2 Sosu aiwawe aꞌi peri ape ane tu fene maꞌe au teꞌe fiyariye ape, fene peri ano ape wanu tote tawesi umasinamiteye. Etiri werese ano ne, fene Owane Sitewi maꞌe au teꞌe toweriteye. Serai ane fene ne au teꞌe wisereyesiya.

3-4 Sosu ane peri tereꞌe fene maꞌe au teꞌesiya. Fene peri ano wanu etire. Meni Krais, le aꞌi lai lu werese lo Meni Owane ne. Menitani lo meni owane apou aꞌi meni lo ne. Meni owane ape tani lo marepi au noweinoweisiya. Sosu Owane Sitewi, le aꞌi lai Krais lo Meni Owane Pefine aꞌi ne. Meni ta Owane Sitewi maꞌe au teꞌeyei su, le mato lo tuhe ani tahe ani asire. Serai le yo seni wisere aꞌi irowei. Meni ta Owane Sitewi lo marepi au teꞌe fiyariyei su, le mato tuhe ani tahe ani asire. Le mato lo napetuwei ape, Owane Sitewi maꞌe au teꞌeyei su, le Krais maꞌe au neritaseyeyei.^b 5 Ane taune maꞌe peri ta au teꞌesiya. Menitani ta Owane Sitewi maꞌe au ei toweriyei su, le mato tuhe ani asire. Le Owane Sitewi lo marepi au teꞌeyei su, le mato tuhe owe ape ani tahe anire. Menitani lo mato tuhe ariye aꞌi su, le mato topo lo ne au neritaseye teriteyei. Menitani mato tuhe ariye aꞌi su, le mato towe werese wou howe pamoweye. 6 Menitani ta mato tuhe ariye aꞌi ironamiyei su, le menitani ta mato towe werese wou howe pamoweyei ape ne. Le marepi topo lo maꞌe au neritaseyeyei. Ahowa, menitani lo mato towe ariye aꞌi su, le neritase aꞌi ne. Serai le mato tuhe ani asire. 7 Lu werese Owane Sitewi lo wesi sahe irosiya su, lowe mato tuhe lowe lo ani tahe anire. Tu naifa weriyei, Owane Sitewi lai lu ape mo taꞌaneye. Serai lu ape mo Owane Sitewi lo nihari hepene au atuatu areiyenamisiya. Taune werese lu towafi lowe lo, lo nihari hepene au atuatu areiyenamisiya.^c 8 Owane Sitewi lai meni tutawe taꞌaneye su, le hepene lo se taꞌaneye. Ahowa, le menitani tutawe taꞌaneye su, le meni lo miye taꞌi ani tahe aniyewe, taꞌaneye. 9 Aiwawe aꞌi, Owane Sitewi lai meni tutawe ape taꞌaneye su, le iyape topo lo meni ape ei ani aroweyei ne taꞌaneye. Ahowa, le menitani tutawe ape taꞌaneye su, le meni lo au pati aniyei ne taꞌaneye.^d 10 Serai taune werese Owane Sitewi lo wesi sahe irosiya ape, lowe mato tuhe ani asire. Mato tuhe ape menitani lo ariariyeyei. Menitani ape meni topo lo kairefi unahi maꞌe ironamisiya. Taune werese mato tuhe ani asinamiyei su, Owane Sitewi lo ipari wisere aꞌi lowe maꞌe siyenaraiyei. Lowe apou toteyei, “Taune lo yo seni eite wisere aꞌi ne. Lowe meni lowe lo unahi ironamisiya.” 11 Ahowa, peri ano wanure! Meni Owane Pefine aꞌi lo nihe se taune werese woto aꞌi teinamirowata. Lowe lai lu lowe lo aiwawe aꞌi teinamirowa. Lu werese aiwawe aꞌi woto aꞌi teinamirowata. Lowe taune lowe lo aiwawe aꞌi teinamirowa. Taune werese lu lowe lo au pati anire. Sosu lu werese taune lowe lo au pati anire. 12 Tu naifa weriyei, Owane Sitewi menitani tutawe meni lo miye paꞌare se ani tahe aniyewe, taꞌaneye. Moꞌo mi mi pasi pasi weriyei su, taune lai eimane werese auteiteye. Nomo werese, sosu etiri werese Owane Sitewi lai taꞌaneye.

