2 Fene nomo ne marepi fene lo papu totenamite. Nomo lu taune maꞌe au luwaruwe taꞌame. Nomo lu taune werese maꞌe peri wawero ta au teꞌe taꞌame. Ahowa, nomo lu taune lo etiri tamo taꞌaneyei ne areare taꞌame. 3 Ane peri eite au teꞌesiya su, ane yo seni fene lo ne au hese erei taꞌame. Ane nowe tu se fene maꞌe apou eiye, “Ane fene marepi erasi aꞌi tote wawesiyesiya. Serai fene temeniyeyei su, ane fene ne aiwawe aꞌi temeniyereme. Aiwawe aꞌi fene mi mi pasi pasi iroteyei su, ane fene ne aiwawe aꞌi irotereme.” 4 Ane fene ne marepi kairefi aꞌi totenamisiya. Ane fene ne marepi wisere aꞌi totenamisiya. Fene ane marepi fetane aꞌi auwe. Nomo marepi orese aꞌi teritesiya su, nomo marepi wisere nineꞌi se aꞌi fene ne au temeꞌeriyesiya.

5 Sosu aꞌi pe nomo omo pani Masedonia maꞌe fi su, tahe paꞌare nomo lo pereꞌeyeye. Mi mi werese lu tamo nomo maꞌe au luwaruweye. Lowe nomo ne peri teꞌe naruteye. Serai marepi nomo lo papu atoweiye iroteye.^a

6 Ahowa, Owane Sitewi lai lu taune werese, marepi orese aꞌi teritesiya ape, le marepi fetane aꞌi lowe maꞌe aurowa. Owane Sitewi lai nomo ne marepi erasi toteye su, serai le meni Taitus nomo maꞌe eimawesai. 7 Le nomo maꞌe henerai su, le marepi nomo lo maꞌe au nineꞌitai. Aiwawe aꞌi le ane maꞌe peri ta fene ne au teꞌesai. Le ane maꞌe apou au teꞌesai, “Fene, lu taune Omo Korin sahe irosiya ape, le maꞌe marepi wisere fetane aꞌi au irowe. Fene ane siyeyei ne totereme. Sosu marepi orese aꞌi ane teriteteye ape, fene ane ne marepi erasi aꞌi ewiteteye. Sosu fene ane ne marepi erasi aꞌi tote wawesiyesiya.” Serai ane peri ape wanuwe su, marepi ano erasi aꞌi tote wisereye nineꞌiteye.

8 Fene one towe tutawe ano siye teꞌeye su, fene marepi orese aꞌi teriteteye. Ane one towe ape leseye su, marepi ano orese aꞌi terite taꞌame. Ane marepi orese aꞌi fene lo siyeye su, marepi ano orese aꞌi teriteteye. Ahowa, one towe ano nowe oso aꞌi se fene ne marepi orese aꞌi au irowe.^b 9 Ahowa, pereye nowe eite se ane marepi erasi aꞌi tote nineꞌisiya. Fene one towe ano siye teꞌeye su, fene marepi orese aꞌi teriteteye. Ahowa, fene yo seni luwaru aꞌi atati arunati su, marepi ano erasi wisereye nineꞌiteye. Owane Sitewi lai marepi orese aꞌi fene lo au irowe. Serai fene yo seni luwaru aꞌi atati arunati su, one towe ano marepi hepene fene lo maꞌe au luwaruwe taꞌame. 10 Ahowa, Owane Sitewi lai lu taune tamo marepi orese aꞌi irowei su, sosu lowe yo seni luwaru aꞌi meꞌiyeni maꞌe atati arunatiyei. Sosu Owane Sitewi lai lowe maꞌe marepi hepene heꞌi aꞌi aurowa. Serai lu taune werese marepi wisereye nineꞌiyei. Ahowa, marepi orese aꞌi, awei lo lu taune teritesiya ape, lowe yo seni luwaru aꞌi atati arunati taꞌame su, lowe mi mi pasi pasi weriyei temeniyerowa.^c 11 Serai Owane Sitewi lai fene maꞌe marepi orese aꞌi au irowe su, fene marepi hepene fene lo siye etire. Yo seni aseyaro aꞌi umasiyei ne tohoteteye. Fene lu taune werese maꞌe apou au atuatuteye. Lu tamo ane ne yo seni luwaru aꞌi au fu teꞌeye su, fene yo seni aseyaro aꞌi ano ne au teꞌe areiyeteye. Lowe ane ne au teꞌe luwaruweteye su, fene lowe maꞌe ai marepi toteteye. Fene lowe ne hepene se hemirehemiye. Fene ane ne marepi erasi aꞌi tote wisereyeteye. Fene ane ne marepi erasi aꞌi tote wawesiyenamiteye. Lowe ane maꞌe au luwaruweteye su, fene witane se aꞌi lowe maꞌe itiyaꞌu aineyei ne toteye. Etiri werese ape mo ne fene yo seni aseyaro aꞌi iroteye.

12 Serai ane tu one towe ape fene maꞌe leseye su, ane meni ape yo seni luwaru aꞌi irowe ape, tote taꞌame. Sosu, aiwawe aꞌi ane meni ape maꞌe, etiri au luwaruweye ape tote taꞌame. Ahowa, ane one towe ape fene maꞌe leseye su, ane fene maꞌe peri ta aꞌi au lese areiyeye. Fene peri eite wanu umasiyei su, fene etiri ape apou au atuaturowa. Owane Sitewi lo nihe se fene nomo ne marepi erasi aꞌi tote wawesiyenamiteye. 13 Serai etiri werese ape mo se nomo marepi fetane aꞌi ironamiteye.

Nomo marepi fetane aꞌi ironamiteye su, nomo meni Taitus ne marepi erasi aꞌi au wisereye nineꞌiteye. Le fene mase iroteye su, fene marepi lo au teꞌe wisereyeteye. Serai yo seni fene lo ne le marepi erasi aꞌi au teꞌe nineꞌiteye. 14 Ane iyape fene lo le maꞌe ei ani aroweye. Sosu ane yo seni fene lo ne wanuwe su, ane fene ne neritase se taꞌama. Ahowa, nomo mi mi weriyei peri wiyeme aꞌi fene maꞌe au teꞌeteye. Aiwawe aꞌi etiri werese ape mo ne, fene iroteye ape, nomo Taitus maꞌe au teꞌeye su, wisere pefine aꞌi ne. 15 Serai le fene werese ne marepi erasi aꞌi tote wawesiyenamisiya. Le fene mase iroteye su, fene peri lo ape umasiyei ne tohoteyei. Taitus fene maꞌe henerai su, fene le ne marepi erasi aꞌi au tote wisereyeteye. Aiwawe fene le ne marepi fetane aꞌi au toteteye. Serai fene le ne marepi wisere aꞌi se eriteye. 16 Serai ane fene ne marepi erasi tote wisereye nineꞌisiya. Ane fene ne marepi erasi aꞌi toteye su, ane etiri ta apou soꞌoruwesiya. Mi mi weriyei fene yo seni farere aꞌi ironamirowa.