Owane Sitewi lo wiyawi yahowaꞌi siye lu taune.
3
Sosu kaiyemo mo, tu naifa ane fene maꞌe au teꞌeye su, fene Owane Sitewi lo etiri ape mo siye soꞌoruwerowata. Ahowa, ane fene maꞌe au teꞌeye su, ane fene maꞌe awei lo meni wou aꞌi au teꞌeteye. Ane fene maꞌe eimane osu wou aꞌi au teꞌeteye. Fene nowe heꞌi aꞌi Krais lo yo umasiteye. 2 Ane fene maꞌe peri kairefi aꞌi au teꞌe taꞌame. Ahowa, ane fene maꞌe au teꞌeteye su, Ane, apou wou aꞌi mai ta eimane osu lo maꞌe moꞌu au ayei ape, au teꞌeye. Ane fene maꞌe peri ta moꞌu wou aꞌi au teꞌeteye. Fene peri kairefi aꞌi eite wanu soꞌoru taꞌama. Aiwawe aꞌi nowe pereye eite se fene lai peri kairefi aꞌi eite wanu soꞌoruwerowata. Piyene awere?a 3 Fene lai awei lo yo seni umasinamisiya. Fene ai marepi lu taune tamo se tote tiyatinamisiya. Aiwawe aꞌi fene ai peri fene tiyati maꞌe au teꞌenamisiya. Fene yo seni apou ape mo umasisiya su, fene awei lo yo seni umasisiya awere? Ei. Yo seni fene lo awei lo lu wou aꞌi ne.b 4 Lu tamo apou teꞌesiya, “Nomo Pol lo marepi umasisiya.” Sosu lu tereꞌe tamo apou teꞌesiya, “Nomo meni Apolos lo marepi umasisiya.” Fene peri apou ape teꞌeyei su, fene awei lo lu wou aꞌi ne.c5 Ane peri ta fene maꞌe ei towerisiya, Ane, Pol, eiwerai awere? Meni ape, Apolos, eiwerai awere? Notosi aꞌi lai Owane Sitewi lo wiyawi yahowaꞌi siye lu. Notosi Owane Sitewi lo peri fene maꞌe au teꞌe fiyariteye. Owane Sitewi lai fene taꞌi taꞌi aꞌi ei aniye. Fene Owane Sitewi lo peri wanuwe su, fene le ne tote tawesi umasinamiye. 6 Ane fene maꞌe Owane Sitewi lo peri au teꞌeteye su, apou wou aꞌi, ane me so ta yehe sameye. Sosu meni Apolos fene maꞌe Owane Sitewi lo peri au teꞌe atuatunamiteye su, apou wou aꞌi le me so ape, ane awei sahe yehe sameye ape, saꞌi au ani terosowe. Ahowa, Owane Sitewi aꞌi lai fene kairefi aꞌi au tei ironamisiya.d 7 Serai notosi lu yahowaꞌi ne. Ane Owane Sitewi lo peri fene papu yehe sameye. Apolos Owane Sitewi lo peri saꞌi ani terosowe. Notosi lu yahowaꞌi ne. Owane Sitewi lai fene kairefi aꞌi au tei ironamisiya. 8 Sosu meni ta Owane Sitewi lo peri yehe sameye. Meni tereꞌe ta Owane Sitewi lo peri saꞌi ani terosowe. Lowesi marepi taꞌi aꞌi ne. Lowesi taꞌi taꞌi aꞌi Owane Sitewi lo neri aꞌi anirowa. Meni ta Owane Sitewi lo wiyawi erasi taꞌaneyei su, Owane Sitewi lai etiri erasi ta le maꞌe neri aꞌi aurowa. Aiwawe aꞌi meni ta Owane Sitewi lo wiyawi oso aꞌi taꞌaneyei su, Owane Sitewi lai le maꞌe etiri oso aꞌi neri aꞌi aurowa. 9 Serai notosi Owane Sitewi lo wiyawi yahowaꞌi aꞌi siye lu ne. Fene Owane Sitewi lo taꞌaneyei awei wou aꞌi ne. Fene Owane Sitewi lo wesi, le taꞌanesiya ape, wou aꞌi ne.e
