Lu taune, Owane Sitewi lai au teꞌe fiyariyei ne eimawesawi ape ne.
4
Fene nomo ne apou aꞌi totere. Nomo Owane Sitewi lo wiyawi yahowaꞌi aꞌi taꞌane siye lu ne. Nomo Owane Sitewi lo peri fareyareye aꞌi au noweinoweisiya. 2 Nomo Owane Sitewi lo peri fareyareye aꞌi au noweinoweisiya su, nomo mi mi weriyei yo seni waraꞌi aꞌi lo fa ironamite.a 3 Fene yo seni ano siye eti ereiyei su, etiri oso aꞌi ne. Aiwawe aꞌi meni tereꞌe awei lo marepi se yo seni ano siye eti ereiyei su, marepi ano apou totesiya, etiri oso aꞌi ne. Topo ane aꞌi lai yo seni ano siye eti ereirowata. 4 Marepi ano apou aꞌi totesiya, yo seni werese ano waraꞌi aꞌi ne. Ahowa, ane yo seni luwaru aꞌi ironamisiya awere? Ei, Meni Owane Pefine aꞌi lai yo seni ano siye eti ereirowa. 5 Serai fene yo seni werese owe ape siye eti ereire. Nowe yeꞌewi henerai taꞌame. Ahowa, Meni Owane Pefine aꞌi si tame itorairowa su, le yo seni werese au atuatu areiyerowa. Etiri werese pasi ironamiyei su, le mi aꞌi sahe amerame aꞌi au teꞌe atuatu areiyerowa. Le lu taune lo marepi sitewi amerame aꞌi atuatu areiyerowa. Owane Sitewi yo seni lowe lo siye eti ereirowa su, le lowe tamo maꞌe au teꞌe wisereyeyei. Sosu lu taune tereꞌe maꞌe, le lai lowe tamo au teꞌe luwaruweyei.bLu taune omo Korin sahe irosiya ape, lowe iyape towafi lowe lo ei ani aroweteye.
6 Kaiyemo mo, etiri ape mo ane fene maꞌe au lesesiya ape, ane peri anowe wou ane ne meni Apolos aiwawe apou aꞌi totesiya. Peri anowe ape fene ne au pati aniyei. Peri anowe ape ane fene maꞌe au atuatuwei ape, fene Owane Sitewi lo peri werese wanu umasite. Fene meni ta iyape lo ei ani arowesiya. Sosu fene meni tereꞌe ta maꞌe ai marepi totenamisiya. Fene yo seni ape owe ape umasite.c 7 Fene lu taune werese ne au ani ararosiya awere? Etiri werese omo hire sahe fene maꞌe itorai ape, Owane Sitewi lai fene maꞌe au tepaꞌasiye. Fene etiri ape Owane Sitewi maꞌe aniye su, fene piyene iyape towafi fene lo ei ani arowesiya awere? Fene piyene apou teꞌesiya awere? “Nomo aꞌi lai etiri ape mo aniye.” Ahowa, etiri ape mo Owane Sitewi fene maꞌe auwe ape, le neri aꞌi auwe.d
8 Fene apou aꞌi toteye, “Nomo etiri werese ani tepaꞌasiye. Nomo temeꞌeriyeye. Nomo maꞌaru tomu neꞌese aniye. Nomo aꞌi lai lu owane tutawe wou henerai. Pol, Apolos aiwawe aꞌi lowesi nomo maꞌe lu owane tutawe au iro taꞌame.” Wawero aꞌi tene! Wanure! Marepi ano apou aꞌi totesiya. Fene werese lu owane pefine aꞌi henerai awere? Fene lu owane pefine aꞌi henerai su, notosi fene mase lu taune werese, au noweinoweiteyei. Ahowa, fene lu yahowaꞌi aꞌi ne. 9 Serai marepi ano apou aꞌi totesiya, Owane Sitewi lai nomo sosu Owane Sitewi lo peri au teꞌe siye lu werese yaru yeꞌewi sahe iroteye. Le nomo lu tamo wou temeniyeyei ne ariariyeye. Ai lu tamo meni ta amerame aꞌi aine teraꞌeyei ne henetiyei su, lu taune tomu neꞌese le ne siye nineꞌiyei ne taꞌuweraiyei. Meni ape ne, lowe aine teraꞌeyei ne totesiya ape, nomo meni ape wou aꞌi ne. Owane Sitewi lo ipari wisere aꞌi, omo hire maꞌe irosiya ape, sosu lu taune werese hi awei sahe irosiya ape, lowe werese nomo siye nineꞌiyei ne taꞌuwerai. 