Lu taune Krais lo yo seni umasisiya.
3
Nomo iyape towafi nomo lo fene maꞌe ei ani aroweye awere? Lu tamo fene maꞌe aiyeyei su, lowe one towe tamo fene maꞌe aitaiyei. One towe ape mo sahe, lu ape mo iyape towafi lowe lo ei ani aroweyei. Serai lowe fene maꞌe one towe lowe lo au atuatuwei su, fene lowe ne apou toteyei, serai fene lowe iyape lowe lo ei ani aroweyei. Nomo lowe wou taꞌama. Fene nomo ne wanu soꞌoruwe tepaꞌasiye.a 2 Fene aꞌi lai one towe nomo lo ne. Meni Owane Krais lai marepi hepene nomo lo sahe au leseye. Lu taune werese fene siyeyei su, lowe Krais lo yo seni siye soꞌoruweyei tene!b 3 Nomo Krais lo peri fene maꞌe au teꞌeye su, fene le ne tote tawesi umasiteye. Lu taune werese marepi hepene fene lo siyeyei su, lowe Krais lo one towe siye soꞌoruweyei. Krais one towe ape yehe kere se lese taꞌame. Ahowa, le Owane Sitewi lo Hepene Waraꞌi aꞌi se leseye. Le tapiye sahe leseye taꞌama. Ahowa, le lu taune lo marepi sahe au leseye.c4 Nomo Owane Sitewi ne soꞌoruwesiya. Le lai Krais lo wiyawi werese wiyeme aꞌi heneraiyei ne au irorowa. 5 Nomo aꞌi lai Owane Sitewi lo wiyawi taꞌanerowata. Nomo peri lo au teꞌerowata. Nomo wiyawi lo kairefi nomo lo se taꞌanerowata. Ahowa, Owane Sitewi lai kairefi lo nomo maꞌe wiyawi lo taꞌaneyei ne auwe. 6 Owane Sitewi aꞌi lai kairefiyei lo nomo maꞌe wiyawi lo taꞌaneyei ne auwe. Serai nomo Owane Sitewi lo peri teꞌe naneiyei heꞌi aꞌi au teꞌe fiyariteye. Peri teꞌe naneiyei ape lu lo yo peri, lu tamo lesesiya ape, wou taꞌama. Peri teꞌe naneiyei heꞌi aꞌi ape Owane Sitewi lo Hepene Waraꞌi aꞌi maꞌe fai. Moses lo yo peri apou teꞌesiya. “Lu taune werese yo seni luwaru aꞌi irowei su, lowe temeniyerowa.” Fene Moses lo yo peri umasiyei su, fene mi mi pasi pasi weriyei temeniye poꞌuterowa. Ahowa, Owane Sitewi lo Hepene Waraꞌi aꞌi marepi hepene heꞌi aꞌi aurowa.d
Owane Sitewi lo marepi heꞌi aꞌi wisere pefine aꞌi ne.
7 Sosu aꞌi pe Owane Sitewi lai Moses lo yo peri tapiye potu aꞌi sahe leseye. Yo peri ape Owane Sitewi lo mi erasi aiwawe fai. Serai Israel lo lu tewi werese meni Moses lo nihari siye eti taꞌame. Moses omo hire maꞌe itorai su, Owane Sitewi lo mi erasi nihari lo napetuwe. Nowe moꞌo oso aꞌi su, Owane Sitewi lo mi erasi nihari lo sahe poꞌute memeꞌiti. Yo peri ape, Owane Sitewi Moses maꞌe auwe ape, mi erasi aiwawe aꞌi fai su, ahowa, yo peri lowe maꞌe marepi hepene heꞌi aꞌi au taꞌame. Lu taune werese yo peri ape wanu tote umasiyei ape, lowe werese temeniyeye.e 8 Ahowa, yo peri heꞌi aꞌi, Krais lu taune werese maꞌe auwe ape, Owane Sitewi lo Hepene Waraꞌi aꞌi yo peri heꞌi aꞌi ape ne mi erasi aꞌi se iro heneraiyei. Sosu moꞌo Owane Sitewi lo mi erasi pefine aꞌi yo peri weriyei hi ani ararowei. 