3 Nomo Owane Sitewi lo wiyawi taꞌanesiya su, nomo lu taune peri luwaru aꞌi wiyawi nomo lo ne au teꞌe narusiya wou taꞌama. Serai nomo etiri ta yo sahe ani fuwei ne tote taꞌame. Ahowa, yo seni nomo aseyaro waraꞌi aꞌi fa heneraite. 4 Ahowa, etiri werese nomo irosiya ape, nomo lu taune werese apou au atuatusiya. Nomo Owane Sitewi lo wiyawi siye lu yahowaꞌi aꞌi ne. Nomo etiri luwaru aꞌi teritesiya ape, marepi orese aꞌi teritesiya ape, sosu yo seni luwaru aꞌi lu taune nomo maꞌe au luwaruwesiya ape, nomo etiri ape mo teritesiya su, lu taune werese nomo ne siyerowa. Nomo Owane Sitewi lo wiyawi yahowaꞌi aꞌi taꞌane siye lu ne. 5 Lu tamo nomo me au se aineye. Sosu lowe nomo kalabus wesi maꞌe heneti. Sosu lu taune tomu neꞌese nomo maꞌe ai peri erasi irowe. Etiri eite mo se nomo wiyawi erasi ani tohoteteye. Pasi tomu neꞌese nomo nihe howeirowata. Sosu nomo lau erasi se teriteteye.^a 6 Yo seni nomo lo waraꞌi aꞌi ne. Owane Sitewi lai nomo maꞌe marepi wisere aꞌi auwe. Serai nomo Owane Sitewi lo marepi siye soꞌoruwesiya. Marepi orese aꞌi nomo maꞌe heneraiyei su, Owane Sitewi lai nomo maꞌe marepi fetane aꞌi auwei. Lu taune tereꞌe marepi orese aꞌi teritesiya su, nomo faraꞌu lowe au pati anisiya. Owane Sitewi lo Hepene Waraꞌi aꞌi nomo papu irosiya su, nomo lu taune tereꞌe ne marepi erasi aꞌi tote wawesiyesiya.^b 7 Peri nomo lo wiyeme aꞌi ne. Sosu Owane Sitewi lai nomo maꞌe kairefi lo auwe. Nomo yo seni waraꞌi aꞌi ironamisiya. Apou aꞌi nomo yo seni luwaru aꞌi ereti eyate feni se ai atu tiyatinamisiya. Sosu ereti opi feni se nomo tiye ta ereti anite tawesisiya. Serai yo seni luwaru aꞌi marepi hepene nomo lo au luwaruwerowata. 8 Etiri werese ape mo, nomo irosiya ape, lu taune tamo iyape nomo lo maꞌe au teꞌe wisereyesiya. Sosu lu taune tereꞌe tamo nomo maꞌe teꞌe naruwe. Lu taune marepi nomo lo maꞌe au tote wisereyesiya. Sosu lu taune tereꞌe tamo marepi nomo lo au luwaruwesiya. Lu taune tereꞌe tamo peri nomo lo ne wawero aꞌi teꞌesiya. Ahowa, nomo Owane Sitewi lo peri au teꞌesiya su, nomo peri wiyeme aꞌi au teꞌesiya. 9 Lu taune tamo nomo ne siye soꞌoruwesiya. Sosu lu taune tereꞌe nomo ne yahowaꞌi toteye. Nowe ta se nomo temeniyeyei ne ataheyeye. Ahowa, marepi hepene nomo lo norohuwe aꞌi irosiya. Lowe nomo maꞌe me au se ainesiya. Ahowa, lowe nomo aine teraꞌe taꞌame.^c 10 Nomo marepi erasi aꞌi ewitesiya. Ahowa, nomo mi mi weriyei marepi nomo lo sahe tote nineꞌinamisiya. Nomo etiri maꞌaru nomo lo poꞌutesiya. Ahowa, nomo lu taune tomu neꞌese maꞌe Owane Sitewi lo etiri wisere aꞌi au nonetisiya. Awei lo lu lo nihe se nomo etiri werese poꞌutesiya. Ahowa, Owane Sitewi lai etiri werese ape mo lo nomo maꞌe au teꞌe naneiyei ape nomo maꞌe auwe.

11 Fene lu taune omo Korin sahe irosiya ape, peri ano wanure! Nomo etiri werese ne fene maꞌe au teꞌe areiyeye. Nomo peri ta fareyarerowata. Nomo marepi erasi aꞌi fene ne totenamisiya. 12 Nomo fene ne marepi erasi aꞌi tote wawesiyesiya. Ahowa, fene nomo ne marepi fene lo itiyaꞌu tote wawesiye se taꞌama. 13 Sosu ane fene maꞌe itiyaꞌu au teꞌesiya. Ane fene maꞌe eimane ano wou aꞌi au teꞌesiya. Fene marepi erasi aꞌi se nomo ne au tote wawesiyenamite.^d

14 Fene lu tereꞌe tamo nati wafei wou aꞌi tiyei su, lu taune ape mo, Jisas lo yo seni umasi taꞌame ape, fene nati wafei se owe ape tite. Ahowa! Yo seni farere aꞌi sosu yo seni luwaru aꞌi lowesi nati wafei tirowata. Aiwawe aꞌi mitaiyeyei sosu pasi aꞌi nati wafei tirowata.^e 15 Sosu Krais aiwawe Satan lowe marepi taꞌi aꞌi toterowata. Fene aiwawe aꞌi. Fene lu tereꞌe Jisas lo yo umasiye taꞌama ape, fene lowe aiwawe aꞌi marepi taꞌi aꞌi toterowata. 16 Owane Sitewi lo wesi aiwawe. Sosu god tereꞌe wawero aꞌi Owane Sitewi lo wesi nati wafei tirowata. Nomo aꞌi lai Owane Sitewi lo wesi pefine wou aꞌi ne. Owane Sitewi nomo lo mi mi pasi pasi hepene norohuwe aꞌi ironamisiya. Tu naifa Owane Sitewi apou eiye,