Krais lo lu taune tiyati owe ape etire.
6
Fene, Jisas lo yo seni umasinamisiya ape, fene ai marepi luwaru aꞌi meni teꞌere maꞌe ai tiyati ironamisiya su, fene meni ape awei lo lu owane maꞌe etiyei ne owe ape henetire. Fene meni ta etiyei su, fene Owane Sitewi lo lu owane aseyaro maꞌe etiyei ne henetire. 2 Wanure! Nowe yeꞌewi su, lu taune Jisas lo yo seni umasinamisiya ape, lowe awei lo yo seni werese au hese ereirowa. Fene awei lo yo seni werese au hese ereirowa su, fene lai faraꞌu pereye nowe eite se ai marepi oso oso aꞌi au hese ereirowa.a 3 Wanure! Fene, nomo aiwawe aꞌi lai Owane Sitewi lo ipari wisere aꞌi lo yo seni werese au hese ereirowa. Fene Owane Sitewi lo ipari wisere aꞌi lo yo seni au hese ereirowa su, pereye nowe eite se nomo ai marepi werese nomo lo au hese ereiyei. Ai marepi nomo lo oso oso aꞌi tene! 4 Serai fene lu tamo ai marepi nomo lo etiyei ne ei taꞌuweraiyei su, fene Owane Sitewi lo lu owane aseyaro tamo teꞌe ariariyere. Serai lowe ai marepi nomo lo faraꞌu wanu au hese ereiyei. 5 Etiri ape mo, ane fene maꞌe lesesiya ape, ane fene maꞌe au neritaseyeyei ne totesiya. Fene marepi apou totesiya. “Nomo lu owane werese ariye. Serai nomo ai marepi nomo lo awei lo lu owane maꞌe au etiyei ne henetiyei.” Wawero tene! 6 Kaiyemo ta fene maꞌe au luwaruweyei su, fene meni ape awei lo lu owane maꞌe au etiyei ne heneti. Wanure! Yo seni ape luwaru aꞌi ne.7 Kaiyemo ta fene maꞌe au luwaruweyei su, fene le ne awei lo meni owane maꞌe etiyei ne owe ape henetire. Le fene maꞌe au luwaruweyei su, fene etiri ta itiyaꞌu owe ape irore. Fene yo seni apou ape irowei, fene Owane Sitewi ani ararowei. Yo seni ape wisere aꞌi tene! Kaiyemo ta maꞌaru fene lo taꞌarei areareyei su, fene marepi luwaru aꞌi le maꞌe owe ape totere. Yo seni ape wisere aꞌi tene! 8 Ahowa! Fene kaiyemo ta awei lo lu owane maꞌe etiyei ne henetiyei su, fene lai kaiyemo ape aiwawe aꞌi ne. Fene kaiyemo ape maꞌe au luwaruweteyei. Sosu fene lai kaiyemo lo maꞌaru taꞌarei areare aniyei. 9 Lu taune werese Owane Sitewi lo yo umasi taꞌame ape, lowe Owane Sitewi lo omo hire maꞌe wirowata. Fene marepi towafi fene lo owe ape arearete. Lu taune yo seni luwaru aꞌi ironamisiya ape, lowe Owane Sitewi lo omo hire maꞌe wirowata. Lu taune tafaꞌe yo seni ironamisiya ape, lu taune god tereꞌe apeꞌi onu umasisiya ape, lu taune naituwei towafi lowe lo au luwaruwesiya ape, taune tamo tafaꞌe yo seni luwaru aꞌi ironamisiya. Lu tamo lu tereꞌe tafaꞌe yo seni luwaru aꞌi ironamisiya ape, lowe werese Owane Sitewi lo omo hire maꞌe wirowata. 10 Lu taune etiri maꞌaru taꞌarei anisiya ape, lu taune etiri siye wisereyenamisiya ape, lu taune saꞌi luwaru aꞌi a meremereyenamisiya ape, lu taune maꞌe au teꞌe narunamisiya ape, lu taune marepi areareyei totesiya ape, lu taune tereꞌe maꞌe ironamisiya ape, lowe werese ape mo Owane Sitewi lo omo hire maꞌe wirowata.b 11 Fene tamo, yo seni luwaru apou ape ironamiteye. Ahowa, Meni Owane Jisas Krais lo peri wanu umasinamiteye su, Owane Sitewi lai yo seni luwaru aꞌi fene lo ani sasari pamoweye. Le marepi hepene fene lo waraꞌi aꞌi au ironamiteye. Sosu le fene maꞌe eiye, “Ane nihe ano se marepi hepene fene lo waraꞌi aꞌi siyenamisiya.” Le Hepene Waraꞌi lo fene papu eimawesawi. Le Meni Owane Jisas Krais aiwawe aꞌi, lowesi fene maꞌe au pati anisiya. Serai Owane Sitewi lai yo seni werese fene lo au hese ereiteye. Fene maꞌe eiye, “Ane yo seni luwaru werese aꞌi fene lo au sasariye. Serai fene lu taune aseyaro aꞌi henerai.”c
Pol tafaꞌe yo seni luwaru aꞌi ape ne au teꞌesiya.
