Owane Sitewi maꞌe maꞌaru auwei ne totesiya.
16
Sosu aꞌi pe ane fene maꞌe peri tereꞌe au teꞌe areiyesiya. Fene maꞌaru tamo ani taꞌuweyewe, Owane Sitewi lo lu feni omo Jerusalem sahe, maꞌaru ariye aꞌi ape, ausawiyei. Tu ane lu taune omo werese Galesia sahe apou ei toweriye. Serai lowe maꞌaru tamo Owane Sitewi lo lu feni omo Jerusalem maꞌe ausawi. Ane fene maꞌe aiwawe aꞌi ei toweriyei.a 2 Owane Sitewi lai fene maꞌe maꞌaru tamo auwei su, fene nowe Nowe amou werese se maꞌaru tewi aꞌi fene ani taꞌuwe fute. Serai ane fene maꞌe aiyeyei su, fene maꞌaru erasi aꞌi fu tepaꞌasiyei. Serai ane fene maꞌe aiyeyei su, ane maꞌaru fene lo ei anirowata. 3 Sosu ane fene maꞌe heneraiyei su, fene lu tamo ei ariariyere. Ane one towe tamo lowe mase le se ausawiyei. Sosu ane lu ape mo omo Jerusalem maꞌe maꞌaru werese fene lo mase eimawesawiyei. Sosu lu ape mo lu taune werese maꞌaru, ariye aꞌi ape, faraꞌu nonetiyei. 4 Ane lu ape mo aiwawe aꞌi iyei awere? Piyete awere? Ane soꞌoru taꞌama. Owane Sitewi lo marepi piye teꞌesiya awere? Ane Owane Sitewi lo marepi umasiyei.Pol piye marepi totesiya awere?
5 Ane omo pani Masedonia iyei ne totesiya. Ane omo pani Masedonia maꞌe sewiye tepaꞌasiyei su, ane fene maꞌe heneraiyei.b 6 Ane omo Korin maꞌe heneraiyei su, ane nowe tamo fene mase iroteyei. Yame taꞌi yame hesi ane fene mase iroteyei. Ane soꞌoru taꞌama. Ane nowe naretei aꞌi fene mase iroteyei awere? Ane soꞌoru taꞌama. Ane omo tereꞌe maꞌe iyei ne toteyei su, fene ane pati henetire.c 7 Ane nowe oso aꞌi fene mase iroteyei ne totesiya taꞌama. Ahowa, ane nowe pite aꞌi fene mase ironamiteyei ne totesiya. Ane Meni Owane Pefine aꞌi nomo lo lo marepi umasiyei.
8-9 Ahowa, pereye nowe eite se ane omo Efesus sato irosiya. Lu taune tomu neꞌese Jisas lo peri wanu anireme. Sosu Juda taꞌuwe hereiyei iyape Pasova, i tepaꞌasiyei su, ane lowe arunatirowawe, fene maꞌe heneraiyei. Omo Efesus sahe lu tomu neꞌese Owane Sitewi lo peri einamisiya. Serai ane Owane Sitewi lo lu feni werese tote tawesiyei lowe lo au kairefiyeyei.d
10 Sosu aꞌi pe meni ta iyape Timoti fene maꞌe iyei su, fene le au noweinoweite. Le Owane Sitewi lo wiyawi aninamisiya. Ane wiyawi aiwawe aꞌi taꞌanesiya. Serai fene marepi fetane aꞌi le maꞌe aute. Serai le atoweiyerowata.e 11 Meni Timoti fene maꞌe iroteyei su, fene apou owe ape totere, “Meni ape yoꞌorei meni. Marepi lo luwaru aꞌi ne. Nomo peri lo wanuwei taꞌama.” Ahowa, fene werese luwaru aꞌi le ne owe ape totete. Le omo tereꞌe maꞌe iyei ne toteyei su, fene le pati hene arosawire. Fene marepi fetane aꞌi le maꞌe aute. Serai le ane maꞌe si tame aiyeyei. Ane le lu tamo aiwawe aꞌi Owane Sitewi lo peri umasisiya ape, ninawesiya.f
12 Sosu ane Apolos ne, kaiyemo nomo lo, fene maꞌe au teꞌesiya. Ane le maꞌe kairefi aꞌi se au teꞌeye, “Ne omo Korin maꞌe sewiyeyei ne ire.” Ahowa, marepi lo se apou aꞌi toteye, “Ahowa, pereye nowe eite se ane lowe maꞌe sewiyeyei ne irowata. Sosu nowe moꞌo su marepi ano taꞌuwe tepaꞌasiyei su, ane lowe maꞌe sewiyeyei ne iyei.”g
Pol peri yeꞌewi lo lowe maꞌe au teꞌeteye.
