6 Peri eite ane fene maꞌe eisiya ape, marepi ano aꞌi ne. Ane fene maꞌe peri kairefi aꞌi se au teꞌe taꞌame. 7 Marepi ano apou aꞌi totesiya. Lu werese yoꞌorei ki ane wou aꞌi ironamisiya. Ahowa, Owane Sitewi lai lu taꞌi taꞌi aꞌi marepi tereꞌe tereꞌe auwe. Owane Sitewi lai meni ta maꞌe marepi naituwe wou aꞌi auwe. Sosu le meni tereꞌe marepi yoꞌorei ki aꞌi auwe.

8 Ahowa, ane yoꞌorei ki, watiꞌare ki, taune weiname werese maꞌe apou eisiya. Fene yoꞌorei, watiꞌare, weiname iroteye su, fene seni wisere aꞌi irowei. Ane wou aꞌi ne. 9 Ahowa, ane lu maꞌe apou eisiya. Fene mi mi weriyei menitani ta naituwe ne totenamisiya su, fene menitani ape se naiture. Sosu aiwawe aꞌi taune werese fene mi mi weriyei meni ta naituwei ne totenamisiya su, fene meni ape se naiture. Fene naituwei su, yo seni fene lo wisere aꞌi ne. Ahowa, fene marepi totenamisiya. Sosu naitu taꞌame su, fene marepi tafaꞌe luwaru erasi aꞌi tote heneraiyei. Serai fene faraꞌu naiture. Yo seni wisere aꞌi ne.^a

10 Topo ane aꞌi lai lu taune naituwei ape maꞌe peri ta au teꞌe atuatuwei. Ahowa, ane peri ta au teꞌe atuaturowata. Meni Owane Pefine aꞌi lo peri ane faraꞌu fene maꞌe au teꞌe atuatuwei. Meni Owane Pefine aꞌi lo peri apou aꞌi teꞌesiya, “Menitani ta meni lo owe ape arunatire.”^b 11 Ahowa, menitani ta meni lo arunatiyei su, le taune watiꞌare mi mi weriyei ironamiteyei. Menitani ta meni lo arunati taꞌame su, le meni lo ne marepi orese aꞌi fareraiyere. Serai lowesi si tame taꞌuweraiyei. Sosu aiwawe lu werese, lowe tani lowe lo owe ape eimawesawire.

12 Sosu ane fene tereꞌe maꞌe eisiya. Peri ape, ane eisiya ape, topo ano ne. Meni Owane Pefine aꞌi lo peri taꞌame. Meni ta Jisas lo yo seni umasinamisiya ape, menitani taꞌi Jisas lo yo seni umasi taꞌame ape, lowesi naituwei. Menitani lo marepi apou aꞌi totesiya su, “Ane faraꞌu meni ano mase ironamiteyei.” Meni ape tani lo owe ape eimawesawire. 13 Sosu aiwawe aꞌi menitani Jisas lo yo seni umasinamisiya ape, le meni ta Jisas lo yo seni umasi taꞌame ape, naituwe su, meni ape lo marepi apou totesiya, “Ane tani ano mase faraꞌu ironamiteyei.” Menitani ape meni lo owe ape arunatire. 14 Menitani ta Jisas lo yo seni umasinamisiya ape, sosu meni lo Jisas ne umasi taꞌame ape, Owane Sitewi lo nihe se lowesi marepi hepene lowesi lo taꞌi aꞌi ironamisiya. Aiwawe aꞌi meni ta Jisas lo yo seni umasinamisiya ape, sosu tani lo Jisas ne umasi taꞌame ape, Owane Sitewi lo nihe se marepi hepene lowesi lo taꞌi aꞌi ironamisiya. Owane Sitewi lo nihe se marepi hepene lowesi lo hesi aꞌi ironamisiya su, eimane werese lowesi lo awei lo eimane heneraiyei. Ahowa, lowesi marepi hepene taꞌi aꞌi ironamisiya su, eimane werese lowesi lo aseyaro aꞌi heneraiyei. 15 Meni ta Jisas ne umasi taꞌame ape tani lo arunatiyei ne toteyei su, meni ape faraꞌu irowa. Menitani ape lai meni lo, arunatiyei ne toteyei ape, owe ape ti tawesire. Aiwawe aꞌi menitani ta, Jisas ne umasi taꞌame ape, meni lo arunatiyei ne toteyei su, menitani ape faraꞌu irowa. Owane Sitewi lo marepi apou aꞌi totesiya. Lowesi marepi fetane aꞌi ironamite.^c 16 Menitani, ne etiri ta soꞌoru taꞌama. Ne meni no Jisas maꞌe henetirowa awere? Piyete awere? Meni, ne aiwawe aꞌi etiri ta soꞌoru taꞌama. Ne tani no Jisas maꞌe henetirowa awere? Piyete awere?^d