12 Fene apou teꞌesiya, “Meni Owane Krais yo seni luwaru aꞌi ano au sasari pamoweye su, ane faraꞌu yo seni werese werese aꞌi irowei.” Ahowa, ane fene maꞌe itiyaꞌu eiye, “Yo seni werese apou ape marepi hepene fene lo au pati anirowata. Ei, ane yo seni werese werese faraꞌu irowe. Ahowa, ane yo seni luwaru aꞌi lo kairefi aꞌi unahi sahe irorowata.”d 13 Fene apou eiye, “Owane Sitewi topo lai lire nomo lo au taꞌaneye. Serai nomo ayei ta ene ayei su, ayei ape tahe paꞌare nomo lo au pati aniyei.” Nowe yeꞌewi se Owane Sitewi lai lire sosu ayei werese au luwaruwe poꞌuterowa. Fene peri tereꞌe apou eiye, “Tafaꞌe yo seni luwaru aꞌi tahe paꞌare nomo lo ne au pati aniyei.” Wawero tene! Owane Sitewi lai tahe paꞌare nomo lo au taꞌaneye. Serai tahe paꞌare nomo lo topo lo ne. Serai nomo tafaꞌe yo seni luwaru aꞌi irowei su, nomo Owane Sitewi lo tahe paꞌare au luwaruweyei.e 14 Sosu Jisas me tapeꞌi sahe temeniyeye su, Owane Sitewi lai le si tame hene aniye. Sosu nomo aiwawe aꞌi. Nomo temeniyeyei su, Owane Sitewi lai kairefi lo se nomo si tame hene aniyei.f
15 Fene Jisas lo peri wanu tote tawesi umasinamiteye su, fene lai Krais lo tahe paꞌare tewi aꞌi henerai. Serai fene tafaꞌe yo seni luwaru aꞌi irowei su, fene tafaꞌe yo seni luwaru aꞌi Krais lo tahe paꞌare sahe irowei. Fene yo seni luwaru aꞌi ape owe ape irote!g 16 Meni ta tafaꞌe yo seni luwaru aꞌi, tafaꞌe menitani maꞌe irowei su, le tahe taꞌi aꞌi menitani ape aiwawe aꞌi heneraiyei. Owane Sitewi lai tu naifa weriyei apou eiye,
“Lowesi tahe taꞌi aꞌi heneraiyei.”h Stt 2:24
17 Serai meni ta Meni Owane Pefine aꞌi maꞌe tote tawesiyei su, meni ape hepene taꞌi aꞌi le aiwawe heneraiyei.i
18 Fene tafaꞌe yo seni luwaru aꞌi ape meꞌiyeni maꞌe atati tei arunatite! Yo seni luwaru aꞌi werese tereꞌe tahe paꞌare fene lo nowe maꞌe ironamisiya. Ahowa, meni ta tafaꞌe yo seni luwaru aꞌi irosiya ape, le tahe paꞌare topo lo maꞌe au luwaruwesiya. 19-20 Fene Jisas lo peri wanu umasinamiteye su, Owane Sitewi lai Hepene Waraꞌi aꞌi lo marepi hepene fene lo papu eimawesai. Serai tahe paꞌare fene lo Owane Sitewi lo Hepene Waraꞌi lo wesi henerai. Jisas me tapeꞌi sahe temeniyeye su, le yo seni luwaru werese aꞌi fene lo ani ete sasari pamoweye. Serai tahe paꞌare fene lo, towafi fene lo taꞌama. Owane Sitewi topo lai tahe paꞌare fene lo ani tepaꞌasiye. Peri eite wiyeme aꞌi tene. Fene peri eite fa wanu umasite. Serai fene tahe paꞌare fene lo se yo seni aseyaro waraꞌi irote. Fene tafaꞌe yo seni luwaru aꞌi owe ape irote. Tahe paꞌare fene lo se, fene Owane Sitewi lo iyape ei ani arowete.j