Pol lai Aposel lo wiyawi yahowai taꞌaneyei ne nineꞌi.
9
Owane Sitewi lai ane Aposel lo heneraiyei ne ariariyeye. Jisas lai ane ei ariariyeye. Sosu le lu taune werese maꞌe Jisas lo peri au teꞌe fiyariyei ne eimawesawi. Ane Meni Owane Jisas siyeye. Ane fene maꞌe fai su, ane Owane Sitewi lo peri au teꞌe areiyeteye. Fene peri ano wanu umasiteye. Serai fene Meni Owane Pefine aꞌi ne wanu tote tawesi umasiteye. Serai le ane Aposel lo heneraiyei ne ei ariariyeye su, fene peri ano wanu umasite.a 2 Lu taune tereꞌe tamo apou teꞌeye, “Owane Sitewi lai meni Pol nomo maꞌe au teꞌe fiyariyei ne eimawesai taꞌama.” Ahowa, fene werese maꞌe Owane Sitewi lai ane peri lo au teꞌe fiyariyei ne eimawesawi. Fene peri ano wanu umasinamiteye su, fene apou soꞌoruwesiya, “Meni Owane Pefine aꞌi lai Pol au teꞌe fiyariyei ne ariariyeye.” Fene lai yaru ano ne.b3 Lu taune ane maꞌe yo seni luwaru aꞌi fu teꞌeyei su, ane peri ano lowe maꞌe itiyaꞌu au teꞌerowa. 4 Ane, lu tewi ano aiwawe aꞌi, Meni Owane Jisas lo wiyawi ironamisiya su, Owane Sitewi ane maꞌe eiye, “Ne faraꞌu ayei tamo lu taune maꞌe ausaiyei ne ei towerisiya.” Lu taune tamo nomo maꞌe ayei itiyaꞌu auwei. Saꞌi aiwawe itiyaꞌu auwei.c 5 Nomo Owane Sitewi lo peri au teꞌeyei ne iyei su, nomo faraꞌu tani nomo lo, Jisas lo yo umasinamisiya ape, aiwawe henetiyei. Jisas lo lu feni werese taune lowe lo aiwawe aꞌi heneti. Meni Owane Pefine aꞌi ape lo paꞌise werese lowe Owane Sitewi lo peri au teꞌeyei ne fi su, lowe taune lowe lo werese aiwawe aꞌi heneti. Pita, iyape tereꞌe Sifas, aiwawe aꞌi tani lo heneti. 6 Piyene Barnabas notosi Owane Sitewi lo peri au teꞌe fiyariye su, lu taune tamo notosi maꞌe ayei nonetai taꞌame awere? Lowe Owane Sitewi lo wiyawi lu tereꞌe maꞌe ayei tamo ene ayei ne nonetisiya. Ahowa, notosi awei lo wiyawi taꞌaneye. Sosu maꞌaru se ayei ne eteye ne. 7 Ai atu siye lu werese, meni owane lowe lo maꞌaru lowe maꞌe auwei. Serai lowe ayei ta eteyei ne. Lu tamo taꞌaneyei awei sahe me so tamo sameyei su, loꞌu awei sahe irowei ape, le me so werese faraꞌu ayei. Aiwawe aꞌi lu tamo fe au noweinoweiyei ape, fe loꞌu tewi lo, le faraꞌu ayei. Lowe wiyawi lowe lo taꞌaneyei su, lowe loꞌu tewi ta lowe lo faraꞌu ene ayei. Sosu saꞌi ene ayei.
8 Peri eite ane fene maꞌe au teꞌesiya ape, Marepi ano aꞌi taꞌame ne! Tu naifa Moses lo yo peri, one towe sahe aꞌi au leseye. 9 Meni ape, Moses, apou au leseye.
