God wawero aꞌi ne, fene weiya!
10
Kaiyemo mo, fene peri ta apou wanuwe. Ane fene maꞌe tame teꞌesiya. Tu naifa weriyei, Owane Sitewi lai yaꞌariyei nomo lo niꞌarawe tewi aꞌi se yo lowe lo ariariyeye. Lowe saꞌi erasi aꞌi iyape, Saꞌi Loꞌu aꞌi, henerai su, Owane Sitewi lai Saꞌi Loꞌu aꞌi aine tou apuweye. Serai lowe werese awei foroꞌo aꞌi sahe Saꞌi Loꞌu aꞌi toneri.a 2 Serai Moses lowe aiwawe aꞌi aitu sapu siye umasiti. Owane Sitewi Saꞌi Loꞌu aꞌi aine tou apuweye su, Moses lowe aiwawe aꞌi saꞌi ape toneri. Owane Sitewi lai lowe werese Moses lo ereti sahe auwe. Sosu lowe werese Moses moꞌo umasitiye. Apou aiwawe aꞌi, Owane Sitewi lai lowe werese Moses lo iyape se saꞌi au huwe. 3 Lowe lau erasi teriteye su, Owane Sitewi lai nau taꞌase, omo hire maꞌe fai ape, au arosai.b 4 Lowe saꞌi wawe toteye su, Owane Sitewi lai Krais hi maꞌe eimawe arosai. Le tapiye wou henerai. Serai tapiye ape lowe maꞌe saꞌi au aye. Tapiye ape, Krais tene! Le lowe werese moꞌo umasinamiye. Serai le lowe maꞌe au noweinoweinamiye.c 5 Owane Sitewi lowe maꞌe etiri tomu neꞌese aunamiteye. Ahowa, lowe Owane Sitewi lo peri arisinamiteye. Serai Owane Sitewi lowe maꞌe ai marepi totenamiye. Le lowe werese ipo ariye aꞌi maꞌe eimawesawi. Lowe werese, peri lo arisiye ape, Owane Sitewi lai lowe werese aine teraꞌeyei ne toteye.d6 Owane Sitewi lai lu tewi lo aine teraꞌe fiyariteye su, le nomo maꞌe au atuatuteye. Nomo etiri tamo siye wisereyesiya su, Owane Sitewi lo lu tewi wou irowe ape, le ai marepi nomo maꞌe totenamiyei. Le nomo maꞌe apou au teꞌesiya, “Fene etiri tamo owe ape siye wisereyete.”e 7 Tu naifa Owane Sitewi lo lu tewi god wawero taꞌane umasinamiteye. Serai le nomo maꞌe au teꞌesiya, “Fene god wawero werese owe ape taꞌane umasinamite.” Owane Sitewi lo peri tu naifa weriyei apou leseye,
“Lu taune ene ayei ne onuwewe saꞌi luwaru aꞌi aye. Ene a tepaꞌasiye su, lowe god wawero maꞌe yakowei ne sine nineꞌiteye.” Kis 32:6
8 Fene tafaꞌe yo seni luwaru aꞌi owe ape irore. Tu naifa weriyei, Owane Sitewi lo lu tewi tafaꞌe yo seni ironamiteye su, Owane Sitewi lu taune tomu neꞌese, 23,000 lu taune, poweiye taꞌi se aine teraꞌe fiyari eresawi.f 9 Lowe yo seni luwaru aꞌi ironamiteye su, lowe Owane Sitewi maꞌe apou teꞌeye, “Ne piyene nomo ne au noweinowei taꞌame awere?” Owane Sitewi lai peri eite ne lowe teꞌeye ape ai peri ironamiye. Serai le haru aimesi tomu neꞌese lowe maꞌe eimawesawi. Haru aimesi werese lowe maꞌe tomuwe. Haru aimesi lu taune tomu neꞌese tomu teraꞌeye. Serai fene yo seni luwaru aꞌi wou, lowe ironamiteye ape, owe ape irote.g 10 Lowe Owane Sitewi maꞌe ai marepi erasi aꞌi totenamiteye su, lowe le maꞌe apou teꞌeye, “Yo seni no luwaru aꞌi ne.” Owane Sitewi peri eite wanuwe su, le ipari lo, lu aine teraꞌesiya ape, ipari hi maꞌe eimawe arosai. Ipari ape lu taune tomu neꞌese aine teraꞌeteye. Serai fene Owane Sitewi maꞌe ai marepi owe ape totete.h
11 Etiri werese ape mo lowe maꞌe henerai su, Owane Sitewi lu taune werese maꞌe marepi lo au atuatuteye. Tu naifa weriyei, meni ta etiri ape mo leseye. Peri ape nomo maꞌe, yo seni wisere aꞌi nomo ironamiyei ape, au teꞌe atuatu areiyesiya. Nowe eite se nomo awei sato ironamisiya ape, nowe ape Krais si tame hi maꞌe itorairowa ape, atahe aꞌi ne. Serai nomo peri ape ne marepi erasi aꞌi fa totenamite.
