4 Owane Sitewi lai etiri kairefi aꞌi apou ape mo nomo maꞌe auwei. Ahowa, Owane Sitewi lo Hepene Waraꞌi taꞌi aꞌi lai etiri kairefi aꞌi ape mo, lo sitewi aꞌi ne.^c 5 Owane Sitewi lo wiyawi tereꞌe tereꞌe tomu neꞌese irosiya. Nomo Owane Sitewi lo wiyawi taꞌaneyei su, nomo Meni Owane Pefine taꞌi aꞌi ne au taꞌaneyei. 6 Owane Sitewi lo wiyawi tereꞌe tereꞌe tomu neꞌese irosiya. Ahowa, Owane Sitewi lai wiyawi werese lo lu taune werese sahe ironamisiya. 7 Lu taune werese Jisas lo peri wanu umasinamiteye ape, Owane Sitewi lo Hepene Waraꞌi aꞌi lai nomo taꞌi taꞌi aꞌi maꞌe kairefiyeyei lo auwe. Nomo kairefiyeyei lo aniyei su, nomo lu feni lo taꞌi taꞌi aꞌi au pati aniyei.

8 Lu tamo maꞌe Owane Sitewi lo Hepene Waraꞌi aꞌi lai marepi wisere aꞌi awei. Lu tereꞌe tamo maꞌe Owane Sitewi lo Hepene Waraꞌi lai le maꞌe marepi tote soꞌoruweyei ne auwei. 9 Lu tereꞌe tamo maꞌe Owane Sitewi lo Hepene Waraꞌi le maꞌe tote tawesiyei erasi aꞌi auwei. Lu tereꞌe tamo maꞌe, Owane Sitewi lo Hepene Waraꞌi lai lowe maꞌe kairefiyei ape u tahe apou ape mo au taꞌane faraꞌuweyei ne auwei. 10 Owane Sitewi lo Hepene Waraꞌi lai lu tereꞌe tamo maꞌe kairefiyeyei taꞌi auwei. Serai lowe etiri taꞌaneye ape ne, lu taune hepene se siye suꞌariye. Lu tereꞌe tamo maꞌe, le kairefiyeyei lo lowe maꞌe au teꞌeyei ne auwei. Le kairefiyeyei lo lu tereꞌe tamo maꞌe ipari tereꞌe tereꞌe siye etiyei ne auwei. Le kairefiyeyei lo lu tereꞌe tamo maꞌe peri tereꞌe tereꞌe au teꞌeyei ne auwei. Lu ape mo peri tereꞌe lo sitewi soꞌoru taꞌama. Ahowa, lowe peri tereꞌe au teꞌeyei su, meni tereꞌe ta peri lo ape wanu soꞌoruwerowawe, sosu le peri lo sitewi au teꞌe areiyerowa. Owane Sitewi lo Hepene Waraꞌi kairefi lo lu ape mo maꞌe auwei. 11 Peri ano wanure. Owane Sitewi lo Hepene Waraꞌi taꞌi aꞌi ne. Le aꞌi lai kairefiyeyei tereꞌe tereꞌe lo nomo taꞌi taꞌi aꞌi maꞌe auwei. Le nomo maꞌe kairefi lo nonetiyei su, le marepi topo lo umasiteyei.^d