9 Moses lo yo peri ape tu naifa Owane Sitewi lo mi erasi aiwawe fai. Sosu lu taune werese yo peri umasiyei ape, lowe mi erasi ape siye poꞌuteye. Ahowa, Owane Sitewi lo Hepene Waraꞌi aꞌi yo seni luwaru aꞌi nomo lo au sasari pamowerowa su, le marepi hepene heꞌi aꞌi nomo maꞌe aurowa. Serai Owane Sitewi lo mi erasi pefine aꞌi mi tereꞌe werese hi ani ararorowa.f 10 Peri eite wiyeme aꞌi tene! Wanure! Yo peri ape, Owane Sitewi lai Moses maꞌe auwe ape, tu naifa mi erasi mase fai. Ahowa, pereye nowe eite se, mi erasi ape poꞌuteye. Mi erasi ape marepi hepene heꞌi aꞌi mase aiyesiya ape, yo peri weriyei lo mi ani araronamisiya. 11 Sosu mi erasi ape, yo peri ape aiwawe fai ape, poꞌute memeꞌititeye. Ahowa, Owane Sitewi lo Hepene Waraꞌi aꞌi marepi hepene heꞌi aꞌi nomo maꞌe auwe su, mi erasi pefine aꞌi lo mi mi weriyei weriyei poꞌuterowata.
12 Serai Owane Sitewi lai nomo maꞌe peri teꞌe naneiyei lo ape nomo ninawesiya ape, auwe su, nomo peri lo lu taune werese maꞌe kairefi aꞌi se au teꞌe fiyariyei. 13 Nomo meni Moses wou taꞌama. Tu naifa, Moses, omo hire maꞌe itorai su, nihari lo mi erasi tewi mitaiye fiyariteye. Serai le nihari lo ipari tahe se napetuwe. Sosu Israel lo lu tewi werese nihari lo mi erasi, poꞌute memeꞌititeye ape, siye etirowata. Moses lo mi ataheye poꞌuteye.g 14 Ahowa, Owane Sitewi lai marepi lowe lo einami ti tawesiteye. Sosu pereye nowe eite se marepi lowe lo aiwawe aꞌi iroteye. Serai lowe Moses lo yo peri weriyei siye teꞌeyei su, marepi lowe lo Owane Sitewi lo yo seni siye soꞌoruwerowata. Ahowa, lowe Krais ne wanu tote tawesiyei su, Owane Sitewi lai aitu sapu ape, yo peri lo napetuteye ape, ani arau fiyarirowa. Serai lowe faraꞌu Owane Sitewi lo yo seni siye soꞌoruwerowa. 15 Ei, pereye nowe eite se, lowe Moses lo yo peri weriyei siye teꞌeyei su, Owane Sitewi lai marepi lowe lo aitu sapu se napeturowa. 16 Ahowa, lu taune Meni Owane Pefine maꞌe atatirowawe, le ne tote tawesiyei su, Owane Sitewi lai aitu sapu marepi lowe lo napetuteye ape, ani arau fiyarisawirowa.h 17 Serai Meni Owane Pefine aꞌi ape, le Owane Sitewi lo Hepene Waraꞌi aꞌi ne. Sosu eiwerou maꞌe Hepene Waraꞌi aꞌi lo irorowa su, le nomo maꞌe marepi hepene heꞌi aꞌi aurowa. Sosu nomo marepi orese aꞌi ironamitorowa.i 18 Sosu nomo werese, Meni Owane Pefine aꞌi ne tote tawesisiya ape, nomo faraꞌu mi erasi pefine aꞌi lo siye etisiya. Le ipari tahe nihari nomo lo napetuteye ape, ani arau fiyarisawi. Serai lu taune tereꞌe tamo nihari nomo lo siyeyei su, lowe Owane Sitewi lo mi pefine erasi aꞌi faraꞌu siyerowa. Le aꞌi lai nomo nihari lo aiwawe wou iro henerairowa. Nowe mi mi weriyei le nomo mi erasi aꞌi taꞌanesiya. Meni Owane Pefine aꞌi lai nomo maꞌe wiyawi ape taꞌanesiya ape, le Owane Sitewi lo Hepene Waraꞌi aꞌi ne.