17 Owane Sitewi lai lu taune werese taꞌi taꞌi aꞌi ariariyeye. Le aꞌi lai lu taune werese lo marepi siye soꞌoruwesiya. Serai Owane Sitewi meni ta yoꞌorei ki ironamiyei ne ariariyeyei su, meni ape yoꞌorei ki fa ironamite. Aiwawe aꞌi Owane Sitewi meni ta menitani naituwei ne ariariyeyei su, lowesi fa naiture. Aiwawe aꞌi Owane Sitewi menitani ta ariariyeyei su, le Owane Sitewi lo marepi fa umasire. Ane peri eite lu taune werese maꞌe Owane Sitewi lo wesi omo omo werese sahe au teꞌe atuatu areiyesiya. 18 Meni ta Juda lo seni anite tawesisiya ape, le moꞌo Jisas lo yo seni umasinamiteyei. Meni ape tahe lo touwe ape, le tahe lo si tame naterairowata. Aiwawe aꞌi awei lo meni ta Jisas lo yo seni wanu umasinamiteyei su, Juda lo lu tamo tahe lo owe ape toure. 19 Meni ta tahe lo au touwei su, seni ape yahowaꞌi aꞌi ne. Sosu aiwawe aꞌi meni ta tahe tou taꞌame su, seni ape yahowaꞌi aꞌi ne. Etiri erasi aꞌi apou aꞌi totesiya. Lu taune werese Owane Sitewi lo peri werese aꞌi fa wanu umasinamite.^e 20 Owane Sitewi lai meni ta, tahe lo touwe ape, ariariyeye su, le tahe touwe seni ape se aiwawe aꞌi ironamite. Aiwawe aꞌi Owane Sitewi lai meni ta, tahe lo tou taꞌame ape, ariariyeye su, meni ape tahe lo tourowata. 21 Owane Sitewi fene ariariyeye su, fene wiyawi yahowaꞌi ani siye lu taune awere? Fene marepi erasi aꞌi owe ape totete. Ahowa, fene wiyawi yahowaꞌi aꞌi arunatiyei su, etiri wisere aꞌi ne. 22 Owane Sitewi lai meni ta wiyawi yahowaꞌi taꞌaneteye ape, ariariyeteye. Sosu meni ape Owane Sitewi lo peri wanu umasinamiteyei su, Meni Owane Pefine aꞌi meni ape lo yo seni luwaru aꞌi ani sasari pamoweyei. Serai Owane Sitewi lo nihe se, sosu meni ape wiyawi yahowaꞌi taꞌane siye meni taꞌame. Sosu aiwawe aꞌi meni ta wiyawi maꞌaru ani siye meni Owane Sitewi lai meni ape peri lo wanu umasiyei ne ariariyeye su, meni ape Owane Sitewi lo nihe se, Meni Owane Krais lo wiyawi yahowaꞌi taꞌane siye meni heneraiyei.^f 23 Fene werese Jisas lo yo umasinamisiya ape, Krais lai yo seni luwaru werese fene lo eteye. Serai fene awei lo yo seni luwaru aꞌi owe ape umasite. Fene awei lo yo seni luwaru lo kairefiyei unahi owe ape ironamite. Apou aꞌi fene wiyawi yahowaꞌi taꞌane siye lu heneraiyei. 24 Kaiyemo mo, lu taune werese Owane Sitewi lo yo seni umasinamiteyei ape ne, meni ta wiyawi yahowaꞌi siye meni, irosiya ape, le apou aꞌi ironamiyei. Meni ta wiyawi maꞌaru ani siye ape, le apou aꞌi ironamiyei.

25 Sosu aꞌi pe ane taune watiꞌare ne au teꞌesiya. Meni Owane Pefine ane maꞌe fene ne au teꞌe taꞌame. Ahowa, ane marepi ano fene maꞌe au teꞌesiya. Meni Owane Pefine aꞌi lai ferafereiyei lo se ane maꞌe marepi wisere aꞌi auwe. Serai peri ano wiyeme aꞌi ne.

26 Nowe pereye eite se nomo marepi orese luwaru aꞌi tamo teritesiya. Serai ane marepi ano fene maꞌe au teꞌesiya. Meni ta yoꞌorei ki irosiya ape, le yoꞌorei ki ironamiteyei. Meni ta naituwei irosiya ape, le apou aꞌi ironamiteyei. Yo seni eite wisere aꞌi tene! 27 Fene menitani ta naitu ene anamisiya awere? Fene tani fene lo si omo lo maꞌe owe ape eimawesawire. Fene ta tani lo si tame eimawesawi ape, fene menitani tereꞌe owe ape naiture. 28 Wanure! Yoꞌorei meni ta menitani taꞌi naituwei su, le yo seni luwaru aꞌi iro taꞌame. Sosu aiwawe aꞌi menitani watiꞌare ta meni taꞌi naituwei su, le yo seni luwaru aꞌi iro taꞌame. Lowesi naituwei su, etiri luwaru aꞌi tomu neꞌese lowesi maꞌe heneraiyei. Fene naituwei taꞌama su, etiri orese aꞌi fene maꞌe aweraꞌiyenatiyei. Ane peri eite fene maꞌe au pati aniyei ne au teꞌesiya. Serai etiri orese aꞌi fene sahe aweraꞌiyenatiyei.