12 Owane Sitewi lo Hepene Waraꞌi aꞌi nomo maꞌe kairefiyeyei tereꞌe tereꞌe aunamisiya. Sosu nomo werese Jisas lo marepi taꞌi aꞌi totenamisiya. Nomo lu taune werese Jisas lo peri wanu umasinamisiya ape nomo taꞌi aꞌi irosiya. Meni lo tahe paꞌare ne totere! Tahe paꞌare tewi aꞌi tomu neꞌese irosiya. Nihe hesi aꞌi, ereme taꞌi, lowe hesi aꞌi, ereti hesi aꞌi. Serai etiri werese taꞌi taꞌi aꞌi tahe paꞌare taꞌi aꞌi ne. Apou aꞌi Krais lo lu feni werese nomo tahe paꞌare aiwawe aꞌi ne. Nomo tomu neꞌese irosiya. Serai nomo Krais lo tahe paꞌare taꞌi aꞌi henerai.^e 13 Nomo Jisas lo peri wanu umasiye su, Owane Sitewi lo Hepene Waraꞌi aꞌi nomo Jisas lo tahe paꞌare maꞌe hene ani fuwe. Serai nomo taꞌi taꞌi aꞌi tahe paꞌare lo tewi aꞌi henerai. Nomo Juda lo lu taune, fene lu taune tewi tereꞌe, nomo werese Jisas lo peri wanu umasisiya ape, nomo Jisas lo tahe paꞌare taꞌi aꞌi henerai. Sosu aiwawe aꞌi lu taune tamo wiyawi yahowaꞌi taꞌanesiya ape, sosu lu taune tereꞌe wiyawi maꞌaru se taꞌanesiya ape, lowe werese Jisas lo peri wanu umasinamisiya ape, Jisas lo tahe paꞌare tewi aꞌi henerai. Owane Sitewi lo Hepene Waraꞌi aꞌi nomo werese Jisas lo tahe paꞌare sahe hene ani futeye.^f

14 Peri anowe ape wanure. Meni lo tahe paꞌare werese nihe aꞌi taꞌame ne. Ahowa, nihe tahe paꞌare tewi aꞌi ne. Tahe paꞌare nomo lo lowe hesi aꞌi irosiya, ereti hesi aꞌi irosiya, ahi taꞌi aꞌi irosiya. Tahe paꞌare nomo lo sahe etiri tewi aꞌi tomu neꞌese irosiya. Ahowa, tahe paꞌare nomo lo taꞌi aꞌi irosiya. 15 Lowe fene lo apou eiyei su, “Ane ereti se taꞌame. Serai ane tahe paꞌare lo tewi aꞌi taꞌame.” Wawero! Lowe fene lo tahe paꞌare lo tewi aꞌi tene! 16 Sosu apaniye fene lo apou eiyei su, “Ane nihe se taꞌame. Serai ane tahe paꞌare lo tewi aꞌi taꞌame.” Wawero! Apaniye fene lo tahe paꞌare lo tewi aꞌi tene! 17 Tahe paꞌare werese nihe aꞌi iroteye su, eiwerou wanuwei awere? Tahe paꞌare werese apaniye aꞌi iroteye su, eiwerou etiri heneri somuwei awere? 18 Ahowa, Owane Sitewi lai nomo werese Jisas lo peri wanu umasiteye ape, Jisas lo tahe paꞌare sahe hene ani funamiteye. Le nomo Krais lo tahe paꞌare sahe hene ani fuwe su, le marepi topo lo umasiye. 19 Serai nomo werese tewi ta apou aiwawe aꞌi irosiya su, tahe paꞌare ariye poꞌuteye. 20 Wanure! Nomo werese tomu neꞌese aꞌi ne. Serai nomo Krais lo tahe paꞌare taꞌi aꞌi henerai.

