Fene lu taune Jisas lo lu feni ani pati ferafereite.
9
Sosu aꞌi pe maꞌaru ape ne, fene Juda lo lu feni maꞌe auwei ne ani taꞌuweye ape, lowe Jisas ne tote tawesisiya. Ane peri tereꞌe tamo fene maꞌe leseyei wou taꞌama.a 2 Ane marepi fene lo soꞌoruwesiya. Mi mi tomu neꞌese ane iyape fene lo lu taune maꞌe omo pani Masedonia sahe ei ani aroweye. Ane lowe maꞌe apou eiye, “Mi mi werese fene lu taune maꞌe au pati ani naneiye. Tu naifa iyu menei i tepaꞌasiye su, fene omo pani Akaia sahe maꞌaru au taꞌuwe naneiye. Lowe marepi wisere aꞌi fene lo wanuwe su, lowe aiwawe maꞌaru tamo au taꞌuwe naneiye.” 3 Serai ane lu hesi heta fene maꞌe eimawesawiyei. Lowe heneraiyei su, lowe peri nomo lo wiyeme aꞌi siyeyei. Nomo iyape fene lo lu taune maꞌe omo pani Masedonia sahe irosiya ape, ei ani aroweteye su, fene peri nomo lo yahowaꞌi owe ape iro heneraire. Ahowa, ane fene maꞌe eisiya, “Fene maꞌaru ape mo ani taꞌuwe tepaꞌasiyei.” Serai peri nomo lo lowe maꞌe wiyeme aꞌi heneraiyei. 4 Lu tamo omo pani Masedonia maꞌe fai ape, lowe ane mase fene maꞌe iyei su, sosu fene maꞌaru fene lo au taꞌuwe nanei taꞌame su, ane fene aiwawe aꞌi neritase erasi aꞌi teriterowa. Nomo piyene neritase aꞌi teriterowa awere? Ane iyape fene lo ne lowe maꞌe ei ani aroweye. Sosu fene maꞌaru tamo taꞌuwe nanei taꞌame. 5 Serai ane lu hesi heta ape mo maꞌe peri kairefi aꞌi teꞌeye. Lowe fene maꞌe tu sewiyeyei ne iyei. Lowe heneraiyei su, lowe maꞌaru fene auwei ne toteye ape, au taꞌuwe nanei tepaꞌasiyei. Sosu maꞌaru fene lo fene au taꞌuwe tepaꞌasiyei ape, sosu marepi fene lo wisere aꞌi toteyei. Ane marepi fene lo ei tatai aniyei wou taꞌama. Marepi ano apou totesiya. Fene maꞌaru ape marepi nineꞌiyei se aure.Maꞌaru, etiri fene lo lu taune maꞌe isafi nonete.