13 Fene werese marepi fene lo ne au hesere. Menitani ta Owane Sitewi maꞌe ei toweriyei su, le mato tuhe ariye aꞌi awere? Mato tuhe ani asiyei awere? Lowe piye seni irowei awere? Nomo soꞌoruwe tepaꞌasiye. Lowe Owane Sitewi maꞌe au teꞌeyei su, lowe mato tuhe ani asinamite. 14 Seni ta nomo maꞌe au atuatu areiyeyei. Wanure! Meni ta mato towe pite aꞌi irosiya ape, le neritase aꞌi ironamisiya. 15 Fene menitani ta ne totere! Le mato towe pite aꞌi irosiya su, yo seni lo ape wisere aꞌi ne. Owane Sitewi lai taune lo mato towe pite aꞌi mato towafi lowe lo napetuwei ne taꞌaneye. 16 Fene tamo apou toteyei su, “Nomo yo seni ape umasiyei ne taꞌoreyei aꞌi ne.” Peri ano wanure! Nomo Owane Sitewi lo yo seni umasinamisiya. Sosu aiwawe aꞌi lu taune Owane Sitewi lo wesi sahe omo omo werese aꞌi sahe, lowe yo seni ape umasinamisiya. Serai fene aiwawe yo seni ape umasinamite.

17 Ane peri ano fene maꞌe au teꞌesiya su, ane iyape fene lo ei ani arowerowata. Fene Owane Sitewi lo wesi sahe taꞌuweraiyei su, fene ai marepi tiyati ironamisiya. Fene Owane Sitewi ne toterowata. Fene taꞌuweraiyei su, fene marepi towafi fene lo au kairefiyete. Fene ai marepi tote tiyatinamisiya su, fene tote tawesiyei fene lo au luwaruwesiya. 18 Peri tutawe ano apou aꞌi teꞌesiya. Lu tamo ane maꞌe au teꞌerai. Fene Owane Sitewi lo wesi sahe taꞌuwerai su, lu taune tomu neꞌese marepi hesi aꞌi hesi aꞌi ironamiteye. Serai fene ai peri tiyati teꞌe atuteye. Peri ape ane wanuwe ape, wiyeme aꞌi awere? Piyete awere? Ane apou aꞌi totesiya. Peri tewi aꞌi wiyeme aꞌi tene!^e 19 Fene marepi hesi aꞌi tiyati ironamisiya. Yo seni ape luwaru aꞌi ne. Lu tamo marepi tereꞌe totesiya. Fene peri towafi fene lo siye etire. Peri towafi fene lo Owane Sitewi lo marepi aiwawe aꞌi awere? Lu tamo Owane Sitewi lai ariariyeye ape, lowe Owane Sitewi lo marepi umasinamisiya. Fene peri lowe lo umasite. 20 Serai fene Owane Sitewi lo wesi sahe taꞌuweraiyei su, fene Meni Owane Pefine aꞌi ne tote se taꞌame. Ahowa, fene taꞌuweraiyei su, fene ayei aꞌi totenamiyei. 21 Fene ene ayei ne taꞌuweraiyei su, fene lu taune tereꞌe ne tote taꞌame. Ahowa, fene lire fene lo aꞌi totesiya. Fene tu ayei fene lo ani ene aye. Yo seni ape luwaru aꞌi ne. Lu taune tamo lau erasi irowe. Lowe ene arowata. Aiwawe aꞌi lu taune tereꞌe tamo saꞌi meremereye erasi aꞌi areme. Yo seni ape luwaru aꞌi ne. 22 Peri ano wanure! Fene werese wesi fene lo irosiya. Wesi fene lo sahe, fene ayei ene are. Fene saꞌi meremereye aꞌi areme su, fene wesi fene lo sahe saꞌi are. Owane Sitewi lo wesi sahe fene marepi towafi fene lo toterowawe, ayei erasi ene ayei su, fene Owane Sitewi lo iyape maꞌe au neritaseyeyei. Lu tamo ayei ariye aꞌi irosiya ape, fene lowe maꞌe au neritaseyeyei. Piye peri ane fene maꞌe au teꞌesiya awere? Ane fene maꞌe au teꞌe wisereyesiya awere? Ahowa! Fene yo seni ape irowei su, ane fene maꞌe au teꞌe wisereyerowata.