12 Serai meni ta apou totesiya su, “Ane kairefi aꞌi teinamiteye. Ane yo seni luwaru aꞌi iro taꞌame.” Weiyai! Le marepi apou wou aꞌi totesiya su, le yo seni lo winetaiyei. Le yo seni luwaru aꞌi ironamiyei. 13 Yo seni luwaru aꞌi fene maꞌe heneraiyei ne toteyei su, fene hepene se owe ape suꞌarire. Lu taune werese, lowe yo seni luwaru aꞌi irowei ne totenamiteyei. Ahowa, Owane Sitewi nomo maꞌe apou eiye, “Yo seni luwaru aꞌi lo marepi fene maꞌe heneraiyei su, ane fene au pati aniyei. Ane fene maꞌe yo seni luwaru aꞌi fu arorowata. Yo seni luwaru aꞌi fene maꞌe heneraiyei su, ane fene maꞌe yo taꞌi atuatuwei. Serai fene yo seni luwaru aꞌi aweraꞌiyenatiyei.” Owane Sitewi marepi tote tawesiyei fene lo au kairefiye teinamisiya.
God wawero lo taꞌuwe hereiyei.
14 Serai, kaiyemo mo ano, fene god wawero werese meꞌiyeni maꞌe atati arunatiyewe iterotire. Fene lowe ne owe ape au nineꞌinamite. 15 Ane fene maꞌe marepi wisere aꞌi totenamisiya ape, au teꞌesiya. Peri ano au tote etire. 16 Nomo me tapeꞌi, Jisas sahe temeniyeye ape, tote eti tawesinamisiya. Serai nomo siye saꞌi, nomo Owane Sitewi maꞌe au teꞌe wisereyesiya ape, tewi ayei su, nomo Jisas lo fisaꞌi nomo ne ete aniyei ape, ene aye. Nomo Jisas lo fisaꞌi marepi tote tawesisiya. Aiwawe aꞌi nomo siye loꞌu ani towesi ene ayei su, nomo Jisas lo tahe paꞌare nomo ne towesiye ape marepi tote tawesinamisiya.i 17 Nomo siye loꞌu tewi oso oso aꞌi ani towesi erauwiyei. Siye loꞌu ape lai taꞌi aꞌi irosiya. Serai nomo Jisas lo yo seni umasinamisiya ape, nomo lu taune tomu neꞌese irosiya. Nomo siye loꞌu ani ene ayei su, nomo tahe paꞌare taꞌi aꞌi, marepi taꞌi aꞌi wou heneraiyei.j
18 Fene Israel lo lu taune werese ne totere. Lowe fe sipsip loꞌu Owane Sitewi maꞌe au heseyei ne aine teraꞌeye. Serai lowe fe sipsip loꞌu tewi aꞌi ani ene ayei su, lowe Owane Sitewi maꞌe au teꞌe wisereye nineꞌiyei.k 19 Ane peri eite au teꞌesiya su, ane piye marepi sitewi ano au teꞌesiya awere? Fe sipsip lo loꞌu tewi aꞌi lowe god wawero maꞌe au heseteye ape, yahowaꞌi ne. Fene fe sipsip loꞌu tewi aꞌi god wawero maꞌe auwe ape, ene ayei su, loꞌu ape lai lire fene lo au luwaruwerowata. Aiwawe aꞌi god wawero werese yahowaꞌi ne. Lowe kairefi se taꞌame. Lowe fene au luwaruwerowata.l 20 Ahowa, weiyai! Ane fene maꞌe eisiya. Awei lo lu god wawero maꞌe fe lo loꞌu tewi aꞌi ta au heseyei su, lowe sepei luwaru aꞌi maꞌe au heseyei. Lowe Owane Sitewi Pefine aꞌi maꞌe au heseyei taꞌama. Fene sepei luwaru werese aꞌi maꞌe owe ape au wisereye nineꞌite. Serai fene fe lo loꞌu tewi aꞌi lowe god wawero au heseye ape owe ape ani ene ate.m 21 Fene Meni Owane Pefine aꞌi ne au teꞌe nineꞌiyei ne taꞌuweyei su, fene marepi taꞌi aꞌi lo aiwawe toteyei. Serai fene piyene sepei luwaru aꞌi ne totenamisiya awere? Fene siye loꞌu ani towesiye erauwiyei su, fene Jisas lo tahe paꞌare ne toteyei. Fene fe piyoꞌu sepei luwaru maꞌe au heseyei su, fene sepei luwaru aꞌi ne au wisereye nineꞌiyei. Fene yo seni hesi aꞌi ape owe ape umasite.n 22 Nomo god wawero maꞌe fe piyoꞌu au heseyei su, Owane Sitewi lo ai marepi erasi aꞌi nomo maꞌe totenamiyei. Kairefiyeyei nomo lo, Owane Sitewi lo kairefiyeyei ani ararosiya awere? Piyete! Owane Sitewi lo kairefi nomo ani ararowe. Nomo Owane Sitewi lo kairefiyeyei maꞌe teirowata.o
Nomo Owane Sitewi ne au teꞌe nineꞌinamite.
