Owane Sitewi lo peri au teꞌe fiyariyei ne, yo seni wisere aꞌi ne.
14
Fene lu taune werese maꞌe marepi erasi aꞌi tote wawesiyenamiyei ne tohotete. Fene lu taune maꞌe marepi erasi aꞌi tote wawesiyenamiyei su, fene yo seni wisere aꞌi irowei. Weiya. Fene Owane Sitewi lo Hepene Waraꞌi lo kairefi tereꞌe tereꞌe nehi umasitite. Owane Sitewi lo Hepene Waraꞌi fene maꞌe kairefi lo auwei su, fene Owane Sitewi lo peri wiyeme aꞌi lu taune maꞌe au teꞌe fiyariyei. Fene kairefi ape ne tote umasinamite.a 2 Meni ta peri tereꞌe tereꞌe se au teꞌeyei su, le lu taune maꞌe au teꞌe taꞌame. Ahowa, le Owane Sitewi maꞌe au teꞌeyei. Lu taune werese peri eti lo ape soꞌoru taꞌama. Owane Sitewi lo Hepene Waraꞌi lai lowe maꞌe peri fareyareye aꞌi auwe. Serai lowe peri tereꞌe tereꞌe se au teꞌeyei. 3 Meni ta Owane Sitewi lo peri wiyeme aꞌi au teꞌe fiyariyei su, le lu taune maꞌe au teꞌeyei. Le lowe maꞌe au teꞌeyei su, le marepi lowe lo au kairefiyei ne toteyei. Le yo seni luwaru aꞌi lowe lo au fareraiyei ne toteyei. Lu taune tamo marepi orese aꞌi heneraiyei su, le marepi lowe lo au fetaneyeyei ne toteyei. 4 Ahowa, meni ta peri tereꞌe tereꞌe se au teꞌeyei su, le marepi topo lo au kairefiyeyei. Meni ta Owane Sitewi lo peri wiyeme aꞌi au teꞌe fiyariyei su, le lu taune lo marepi werese au ani kairefiyeyei.5 Marepi ano apou aꞌi totesiya, fene werese peri tereꞌe tereꞌe se au teꞌenamiyei su, yo seni ape wisere aꞌi ne. Fene werese Owane Sitewi lo peri wiyeme aꞌi au teꞌe fiyariyei su, yo seni ape wisere erasi aꞌi tene! Ane marepi tutawe apou totesiya. Meni ta Owane Sitewi lo peri au teꞌe fiyariyei su, Owane Sitewi lai meni ape maꞌe erasi aꞌi au wisereyeteyei. Meni ta peri tereꞌe tereꞌe se au teꞌeyei su, meni tereꞌe peri eti lo ape lu taune maꞌe pei au teꞌe areiyere. Serai le lu taune werese lo marepi au ani kairefiyeyei. 6 Kaiyemo mo peri ano wanure! Ane peri tereꞌe tereꞌe apou ape se fene maꞌe au teꞌeraiyei su, fene werese peri eti lo ape soꞌoruwerowata. Peri ape, ane fene maꞌe au teꞌeyei ape, marepi fene lo au kairefiyerowata. Sosu ane Owane Sitewi lo peri fene maꞌe peri nomo lo se au teꞌeraiyei su, nomo werese peri eti lo wanu soꞌoruwerowa. Owane Sitewi lai peri ta ane maꞌe au teꞌeyei su, ane peri ape fene maꞌe peri nomo lo se au teꞌeyei. Serai fene peri ape lo eti wanu soꞌoruwerowa. Etiri werese, Owane Sitewi irorowa ape, ane fene maꞌe au teꞌe atuaturowa. Fene werese Owane Sitewi lo peri wiyeme aꞌi wanu soꞌoruwerowa.
