Krais lo lu feni maꞌaru tamo isafiyei ne au taꞌuweye.
8
Kaiyemo mo, nomo Owane Sitewi lo ferafereiyei ne fene maꞌe au teꞌereme. Owane Sitewi lai ferafereiyei lo ape lu taune werese maꞌe, Owane Sitewi lo yo seni umasiteye ape, omo pani Masedonia sahe auwe.a 2 Lu tamo lowe maꞌe erasi aꞌi au luwaruweteye su, lowe marepi hepene nineꞌi temeꞌeriye irowe. Lu taune tamo maꞌaru poꞌuteye su, lowe lai maꞌaru towafi lowe lo lu taune tereꞌe maꞌe auwei ne ani taꞌuweye. Lowe werese isafiye aꞌi ne. 3 Wiyeme aꞌi ane fene maꞌe au teꞌesiya. Lowe maꞌaru towafi lowe lo lu taune ape maꞌe auwei ne ani taꞌuweye. Wiyeme aꞌi. Lowe maꞌaru ariye ataheyeye su, lowe maꞌaru neꞌese noneyei ne toteteye. Lowe marepi towafi lowe lo tote umasiteye. 4 Lowe nomo maꞌe peri kairefi aꞌi se mi mi weriyei apou teꞌe toweriye, “Lu taune, Jisas lo yo umasisiya ape, omo pani Judia sahe, lowe etiri maꞌaru werese poꞌutesiya. Serai nomo maꞌaru nomo lo lowe maꞌe isafiyeyei ne totesiya.” 5 Nomo maꞌaru ape mo, lowe auwe ape, siyeye su, nomo hepene se suꞌariye. Lowe tutawe aꞌi Meni Owane Pefine aꞌi maꞌe marepi hepene towafi lowe lo auwe. Sosu moꞌo lowe Owane Sitewi lo marepi tote umasiteyewe, marepi hepene lowe lo nomo maꞌe aiwawe aꞌi tote wawesiye auwe. 6 Serai nomo Taitus maꞌe peri kairefi aꞌi se apou teꞌeye, “Ne omo Korin maꞌe tu henerai su, ne lu taune ape mo maꞌe eiye, ‘Fene maꞌaru tamo lu taune tereꞌe maꞌe auwei ne ani taꞌuwere!’ Sosu ne si tame irowa su, ne maꞌaru lowe lo, lowe au ferafereiyei ape, ani taꞌuwe tepaꞌasiyei.” 7 Fene etiri erasi aꞌi irosiya. Fene Owane Sitewi lo marepi ne tote tawesi umasinamisiya. Peri werese fene lo wisere erasi aꞌi se au teꞌe fiyarinamiteye. Fene etiri werese siye soꞌoruwesiya. Fene lu taune tereꞌe ape mo ne au pati aniyei ne totenamisiya. Fene nomo ne marepi erasi aꞌi tote wawesiyenamisiya. Serai ane fene maꞌe peri kairefi aꞌi se au teꞌesiya. Fene marepi wawesiyeyei lo wiyawi ironamite. Maꞌaru towafi fene lo ne, fene lu taune maꞌe marepi erasi aꞌi se isafiye nonete.b8 Ane peri kairefi aꞌi se fene maꞌe au teꞌesiya wou taꞌama. Ahowa, ane marepi fene lo memeꞌiyei ne totesiya. Marepi fene lo farere aꞌi awere? Ane lu taune tereꞌe lo isafiyeyei ne au teꞌe atuatusiya. Ane fene maꞌe ei towerisiya. Marepi tote wawesiyeyei fene lo wiyeme aꞌi awere? Arearesiya awere? 9 Fene Meni Owane Jisas Krais lo ferafereiyei siye soꞌoruwe tepaꞌasiye. Le etiri tomu neꞌese ironamiteye. Ahowa, le etiri werese topo lo fene ne fu arunati. Sosu le hi awei sahe itorai su, le etiri maꞌaru werese poꞌuteye. Serai etiri werese lo poꞌuteye su, Owane Sitewi lo nihe se, le fene maꞌe etiri tomu neꞌese aurowa.c
10 Serai maꞌaru fene lo isafiye noneyei ne, ane marepi ano fene maꞌe au teꞌesiya. Fene marepi ano umasire. Tu naifa iyu menei taꞌi i tepaꞌasiye su, fene maꞌaru tamo taꞌuwerai. Pereye nowe eite se, fene wiyawi ape taꞌane tepaꞌasire. Serai fene isafiyeyei lo marepi totenamite. 11 Serai fene wiyawi ape iro tepaꞌasire. Tu naifa fene wiyawi ape irowei ne toteye. Sosu pereye fene wiyawi ape taꞌane tepaꞌasirowa su, marepi fene lo aiwawe aꞌi wisereye nineꞌi toterowa. Fene maꞌaru erasi irosiya su, fene maꞌaru tewi erasi aꞌi aure. Maꞌaru oso aꞌi irosiya su, fene tewi oso aꞌi aure. 12 Fene maꞌaru tewi aꞌi lowe maꞌe auwei ne totesiya su, Owane Sitewi lai fene maꞌe au wisereyeyei. Owane Sitewi lai etiri maꞌaru werese meni ta anitesiya ape, siye soꞌoruwesiya. Ahowa, le lai etiri maꞌaru werese meni ta ariye aꞌi irosiya ape, siye taꞌame.d
