Ane peri tereꞌe tereꞌe au teꞌeyei su, sosu ane peri ape wanu soꞌoruwerowata. Aiwawe aꞌi, ane Owane Sitewi lo ipari wisere aꞌi lo peri tereꞌe au teꞌeyei su, sosu ane peri ape wanu soꞌoruwerowata. Ane peri tereꞌe tereꞌe ape mo au teꞌeyei su, Ahowa, ane lu taune werese marepi erasi aꞌi tote wawesiyerowata. Ane metaiyei noꞌu yahowaꞌi aiwawe aꞌi heneraiyei. Sosu ane meneꞌe mapefuwe lo noꞌu erasi yahowaꞌi aiwawe aꞌi heneraiyei. 2 Owane Sitewi lai Hepene Waraꞌi lo kairefi ane maꞌe auwei su, serai ane peri lo lu taune maꞌe au teꞌe fiyarirowa. Serai ane etiri werese fareyareye aꞌi siye soꞌoruwerowa. Serai ane etiri werese siye soꞌoruwerowa. Serai ane Owane Sitewi ne tote tawesiyei erasi aꞌi yaꞌorenamiyei su, ane omo pite aꞌi maꞌe apou eiyei, “Omo, Ne sinetire!” Serai omo ape sinerowawe, irowa. Ane Owane Sitewi lo Hepene Waraꞌi aꞌi lo kairefi werese aniyei su, ahowa, ane lu taune werese ne marepi erasi aꞌi tote wawesiyerowata. Ane meni yahowaꞌi aꞌi wou heneraiyei.^a

3 Ane maꞌaru etiri werese ano lu ariye aꞌi maꞌe auwei su, ane lowe maꞌe Owane Sitewi lo peri au teꞌeyei su, serai lu tamo, Jisas lo peri umasi taꞌame ape, lowe ane me tapeꞌi sahe aine ti tawesi teraꞌeyei. Sosu lowe ane yehe ani leiyei. Ane etiri ape mo irowei su, sosu ane lu taune werese ne marepi erasi aꞌi tote wawesiyenamirowata. Serai wiyawi ano ane irowei ape, yahowaꞌi heneraiyei.

4 Nomo lu taune marepi erasi aꞌi tote wawesiyenamiyei su, nomo lowe maꞌe pei au pati aninamite. Nomo lowe maꞌe ai peri owe ape teꞌete. Nomo lowe lo etiri werese owe ape siye wisereyete. Nomo lu taune maꞌe iyape towafi nomo lo owe ape ei ani arowete. Sosu lowe maꞌe apou eiyei, “Yo seni werese nomo lo aseyaro pefine aꞌi ne.” Nomo peri ape owe ape teꞌete. 5 Nomo lu taune marepi erasi aꞌi tote wawesiyenamiyei su, nomo lowe maꞌe owe ape ani ararote. Nomo marepi towafi nomo lo owe ape umasite. Lu tamo nomo maꞌe au luwaruweyei su, nomo lowe maꞌe ai marepi owe ape totete. Lowe nomo maꞌe au luwaruweyei su, nomo lowe maꞌe itiyaꞌu au luwaruwerowata. 6 Nomo yo seni luwaru aꞌi siyeyei su, nomo yo seni luwaru aꞌi ape ne owe ape au wisereyere. Ahowa, nomo peri wiyeme aꞌi wanuwei su, nomo Owane Sitewi maꞌe au wisereyeyei.^b 7 Lu taune tamo nomo maꞌe au luwaruweyei su, nomo lowe ne meꞌiyeni maꞌe owe ape atati teire. Etiri luwaru aꞌi tamo nomo maꞌe heneraiyei su, nomo Owane Sitewi ne tote tawesinamisiya. Serai nomo marepi wiyeme pefine aꞌi lo heneraiyei ne ninawenamisiya. Sosu lowe yo seni luwaru aꞌi ironamiyei su, nomo yo seni lowe lo ne apou toteyei, lowe yo seni luwaru aꞌi lowe lo meꞌiyeni maꞌe atati arunatiyei. Sosu lowe yo seni luwaru aꞌi meꞌiyeni maꞌe atati arunatiyei su, sosu lowe Jisas lo peri wanu umasiyei. Lu tamo nomo maꞌe au luwaruweyei su, nomo kairefi aꞌi teinamiyei.^c

8 Nomo lu taune maꞌe marepi erasi aꞌi tote wawesiyenamiyei su, tote wawesiyeyei ape lo yo seni mi mi pasi pasi ironamirowa. Owane Sitewi lai Hepene Waraꞌi aꞌi lo kairefi nomo maꞌe auwei su, serai nomo peri lo lu taune maꞌe au teꞌe fiyarisawirowa. Kairefi ape poꞌuterowa. Nomo peri tereꞌe tereꞌe au teꞌeyei su, peri tereꞌe tereꞌe lo yo seni poꞌuterowa. Soꞌoruweyei werese ape mo lo yo seni poꞌuterowa. 9 Nomo Owane Sitewi lo peri tewi oso aꞌi wanu soꞌoruwe tepaꞌasiye. Aiwawe aꞌi nomo peri lo tewi oso aꞌi lu taune maꞌe au teꞌe fiyarisawi. 10 Nowe yeꞌewi su, etiri werese ape mo wisere pefine aꞌi henerairowa. Nowe ape se etiri wisere pefine aꞌi henerairowa su, etiri ape mo nomo tewi oso aꞌi siye soꞌoruwesiya ape, poꞌuterowa.

11 Tu naifa ane meni eime osu wou aꞌi iroteye su, ane eime osu lo peri wou aꞌi teꞌeye. Ane eime osu lo marepi wou aꞌi toteye. Ane eime osu lo yo seni wou aꞌi umasiteye. Ahowa, ane meni erasi henerai su, ane eime osu lo yo seni werese meꞌiyeni maꞌe atati arunati. 12 Sosu nomo eimane osu lo yo seni wou irosiya. Nomo etiri ta irowei su, nomo etiri lo sitewi soꞌoru taꞌama. Nomo saꞌi aseyaro aꞌi papu siyeyei su, nomo nihari nomo lo siye areiye taꞌame. Aiwawe aꞌi nomo Owane Sitewi lo yo seni werese aꞌi siye soꞌoru taꞌama. Nomo Owane Sitewi lo yo seni tewi aꞌi siye soꞌoruwe tepaꞌasiye. Nowe yeꞌewi su, nomo Owane Sitewi lo nihari siyerowa su, nomo Owane Sitewi lo yo seni werese siye soꞌoruwe tepaꞌasirowa. Apou aꞌi ne. Owane Sitewi lai yo seni werese werese aꞌi nomo lo siye soꞌoru tepaꞌasinamiteye.

13 Ahowa, etiri hesi heta poꞌuterowata. Owane Sitewi ne tote tawesiyei eite poꞌuterowata. Owane Sitewi lo teꞌe naneiyei werese aꞌi, nomo ninawenamisiya ape, mi mi pasi pasi ironamitorowa. Nomo lu taune werese marepi erasi aꞌi tote wawesiyenamitorowa. Etiri hesi heta ape mo, etiri tutawe apou aꞌi ne. Nomo lu taune werese marepi erasi aꞌi pei tote wawesiyenamite. Etiri ape mi mi pasi pasi poꞌuterowata.^d