7 Etiri werese hepene se taꞌame ape, meneꞌe teifowe, wau aiwawe. Fene meneꞌe teifowe fateyei su, fene etiri eite noꞌu wisere aꞌi wanuwei. Fene wau aineyei su, noꞌu tereꞌe wanuwei. Serai etiri hesi ape noꞌu taꞌi aꞌi irowei su, piye noꞌu etiri wanuwei awere? Nomo soꞌoru taꞌama. Serai fene etiri hesi ape lo noꞌu tereꞌe tereꞌe wanuwei. 8 Lu tamo fe erawe umasiyei ne toteyei. Meni ta fe siyeyei su, le lu feni lo maꞌe peri erasi ute areiyeyei. Serai lu feni lo peri ape wanuwei su, lowe fe umasiyei ne fi. Meni ta fe taꞌi siyeyei su, le lu feni lo ute taꞌame su, fe ape lowe aweraꞌiyenatiyei. 9 Ane fene ne totesiya. Fene peri ta peri tereꞌe tereꞌe se au teꞌeyei su, eiwerai peri ape fene lo eti wanu soꞌoruwerowa awere? Lu taune werese wanurowata. Fene fiyaru maꞌe au teꞌeyei. Sosu fene peri ta peri nomo lo se au teꞌeyei su, lu taune werese faraꞌu wanuwei. 10 Lu taune werese omo pani irosiya ape, lowe peri tereꞌe tereꞌe se teꞌenamisiya. Peri tereꞌe tereꞌe werese aꞌi peri lo eti se. Lowe peri tereꞌe se teꞌesiya su, lowe peri towafi lowe lo aꞌi soꞌoruwesiya. 11 Serai nomo Owane Sitewi lo peri wanuwei ne taꞌuweraiyei. Meni ta Owane Sitewi lo peri tereꞌe se au teꞌeyei su, nomo peri ape lo eti wanu soꞌoru taꞌama. Apou aꞌi le omo tereꞌe maꞌe fai. Nomo peri lo soꞌoru taꞌama. Le aiwawe aꞌi peri nomo lo wanu soꞌoru taꞌama. 12 Ane fene maꞌe au teꞌesiya. Fene Owane Sitewi lo Hepene Waraꞌi lo kairefi anireme su, fene kairefi ape, lu taune lo marepi au kairefiyeyei ape, aniyei ne totenamite.
13 Serai meni ta Owane Sitewi lo peri tereꞌe tereꞌe se au teꞌeyei su, le Owane Sitewi maꞌe apou ei toweriyei, “Owane Sitewi, Ne ane maꞌe peri ape lo sitewi ano wanu soꞌoruweyei ne aure. Serai ane peri sitewi no lu taune maꞌe au teꞌe fiyariyei.” 14 Ane Owane Sitewi maꞌe peri tereꞌe se au teꞌeyei su, ane peri ape lo sitewi soꞌoru taꞌama. Ahowa, Owane Sitewi lai marepi ano siyeyei su, le aꞌi lai peri ape lo sitewi ano wanu soꞌoruweyei. Hepene ano Owane Sitewi maꞌe au teꞌe tiyatisiya. 15 Serai nomo piye irowei awere? Ane Owane Sitewi maꞌe yo hesi aꞌi au teꞌesiya. Sosu ane faraꞌu Owane Sitewi maꞌe peri tereꞌe se au teꞌeyei. Ane faraꞌu peri ano se Owane Sitewi maꞌe au teꞌesiya. Aiwawe aꞌi ane Owane Sitewi maꞌe yakowei ahi taꞌi peri tereꞌe tereꞌe se irowei. Sosu ane yakowei ahi taꞌi peri nomo lo se, Owane Sitewi maꞌe irowei. 16 Serai fene Owane Sitewi maꞌe peri tereꞌe se au teꞌe wisereyeyei su, lu taune tereꞌe peri fene lo wanu soꞌoruwerowata. Lowe peri apou eirowata. “Peri eite wiyeme aꞌi ne.” Lowe peri ape lo sitewi fene lo soꞌoru taꞌama. 17 Fene Owane Sitewi maꞌe au teꞌe wisereyesiya. Peri eite wiyeme aꞌi ne. Ahowa, peri fene lo lu taune lo marepi au ani kairefiyerowata.