29 Ahowa, ane peri eti fene maꞌe au teꞌesiya. Kaiyemo mo, nowe ataheye poꞌutesiya, lu taune naituwei ape, lowe Meni Owane Pefine ne tote tawesi etinamite. Apou wou aꞌi lowe yoꞌorei ki, watiꞌare ki fa ironamite. 30 Lu taune ape mo marepi orese aꞌi se lusiya ape, lowe marepi orese towafi lowe lo owe ape totenamite. Ahowa, lowe Owane Sitewi ne tote tawesi etinamite. Lowe marepi erasi se niyeyeisiya ape, lowe lu taune marepi orese aꞌi teritesiya ape, fa irote. Lowe etiri tamo etesiya ape, lowe lu taune etiri eterowata ape, fa irote. 31 Lu taune awei lo wiyawi ironamisiya ape, lowe lu taune awei lo etiri ape mo tote taꞌame ape, fa irote. Etiri werese awei sahe irosiya ape, nowe meꞌiye su ataheye poꞌuterowa.^g

32 Fene peri ano siye teꞌeyei su, fene marepi orese aꞌi owe ape totere. Ahowa, yoꞌorei ki, watiꞌare ki lowe marepi erasi aꞌi Meni Owane Pefine aꞌi ne totenamiyei. Apou totesiya, nomo Meni Owane Pefine aꞌi mi mi weriyei au wisereyeyei ne totesiya. 33 Meni ta naituwe ape, le awei lo etiri ape mo erasi aꞌi totenamisiya. Apou aꞌi teꞌesiya, “Ane tani ano maꞌe au wisereyeyei ne totesiya.” Sosu aiwawe ane Owane Sitewi ne marepi erasi aꞌi totenamisiya. 34 Serai marepi lo se ironamisiya. Sosu aiwawe taune watiꞌare ne, lowe Meni Owane Pefine aꞌi erasi aꞌi totenamisiya. Tahe paꞌare lo, hepene lo aiwawe aꞌi aseyaro waraꞌi ironamitorowa. Ahowa, menitani ta naitu ene ayei ape, le awei lo etiri ape mo erasi aꞌi totenamisiya. Le meni lo erasi aꞌi au teꞌe wisereyeyei ne totesiya.

35 Sosu ane etiri werese eite mo fene maꞌe au teꞌe areiyeyei su, ane fene maꞌe au pati aniyei ne totesiya. Ane marepi fene lo einamiyei ne toterowata. Marepi ano apou aꞌi totesiya. Fene marepi hepene aseyaro aꞌi fene lo lu taune maꞌe au teꞌe atuatuteyei. Sosu fene werese marepi taꞌi aꞌi Meni Owane Pefine aꞌi ne totenamite.

36 Meni ta menitani watiꞌare naituwei ne ariariyeye su, le apou toteye, “Ane Pol lo peri umasite. Serai ane menitani ano naiturowata.” Sosu meni ape menitani lo siye wisereyesiya su, marepi lo kairefi se taꞌame. Meni ape apou aꞌi totesiya su, le faraꞌu marepi lo umasiyei. Le menitani lo naiture. Yo seni lowesi lo wisere aꞌi ne. 37 Meni ta marepi sahe kairefi erasi aꞌi se totenamisiya su, le apou eisiya, “Menitani ape ane naituwei ne ei ariariyeye ape, ane le naiturowata. Ane menitani ape arunatiyei. Ane le naiturowata. Mi mi werese ane Meni Owane Pefine aꞌi ne totenamiyei.” Serai le menitani ape naitu taꞌame. Le Meni Owane Pefine aꞌi ne totenamiteye. Yo seni lo ape wisere aꞌi ne. 38 Serai meni ape menitani lo naituwei su, le yo seni wisere aꞌi ironamiyei. Sosu aiwawe aꞌi meni ta marepi kairefi aꞌi se Meni Owane Pefine aꞌi ne totenamiyei su, menitani lo naitu taꞌame. Owane Sitewi lai yo seni lo ape au wisereyeyei.

39 Tani ta meni lo naitu ene ari. Meni ape temeniyeyei su, lowesi lo naituwei tepaꞌasiye. Marepi lo meni tereꞌe faraꞌu naituwei ne toteyei. Meni tereꞌe Jisas lo yo umasinamite.^h 40 Ahowa, marepi ano apou aꞌi totesiya, tani lo meni temeniyeye su, le taune weiname ironamisiya. Menitani lo marepi wisereye nineꞌisiya. Ane apou aꞌi totesiya. Sosu ane Owane Sitewi lo Hepene Waraꞌi aꞌi marepi hepene ano papu irosiya. Serai peri ano wanure!