Meni ta Jisas lo yo umasiteye ape, tani lo omo lo maꞌe eimawesawi.
5
Lu taune tamo nomo maꞌe yo seni fene lo ne au teꞌeye. Lowe apou au teꞌeye. “Lu taune tamo, fene mase irosiya ape, tafaꞌe yo seni luwaru aꞌi ironamisiya.” Yo seni fene lo ape luwaru aꞌi tene. Lu taune tereꞌe Jisas lo yo umasi taꞌame ape, lowe yo seni ape apou ape iro taꞌame. Lowe ane maꞌe apou teꞌeye. “Meni ta aite lo tani tafaꞌe yo seni luwaru aꞌi iro howeiteye.”a 2 Fene yo seni apou ape siyeteye su, fene kuseriyei aꞌi totenamiteye. Meni ape yo seni luwaru ape ironamiteye su, fene werese le ne marepi orese aꞌi tote taꞌame. Ahowa, meni ape yo seni luwaru aꞌi ironamiteye ape, fene meni ape Owane Sitewi lo wesi nowe maꞌe fu arosawire. 3 Ane fene mase iro taꞌame. Ahowa, marepi ano fene mase ironamisiya. Ane peri ape wanuwe su, meni ape yo seni luwaru aꞌi ironamiteye ape ne, ane Owane pefine lo iyape se le ne au hese erei tepaꞌasiye. Apou aꞌi ane fene mase iroteye.b 4 Fene werese taꞌuweraiyei su, Meni Owane Jisas fene mase iroteyei. Aiwawe aꞌi marepi ano fene mase ironamiteyei. Fene taꞌuweraiyei su, Owane Jisas Krais lo iyape se meni ape maꞌe apou au teꞌere, 5 “Ne sepei Satan lo yo seni umasinamiteye su, ne le maꞌe ire.” Le tahe paꞌare no aine teraꞌe poꞌuteyei. Sepei Satan le maꞌe fofowei erasi au irowei su, le yo seni luwaru aꞌi lo meꞌiyeni maꞌe atati aruwei. Serai nowe yeꞌewi se, Jisas Krais si tame itorairowa su, le marepi hepene heꞌi aꞌi meni ape maꞌe aurowa.cKorin lo lu taune towafi aꞌi lai teꞌe aroweteye.
6 Fene apou teꞌeye, “Nomo Owane Sitewi lo peri wanu umasinamisiya.” Fene peri ape au teꞌeye su, fene iyape towafi fene lo ei ani aroweye. Yo seni eite luwaru aꞌi tene. Fene peri anowe ano wanure! “Meni ape fe wawe saꞌi aiwawe aꞌi ne. Fene fe lire tou erauwiyei su, fene wawe saꞌi seni ani peratiyei. Wawe saꞌi fe loꞌu werese papu fiyariyei. Serai fe loꞌu werese uwase luwaruwerowa. Meni ape fe wawe saꞌi aiwawe aꞌi ne. Meni ape fene mase ironamiteyei su, le lai marepi werese fene lo au ani luwaruweyei.”d 7 Serai fene fe wawe saꞌi ape ani fusawire. Fene wawe saꞌi ani fusawiyei su, fene marepi wisere aꞌi heneraiyei. Fene Krais lo marepi wanu tawesi umasinamiteye su, fene lirewawe amerame aꞌi henerai. Fene meni ape nowe maꞌe ani fusawiyei su, fene marepi hepene amerame aꞌi aiwawe aꞌi heneraiyei. Krais, fe sipsip lo pasova nomo lo ape ne, me tapeꞌi sahe temeniyeye su, Owane Sitewi lai yo seni luwaru werese aꞌi nomo lo au sasari pamowe tepaꞌasiye.fe
8 Serai nomo werese taꞌuwe hereiyei irowei. Nomo Krais ne totenamisiya. Israel tu naifa wou aꞌi ne. Lowe nau taꞌase weriyei ani fusawi. Nau heꞌi aꞌi ateye. Nomo aiwawe aꞌi ne. Nomo peri yaꞌariyei, yo seni yaꞌariyei, meꞌiyeni maꞌe atati arunati. Nomo peri aseyaro au teꞌenamiyei, yo seni aseyaro aꞌi ironamiyei.g
9 Ane nowe tu naifa fene maꞌe one towe sahe apou au leseye. Fene lu taune tafaꞌe yo seni luwaru aꞌi ironamisiya ape, lowe mase owe ape taꞌuwete. 10 Ahowa weiya! Ane awei lo lu taune werese aꞌi tafaꞌe yo seni luwaru aꞌi ironamisiya ape, au teꞌeyei ne tote taꞌame. Awei lo lu taune, etiri siye wisereyesiya ape, awei lo lu taune peri arearesiya ape, lu taune werese god tereꞌe areareye aꞌi umasisiya ape, ane lowe werese ne au teꞌeyei ne tote taꞌame. Fene lu taune yo seni luwaru aꞌi irosiya ape, apou ape aweraꞌiyenatiyei su, Owane Sitewi fene awei nowe maꞌe hene ani wirowa. 11 Ahowa, ane fene maꞌe one towe lese ausawi su, ane marepi ano apou aꞌi toteye. Lu taune tamo Jisas lo marepi umasiteye ape, yo seni luwaru aꞌi ironamisiya su, fene lu taune ape mo aiwawe aꞌi owe ape taꞌuwere. Lu taune tafaꞌe yo seni luwaru aꞌi ironamisiya ape, lu taune tamo, lu taune tereꞌe siye wisereyenamisiya ape, lu taune god wawero umasisiya ape, lu taune maꞌe teꞌe narunamisiya ape, lu taune saꞌi luwaru aꞌi a meremereyesiya ape, lu taune arearesiya ape, fene lowe werese mase owe ape ene ayei ne taꞌuwete.h
12 Wanure! Lu taune Jisas lo yo seni umasi taꞌame ape, ane lai yo seni lowe lo au hese ereirowata. Lu taune werese Jisas lo yo seni umasinamisiya ape, fene yo seni lowe lo siye eti hese ereite. 13 Lu taune werese Jisas lo yo seni umasi taꞌame ape, Owane Sitewi lai yo seni werese lowe lo au hese ereirowa. Ane fene maꞌe au teꞌesiya. Fene meni ape, ane tu au teꞌeye ape, Owane Sitewi lo wesi nowe maꞌe naꞌarisawire.i