18 Ane Owane Sitewi maꞌe au teꞌe wisereyesiya. Ane peri tereꞌe tereꞌe se tomu neꞌese au teꞌesiya. Ane fene werese ani ararosiya. 19 Peri ano wanure! Ane Owane Sitewi lo wesi sahe fene maꞌe au teꞌeyei su, ane peri tewi oso aꞌi peri nomo lo se au teꞌeyei. Serai fene werese peri ape lo sitewi ano wanu soꞌoruweyei. Ane peri pite aꞌi fene maꞌe peri tereꞌe se, au teꞌeyei su, fene peri ape lo sitewi ano soꞌoru taꞌama. Yo seni ano luwaru aꞌi ne. Serai ane Owane Sitewi lo peri, peri nomo lo se, fene maꞌe pei au teꞌe areiyete.
20 Kaiyemo mo, peri ano wanure! Fene eimane osu lo marepi wou aꞌi owe ape totete. Ahowa, fene peri tereꞌe tereꞌe se au teꞌeyei su, lu taune tomu neꞌese peri fene lo wanu soꞌoruwerowata. Serai fene eimane osu lo yo seni owe ape irote. Fene meni owane lo marepi pei totete. Fene peri tereꞌe tereꞌe se au teꞌeyei su, fene meni owane lo marepi wou pei totete. Lu taune tamo peri tereꞌe eite wanu soꞌoru taꞌama su, fene peri tereꞌe ape se owe ape au teꞌete. Ahowa, fene yo seni luwaru aꞌi ne toteyei su, fene eimane osu lo marepi pei totete. Eimane osu yo seni luwaru aꞌi totenamirowata.b 21 Tu naifa weriyei meni ta Aisaia, Owane Sitewi lo peri one towe sahe leseye. Le apou leseye,
“Ane Meni Owane Pefine aꞌi ne. Ane lu tewi ano maꞌe Juda lo peri se au teꞌeye su, lowe peri ano arisinamiye. Ane lu taune ano maꞌe au teꞌeyei su, ane lu tereꞌe lo peri lowe maꞌe au teꞌeyei. Ane lu tereꞌe lo ahi tahe se au teꞌeyei. Ane lowe maꞌe au teꞌeyei su, lowe peri ano wanu taꞌame. Lowe peri ano wanu umasiyei taꞌama.” Ais 28:11-12
Peri eite Meni Owane Pefine aꞌi au teꞌeye. 22 Serai nomo peri tereꞌe tereꞌe se au teꞌeyei su, nomo lu taune werese Jisas lo peri umasisiya ape, nomo lowe maꞌe Owane Sitewi lo marepi au teꞌe atuatu taꞌame. Nomo Owane Sitewi lo peri lu taune maꞌe peri lo umasi taꞌame ape, au teꞌeyei su, lowe peri tereꞌe se yaru erasi aꞌi siyerowa. Serai Owane Sitewi nomo maꞌe peri lo lu taune maꞌe au teꞌe fiyarisawiyei su, nomo peri fene lo se fene maꞌe au teꞌe areiyeyei. Owane Sitewi lo peri ape nomo werese ne au pati aniyei. Ahowa, Owane Sitewi lo peri ape lu taune Jisas lo peri umasiye taꞌama ape, peri ape lowe maꞌe au pati anirowata.