13 Mi mi werese fene yo seni luwaru werese aꞌi ape ne tei kairefiye noweinoweite. Tote tawesiyei fene lo kairefi aꞌi tei ironamite. Lu tamo fene maꞌe au luwaruweyei su, fene owe ape atoweiyere. Lowe fene maꞌe au luwaruweyei ne toteyei su, fene kairefi aꞌi tei irote. 14 Fene Owane Sitewi lo wiyawi taꞌaneyei su, fene lu taune werese marepi erasi aꞌi tote wawesiyenamite. Sosu lowe maꞌe au pati anite.
15 Sosu kaiyemo mo, ane fene maꞌe au teꞌesiya, Peri ano wanure. Fene Stefanas lo peri wanure. Ane omo pani Akaia sahe Owane Sitewi lo peri au teꞌeye su, le tani lo nohuweripi awaripi aiwawe aꞌi, lowe tutawe Owane Sitewi lo peri wanu umasinamiye. Pereye nowe eite se, lowe Owane Sitewi lo peri lu taune Jisas lo peri wanu umasinamisiya ape, lowe maꞌe tote tawesiyei lowe lo au kairefiyeye.h 16 Meni ape Owane Sitewi lo peri au teꞌe areiyeyei su, fene peri lo wanu umasinamite. Serai fene meni ape unahi onure. Sosu aiwawe aꞌi lu tamo, Owane Sitewi lo wiyawi taꞌanesiya ape, meni ape wou aꞌi fene peri lowe lo wanu umasinamite.
17 Ane fene siye taꞌame su, marepi ano orese aꞌi ne. Sosu fene lu hesi heta ane maꞌe eimawesai. Lu ape mo Stefanas, Fortunatus, Akaikus, lowe ane henerai su, ane marepi wisere erasi aꞌi toteye. Lowe yaru fene lo aniye. Serai lowe marepi ano au kairefiyeye. 18 Lowe ane maꞌe fai su, lowe peri heneruwe wisere aꞌi fene ne ane maꞌe au teꞌesai. Lowe marepi wisere aꞌi ane maꞌe auwe. Sosu fene peri ano wanuwei su, marepi fene lo aiwawe aꞌi au teꞌe wisereyeyei. Serai fene lu ape mo ne au teꞌe wisereyere.
Pol lowe maꞌe au teꞌe wisereyesawi.
19 Lu taune werese Owane Sitewi lo peri wanu umasinamisiya ape, omo pani Esia sahe lowe fene werese maꞌe au teꞌe wisereyesawi. Nohuweripi Akwila, tani lo Prisila, lowesi fene maꞌe erasi aꞌi au teꞌe wisereyesawi. Lu taune werese lowesi lo wesi sahe, Owane Sitewi maꞌe au teꞌe wisereyeyei ne taꞌuwerai ape, lowe fene maꞌe au teꞌe wisereyesawi. Lu taune werese ape mo Owane Sitewi lo peri wanu umasinamisiya.i 20 Lu taune werese Owane Sitewi lo peri wanu tote tawesi umasinamisiya ape, lowe fene maꞌe au teꞌe wisereyesawi. Fene Krais lo lu feni taꞌi taꞌi aꞌi tiyati eritere! Sosu eire, “Owane Sitewi lai fene maꞌe au wisereyeyei.”
21 Ane Pol fene maꞌe eriteyei ano lese ausawiyei. Ane Pol ereti topo ano se eriteyei ano fene maꞌe lese ausawiyei.
22 Lu tamo Meni Owane Jisas Krais ne marepi erasi aꞌi tote wawesiye taꞌame su, Owane Sitewi lai lowe maꞌe fofowei erasi aꞌi au irowei. Sosu Owane Sitewi lowe yehe omo maꞌe ani fu arosawirowa. Serai ane apou totesiya, Meni Owane Jisas Krais witane aꞌi si tame itorairowa.j 23 Sosu Owane Jisas Krais lo ferafereiyei fene maꞌe ironamiteyei. 24 Ane fene werese maꞌe marepi erasi aꞌi Jisas lo iyape se tote wawesiyenamisiya. Wiyeme aꞌi tene! One towe ano tepaꞌasiye.