21 Nihe fene lo ereti maꞌe apou ei taꞌame su, “Ne lai yahowaꞌi ne.” Sosu mato fene lo lowe hesi maꞌe apou ei taꞌame su, “Fenesi yahowaꞌi aꞌi ne.” 22 Ahowa, tahe paꞌare tewi aꞌi ape mo kairefi se taꞌame ape, lowe werese wiyawi ta irosiya. Peri eite wiyeme aꞌi. Serai fene lu taune tamo owe ape hi ani ararote. 23 Tahe paꞌare lo tewi aꞌi tamo, nomo lai yahowaꞌi toteyei ape, nomo tewi ape mo au leseyei. Tahe paꞌare lo tewi tereꞌe ta, nomo neritase aꞌi toteyei ape, nomo ipari tahe ani asiyei. Serai nomo tewi ape au napetuwe. Serai lu taune werese tewi aꞌi ape siyerowata. 24 Ahowa, tahe paꞌare tewi aꞌi ape mo wiyawi erasi irosiya ape, nomo tahe paꞌare tewi ape napetu taꞌame. Wanure. Owane Sitewi lai tahe paꞌare nomo lo taꞌaneye su, le tewi yahowaꞌi maꞌe wiyawi erasi aꞌi auwe. 25 Owane Sitewi lai tahe paꞌare nomo lo taꞌaneye su, le apou toteye. “Tahe paꞌare tewi aꞌi werese, lowe marepi taꞌi aꞌi totenamisiya.” Ane fene ne totesiya, fene werese marepi hesi aꞌi hesi aꞌi owe ape totete. Ahowa, fene taꞌi taꞌi aꞌi tiyati au noweinoweite. 26 Meni ta maꞌe etiri luwaru aꞌi heneraiyei su, fene werese etiri luwaru aꞌi ape teriteyei. Aiwawe aꞌi meni ta lo iyape ei ani aroweyei su, fene werese aiwawe aꞌi le ne au wisereye nineꞌiyei.

27 Wanure! Fene werese, Jisas lo peri wanu umasiye ape, fene Krais lo tahe paꞌare aꞌi henerai. Fene werese taꞌi taꞌi aꞌi Krais lo tahe paꞌare ironamisiya.^g 28 Serai Owane Sitewi lai meni owane tamo Owane Sitewi lo wesi sahe wiyawi lo irowei ne ariariyeye. Tutawe le eimawesawi siye lu ariariyeye. Lowe Owane Sitewi lo wiyawi omo tereꞌe tereꞌe maꞌe aitiyei. Toꞌuresi. Le au teꞌe siye lu ariariyeye. Lowe Owane Sitewi lo wesi sahe Owane Sitewi lo peri au teꞌe fiyariyei. Moꞌo le teꞌe au atuatu siye lu tamo ariariyeye. Sosu le lu tamo wiyawi erasi pefine aꞌi iro heneraiyei ne ariariyeye. Le lu tamo maꞌe wiyawi u tahe taꞌane faraꞌuweyei ape neri aꞌi auwe. Sosu le lu tamo maꞌe wiyawi lo au pati aniyei ne neri aꞌi auwe. Le lu taune maꞌe wiyawi ta, lu taune maꞌe yo farere aꞌi au atuatunamisiya ape auwe. Lowe ape mo maꞌaru au noweinoweiyei, lowe wiyawi tereꞌe tereꞌe irowei. Sosu yeꞌewi le lu tamo maꞌe peri tereꞌe tereꞌe au teꞌeyei ne, neri aꞌi auwe.^h 29 Fene werese eimawesawi siye lu taꞌame. Aiwawe aꞌi fene werese au teꞌe siye lu taꞌame. Fene werese au teꞌe atuatu siye lu taꞌame. Fene werese wiyawi erasi pefine aꞌi iro henerai taꞌame. Ahowa, Owane Sitewi lai wiyawi lo tewi aꞌi tewi aꞌi fene maꞌe auwe. 30 Fene werese maꞌe wiyawi lo u tahe au taꞌaneye faraꞌuweyei taꞌama. Aiwawe aꞌi fene maꞌe werese peri tereꞌe tereꞌe au teꞌe taꞌame. Meni ta peri tereꞌe se au teꞌeyei su, fene werese maꞌe peri tereꞌe lo sitewi au teꞌe taꞌame. 31 Owane Sitewi lai nomo maꞌe kairefi lo tereꞌe tereꞌe neri aꞌi auwe. Etiri werese ape mo wisere aꞌi ne. Ahowa, fene etiri tamo wisere pefine aꞌi ape mo aniyei ne tohotete.

Wanure! Ane etiri tamo wisere pefine aꞌi ape mo fene maꞌe au teꞌe atuatuwei.ⁱ