23 Serai lu taune werese Owane Sitewi lo wesi sahe taꞌuweraiyei su, lowe Owane Sitewi maꞌe peri tereꞌe tereꞌe se au teꞌeyei. Lu tamo, Owane Sitewi lo peri umasi taꞌame ape, Owane Sitewi lo wesi sahe wiyei su, lowe peri tereꞌe tereꞌe wanuwei. Lowe piye toteyei awere? Lowe lu taune werese ne apou toteyei, “Lowe werese meremereye aꞌi ne.”c 24 Sosu lu taune werese Owane Sitewi lo wesi sahe taꞌuweraiyei su, lowe werese Owane Sitewi lo etiri werese, moꞌo heneraiyei ape, au teꞌeyei. Lowe Owane Sitewi lo peri, peri towafi lowe lo se au teꞌeyei su, lu taune werese Owane Sitewi lo peri wanu soꞌoruweyei. Serai lu tamo Owane Sitewi lo wesi papu wiyei su, lowe Owane Sitewi lo peri, peri towafi lowe lo se wanuwei. Owane Sitewi lai marepi lowe lo maꞌe au teꞌe areiyeyei. Serai lowe Owane Sitewi lo peri wanuwei su, lowe apou toteyei, “Nomo Owane Sitewi lo yo seni umasi taꞌame. Marepi nomo lo luwaru aꞌi ne. Nomo marepi hepene nomo lo Owane Sitewi ne pei tote tawesi umasite.”d 25 Serai lu taune ape mo Owane Sitewi lo peri wanuwei su, etiri werese, marepi sahe fareyareteye ape, Owane Sitewi lai etiri werese ape mo lu taune maꞌe au atuatu areiyeyei. Serai etiri werese au atuatu areiyeyei su, lowe, lowe uporo apeꞌi onuwewe, Owane Sitewi maꞌe au teꞌe wisereyeyei. Lowe apou au teꞌeyei, “Owane Sitewi ne, le wiyeme aꞌi tene! Le fene mase ironamisiya.”
Owane Sitewi ne au nineꞌiyei su fene etiri werese au fareraiyete.
26 Serai kaiyemo mo. Piye etiri heneraiyei awere? Fene Owane Sitewi lo wesi sahe taꞌuweraiyei su, meni ta yakowei ahi werese au teꞌete. Meni tereꞌe ta Owane Sitewi lo peri pei au teꞌe atuatute. Meni tereꞌe ta Owane Sitewi lo marepi au teꞌe atuatute. Meni tereꞌe ta Owane Sitewi lo peri, peri tereꞌe tereꞌe se, au teꞌeyei. Meni ape peri tereꞌe tereꞌe se au teꞌeyei su, meni tereꞌe ta peri tereꞌe lo sitewi lu taune maꞌe pei au teꞌe atuature. Serai fene taꞌuweraiyei su, etiri werese eite lu taune maꞌe pei au pati anite.e 27 Sosu ane apou totesiya. Lu tamo Owane Sitewi lo wesi sahe, peri tereꞌe se au teꞌereme su, lu hesi lu hesi heta Owane Sitewi lo peri au teꞌeyei. Lu tomu neꞌese owe ape au teꞌere. Meni taꞌi aꞌi peri tereꞌe se pei au teꞌere. Serai meni ape au teꞌe tepaꞌasiyei su, meni tereꞌe ta peri tereꞌe lo sitewi pei au teꞌere. Sosu peri lo sitewi au teꞌe tepaꞌasiyei su, meni tereꞌe ta faraꞌu Owane Sitewi lo peri, peri tereꞌe se, au teꞌeyei. Sosu meni tereꞌe peri ape lo sitewi pei au teꞌere. 28 Peri ano wanure! Meni tereꞌe ta peri lo sitewi au teꞌe taꞌame su, meni ape Owane Sitewi lo peri, peri tereꞌe se, au teꞌeye ape, le Owane Sitewi lo wesi sahe owe ape au teꞌere. Le marepi topo lo sahe au totere. Le aiwawe aꞌi Owane Sitewi maꞌe marepi lo se au teꞌere. 