Fe loꞌu god wawero tamo maꞌe au heseyei lo peri.
8
Sosu aꞌi pe ane peri tereꞌe fene maꞌe au teꞌesiya. Lu taune tamo fe tereꞌe tereꞌe aine teraꞌeyewe, god wawero maꞌe au heseye.ba Ane aiwawe aꞌi totesiya. “Fene werese etiri werese werese soꞌoruwesiya.” Fene etiri werese soꞌoruwe tepaꞌasiyei su, fene lu kuseriyei henerai. Ahowa, fene lu taune maꞌe marepi erasi aꞌi tote wawesiyenamisiya su, fene lu taune tereꞌe au kairefiye tiyatirowa.c 2 Meni ta apou totesiya, “Ane etiri werese siye soꞌoruwe tepaꞌasiye.” Meni ape lo marepi luwaru aꞌi totesiya. Meni ape lo soꞌoruweyei poꞌuteye tene! 3 Lu taune tamo Owane Sitewi ne marepi erasi aꞌi tote wawesiyesiya su, le aꞌi lai lowe siye soꞌoruwe tepaꞌasiye.4 Serai fe loꞌu tewi ene ayei ne, lowe god wawero maꞌe au heseye ape, ane fene maꞌe au teꞌesiya. Fene fe loꞌu tewi ene ayei su, fene yo seni luwaru aꞌi iro taꞌame. Nomo etiri ape soꞌoruwe tene! Omo omo werese sahe god wawero werese aꞌi yahowaꞌi aꞌi ne. Owane Sitewi wiyeme taꞌi aꞌi ne! God wawero tereꞌe tereꞌe tamo se taꞌama.d 5 Lu taune tomu neꞌese apou teꞌesiya, “God tomu neꞌese hire maꞌe irosiya. Sosu hi awei sahe lowe nomo au noweinoweinamisiya.” 6 Ahowa, nomo Jisas lo yo umasinamisiya ape, Owane Sitewi wiyeme taꞌi aꞌi nomo ne au noweinoweinamisiya. Le Owane Sitewi Tai Pefine aꞌi nomo lo ne. Le aꞌi lai etiri werese taꞌaneye. Serai le aꞌi lai nomo taꞌaneye su, nomo mi mi weriyei le ne fa totenamite. Meni Owane Pefine taꞌi aꞌi irosiya. Iyape lo Jisas Krais. Owane Sitewi lai meni eime lo maꞌe apou eiye, “Ne etiri werese fa taꞌanere.” Sosu le etiri werese taꞌaneye. Serai nomo Krais lo peri wanu tote tawesi umasinamiyei su, le marepi hepene nomo lo heꞌi aseyaro aꞌi taꞌaneye. Serai lu tamo god wawero taꞌaneye ape, god wawero ape nomo au noweinoweirowata.e
7 Ahowa, wanure! Lu taune tamo peri eite soꞌoru taꞌama. God wawero werese aꞌi yahowaꞌi aꞌi ne. Lu taune tamo god wawero meꞌiyeni maꞌe atati arunati su, lowe fe loꞌu ne, god wawero auwe ape, marepi erasi aꞌi totesiya. Lowe apou aꞌi totesiya, “Fe loꞌu tewi ape, god wawero maꞌe auwe ape, kairefi aꞌi irosiya. Serai ane fe loꞌu tewi ayei su, ane yo seni luwaru aꞌi irowei.” Lowe etiri ta soꞌoru taꞌama. Sosu marepi lowe lo kairefi se taꞌame. God wawero werese ape mo yahowaꞌi ne. 8 Nomo Owane Sitewi lo nihe se lu taune waraꞌi aꞌi henerai. Nomo piye etiri irowei awere? Nomo fe loꞌu tewi, god wawero auwe ape, ene ayei su, nomo lu taune waraꞌi aꞌi heneraiyei awere? Ahowa! Nomo fe loꞌu tewi ape ene ayei taꞌama su, nomo lu taune waraꞌi aꞌi heneraiyei awere? Ahowa! Nomo fe loꞌu tewi ape ene ayei su, etiri yahowaꞌi aꞌi ne. Aiwawe aꞌi nomo fe loꞌu tewi ene a taꞌame ape, nomo yo seni ape umasiyei su, etiri yahowaꞌi aꞌi ne. Nomo lu taune waraꞌi aꞌi henerairowata.
9 Wanure! Weiyai! Fene fe loꞌu tewi god wawero au heseye ape, ene ayei su, fene yo seni luwaru aꞌi iro taꞌame. Ahowa, fene fe loꞌu ape ene ayei su, meni ta fene siyeyei. Le apou toteyei, “Meni ape yo seni luwaru aꞌi irowe.” Fene meni ape marepi orese aꞌi au irowei su, fene fe loꞌu tewi owe ape ene ate!f 10 Fene, god wawero yahowaꞌi aꞌi soꞌoruwesiya ape, god wawero lo wesi sahe onu ene ayei su, fene apou toteyei, “Ane faraꞌu fe loꞌu tewi ape ayei.” Serai lu taune werese Owane Sitewi ne tote tawesisiya ape faraꞌu fe loꞌu ape ene ayei. Fene apou totesiya su, fene meni tereꞌe ta lo tote tawesiyei au luwaruweyei. Serai meni ta fene fe loꞌu tewi ape ayei siyeyei su, fene lai meni ape lo tote tawesiyei au luwaruweyei. Fene lai yo seni luwaru aꞌi irowei. 11 Fene meni ape maꞌe apou teꞌeyei. “Ne fe loꞌu ape faraꞌu are.” Serai meni ape marepi lo kairefi se taꞌama. Le fe loꞌu ayei su, fene meni ape lo marepi au luwaruweyei. Meni ape ne Meni Owane Jisas Krais lai me tapeꞌi sahe au temeniyeye.g 12 Fene meni ape maꞌe, Kaiyemo nomo lo, seni luwaru aꞌi au irowei su, sosu marepi lo, kairefi se taꞌama ape, au luwaruweyei su, fene Krais maꞌe yo seni luwaru aꞌi irowei. 13 Serai ane fe loꞌu tewi ayei su, meni ta lo marepi au luwaruweyei su, ane fe loꞌu tewi werese amouweyei. Ane kaiyemo lo marepi eiwerou au luwaruwerowata.h