꞌi ape awei lo lu lo marepi wisere aꞌi hi ani araroteyei. Sosu aiwawe aꞌi Owane Sitewi lo marepi pereꞌe pereꞌe aꞌi iroteyei su, Owane Sitewi lo marepi pereꞌe aꞌi lu taune lo marepi kairefi aꞌi hi ani araroteyei.^l

26 Kaiyemo mo, nowe tu naifa, Owane Sitewi lai fene ei ani taꞌame su, fene nowe ape se totere. Fene werese awei lo marepi soꞌoru taꞌama. Fene werese lu owane pefine se taꞌame. Fene werese lu tewi fene lo kairefi aꞌi henerai taꞌama.^m 27 Lu taune tomu neꞌese lai lu taune meremereye aꞌi ne tote luwaruwesiya. Ahowa, Owane Sitewi lai awei lo etiri meremereye aꞌi ariariyeye. Lu taune werese maꞌe marepi wisere pefine aꞌi irosiya ape, sosu iyape towafi lowe lo ei ani arowesiya ape, le lowe maꞌe au neritaseyeyei. Sosu aiwawe aꞌi Owane Sitewi lai lu taune iyape se taꞌame ariariyeye. Lu taune, kairefi pefine aꞌi irosiya ape, le lowe maꞌe au neritaseyeyei. 28 Lu taune ape mo ne, awei lo lu taune lai marepi luwaru aꞌi totesiya ape, Owane Sitewi lai ariariyeye. Sosu le lu taune werese iyape se taꞌame aiwawe aꞌi ariariyeye. Sosu lu taune werese yahowaꞌi ape mo Owane Sitewi lai lowe maꞌe ei ani aroweye. Serai lu taune iyape towafi lowe lo ei ani arowesiya ape, Owane Sitewi lai lowe maꞌe yahowaꞌi au irowei. 29 Serai lu taune werese, iyape erasi aꞌi se, lowe iyape towafi lowe lo Owane Sitewi maꞌe ei ani arowerowata.ⁿ 30 Fene, Krais lo peri wanu umasinamiteye ape, Owane Sitewi lai fene Krais Jisas papu hene ani funamiteye. Krais Jisas, marepi wisere pefine aꞌi, Owane Sitewi maꞌe fai ape, henerai. Serai le marepi wisere pefine aꞌi nomo lo, lo sitewi ne. Le yo seni waraꞌi aꞌi nomo lo, lo sitewi ne. Owane Sitewi lai fene siyesiya su, le Krais Jisas lo yo seni waraꞌi aꞌi, fene papu irosiya ape, siyesiya. Sosu le lai fene maꞌe Krais Jisas se marepi hepene heꞌi aꞌi auwe. Serai fene mi mi pasi pasi lu taune waraꞌi aꞌi ironamirowa.^o 31 Tu naifa meni ta apou leseye,