“Fe bulmakau kewi so aine towesiyei su, fene fe bulmakau lo ahi owe ape ti tawesire. Kewi so tewi aꞌi faraꞌu ayei.” Lo 25:4
Owane Sitewi yo peri ape au teꞌeye su, le fe bulmakau ape ne aꞌi au totesiya awere?d 10 Ahowa, le nomo werese ne totenamisiya. Tu naifa le nomo ne apou au leseye, “Meni ta taꞌaneyei awei horuse futirowawe, me so sameyei su, fene lai me so pereꞌe ninaweteyei. Aiwawe aꞌi meni tereꞌe ta kewi so aine towesiyei su, le aiwawe aꞌi kewi so ninaweteyei. Lowesi tewi aꞌi tewi aꞌi aniyei.”e 11 Nomo aiwawe aꞌi ne. Nomo fene maꞌe Owane Sitewi lo peri au teꞌeteye su, fene Krais lo peri wanu eti umasinamiteye. Serai nomo wiyawi taꞌaneyei ape, fene awei lo etiri nomo maꞌe itiyaꞌu fa aure.f 12 Lu tereꞌe tamo Owane Sitewi lo peri fene maꞌe au teꞌe fiyariye su, fene etiri maꞌaru tamo lowe maꞌe auwe. Serai nomo fene maꞌe Owane Sitewi lo peri au teꞌe fiyariye, fene piyene etiri maꞌaru tamo nomo maꞌe au taꞌame awere? Owane Sitewi lai nomo peri lo au teꞌeyei ne ei ariariyeye. Serai lu taune werese peri lo wanu tote umasisiya su, Owane Sitewi lowe maꞌe eiye, “Fene werese wiyawi lu ano etiri maꞌaru tamo aure.” Ahowa, nomo fene maꞌe fai su, nomo etiri maꞌaru fene lo nomo maꞌe teꞌe toweri taꞌame. Ahowa, nomo marepi orese aꞌi fene maꞌe au wou taꞌama. Nomo Krais lo peri heneruwe wisere aꞌi nepawe amerame aꞌi sahe fene maꞌe au teꞌereme. Serai lu taune werese le ne tote tawesi umasite.g 13 Peri eite wiyeme aꞌi ne. Au heseyei lu owane, lowe fe sipsip Owane Sitewi maꞌe au heseyei su, lowe faraꞌu fe sipsip loꞌu tewi ene ayei. Aiwawe aꞌi lu tamo Owane Sitewi lo wesi tutawe lo wiyawi taꞌanesiya ape, lowe fe sipsip loꞌu tewi aꞌi, Owane Sitewi maꞌe au heseyei ape, ene ayei.h 14 Serai Meni Owane Pefine aꞌi nomo maꞌe apou au teꞌeye, “Nomo Krais lo peri au teꞌe fiyariyei su, lu taune ape mo Krais lo peri wanu tote umasiteye ape, lowe faraꞌu maꞌaru etiri tamo nomo maꞌe aurowa.”i
15 Ane fene mase iroteye su, ane fene maꞌe apou ei toweri taꞌame. “Fene ayei tamo ausa.” Sosu ane one towe eite fene maꞌe lese ausawi su, ane fene ne apou tote taꞌame, “Fene ayei tamo ane maꞌe fa aure.” Ahowa, ane ataheye temeniyeyei su, ane fene maꞌe ayei tamo ei towerirowata. Serai lu taune peri ano wanuwei su, lowe ane ne toteyei, “Ane Krais lo peri neri aꞌi au teꞌerowa.” 16 Ane Owane Sitewi lo peri au teꞌe fiyariyei su, ane iyape topo ano ei ani arowerowata. Owane Sitewi lai ane maꞌe apou eiye, “Ne peri ano au teꞌe fiyarite.” Serai ane peri lo fu umasiyei. Ane Owane Sitewi lo peri au teꞌe fiyari taꞌame su, Owane Sitewi lai ane maꞌe etiri luwaru aꞌi ta irowei.j 17 Ane marepi ano apou toteyei su, “Ane Owane Sitewi lo peri au teꞌe fiyarite.” Wiyeme ai. Ane faraꞌu maꞌaru aniyei. Ahowa, Owane Sitewi lai wiyawi ape ane maꞌe auwe. Serai ane marepi pefine aꞌi lo umasite. Ane wiyawi ape maꞌaru tamo aniyei ne irorowata. 18 Ane Owane Sitewi lo peri au teꞌe fiyariyei su, ane piye etiri aniyei awere? Etiri ape ane aniyei ape, apou wou aꞌi ne. Ane marepi wisere erasi aꞌi teritenamisiya. Serai ane Owane Sitewi lo peri neri aꞌi au teꞌe fiyariyei. Ane Owane Sitewi lo peri au teꞌe fiyariyei su, ane maꞌaru tamo anirowata. Serai ane fene maꞌe ayei tamo ausaiyei ne ei towerirowata.
