Wesi nomo lo niꞌarawe hire maꞌe ironamisiya.
5
Sosu aꞌi pe tahe paꞌare nomo lo ipo wesi wou aꞌi ne. Nomo awei sahe irosiya su, hepene nomo lo tahe paꞌare papu irosiya. Tahe paꞌare nomo lo temeniyeyei su, Owane Sitewi lai wesi hire niꞌarawe sahe nomo maꞌe auwei ne taꞌaneye. Wesi ape Owane Sitewi lai nomo maꞌe auwei ape, lu tamo ereti lowe lo se taꞌane taꞌame ape, mi mi pasi pasi irorowa. Owane Sitewi lai wesi ape ne nomo maꞌe au teꞌe soꞌoruwe areiyeye.a 2 Nomo awei sato irosiya su, nomo wesi ape ne marepi erasi aꞌi totesiya. Serai nomo marepi sahe heyanete omoꞌomesiya. Wesi nomo lo hire maꞌe irosiya ape, nomo Owane Sitewi maꞌe apou teꞌe towerisiya. “Ne wesi ape se nomo hire maꞌe fu tawesire.”b 3 Nomo temeniyeyei su, tahe paꞌare weriyei poꞌuterowa. Ahowa, nomo omo hire maꞌe wiyei su, le nomo maꞌe tahe paꞌare heꞌi aꞌi aurowa. 4 Serai nomo tahe paꞌare weriyei sato irosiya su, nomo noꞌu erasi aꞌi omoꞌomesiya. Sosu nomo fofowei orese erasi aꞌi tamo teritesiya. Ahowa, nomo temeniyeyei su, nomo hepene nomo lo tahe paꞌare mase iroteyei wou taꞌama. Ahowa, nomo tahe paꞌare heꞌi aꞌi, Owane Sitewi lai aurowa ape, aniyei ne totesiya. Sosu tahe paꞌare weriyei nomo lo uwaseyei su, Owane Sitewi lai nomo maꞌe tahe paꞌare heꞌi aꞌi aurowa. Serai nomo mi mi pasi pasi weriyei ironamitorowa. 5 Sosu aꞌi pe Owane Sitewi lai tahe paꞌare heꞌi aꞌi ape nomo maꞌe auwei ne taꞌaneye. Sosu le lai Hepene Waraꞌi aꞌi lo nomo maꞌe eimawesai. Serai Hepene Waraꞌi aꞌi lo nomo papu itoraiyei su, Owane Sitewi apou eiyei, “Hepene Waraꞌi aꞌi ano, ane fene maꞌe eimawe arosai ape, le peri teꞌe nanei tutawe ano ne. Le fene papu wiraiyei su, fene etiri ta siye soꞌoruwerowa. Nowe meꞌiye su, ane tahe paꞌare heꞌi aꞌi fene maꞌe ausawirowa.”6 Serai nomo mi mi werese marepi wisere aꞌi teritenamisiya. Nomo tahe paꞌare weriyei towafi nomo lo sahe iroteyei su, nomo Meni Owane Pefine aꞌi lo tahe paꞌare heꞌi aꞌi anirowata. Serai nomo Meni Owane Pefine aꞌi mase irorowata. Ahowa, nomo temeniyeyei su, nomo tahe paꞌare heꞌi aꞌi anirowa. Serai nomo Meni Owane Pefine aꞌi mase mi mi pasi pasi ironamitorowa.c 7 Etiri werese nomo irosiya ape, nomo Owane Sitewi ne tote tawesisiya. Ahowa, nomo etiri ape mo ne nihe se siye taꞌame. 8 Marepi nomo lo wisereye nineꞌinamisiya. Pefine aꞌi ne! Marepi ano aiwawe aꞌi totesiya. Ane tahe paꞌare weriyei ano arunatireme. Sosu Meni Owane Pefine aꞌi mase mi mi pasi pasi ironamitorowa.d 9 Etiri tutawe aiwawe aꞌi ne, etiri werese ape mo, nomo irosiya ape, Owane Sitewi nomo ne au wisereyesiya. Nomo tahe paꞌare weriyei nomo lo sahe irosiya su, le nomo ne au wisereyesiya. Sosu nomo Meni Owane Pefine mase iroteyei su, aiwawe aꞌi le nomo ne au wisereyeyei.e 10 Nowe yeꞌewi heneraiyei su, nomo werese Krais lo etiyei sahe teirowa. Werese taꞌi taꞌi aꞌi yo seni werese, nomo werese taꞌi taꞌi aꞌi irowe ape, le nomo maꞌe etiri tamo auwei. Yo seni wisere aꞌi, nomo irowe ape, le nomo maꞌe etiri ta wisere aꞌi aurowa. Sosu yo seni luwaru aꞌi nomo irowe ape, le nomo maꞌe etiri luwaru aꞌi aurowa.f
Nomo Owane Sitewi mase kopurame irosiya.