23 Meni Owane Pefine aꞌi nomo lo peri ta ane maꞌe au teꞌeye. Ane fene mase ironamiteye su, ane peri lo ape fene maꞌe au teꞌeye. Fene peri lo ape tote iꞌaneye. Serai ane peri lo ape fene maꞌe tame teꞌeyei. Tu naifa pasi aꞌi meni Judas Owane Jisas ai atu siye lu maꞌe heneti su, Jisas siye loꞌu tewi aꞌi ani towesiyewe, noneye. 24 Siye loꞌu ereti lo se aniye su, le Owane Sitewi maꞌe au teꞌe wisereyeye. Le siye loꞌu tewi aꞌi ani towesiyewe, ereti se aniteye. Sosu lowe maꞌe eiye, “Siye loꞌu tewi eite tahe paꞌare towesiye aꞌi ano ne. Ane fene maꞌe auwei. Fene taꞌuweraiyei su, fene siye loꞌu tewi aꞌi ani towesiye. Fene tiyati nonetiyei su, fene ane, me tapeꞌi sahe temeniyeye ape, tote tawesinamiyei.” 25 Lowe siye loꞌu ene a tepaꞌasiye su, le aiwawe aꞌi saꞌi paꞌare ereti lo se aniye. Sosu eiye, “Siye saꞌi ape ne, Owane Sitewi lai peri teꞌe naneiyei heꞌi aꞌi fene maꞌe au teꞌe atuatuwei. Lowe watipi sahe ti se tewiye su, fisaꞌi ano nowe maꞌe heneraiyei. Fene fisaꞌi ano toteyei su, fene Owane Sitewi lo peri teꞌe naneiyei ape siye soꞌoruweyei. Serai fene taꞌuweraiyei su, fene ane ne tote tawesinamite. Fene siye saꞌi ayei su, fene fisaꞌi ano, fene ne auwe ape, tote tawesire.”^f

26 Nowe mi mi su fene siye loꞌu, siye saꞌi ene ayei su, fene lu taune werese maꞌe Meni Owane Pefine aꞌi nomo lo, me tapeꞌi sahe temeniyeye ape ne, au teꞌe fiyariyei. Serai fene mi mi weriyei siye loꞌu ene anamirowa. Serai Meni Owane Jisas si tame itorairowa su, le nomo hire maꞌe henetirowa. 27 Serai lu taune tamo marepi areareyei se siye saꞌi aꞌi ene ayei su, Owane Sitewi lo nihe se, lowe Meni Owane Jisas wou aine teraꞌeye.^g 28 Ahowa, fene taweiru sawa. Fene taꞌi taꞌi aꞌi marepi towafi fene lo tote etire. Marepi aseyaro aꞌi awere? Marepi fene lo aseyaro aꞌi ironamisiya su, fene faraꞌu siye loꞌu, siye saꞌi ene are. 29 Lu taune tamo marepi towafi lowe lo areareyei se siye loꞌu, siye saꞌi ene ayei su, lowe Owane Sitewi lo ai marepi lowe maꞌe ene ayei wou aꞌi ne. 30 Lu taune tomu neꞌese marepi towafi lowe lo areareyei se siye loꞌu, siye saꞌi ene anamisiya. Serai lu taune tomu neꞌese tahe pereꞌe aꞌi, u tahe se ironamisiya. Lu taune tamo marepi areareyei towafi lowe lo se ene ayei su, lowe temeniyeye. 31 Ahowa, nomo tutawe marepi towafi nomo lo tote etiyei su, Owane Sitewi lai yo seni nomo lo au hese ereirowata. Sosu nomo maꞌe fofowei erasi aurowata. 32 Owane Sitewi lai yo seni luwaru aꞌi nomo lo au hese ereiyei su, le nomo maꞌe fofowei erasi aurowa. Nomo fofowei ape teriteyei su, nomo yo seni luwaru aꞌi nomo lo atati arunatiyei. Nomo yo seni luwaru aꞌi nomo lo atati arunatiyei su, Owane Sitewi lai nomo yehe omo maꞌe ani fu arosawirowata. Ahowa, nomo yo seni luwaru aꞌi atati arunati taꞌame su, le nomo lu taune tereꞌe aiwawe aꞌi yo seni ironamiteye ape, yehe omo maꞌe ani fu arosawirowa.^h

33 Serai Kaiyemo mo ano, fene Meni Owane Pefine aꞌi lo taꞌuwe hereiyei ene ayei ne taꞌuweraiyei su, fene lu taune werese ninawere. Lu taune werese taꞌuwerai tepaꞌasiyei su, fene faraꞌu taꞌuwe hereiyei ape ene are. 34 Lu taune tamo lau mase teriteyei su, lowe wesi towafi lowe lo sahe ene are. Sosu lu taune tamo lau mase taꞌuweraiyei su, lowe marepi hesi aꞌi toteyei. Serai lowe siye loꞌu, siye saꞌi wisere aꞌi marepi towafi lowe lo areareyei se ene ayei su, Owane Sitewi lai lowe maꞌe fofowei erasi aurowa.

Sosu ane peri tereꞌe tamo fene maꞌe au teꞌeyei ne totesiya. Ahowa, ane fene maꞌe sewiyeyei ne aiyeyei su, ane peri ape fene maꞌe au teꞌerowa.