19 Wiyeme aꞌi, ane aꞌi lai wiyawi werese ano au noweinoweisiya. Lu taune werese lowe wiyawi ano au noweinowei taꞌame. Ane lu tamo lo wiyawi yahowaꞌi iro siye meni taꞌame. Ahowa, ane lu taune werese lo wiyawi yahowaꞌi iro siye meni wou henerai. Ane wiyawi yahowaꞌi siye meni heneraiyei su, ane lu taune tomu neꞌese Jisas maꞌe henetiyei. 20 Juda lo lu taune werese ne, ane lai Juda lo meni henerai. Serai ane Juda lo lu taune tomu neꞌese Jisas maꞌe henetiyei. Lu taune werese Moses lo yo peri umasinamisiya ape ne, ane Moses lo yo peri umasisiya. Ahowa, ane Moses lo yo peri umasisiya su, ane Jisas lo yo seni aweraꞌiyenati taꞌame. Ane Moses lo yo peri umasisiya su, lu taune tomu neꞌese Moses lo yo peri umasinamisiya ape, ane lowe Jisas maꞌe henetiyei.k 21 Lu taune werese awei lo yo seni umasinamisiya su, ane Moses lo yo peri aweraꞌiyenati. Serai ane awei lo lu taune Jisas maꞌe henetiyei. Ane Moses lo yo peri aweraꞌiyenatiyei su, ane Krais lo yo seni aweraꞌiyenati taꞌama. Ahowa, ane Krais lo yo seni umasinamisiya. 22 Lu taune, Jisas lo peri wanu umasiteye ape, lowe Jisas lo yo seni tei kairefiye taꞌame su, ane yo seni lowe lo wou umasiteye. Ane lowe aiwawe aꞌi heneraiyei su, ane lowe Jisas maꞌe henetiyei. Ane lu taune werese lo yo seni umasiteyei. Lowe yo seni ano siyeyei su, ane faraꞌu lowe Jisas maꞌe henetiyei. Ane wiyawi ape taꞌaneyei su, ane lowe Jisas maꞌe tohote henetiyei.l
23 Ane Jisas lo peri heneruwe ne marepi erasi aꞌi totenamisiya. Serai ane etiri werese taꞌaneyei. Ane Jisas lo peri au teꞌe fiyariyei su, lu taune Jisas lo peri wanu umasiyei. Lowe Jisas lo peri wanu umasiyei su, ane lowe ne marepi erasi aꞌi wisereye nineꞌirowa.
24 Sosu aꞌi pe paꞌeyei iteroti ape, heneraiyei su, lu tomu neꞌese iterotiyei. Meni taꞌi aꞌi tutawe iteroti heneriyei. Le etiri wisere aꞌi ta aniyei. Fene Owane Sitewi lo wiyawi irowei su, fene wiyawi tohotenamite. Apou aiwawe aꞌi, meni ta tutawe heneriyei ne iteroti. Serai Owane Sitewi lai etiri wisere aꞌi ta fene maꞌe aurowa. 25 Lu werese paꞌeyei iterotiyei ape, lowe marepi taꞌi aꞌi toteyei. Le tutawe heneriyei ne iterotiyei. Le tutawe heneraiyei ne iterotiyei su, lowe meni ape lo mato sahe motowe ti lese yose atatiyei. Ahowa, motowe yoseti ape witane aꞌi uwaseyei. Nomo Owane Sitewi lo wiyawi taꞌaneyei su, Owane Sitewi lai nomo maꞌe etiri ta, uwase taꞌame ape, aurowa.m 26 Serai ane paꞌeyei iteroti heneriyei su, ane marepi taꞌi aꞌi totenamiyei. Ane ereti se atuwei su, ane ereti se fiyaru maꞌe aine fu taꞌame. Apou aiwawe aꞌi, meni ta hare neiyei ne toteyei. Le towei ereti feni hesi nei taꞌame. Ahowa, le hare neiyei su, le hare siye etiyewe, towei farere aꞌi neiyei. Ane aiwawe aꞌi ne. Ane Owane Sitewi lo wiyawi taꞌaneyei su, ane marepi taꞌi aꞌi toteyei. 27 Meni ta paꞌeyei itero heneriyei su, le tahe paꞌare lo au kairefiye irowei. Apou aiwawe aꞌi, meni ta tahe lo sahe me wisu seꞌiyei. Serai tahe lo kairefi aꞌi heneraiyei. Tahe kairefi aꞌi heneraiyei su, le tutawe heneriyei ne paꞌeyei iterotiyei. Ane aiwawe aꞌi. Ane Owane Sitewi lo peri lu taune maꞌe au teꞌe fiyariyei su, ane marepi ano au kairefi ironamiyei. Ane marepi ano kairefi aꞌi iro taꞌame su, Owane Sitewi ane maꞌe apou au eiyei, “Ne peri ano arisiye.” Serai ane marepi ano fu au tote kairefiye irowei.n