6 Peri ano wanu tawesire. Meni ta me so tewi oso aꞌi tamo yehe sameyei su, le me so oso aꞌi taꞌe aniyei. Sosu meni ta me so tomu neꞌese yehe sameyei su, le me so tomu neꞌese taꞌe aniyei.b 7 Serai peri anowe ape apou teꞌesiya. Lu taune taꞌi taꞌi aꞌi marepi towafi lowe lo maꞌaru tamo auwei ne toteyei su, le maꞌaru apou aꞌi auwei. Lu taune taꞌi taꞌi aꞌi marepi orese aꞌi se, lowe maꞌaru tamo owe ape aure. Aiwawe aꞌi ane marepi lowe lo maꞌaru tamo auwei ne tatai aniyei wou taꞌama. Lu taune, marepi nineꞌiyei se maꞌaru auwe ape, Owane Sitewi lai lowe ne marepi erasi aꞌi tote wawesiyesiya. 8 Piyene awere? Fene maꞌaru fene lo marepi nineꞌiyei se auwei su, Owane Sitewi lai faraꞌu etiri maꞌaru tomu neꞌese fene maꞌe itiyaꞌu aurowa. Serai fene etiri maꞌaru fene lo poꞌuterowata. Le fene maꞌe etiri maꞌaru tomu neꞌese auwei su, fene faraꞌu lu taune tereꞌe etiri maꞌaru ariye ape au nonetirowa. 9 Tu naifa weriyei, Owane Sitewi one towe lo sahe apou eiye,
“Meni ta etiri maꞌaru tomu neꞌese lu taune ariye ape maꞌe, auwei su, yo seni wisere aꞌi lo mi mi pasi pasi weriyei ironamitorowa.” Sng 112:9
10 Serai apou wou aꞌi ne. Owane Sitewi lai me so same siye meni maꞌe au naneiyei. Le aiwawe aꞌi meni ape maꞌe nau taꞌase au ayei ne aunamiyei. Serai Owane Sitewi aiwawe aꞌi fene maꞌe etiri maꞌaru tomu neꞌese auwei su, le etiri maꞌaru fene lo erasi pefine aꞌi heneraiyei ne au irorowa. Sosu etiri maꞌaru fene lo ape erasi aꞌi henerairowa su, fene faraꞌu lu taune tereꞌe maꞌe au nonetirowa.c 11 Serai apou aꞌi fene etiri maꞌaru tomu neꞌese lu taune tereꞌe maꞌe au nonetiyei su, Owane Sitewi lai etiri maꞌaru tomu neꞌese fene maꞌe itiyaꞌu aurowa. Sosu fene mi mi weriyei lu taune, etiri maꞌaru ariye aꞌi ape maꞌe, au nonetiyei. Serai nomo maꞌaru fene lo lu taune maꞌe au nonetiyei ne aitiyei su, lowe Owane Sitewi maꞌe marepi au teꞌe wisereyerowa. Owane Sitewi lai mi mi werese etiri tomu neꞌese aurowa. Serai fene faraꞌu aꞌi nowe tereꞌe tereꞌe se lu taune ariye aꞌi maꞌe nonetirowa. Sosu nomo maꞌaru ape lowe maꞌe waꞌaretiyei su, lowe Owane Sitewi maꞌe maꞌaru fene lo ne au teꞌe wisereyerowa.
d 12 Serai wiyawi fene lo ape fene taꞌanesiya ape, fene lu taune tomu neꞌese maꞌe, omo Jerusalem sahe, etiri maꞌaru ariye ape, au pati aniyei. Lu taune ape mo, Jisas lo yo seni umasisiya ape, maꞌaru fene lo aniyei su, lowe yo seni fene lo ne Owane Sitewi maꞌe au teꞌe wisereyerowa. 13 Sosu wiyawi fene lo ape lu taune werese maꞌe, fene taꞌanesiya ape, apou au atuatu areiyesiya. Lu taune wiyawi fene lo siyeyei su, lowe Owane Sitewi maꞌe au teꞌe wisereyeyei. Aiwawe aꞌi lowe apou siye soꞌoruweyei. Fene Krais lo peri heneruwe mi mi weriyei umasinamisiya. Sosu aiwawe fene maꞌaru tomu neꞌese lowe maꞌe sosu lu taune tereꞌe werese maꞌe au nonetisiya. Etiri ape mo ne lowe lai Owane Sitewi maꞌe au teꞌe wisereyeyei. 14 Serai Owane Sitewi lo seremareyeyei erasi pefine aꞌi, le fene maꞌe auwe ape, lowe siyeyei su, lowe werese fene ne Owane Sitewi maꞌe au teꞌe toweriyei. Sosu lowe fene ne marepi erasi aꞌi sewiyeyei ne totesiya. 15 Serai Owane Sitewi lai etiri erasi ta nomo maꞌe neri aꞌi auwe su, nomo werese le maꞌe au teꞌe wisereyete. Etiri ape ne, le nomo maꞌe neri aꞌi auwe ape, apou aꞌi meni eime lo ne.