13-14 Marepi ano apou totesiya. Nomo lu taune tereꞌe maꞌe au teꞌeyei wou taꞌama. “Fene maꞌaru tomu neꞌese aꞌi lu taune maꞌe owe ape au isafiyete.” Sosu fene marepi orese aꞌi teritesiya. Ahowa, fene etiri maꞌaru tomu neꞌese aꞌi irosiya su, fene maꞌaru tamo lu taune tereꞌe maꞌe isafiyere. Sosu aiwawe aꞌi nowe moꞌo fene etiri maꞌaru poꞌuteyei su, lu taune tereꞌe fene maꞌe maꞌaru tamo isafiyerowa. Serai fene Owane Sitewi lo marepi tote umasirowa. 15 Tu naifa Owane Sitewi lai one towe lo sahe apou eiye,
“Meni ta ayei tomu neꞌese taꞌuwe anisiya ape, wesi lo temeꞌeriye taꞌame. Sosu meni tereꞌe ta ayei oso aꞌi taꞌuwe anisiya ape, wesi lo temeꞌeriyenamisiya.” Kis 16:18
Pol meni Taitus omo Korin maꞌe eimawesawi.
16 Sosu aꞌi pe meni ta iyape Taitus, le marepi erasi aꞌi se fene ne au pati aninamiyei ne totesiya. Le nomo aiwawe aꞌi ne. Serai nomo Owane Sitewi maꞌe le ne au teꞌe wisereyesiya. 17 Meni ape peri nomo lo wanu umasiteye ne toteye. Sosu le fene maꞌe sewiyeyei ne toteye su, le marepi topo lo umasiteye. Le marepi erasi aꞌi fene maꞌe sewiyereme. 18 Serai nomo kaiyemo tereꞌe nomo lo ta Taitus aiwawe fene maꞌe eimawesawiyei. Meni tereꞌe ape Owane Sitewi lo peri heneruwe au teꞌeteye su, lu taune werese Owane Sitewi lo yo seni umasisiya ape, lowe le ne au tote wisereyeye. 19 Etiri tereꞌe ta ane fene maꞌe teꞌesiya. Lu taune werese, Owane Sitewi ne tote tawesi umasisiya ape, lowe meni ape nomo aiwawe eimawesawiyei ne ariariyeye. Nomo maꞌaru, lu taune tereꞌe maꞌe auwe ape, aiti su, nomo Owane Sitewi lo marepi erasi pefine aꞌi ne au atuaturowa. Sosu aiwawe nomo lu taune werese maꞌe marepi wisere aꞌi nomo lo au atuatuwei.
20 Nomo maꞌaru ape aitiyei su, lu taune peri luwaru aꞌi nomo maꞌe au fu teꞌerowata. Serai nomo meni ape aiwawe maꞌaru ape lu taune maꞌe au nonetiyei ne aitirowa. 21 Marepi sitewi nomo lo apou aꞌi ne. Owane Sitewi lo nihe se sosu lu taune werese lo nihe se, nomo yo seni farere aseyaro aꞌi umasiyei.
22 Nomo kaiyemo tereꞌe ta lowesi mase fene maꞌe eimawesawiyei. Nomo le maꞌe wiyawi tomu neꞌese taꞌaneyei ne teꞌe toweriye. Wiyawi werese ape mo ne, le marepi wisere aꞌi se wiyawi ape mo taꞌaneteye. Serai le marepi fene lo ne wanuwe su, le marepi kairefi aꞌi se, lowesi mase aiwawe aꞌi maꞌaru fene lo au nonetiyei ne totesiya. 23 Ane Taitus ne totesiya, le kaiyemo ano ne. Sosu le ane mase fene au pati aniyei ne taꞌanesiya. Sosu kaiyemo mo nomo lo lowesi maꞌe iyei ape ne, lowe lu taune, Krais ne tote tawesisiya ape, iyape lowe lo se iyei. Lowe omo Jerusalem maꞌe maꞌaru fene lo au nonetiyei ne iyei su, lowe Krais lo marepi maꞌe au teꞌe wisereyerowa. 24 Serai fene lowe maꞌe marepi fene lo au tote wawesiyete. Fene lowe ne marepi tote wawesiyeyei su, lu taune, Krais ne tote tawesisiya ape, lowe tote wawesiyeyei fene lo siyerowa. Sosu lowe apou siye soꞌoruwerowa. Nomo iyape fene lo ei ani aroweteye su, marepi nomo lo farere aꞌi ne.e