11 Sosu aꞌi pe Meni Owane Pefine maꞌe atoweiye aꞌi ne, nomo lai soꞌoruwesiye tene! Serai nomo lu taune werese Jisas maꞌe henetiyei ne totesiya. Ahowa, Owane Sitewi lai nomo ne siye soꞌoruwe tepaꞌasiye. Sosu ane fene ne apou totereme, “Fene marepi towafi fene lo sahe ane ne siye soꞌoruwerowa.” 12 Nomo wiyawi nomo lo ne iyape towafi nomo lo ei ani arowesiya awere? Ahowa, nomo wiyawi nomo lo fene mase taꞌaneyei su, nomo fene maꞌe nomo ne wisere aꞌi fa teriteyei ne totesiya. Nomo wiyawi nomo lo taꞌaneyei su, Owane Sitewi lo nihe se marepi nomo lo waraꞌi aꞌi ne. Serai meni ta iyape topo lo wiyawi lo ne ei ani aroweyei su, fene le maꞌe peri wiyeme aꞌi itiyaꞌu au teꞌerowa. 13 Lu taune tamo nomo ne apou totesiya, “Nomo lu meremereye aiwawe aꞌi ne.” Peri ape wiyeme aꞌi su, nomo Owane Sitewi umasiyei ne meremereyesiya. Ahowa, nomo marepi farere aꞌi irosiya su, nomo faraꞌu fene ne au pati aniyei. 14 Serai Krais nomo werese tote wawesiyenamisiya su, sosu nomo marepi lo kairefi se tote umasinamisiya. Marepi nomo lo kairefi aꞌi totesiya. Apou aꞌi meni taꞌi nomo werese ne temeniyeye. Serai nomo yo seni luwaru aꞌi irowei ne tote etisiya. 15 Sosu le lu taune werese ne temeniyeye su, lowe, marepi hepene heꞌi aꞌi irosiya ape, marepi towafi lowe lo tote umasi taꞌame. Ahowa, lowe, meni ape, lowe ne temeniyeye ape, marepi lo tote umasinamite. Owane Sitewi lai meni ape si tame norohuwe hene ani sineye. Le Meni ape si tame hene norohuwe ani sineye su, le wiyawi ape lowe ne au taꞌanesiya.g
16 Sosu pereye nowe eite se, nomo lu taune siyeyei su, nomo lowe awei lo marepi se au hese ereirowata. Tu naifa ane Krais aiwawe aꞌi ne awei lo marepi se au hese ereiyei ne toteye. Nomo marepi hepene heꞌi aꞌi irosiya su, nomo Krais awei lo marepi se au hese ereirowata. 17 Serai lu taune Krais maꞌe nate tawesisiya su, lowe marepi hepene heꞌi aꞌi ani tepaꞌasiye. Yo seni weriyei werese lowe lo poꞌuteye. Sosu etiri werese lowe lo heꞌi aꞌi henerai.h 18 Etiri werese ape mo Owane Sitewi maꞌe fai. Tu naifa nomo werese Owane Sitewi maꞌe airame ironamiteye. Ahowa, pereye nowe eite se, Owane Sitewi lai nomo werese Jisas lo kairefi se kaiyemo pefine lo au iro henerai. Nomo Owane Sitewi kaiyemo henerai su, le wiyawi lo nomo maꞌe taꞌaneyei ne auwe. Sosu lu taune Owane Sitewi maꞌe airame irosiya ape, nomo faraꞌu lowe le maꞌe henetaiyei. Serai lowe Owane Sitewi lo kaiyemo aiwawe aꞌi henerairowa.i 19 Owane Sitewi lo wiyawi apou aꞌi ne. Le lu taune omo omo werese sahe Krais se le maꞌe taꞌuwe henetaiyei ne totesiya. Lu taune le maꞌe henetaiyei su, le lai yo seni luwaru werese aꞌi lowe lo au sasari pamoweyei. Owane Sitewi lai peri lo eite nomo maꞌe auwe. Serai nomo peri lo ape lu taune werese maꞌe au teꞌe fiyariyei. Sosu lu taune werese Owane Sitewi lo kopurame pefine aꞌi henerairowa.j
20 Serai nomo Krais lo peri wanu umasinamiteye. Aiwawe aꞌi Owane Sitewi lai lu taune werese werese aꞌi ahi nomo lo se ei aniyei. Serai nomo lu taune werese maꞌe Krais lo kairefi aꞌi se apou au teꞌesiya. “Fene ai atuwei lo yo seni Owane Sitewi maꞌe fa arunatite. Sosu fene werese Owane Sitewi lo kaiyemo fa heneraire.” 21 Meni ape, Jisas, yo seni werese waraꞌi aꞌi ironamiteye. Owane Sitewi lai meni ape maꞌe yo seni luwaru werese aꞌi nomo lo ani fuwe. Sosu nomo werese Jisas ne tote tawesiyei su, Owane Sitewi lai yo seni luwaru aꞌi nomo lo au sasari pamoweyei. Serai nomo nihe lo se nomo lu taune waraꞌi aꞌi henerairowa.k