3 Owane Sitewi, Meni Owane Jisas lo Tai, nomo lai iyape lo ei ani aroweyei. Le yo seni ferafereiyei pefine aꞌi lo nomo maꞌe au napetunamisiya. Le marepi wisere fetane aꞌi nomo maꞌe aunamisiya.^a

4 Nomo marepi orese aꞌi teriteyei su, Owane Sitewi lai marepi fetane aꞌi nomo maꞌe au ironamirowa. Marepi fetane aꞌi Owane Sitewi lai auwe ape, lu taune tamo marepi orese aꞌi teriteye ape, nomo faraꞌu marepi fetane aꞌi lo au ferafereirowa. 5 Serai lu tamo lai Krais maꞌe au luwaruweye su, Owane Sitewi lai Krais maꞌe marepi fetane aꞌi auwe. Serai aiwawe aꞌi lowe nomo maꞌe au luwaruweye su, Krais lai Owane Sitewi lo marepi fetane erasi aꞌi nomo maꞌe au ferafereiyei.^b 6 Nomo marepi orese aꞌi tamo teriteyei su, marepi orese aꞌi ape mo tote tawesiyei nomo lo au kairefiyeyei. Fene Owane Sitewi lo marepi fetane aꞌi teriteyei su, yo seni luwaru aꞌi fene sahe henerairowa ape, fene faraꞌu tei kairefiyerowa. Aiwawe aꞌi nomo Owane Sitewi lo marepi fetane aꞌi teriteyei su, fene aiwawe aꞌi Owane Sitewi lo marepi fetane aꞌi teriterowa. Owane Sitewi lai fene maꞌe marepi fetane aꞌi lo auwei su, fene werese yo seni luwaru erasi aꞌi sahe faraꞌu tei kairefiyeyei. Aiwawe etiri luwaru erasi aꞌi nomo maꞌe henerairowa su, nomo faraꞌu tei kairefiyeyei. 7 Nomo etiri pefine aꞌi siye soꞌoruwesiya. Etiri luwaru aꞌi, nomo teritesiya ape, fene teriteyei su, fene Owane Sitewi ne tote tawesiyei fene lo tei kairefiyenamisiya. Sosu fene etiri luwaru aꞌi tamo teriteyei su, Owane Sitewi lai fene maꞌe marepi fetane aꞌi lo, nomo maꞌe auwe ape, aurowa.

8 Kaiyemo mo, nomo fene peri eite wanu soꞌoruwereme. Omo pani Esia sahe lu tamo nomo maꞌe au luwaruwenamiteye. Kairefiyeyei nomo lo poꞌuteteye. Nomo temeniyeyei ne ataheyeye.^c 9 Pefine aꞌi, nomo marepi erasi aꞌi toteteye. Nomo temeniyeyei ne toteteye. Nomo lai marepi nomo lo tote tawesirowata. Ahowa, Owane Sitewi lai lu taune si taꞌane norohuwe hene aniyei ape, nomo le ne tote tawesinamiteye. 10 Nomo temeniyeyei ne ataheyeye su, Owane Sitewi lai nomo maꞌe au ferafereiye. Sosu aiwawe aꞌi le lai nomo werese maꞌe, Owane Sitewi ne marepi tote tawesinamiteye ape, nowe meꞌiye su le nomo au ferafereiyei. Serai lu tamo nomo maꞌe au luwaruweyei su, nomo peri pefine eite siye soꞌoruwesiya. Le nomo maꞌe tame au ferafereinamirowa.^d 11 Fene aiwawe aꞌi Owane Sitewi maꞌe nomo ne au teꞌe toweriyei su, fene nomo ne au ferafereiyei. Lu taune tomu neꞌese nomo ne Owane Sitewi maꞌe au teꞌe toweriyei su, Owane Sitewi lai peri lowe lo wanurowawe, nomo ne au wisereyerowa. Sosu lowe le ne au teꞌe wisereyenamisiya.

12 Sosu aꞌi pe nomo etiri pefine aꞌi soꞌoruwesiyawe, marepi wisere aꞌi nomo lo amerame aꞌi irosiya. Yo seni werese aꞌi nomo lo lu taune werese maꞌe wisere aseyaro aꞌi irosiya. Sosu aiwawe aꞌi nomo fene mase iroteye su, nomo Owane Sitewi lo ferafereiyei umasinamiteye. Serai yo seni nomo lo wisere aseyaro aꞌi fene maꞌe ironamiteye. Nomo awei lo marepi tote umasi taꞌame. 13 Serai nomo fene maꞌe peri nomo lo lese ausawi su, nomo peri fareyare aꞌi lese taꞌame. Fene peri nomo lo siye teꞌeyei su, fene peri sitewi werese wanu soꞌoruwerowa. Marepi ano apou aꞌi ne. Fene mi mi weriyei peri werese lo sitewi wanu soꞌoruwete. 14 Ahowa, fene peri nomo lo tewi aꞌi wanu soꞌoruweye. Nowe moꞌo su, nomo peri werese nomo lo fene siye soꞌoruwereme. Aiwawe aꞌi nowe ape se, Meni Owane Jisas si tame aiyerowa su, nomo fene ne wisere erasi aꞌi nineꞌinamirowa. Sosu aiwawe aꞌi fene nomo ne wisere erasi aꞌi nineꞌinamirowa.^e

