Jisas me tapeꞌi sahe temeniyeye ne lo peri au teꞌeteye.
2
Sosu aꞌi pe kaiyemo mo, ane fene maꞌe Owane Sitewi lo peri au teꞌe fiyariyei ne fai su, ane fene maꞌe peri kuseriyei aꞌi au teꞌe taꞌame. Ane fene maꞌe awei lo marepi wisere pefine aꞌi se au teꞌe taꞌame. 2 Ane marepi tutawe aꞌi totesiya, “Ane fene maꞌe Jisas Krais me tapeꞌi sahe temeniyeye ape, au teꞌe fiyarinamite. Peri tereꞌe tereꞌe ane au teꞌerowata.” 3 Ane fene maꞌe au teꞌeteye su, tahe ano pereꞌe aꞌi iroteye. Ane marepi atoweiye aꞌi ne. Sosu aiwawe tahe paꞌare ano erasi aꞌi auseriyenamiteye.a 4 Ane peri ano fene maꞌe au teꞌe fiyariye su, peri pisaꞌi aꞌi ano se, marepi fene lo tore ani taꞌame. Ahowa, peri ano se Owane Sitewi lo Hepene Waraꞌi aꞌi lo kairefiyeyei lai fene maꞌe au teꞌe atuatu areiyeteye.b 5 Fene Owane Sitewi lo peri wanu umasinamiteye su, fene awei lo marepi wisere aꞌi se tei taꞌame. Ahowa, fene Owane Sitewi lo kairefi se teinamiteye.Hepene Waraꞌi aꞌi marepi wisere aꞌi nomo maꞌe ausiya.
6 Nomo Owane Sitewi lo peri au teꞌesiya su, nomo marepi wisere aꞌi se lu taune maꞌe Owane Sitewi sahe tei kairefiyenamisiya ape, au teꞌe fiyarisiya. Marepi wisere aꞌi ape pereye nowe eite se taꞌama. Marepi wisere aꞌi ape awei lo lu owane pereye irosiya ape, maꞌe fai taꞌama. Awei lo lu owane werese poꞌuterowa. 7 Ahowa, nomo Owane Sitewi lo marepi wisere aꞌi fareyareye ape, au teꞌe fiyarisiya. Owane Sitewi lo marepi wisere aꞌi fareyare aꞌi ape, Owane Sitewi lai tu naifa weriyei weriyei nomo maꞌe au atuatuwei ne au teꞌe naneiteye. Serai nomo le ne tote tawesiye su, le marepi pefine aꞌi lo, nomo ne auwe. Serai nomo marepi werese lo siye soꞌoruwerowa. 8 Awei lu owane werese, pereye nowe eite se irosiya ape, Owane Sitewi lo marepi wisere fareyareye aꞌi, lowe werese soꞌoru taꞌama. Lowe Owane Sitewi lo marepi wisere aꞌi, fareyareye aꞌi ape, ani soꞌoruweye su, lowe Meni Owane Pefine nomo lo, mitaiyeyei erasi se hire maꞌe itorai ape, lowe le me tapeꞌi sahe aine teraꞌe taꞌame. 9 Ahowa, tu naifa weriyei meni ta Owane Sitewi lo peri apou leseye,
“Etiri werese nihe nomo lo se siye taꞌame ape, etiri werese apaniye nomo lo se wanu taꞌame ape, etiri werese marepi nomo lo papu wi taꞌame ape, etiri werese ape mo Owane Sitewi lai lu taune werese maꞌe le ne marepi tote wawesiyenamisiya ape, au taꞌuwe naneirowa.” Ais 64:4
10 Nomo maꞌe, Owane Sitewi lo marepi umasinamisiya ape, Owane Sitewi lai etiri ape mo Hepene Waraꞌi aꞌi lo se nomo maꞌe au teꞌe atuatuwe.
Owane Sitewi lo Hepene Waraꞌi aꞌi etiri werese ape mo nehi siye etinamisiya. Ei, le Owane Sitewi lo marepi werese aiwawe aꞌi nomo maꞌe au teꞌe atuatunamisiya. 11 Meni ta marepi topo lo siye soꞌoruwesiya awere? Hepene topo lo ape, marepi hepene lo papu irosiya ape, le marepi topo lo aꞌi siye soꞌoruwesiya. Sosu aiwawe aꞌi lu taune werese Owane Sitewi lo marepi soꞌoru taꞌama. Ahowa, Owane Sitewi lo Hepene Waraꞌi aꞌi lai Owane Sitewi lo marepi werese soꞌoruwe tepaꞌasiye tene! 12 Nowe pereye eite se Owane Sitewi lai nomo maꞌe Hepene Waraꞌi aꞌi lo, Owane Sitewi maꞌe fai ape, eimawesai. Nomo awei lo sepei ani taꞌame. Etiri werese aꞌi Owane Sitewi lo Hepene Waraꞌi aꞌi, nomo maꞌe auwe ape, le nomo maꞌe au teꞌe atuatu areiyenamisiya. Serai nomo Owane Sitewi lo marepi siye soꞌoruwerowa.
13 Etiri ape mo, nomo lai au teꞌe fiyarisiya ape, awei lu tamo marepi wisere aꞌi lo se nomo maꞌe au teꞌe atuatu taꞌame. Ahowa, Owane Sitewi lo Hepene Waraꞌi aꞌi nomo maꞌe peri ape ne au atuatusiya. Le Owane Sitewi lo marepi pefine aꞌi sosu peri pefine werese aꞌi omo hire maꞌe itorai ape, nomo lu taune maꞌe Hepene Waraꞌi aꞌi lo irosiya ape, au teꞌe atuatu areiyesiya. 14 Awei lo lu werese, lowe Owane Sitewi lo Hepene Waraꞌi aꞌi lo etiri werese siye soꞌoru taꞌama. Ahowa, le apou totesiya, “Owane Sitewi lo Hepene Waraꞌi aꞌi lo etiri werese meremereye aꞌi ne.” Lowe etiri werese ape mo soꞌoruwerowata. Lu taune Owane Sitewi lo Hepene Waraꞌi aꞌi marepi hepene lo papu iro taꞌame ape, lowe Owane Sitewi lo etiri werese siye soꞌoruwerowata. Etiri ape mo omo hire maꞌe fai. 15 Nomo werese Owane Sitewi lo Hepene Waraꞌi aꞌi, marepi hepene lowe lo papu ironamisiya ape, Nomo faraꞌu etiri werese au hese siye etisiya. Ahowa, owe awei lo meni ta lai yo seni nomo lo au hese ereirowata. 16 Owane Sitewi lo one towe sahe apou eiye,
“Lu taune werese Meni Owane Pefine aꞌi lo marepi soꞌoru taꞌama. Serai nomo etiri werese le maꞌe au atuaturowata.” Ais 40:13
Ahowa, nomo le ne tote tawesi umasiyei su, nomo Krais lo marepi siye soꞌoruwe tepaꞌasiye.