29 Aiwawe aꞌi, lu hesi, lu hesi heta Owane Sitewi lo peri au teꞌe fiyari areiyeyei su, lu taune tereꞌe werese lowe peri ape pei au hese ereire. Peri ape Owane Sitewi maꞌe fai awere? Lu lo marepi maꞌe fai awere? Lowe peri ape pei au hese ereire.f 30 Owane Sitewi lo Hepene Waraꞌi meni ta maꞌe Owane Sitewi lo marepi auwe su, meni ape pei sinere. Sosu le lu taune maꞌe Owane Sitewi lo marepi au teꞌe areiyere. Sosu meni tereꞌe Owane Sitewi lo marepi heꞌi aꞌi aniyei su, meni tutawe, au teꞌeye ape, le saro onure. Serai meni tereꞌe ape Owane Sitewi lo marepi heꞌi aniye ape, le Owane Sitewi lo marepi heꞌi aꞌi pei au teꞌe areiyere. 31 Lu taune tamo Owane Sitewi lo peri au teꞌereme su, faraꞌu! Lu taune taꞌi taꞌi aꞌi Owane Sitewi lo peri pei au teꞌere. Meni ta Owane Sitewi lo peri teꞌe tepaꞌasiyei su, sosu meni tereꞌe ta faraꞌu Owane Sitewi lo peri sine teꞌe fiyarire. Lu taune taꞌi taꞌi aꞌi au teꞌe fiyariyei su, le lu taune werese lo marepi au pati aniyei. 32-33 Serai fene Owane Sitewi lo iyape ei ani aroweyei ne taꞌuweraiyei su, Owane Sitewi lai apou totesiya. “Lu taune werese aiwawe aꞌi owe ape sinere. Ahowa, lowe taꞌi taꞌi aꞌi faraꞌu sinerowawe, peri ano au teꞌe fiyarire. Lu taune werese sinerowawe, teꞌeyei su, ane peri lowe lo wanurowata. Ane marepi fetane aꞌi totereme.” Serai meni ta Owane Sitewi lo peri au teꞌeyei ne toteyei su, le apou totere, “Ane pereye Owane Sitewi lo peri au teꞌesiya awere? Piyete awere? Le marepi lo au hese ereiyei su, le faraꞌu Owane Sitewi lo peri au teꞌere.”
Serai lu taune werese Owane Sitewi lo wesi werese sahe, lowe Owane Sitewi lo yo seni ape pei umasire. 34 Fene Owane Sitewi ne au teꞌe nineꞌiyei ne taꞌuweraiyei su, taune werese Owane Sitewi lo wesi sahe peri owe ape teꞌere. Owane Sitewi lo yo peri, apou aꞌi teꞌeye, “Taune werese towafi lowe lo unahi ironamite.”g 35 Lowe Owane Sitewi lo peri wanu soꞌoruweyei ne toteyei su, lowe wesi towafi lowe lo sahe meni lowe lo maꞌe teꞌe towerire. Lowe Owane Sitewi lo wesi sahe etiri ta teꞌe toweriyei su, lowe yo seni luwaru aꞌi irowei.
36 Owane Sitewi lai peri lo tu fene maꞌe auwe awere? Ahowa, le peri lo lu taune tereꞌe maꞌe tu auwe. Sosu moꞌo le peri lo fene maꞌe auwe. Fene tutawe Owane Sitewi lo peri lu taune tereꞌe maꞌe au teꞌe fiyariteye awere? Ahowa, le lu taune tereꞌe maꞌe tu au teꞌeteye. 37 Meni ta apou aꞌi totesiya su, “Ane Owane Sitewi lo au teꞌe siye meni pefine aꞌi ne. Owane Sitewi lo Hepene Waraꞌi marepi hepene ano papu ironamisiya.” Le apou aꞌi totesiya su, le etiri ape ne, ane fene maꞌe au lesesiya ape, pei wanu soꞌoruwe etire. Etiri werese ape ne ane fene maꞌe lese ausawi ape, Owane Sitewi lo etiri ape mo wiyeme aꞌi ne. Serai fene peri ano pei wanu umasinamite.h 38 Ahowa, meni ta peri ano Owane Sitewi maꞌe fai ape meꞌiyeni maꞌe atati aruwei su, fene meni ape lo peri owe ape wanure.
39 Serai kaiyemo mo ano, fene Owane Sitewi lo marepi au teꞌe fiyariyei ne tote etite. Meni ta Owane Sitewi lo peri, peri tereꞌe tereꞌe se au teꞌeyei su, fene meni ape owe einamire. 40 Ahowa, etiri werese Owane Sitewi lo wesi sahe fene pei umasi fareraiyenamite. Fene yo seni marepi fetane aꞌi pei umasinamite.