10 Fene apou aꞌi totesiya. Notosi Krais ne umasisiya su, notosi marepi meremereye aꞌi ironamisiya. Ahowa, fene Krais se marepi wisere erasi aꞌi henerai. Nomo tahe pereꞌe aꞌi ne. Fene tahe kairefi aꞌi ne. Fene iyape erasi se, nomo iyape yahowaꞌi aꞌi ne. 11 Nowe eite se, nomo lau mase, saꞌi wawe aiwawe aꞌi. Ipari tahe nomo lo luwaru aꞌi ne. Lu taune tamo nomo au luwaruweye. Nomo wesi ariye.e 12 Nomo ereti nomo lo se wiyawi erasi aꞌi aninamisiya, lu tamo peri teꞌe naruwei su, nomo Owane Sitewi lo marepi wisere aꞌi ei ani aroweyei. Lu tamo nomo maꞌe au luwaruweyei su, nomo kairefi teinamiyei.f 13 Lu tamo iyape nomo lo teꞌe luwaruweyei su, nomo peri fetane aꞌi se itiyaꞌu teꞌeyei. Nomo awei lo lu luwaru aꞌi henerai. Nomo awei lo oroꞌoru wou aꞌi ne. Mi mi werese lowe nomo ne apou wou aꞌi totenamisiya.
14 Ane fene maꞌe etiri eite au lesesiya su, ane marepi fene lo maꞌe au neritaseyerowata. Ahowa, ane marepi fene lo au fareraiyeyei ne totesiya. Apou wou aꞌi mai eimane lo au fareraiyeyei. 15 Lu tomu neꞌese fene maꞌe Krais lo peri ne au atuatuwei su, fene aite tomu neꞌese taꞌame. Ane Owane Sitewi lo peri fene maꞌe au teꞌe fiyariye su, ane aꞌi lai tai fene lo henerai.g 16 Serai ane tai fene lo henerai su, ane fene maꞌe kairefi aꞌi se au teꞌesiya. Fene yo seni waraꞌi aꞌi ano aiwawe aꞌi fa umasite.h 17 Ane meni Timoti fene maꞌe eimawesawiyei. Le mi mi weriyei Jisas ne tote umasinamisiya. Le fene maꞌe aiyeyei su, le fene maꞌe apou au teꞌeyei, “Fene Pol lo yo seni waraꞌi aꞌi fa umasite.” Ane Timoti Jisas maꞌe heneti. Serai le meni eime ano wou aꞌi ne. Ane le ne marepi erasi aꞌi tote wawesiyenamisiya. Le fene maꞌe marepi hepene heꞌi aꞌi Krais sahe, ane umasinamisiya ape, au teꞌe atuatuwei. Apou wou aꞌi, ane lu taune werese, Jisas ne umasisiya ape, maꞌe omo werese sahe Krais lo yo seni werese ne au teꞌe atuatuteye.i
18 Lu taune tamo apou aꞌi totesiya, “Pol nomo maꞌe sewiyeyei ne aiye taꞌame.” Serai lowe kuseriyei lu henerai. 19 Meni Owane Pefine aꞌi marepi lo ane maꞌe au teꞌe atuatu areiyerowa su, ane iꞌero aꞌi fene maꞌe sewiyeyei ne aiyerowa. Ane aiyeyei su, ane kuseriyei lu ape mo wanu soꞌoruwerowa. Ane peri lowe lo wanuwei taꞌama. Ahowa, ane kairefi lowe lo siye soꞌoruwerowa. 20 Sosu Owane Sitewi lo marepi werese peri yahowaꞌi taꞌama. Ahowa, Owane Sitewi lo marepi apou wou kairefi pefine aꞌi ne.j 21 Ane fene maꞌe sewiyeyei ne aiyeyei su, ane peri kairefi aꞌi se aiyeyei awere? Apou aꞌi, ane me au se aitairowa. Ane fene maꞌe aiyeyei su, ane marepi erasi aꞌi tote wawesiyenamiyei awere? Ane peri momotei aꞌi fene maꞌe aiyeyei awere? Fene lai marepi towafi fene lo fa au hese ereire. Ane fene maꞌe ai marepi se aiyerowa awere? Ane fene maꞌe marepi momotei eresene aꞌi aiyerowa awere?