10 Owane Sitewi ane wiyawi lo irowei ne ariariyeyewe, ferafereiyei lo ane maꞌe auwe. Ane wesi taꞌane siye meni owane wou aꞌi ne. Ane wesi lo taꞌaneyei ne marepi wisere aꞌi se totenamisiya. Ane lu taune Krais maꞌe hene aniyei su, wesi ta taꞌaneyei wou aꞌi ne. Ane wesi me tou au opotiyei. Meni tereꞌe wesi me tou hire maꞌe taꞌaneyei. Weiyai! Lu werese taꞌi taꞌi aꞌi lowe wesi ape fa au taꞌane etiyei. 11 Jisas Krais aꞌi lai wesi me tou tutawe aiwawe aꞌi ne. Lu taune tereꞌe werese me tou tereꞌe tereꞌe au opotirowata.f 12 Sosu lu taune tamo wesi me tou hire maꞌe taꞌaneyei su, lowe etiri tamo se taꞌaneyei. Lowe tapiye gol, tapiye silva, tapiye wisere tereꞌe tereꞌe aꞌi, me tereꞌe tamo, senarepe foroꞌo aꞌi, otowe, lowe etiri apou ape mo wesi me tou hire maꞌe taꞌaneyei. 13 Meni ta me tou hire maꞌe etiri ape mo se taꞌaneyei su, Owane Sitewi lai etiri lowe lo ape mo siye eti ereiyei. Nowe ta se etiri werese lowe lo amerame aꞌi heneraiyei. Owane Sitewi lai etiri werese lowe lo yehe arineyei. Etiri wisere ape mo kairefi aꞌi teinamiyei. Yehe ape etiri ape mo ti siyeyei. Meni ta lo wiyawi wisere aꞌi awere? Luwaru aꞌi awere?g 14 Meni ta Owane Sitewi lo wiyawi kairefi aꞌi taꞌanenamiyei su, Owane Sitewi lai le maꞌe etiri wisere neri aꞌi aurowa. 15 Meni ta lo wiyawi yehe ti poꞌuteyei su, le etiri ape mo lo arunatiyei. Ahowa, le marepi hepene lo arunatirowata. Owane Sitewi lai le yehe sahe ani tepaꞌasi aniyei.
16 Wanure! Fene lai Owane Sitewi lo wesi ta wou aꞌi ne. Owane Sitewi lo Hepene Waraꞌi marepi hepene fene lo papu ironamisiya. Fene soꞌoruwesiya awere?h 17 Meni ta Owane Sitewi lo wesi tapeti ani ereyei su, Owane Sitewi lai le aine teraꞌeyei. Owane Sitewi lo wesi aseyaro waraꞌi aꞌi ne. Fene aiwawe aꞌi aseyaro waraꞌi aꞌi ne.
Owane Sitewi lai wiyawi werese nomo lo au hese ereirowa.
18 Fene marepi towafi fene lo owe ape arearere. Meni ta nowe eite se apou aꞌi toteyei su, “Ane marepi wisere ai totenamisiya.” Meni ape lo marepi afofo aꞌi tene! Meni ape marepi wisere pefine aꞌi heneraiyei ne totesiya su, awei lo lu taune le ne meremereye aꞌi toterowa. 19 Awei lo marepi wisere aꞌi ne, Owane Sitewi lai meremereye aꞌi totenamisiya. Tu naifa weriyei meni ta apou leseye,
“Owane Sitewi topo lai meni ta, awei lo marepi wisere aꞌi, totesiya ape, amerame aꞌi teꞌe atuatu areiyeteye.” Serai Owane Sitewi lo nihe se awei lo marepi werese aꞌi lo meremereye aꞌi ne. Le meni ape maꞌe au neritaseyerowa. Jop 5:13
20 Tu naifa weriyei meni tereꞌe ta Owane Sitewi lo one towe sahe apou leseye,
“Meni Owane Pefine aꞌi awei lo marepi werese aꞌi soꞌoruwesiya tene! Awei lo marepi werese yahowaꞌi aꞌi ne.” Sng 94:11
21 Serai lu taune werese lu lo marepi ne peri karere aꞌi yahowaꞌi aꞌi owe ape au teꞌere. Etiri werese ape mo fene ne au pati aninamisiya. 22 Etiri werese ape mo fene ne au pati anisiya. Ane Pol, meni Apolos, meni Sifas, awei lo etiri werese ape mo, etiri werese ape mo, marepi hepene norohuwe ape, etiri ape mo temeniyeye ape, etiri werese nowe pereye eite se irosiya ape, etiri werese henerairowa ape, etiri werese ape mo fene ne au pati aninamisiya. 23 Fene aiwawe aꞌi lai fene Krais lo ne. Sosu Krais lai Owane Sitewi lo ne.