2
Marepi ano apou toteye, ane fene maꞌe sewiyeyei ne aiyerowata. Piyene awere? Ane marepi orese tereꞌe fene maꞌe tame auwei wou taꞌama.a 2 Piyene awere? Ane fene maꞌe marepi orese aꞌi ta auwei su, piye meni ta lai marepi nineꞌiyei ane maꞌe aurowa. Ahowa, ane marepi orese aꞌi fene maꞌe irowei su, fene aꞌi lai ane maꞌe au nineꞌiyei wou taꞌama. 3 Serene ane tu fene maꞌe one towe sahe leseye su, ane peri kairefi aꞌi se au teꞌe areiyeye. Ane fene maꞌe marepi orese aꞌi auwei ne aiye wou taꞌame. Ane fene maꞌe marepi orese aꞌi auwei ne tame aiyerowa su, marepi ano orese erasi aꞌi teriterowa. Fene werese marepi orese aꞌi teriterowa su, ane aiwawe aꞌi marepi orese aꞌi teriterowa. Fene lai lu taune ane maꞌe marepi sahe au nineꞌiyei ape, ane marepi ano sahe soꞌoruwesiya. Fene marepi erasi aꞌi nineꞌiyei su, ane aiwawe aꞌi marepi erasi aꞌi nineꞌirowa. 4 Ane fene maꞌe one towe ape leseye su, marepi ano orese erasi aꞌi teriteteye. Sosu marepi ano orese ewiteyei erasi teriteteye. Sosu ane fene ne luwei erasi irowe. Ane one towe ape leseye su, ane fene maꞌe marepi orese aꞌi auwei wou taꞌama. Ahowa, peri ano wanure! Fene marepi ano wanu soꞌoruwere. Ane fene ne marepi erasi aꞌi tote wawesiyenamisiya.bFene meni ta lo yo seni luwaru aꞌi ne tote iꞌanere.
5 Sosu aꞌi pe meni ta lu taune maꞌe marepi orese aꞌi au irowe su, le aiwawe aꞌi ane maꞌe marepi orese tewi oso aꞌi irowe. Ahowa, le fene werese maꞌe marepi orese erasi aꞌi au irowe. Ane le ne peri kairefi aꞌi teꞌe wou taꞌama. 6 Meni ape yo seni luwaru aꞌi irowe su, lu tewi erasi, fene mase irosiya ape mo, meni ape maꞌe marepi neritase aꞌi au irowe. Marepi neritase ape le ne faraꞌu aꞌi ne. 7 Ahowa, pefine aꞌi fene meni ape lo yo seni luwaru faraꞌu tote iꞌanere. Fene le yo seni luwaru aꞌi, irowe ape, tote iꞌaneyei su, fene marepi fetane aꞌi le maꞌe au irowei. Fene yo seni lo tote iꞌane taꞌame su, marepi orese erasi aꞌi mi mi werese irowei. 8 Serai ane fene maꞌe marepi kairefi aꞌi se peri teꞌesiya. Fene werese meni ape maꞌe au teꞌere, fene le ne marepi erasi aꞌi tote wawesiyete. 9 Sosu ane tu one towe ape fene maꞌe leseye su, ane marepi fene lo siye soꞌoruwereme. Fene etiri werese se peri ano umasisiya awere? Piyete awere? 10 Fene meni ape lo yo seni luwaru aꞌi tote iꞌaneyei su, ane aiwawe yo seni luwaru lo tote iꞌaneyei. Wiyeme aꞌi ane yo seni luwaru aꞌi tote iꞌaneyei su, ane fene ne yo seni luwaru aꞌi fene lo Krais lo nihe se au tote iꞌaneyei. 11 Sepei Satan, meni ape hi ani ararowei su, le nomo aiwawe aꞌi au luwaruweyei. Ahowa, nomo meni ape lo yo seni luwaru aꞌi tote iꞌaneyei su, sepei Satan nomo ne au ani ararorowata. Ahowa, nomo Sepei Satan lo marepi siye soꞌoruwesiya tene! Le nomo werese ne hi au hi ani ararowei ne totesiya.c
Pol lai Taitus siyereme.
12 Ane tu omo Troas sahe Krais lo peri heneruwe wisere aꞌi au teꞌe fiyariyei ne fi su, Meni Owane Pefine nomo lo lu taune tomu neꞌese ei taꞌuwerai. Serai ane lowe maꞌe Owane Sitewi lo peri au teꞌe fiyariye.d 13 Ahowa, ane lowe maꞌe teꞌe fiyariye su, marepi ano orese aꞌi teriteye. Meni Taitus, kaiyemo ano, le sato ariye. Serai ane lu taune, Troas sahe iroteye ape, arunatiyewe, sosu pani Masedonia maꞌe fi.e
Jisas nomo maꞌe kairefi lo auwe.
14 Ane Owane Sitewi maꞌe au teꞌe wisereyesiya. Le lai nomo Krais maꞌe hene arunarai. Serai Krais lai sepei Satan hi au hi ani ararowe su, nomo le mi mi weriyei moꞌo nineꞌiyei se umasinamiteye. Nomo eiwerou maꞌe fi su, Owane Sitewi kairefiyeyei lo nomo maꞌe auwewe, nomo lu taune werese maꞌe Krais ne peri au teꞌe fiyariteye. Peri ape lu taune werese ne omo werese sahe heneri wisere wou aꞌi ne. 15 Serai nomo werese Krais lo heneri wisere aꞌi Owane Sitewi hire maꞌe wou au heseye. Nomo lai tahe heneri wisere aꞌi lu taune maꞌe, Jisas lo yo umasiteye ape, aiwawe au fiyarisiya. Sosu aiwawe aꞌi lu taune, Jisas lo peri umasi taꞌame ape, nomo heneri wisere aꞌi irosiya. Piyene awere? Nomo peri heneruwe wisere aꞌi lowe maꞌe teꞌe fiyariye. 16 Ahowa, lu taune Krais lo peri umasi taꞌame ape, heneri nomo lo luwaru aꞌi temeniyeyei aiwawe aꞌi ne. Sosu aiwawe aꞌi lu taune, Krais lo peri umasisiya ape, heneri nomo lo wisere pefine aꞌi ne, marepi hepene weriyei weriyei aiwawe aꞌi irosiya. Sawi Amou! Wanure! Meni ta Owane Sitewi lo kairefiyeyei se taꞌame su, serai owe meni ta lai faraꞌu wiyawi ape taꞌaneyei.f 17 Owane Sitewi lai nomo lu taune werese maꞌe Krais lo kairefi se eimawesawi. Nomo Owane Sitewi lo nihe se marepi wiyeme aꞌi se Owane Sitewi lo peri au teꞌe fiyariyei. Nomo Krais lo wiyawi taꞌane siye lu aiwawe aꞌi. Sosu nomo lu tereꞌe tereꞌe wou taꞌama. Lu feni tereꞌe ape mo Owane Sitewi lo peri au teꞌe fiyariye su, lowe maꞌaru aꞌi aniyei ne totesiya.