Aposel Pol lai wiyawi topo lo ne itiyaꞌu teꞌeye.
10
Ane, Pol, marepi ano se fene maꞌe teꞌe areiyesiya. Lu taune tamo apou ane se au fu teꞌeye, “Meni ape Pol nomo mase iroteye su, le marepi lo pereꞌe aꞌi ne. Sosu le peri kairefi aꞌi nomo maꞌe au teꞌe taꞌame. Ahowa, le omo eyeri maꞌe iroteye su, marepi lo kairefi aꞌi sosu ai peri kairefi aꞌi nomo maꞌe au teꞌesiya.” Serai ane fene maꞌe Krais lo marepi momotei aꞌi sosu marepi wisere aꞌi se ei toweriyei.a 2 Ane fene maꞌe aiyeyei su, fene weiyai! Fene Krasi lo marepi umasisiya su, ane fene se ai peri kairefi aꞌi se teꞌerowata. Ahowa, lu taune tamo ane ne apou teꞌesiya su, “Pol awei lo yo seni luwaru aꞌi umasisiya.” Lu taune ape mo maꞌe ane lai ai peri kairefi aꞌi se au teꞌerowa.b 3 Peri eite wiyeme aꞌi tene! Nomo lu aposel aiwawe aꞌi lu taune werese hi awei sahe wou aꞌi ne. Ahowa, nomo marepi sitewi lowe lo wou tote taꞌame. 4 Ahowa, etiri werese se nomo ai atusiya ape, lowe awei lo lu taune lo etiri wou taꞌame. Ai atuwei lo etiri werese nomo lo, nomo Owane Sitewi lo kairefi se ai atu tiyatisiya. Nomo ai atuwei su, nomo fisahe kairefi werese aꞌi faraꞌu aine tapeti towesiyei.c 5 Nomo faraꞌu ai peri wawero hi ani ararosawiyei. Sosu lu tamo Owane Sitewi lo yo einamiyei su, sosu lu taune Owane Sitewi maꞌe aiyerowata. Nomo faraꞌu yo seni ape aine fiyari arosawiyei. Sosu nomo marepi luwaru aꞌi lowe lo werese anite ti tawesirowa su, nomo lowe Krais lo yo seni umasiyei ne au irorowa. 6 Sosu fene mi mi weriyei Krais lo marepi werese tote umasiyei su, nomo faraꞌu peri werese lo, fene arisiye ape, nomo fene maꞌe fofowei erasi aꞌi itiyaꞌu auwei ne naneirowa.7 Fene werese nihari tahe aꞌi siyesiya. Lu taune tamo marepi lowe lo apou aꞌi teꞌeye, “Ane Krais lo yo seni umasiye.” Lu taune ape mo lowe marepi towafi lowe lo tame tote etire. Lowe nomo ne au ani ararowei su, lowe peri wawero au teꞌerowa. Nomo lai lowe aiwawe aꞌi Jisas lo yo seni umasinamisiya. 8 Meni Owane Pefine aꞌi ane maꞌe kairefiyeyei lo auwe. Serai ane iyape topo lo kairefi erasi aꞌi ne ei ani aroweyei su, ane neritaseyeyei terite taꞌame. Ahowa, kairefiyeyei ape se, Owane Sitewi nomo maꞌe auwei ape, nomo tote tawesiyei fene lo au kairefiyerowa. Nomo marepi fene lo au luwaruwerowata.d 9 Fene one towe ape mo ano siye teꞌeyei su, ane marepi fene lo au atoweiyei wou taꞌama. 10 Meni ta one towe ano siye teꞌeyei su, apou teꞌeyei, “Pol lo one towe peri kairefi aꞌi sosu marepi orese aꞌi lo au teꞌesiya. Ahowa, le nomo sato irosiya su, marepi lo pereꞌe aꞌi ne. Sosu peri pisaꞌi aꞌi ne.” 11 Meni ape peri ape teꞌesiya ape, le peri ano wanu soꞌoruwere! Nomo eyeri maꞌe fene maꞌe one towe ta lesesiya su, nomo peri kairefi aꞌi se fene maꞌe leserowa. Sosu aiwawe aꞌi nomo fene mase irowei su, peri nomo lo nihari fene lo sahe kairefi aꞌi se aiwawe aꞌi au teꞌerowa.
12 Lu taune tamo iyape towafi lowe lo ei ani arowesiya. Wiyeme aꞌi ne. Nomo lowe aiwawe taꞌama. Lowe yo seni towafi lowe lo au hese ereisiya. Lowe lu taune tereꞌe lo yo seni au teꞌe hese ereiyei su, lowe yo seni towafi lowe lo se au hese etirowa. Lowe apou totesiya, “Yo seni towafi nomo lo aseyaro farere aꞌi ne.” Lowe marepi eite totesiya su, marepi lowe lo wisereye taꞌame.
13 Lu taune yo seni apou ape irosiya ape, lowe nomo maꞌe etiri ta au atuatusiya. Etiri ape apou aꞌi ne, lowe marepi towafi lowe lo soꞌoru taꞌama. Ahowa, nomo lowe aiwawe taꞌama. Owane Sitewi lai nomo maꞌe kairefiyeyei ta wiyawi lo taꞌaneyei ne auwe. Serai nomo wiyawi lo taꞌaneyei su, nomo faraꞌu iyape nomo lo ei ani aroweyei. Nomo wiyawi tereꞌe werese taꞌaneyei su, nomo iyape towafi nomo lo ei ani arowerowata. Serai nomo wiyawi lo fene ponei sahe taꞌaneyei su, nomo faraꞌu iyape nomo lo ei ani aroweyei.e 14 Owane Sitewi lai nomo fene maꞌe peri lo au teꞌeyei ne eimawesawi. Sosu nomo fene maꞌe tu henerai su, owe meni ta lai fene maꞌe Krais lo peri heneruwe wisere aꞌi au teꞌe te taꞌame. Serai nomo lu owane fene lo henerai tepaꞌasiye.
15 Serai lu tamo tereꞌe wiyawi taꞌaneyei su, nomo apou eirowata, “Wiyawi ape nomo aꞌi lai taꞌaneye.” Ahowa, marepi nomo lo apou totesiya. Nomo tote tawesiyei fene lo au kairefiyeyei ne totesiya. Sosu wiyawi nomo lo, fene sahe taꞌanesiya ape, erasi aꞌi heneraiyei. 16 Serai tote tawesiyei fene lo kairefi aꞌi irorowa su, nomo faraꞌu omo pani tereꞌe eyeri maꞌe Krais lo peri heneruwe au teꞌe fiyariyei ne iyei. Omo pani ape sahe lu tereꞌe tamo wiyawi taꞌane taꞌame. Sosu lu taune tereꞌe tamo wiyawi taꞌaneyei su, nomo apou eirowata. “Wiyawi ape omo tereꞌe sahe nomo aꞌi lai taꞌaneye.” Ahowa, nomo iyape towafi nomo lo yahowaꞌi aꞌi ei ani arowerowata.
17 Tu naifa Owane Sitewi lai one towe lo sahe apou teꞌeye,
“Meni ta iyape ta ei ani aroweyei ne totesiya su, le Meni Owane Pefine aꞌi lo iyape ei ani arowete.” Jer 9:24
18 Serai meni ta topo le aꞌi au teꞌe wisereyeyei su, Owane Sitewi lai le ne marepi luwaru aꞌi toteyei. Ahowa, meni ta Owane Sitewi maꞌe au teꞌe wisereyeyei su, Owane Sitewi meni ape ne wisere aꞌi toteyei.f