23 Nomo Krais ne tote tawesiyei su, nomo etiri werese werese faraꞌu irowei. Ahowa, yo seni tomu neꞌese nomo ne au pati anirowata. Nomo yo seni werese faraꞌu umasirowa. Ahowa, yo seni tomu neꞌese ape mo, tote tawesiyei nomo lo au kairefiyerowata.p 24 Fene marepi towafi fene lo owe ape tote nehi umasite. Ahowa, fene lu taune tereꞌe ne noweinoweiyei ne totete.q
25 Lu tamo fe loꞌu nepawe amerame aꞌi maꞌe aitaiyei su, fene faraꞌu fe loꞌu ape ete ene are. Fene fe loꞌu ne apou owe ape teꞌe towerire, “Fe loꞌu ape fene eiwerou maꞌe aitai awere?” Ahowa, fene fe loꞌu ne teꞌe toweriyei taꞌama su, marepi fene lo fetane aꞌi irowei. Serai fene faraꞌu fe loꞌu ete ene are.r 26 Tu naifa meni taꞌi apou leseye,
“Omo omo pani werese aꞌi Meni Owane Pefine aꞌi lo ne. Sosu aiwawe aꞌi etiri werese awei sahe Meni Owane Pefine aꞌi lo ne.” Sng 24:1
27 Awei lo meni ta fene wesi lo sahe ene ayei ne ei aniyei su, fene marepi luwaru aꞌi owe ape totere. Marepi fene lo fetane aꞌi toteyei su, fene wesi lo maꞌe ene ayei ne irowa. Fene wesi lo maꞌe iyei su, etiri werese meni ape fene maꞌe auwei ape, fene faraꞌu ene are. Fene etiri ape ne owe ape teꞌe towerire. Fene etiri werese ne teꞌe toweri taꞌame su, marepi fene lo fetane aꞌi irowei. 28 Weiyai! Peri ano wanure! Meni ta fene maꞌe apou eiyei su, “Fe loꞌu eite lowe sepei luwaru aꞌi maꞌe au hese tepaꞌasiye.” Le peri ape au teꞌeyei su, fene fe loꞌu owe ape ene are. Fene apou teꞌeyei su, “Ane fe loꞌu eite arowata.” Serai fene meni ape lo marepi au kairefiyeyei. Sosu aiwawe aꞌi marepi fene lo fetane aꞌi ironamiyei.s 29 Ahowa, marepi fene lo ne ane tote taꞌame. Ane meni ape lo marepi ne totesiya. Owane Sitewi lai marepi ano maꞌe au fetaneyeye.
Sosu meni ta fene maꞌe peri ta apou ei toweriyei su, fe loꞌu, god wawero maꞌe au heseye ape, etiri yahowaꞌi su, piyene ane fe loꞌu ape ayei ne amouweyei awere? Meni tereꞌe lo marepi, yo seni ano owe ape au hese ereite. Ane meni tereꞌe ape lo marepi au luwaruwe wou taꞌama. 30 Ane fe loꞌu tewi ene ayei su, ane fe lo loꞌu tewi ne ei toweri taꞌame. Ane fe loꞌu ne Owane Sitewi maꞌe au wisereyeyei. Serai ane Owane Sitewi maꞌe au teꞌe wisereyeyei su, lu taune werese ane maꞌe owe ape teꞌe ani ararore.t
31 Serai fene fe loꞌu ene ayei su, saꞌi ayei su, fene mi mi werese aꞌi Owane Sitewi maꞌe au teꞌe wisereyere. Etiri werese fene irowei ape, fene Owane Sitewi lo iyape ei ani arowete.u 32 Etiri werese fene irowei ape, fene marepi orese aꞌi Juda lo lu taune maꞌe owe ape aure. Sosu aiwawe aꞌi fene marepi orese aꞌi Grik lo lu taune maꞌe owe ape aure. Lu taune, Owane Sitewi lo yo seni umasinamiteye ape, fene lowe maꞌe marepi orese aꞌi owe ape aure.v 33 Wiyawi werese ano, ane lu taune werese aꞌi maꞌe marepi wisere aꞌi auwei ne totesiya. Ane marepi topo ano tote umasi taꞌame. Ane lu taune tereꞌe lo marepi ne totenamiyei. Lowe yo seni waraꞌi ano siyeyei su, lowe Owane Sitewi lo peri wanu tote tawesi umasiyei. Serai Owane Sitewi lai marepi hepene heꞌi aꞌi, mi mi pasi pasi weriyei ironamitorowa ape, lowe maꞌe auwei.w