15 Serai ane etiri eite soꞌoruwe tepaꞌasiye su, fene yo seni wisere aseyaro aꞌi nomo lo siye soꞌoruweteye. Ane tu nowe ta se marepi kairefi aꞌi fene maꞌe sewiyeyei ne toteye. Serai nowe toꞌuresi ane fene maꞌe sewiyeyei ne aiyerowa. Sosu fene nowe toꞌuresi ane siyeyei ne nineꞌirowa. 16 Ane apou toteye, ane omo pani Masedonia maꞌe iteyei su, ane tu omo fene lo maꞌe sewiyeyei ne henerirowa. Sosu ane omo Korin arunatirowawe, ane omo pani Masedonia maꞌe henerirowa. Nowe moꞌo su, ane omo pani Masedonia arunatirowawe, omo Korin maꞌe si tame henerairowa. Serai ane nowe hesi aꞌi fene sewiyeyei ne totesiya.^f 17 Serai peri ano wanure. Ane fene maꞌe sewiyeyei ne toteye. Ahowa, ane fene sewiyerowata. Ane marepi hesi se taꞌama. Ahowa, ane etiri ta irowei ne toteye su, ane marepi erasi aꞌi totesiya. Ane lu tereꞌe tereꞌe wou taꞌama. Ane peri wiyeme aꞌi fene maꞌe teꞌeyei su, ane peri topo ano ape umasirowa. Sosu aiwawe aꞌi ane peri piyete fene maꞌe teꞌeyei su, ane peri topo ano ape umasirowa. 18 Ahowa, Owane Sitewi lai mi mi weriyei weriyei wiyeme aꞌi tene. Nomo fene maꞌe peri wiyeme aꞌi au teꞌeyei su, nomo peri nomo lo umasirowa. Sosu aiwawe aꞌi nomo peri piyete fene maꞌe teꞌeyei su, nomo peri ape umasirowa. 19 Meni Sailas, sosu Timoti, ane aiwawe aꞌi nomo fene maꞌe Owane Sitewi lo meni eime ne, Jisas Krais, teꞌe fiyari areiyeteye su, fene apou wanu soꞌoruwesiya. Krais lai mi mi weriyei peri wiyeme aꞌi au teꞌenamisiya. Le peri werese lo ne aꞌi atati teꞌe taꞌame. Nomo peri wiyeme, sosu peri piyete aiwawe aꞌi au teꞌeyei taꞌame. Krais lai Owane Sitewi lo peri teꞌe naneiyei werese au iro henerairowa.^g 20 Owane Sitewi lai peri teꞌe naneiyei tomu neꞌese nomo werese maꞌe au teꞌeteye su, peri teꞌe naneiyei ape mo, Jisas lo iyape se peri wiyeme aꞌi au teꞌe fiyariye. Serai nomo peri wisere aꞌi Owane Sitewi maꞌe Jisas lo iyape se au teꞌeyei su, Owane Sitewi lai nomo maꞌe peri wiyeme aꞌi itiyaꞌu au teꞌerowa. Serai nomo Owane Sitewi lo iyape ne ei ani aroweyei.^h 21 Sosu Owane Sitewi lai nomo, sosu fene werese aiwawe aꞌi, Krais lo iyape se tote tawesiyei nomo lo tei kairefiyeyei ne irowe. Le lai nomo werese yo seni aseyaro irowei ne ariariyeye. 22 Le lai yaru ta nomo maꞌe au fuwe. Serai nomo werese lo ne. Yaru ape apou aꞌi ne, le marepi hepene nomo lo papu Hepene Waraꞌi aꞌi lo wiyei ne eimawe arosai. Owane Sitewi lai Hepene Waraꞌi aꞌi lo nomo maꞌe eimawe arosai su, nomo peri teꞌe naneiyei tewi aꞌi lo wanu soꞌoruweye. Serai nomo etiri eite soꞌoruwe tepaꞌasiye. Moꞌo nowe yeꞌewi henerairowa su, nomo peri teꞌe naneiyei werese werese aꞌi lo wanu soꞌoruwerowa.ⁱ

23 Nomo marepi orese aꞌi fene maꞌe auwei ne toteyei wou taꞌama. Owane Sitewi lai marepi ano siye soꞌoruwe areiyeye. Serai ane fene maꞌe omo Korin sahe sewiyeyei ne aiye taꞌame. 24 Nomo fene maꞌe tote tawesiyei fene lo ne au teꞌe kairefiyerowata. Ahowa, marepi nineꞌiyei fene lo irosiya ape ne, nomo, fene au pati taꞌaneyei ne totesiya. Fene Krais ne tote tawesiyei su, marepi hepene fene lo tei kairefiyenamitorowa.^j