Lu aposel werese tahe pereꞌe aꞌi se wahu ta wou aꞌi ne.
4
Owane Sitewi lai ferafereiyei se ane maꞌe wiyawi lo taꞌaneyei ne ei aniye. Serai ane marepi eresene momotei aꞌi se wiyawi lo taꞌanenamirowa. 2 Ahowa, ane yo seni neritase fareyare aꞌi meꞌiyeni maꞌe atati arunati. Ane yo seni areare aꞌi iro taꞌame. Ahowa, ane Owane Sitewi lo peri au luwaruwe taꞌame. Serai ane peri pefine aꞌi lu taune werese maꞌe amerame aꞌi au teꞌe areiyeye. Lu taune werese peri ano wanuwei su, lowe marepi lowe lo sahe peri wiyeme aꞌi wanu soꞌoruweyei. Sosu lowe apou toteye, “Owane Sitewi lai etiri werese, nomo iroteye ape, siyesiya.”a 3 Sosu peri heneruwe wisere aꞌi, nomo au teꞌe fiyarisiya ape, lu taune tamo wanu soꞌoru taꞌama, lu taune werese temeniyeyei lo yo umasiye ape, lowe peri eite wanu soꞌoruwerowata. 4 Lu taune ape mo, Owane Sitewi lo peri heneruwe wisere aꞌi wanu soꞌoruwerowata. Piyene awere? Sepei luwaru pefine aꞌi, awei lo yo seni luwaru aꞌi lo sitewi ape ne, le lu taune ape mo lo marepi anite tawesinamiyei su, lowe Krais lo mitaiyeyei erasi aꞌi siyerowata. Mi erasi aꞌi lo ape Krais lo peri heneruwe wisere aꞌi wanu soꞌoruweyei maꞌe fai. Krais aꞌi lai Owane Sitewi lo nihari pefine wou aꞌi ne.b 5 Sosu nomo peri heneruwe wisere aꞌi au teꞌe fiyariyei su, nomo peri ape nomo ne au teꞌe taꞌame. Ahowa, nomo peri ape Jisas Krais, Meni Owane Pefine aꞌi nomo lo ne, fene maꞌe au teꞌe fiyariyei. Serai nomo Krais lo kairefi aꞌi unahi irosiya su, nomo Jisas lo wiyawi yahowaꞌi aꞌi siye lu fene ne henerai. 6 Tu naifa Owane Sitewi apou eiye, “Mi erasi pasi sahe tewi mitaiyete.” Owane Sitewi aiwawe aꞌi ape le marepi nomo lo sahe mi erasi tewi mitaiye fiyarirowa. Serai nomo Owane Sitewi lo mi erasi siyeye su, nomo Owane Sitewi lo marepi wanu soꞌoruweye. Mi erasi ape, nomo siyesiya ape, Jisas lo nihari sahe tewi mitaiyenamisiya.c7 Ahowa, nomo Owane Sitewi lo mi erasi aꞌi ape siye soꞌoruwesiya ape, nomo wahu yaꞌariyei wou aꞌi ne. Serai lowe Owane Sitewi lo kairefi pefine aꞌi ape siyesiya. Kairefi pefine ape lai Owane Sitewi maꞌe fai. Ahowa, kairefi ape nomo maꞌe fai taꞌama.d 8 Mi mi werese nomo fofowei erasi teritesiya. Ahowa, nomo kairefi aꞌi teiteye. Marepi nomo lo meremereye aꞌi iroteye su, nomo marepi fetane aꞌi iroteye.e 9 Lu tamo nomo maꞌe au luwaruweyei su, Owane Sitewi lai nomo ne tote iꞌanerowata. Lowe nomo maꞌe ereti se aineyei su, lowe nomo aine teraꞌerowata. 10 Serai mi mi werese nomo marepi orese aꞌi tahe paꞌare nomo lo sahe fofowei teritenamisiya marepi orese aꞌi tahe nomo lo sahe teritesiya ape, Krais aiwawe aꞌi tu teriteye.f 11 Nomo Jisas lo wiyawi taꞌaneyei su, mi mi werese lu tamo nomo aine teraꞌeyei ne totesiya. Serai nomo fofowei erasi aꞌi tahe nomo lo sahe teriteyei su, lu taune werese Jisas lo marepi hepene, tahe paꞌare nomo sahe siye soꞌoruwerowa.g 12 Nomo Jisas lo peri au teꞌe fiyariyei su, mi mi werese lu tamo nomo aine teraꞌeyei ne totesiya. Ahowa, nomo fene maꞌe Jisas lo peri au teꞌesiya su, serai Owane Sitewi lai marepi hepene heꞌi aꞌi fene maꞌe aunamirowa.
13 Tu naifa meni ta apou leseye,
“Ane Owane Sitewi lo marepi tote tawesiye. Serai ane marepi lo au teꞌe fiyariye.” Sng 116:10
Nomo marepi lo aiwawe aꞌi tote tawesisiya. Serai nomo marepi apou ape aiwawe aꞌi tote tawesisiya su, nomo fene maꞌe marepi apou ape au teꞌe fiyariyei. 14 Owane Sitewi lai Meni Owane Jisas si tame taꞌane norohuwe hene ani sineye su, nomo aiwawe apou siye soꞌoruweye. Owane Sitewi lai aiwawe aꞌi nomo Jisas mase si tame taꞌane norohuwe hene ani sinerowawe, sosu nomo fene aiwawe le maꞌe henetirowa. Serai nomo le mase mi mi pasi pasi ironamitorowa.h 15 Etiri werese eite mo fene ne siye soꞌoruweyei ne pati anisiya. Lu taune tomu neꞌese Jisas ne tote tawesiyei su, Owane Sitewi lai lowe maꞌe ferafereiyei erasi lo au atuaturowa. Serai lowe werese marepi erasi aꞌi le maꞌe au teꞌe wisereye nineꞌirowa. Sosu Owane Sitewi lo mi erasi pefine aꞌi henerairowa.
Nomo Owane Sitewi ne tote tawesinamite.
16 Serai nomo marepi eresene momotei aꞌi ironamite. Tahe paꞌare nomo lo weriyei pereꞌe aꞌi henerai su, mi mi weriyei Owane Sitewi lai marepi hepene nomo lo papu au kairefiyesiya.i 17 Marepi orese fofowei aꞌi ape mo nomo teritesiya ape, nowe oso oso aꞌi irorowa. Piyene awere? Nomo Owane Sitewi lo peri teꞌe naneiyei siye soꞌoruwesiya. Owane Sitewi lai nomo maꞌe mi erasi aꞌi lo aurowa. Mi erasi aꞌi lo ape lai etiri tereꞌe werese hi ani araronamitorowa.j 18 Serai etiri werese awei sahe nomo siyesiya ape, nomo owe ape siye etinamite. Ahowa, nomo etiri werese hire maꞌe nomo siye taꞌame ape, nomo etiri ape mo siye etinamite. Etiri werese ape mo, awei sahe irosiya ape, witane aꞌi uwasenamiyei. Sosu etiri werese hire maꞌe nomo siye taꞌame ape, etiri ape mo mi mi pasi werese ironamitorowa.k