5 Wanure! Marepi ano apou totesiya. Lu ape mo fene peri wawero aꞌi au teꞌesiya ape, ane lowe unahi maꞌe iro taꞌame. Fene apou totesiya, “Lu ape mo, lu wiyeme pefine aꞌi tene!” Wawero! Lu ape mo lowe lu yahowaꞌi aꞌi ne.^d 6 Lu tamo ape mo ane ne apou teꞌesiya, “Pol peri ta au teꞌesiya su, le peri au teꞌe noweinowei taꞌame.” Ahowa, peri ape wiyeme aꞌi su, ane etiri tomu neꞌese siye soꞌoruwesiya. Nowe mi mi werese ane fene maꞌe au teꞌeteye su, ane marepi wisere aꞌi ano fene maꞌe au teꞌe atuatu areiyeteye.^e

7 Ane fene maꞌe Owane Sitewi lo peri heneruwe au teꞌe fiyariteye su, ane maꞌaru fene lo ani taꞌame. Ahowa, ane marepi topo ano hi ani ararowe su, ane iyape fene lo ei ani aroweteye. Yo seni ano ape luwaru aꞌi awere? Piyete awere?^f 8 Ane fene maꞌe peri heneruwe au teꞌeteye su, lu taune omo tereꞌe tereꞌe sahe, Owane Sitewi lo yo umasisiya ape, lowe maꞌaru ane maꞌe auwe. Marepi ape wou aꞌi ne. Ane maꞌaru lowe lo fene maꞌe au pati aniyei ne taꞌarei aniye.^g 9 Sosu ane fene mase iroteye su, ane maꞌaru poꞌuteye. Ane maꞌaru fene lo ei tore ani taꞌame. Ahowa, kaiyemo mo ano omo pani Masedonia maꞌe fai ape, etiri maꞌaru ane maꞌe aitai. Sosu aiwawe nowe moꞌo heta su ane etiri maꞌaru werese fene lo ei tore anirowata. Ane mi mi werese fene maꞌe marepi orese aꞌi au taꞌame.^h 10 Krais lo peri wiyeme marepi hepene ano papu irosiya. Serai ane peri wiyeme aꞌi ape ne ei ani arowenamirowa. Owe meni ta lai omo pani Akaiya sahe peri ape einamirowata. Ane faraꞌu mi mi weriyei Krais lo peri wiyeme aꞌi ne ei ani arowerowa. 11 Ane piyene apou eisiya awere? Ane fene ne marepi tote wawesiye taꞌame awere? Ei! Owane Sitewi lai marepi ano siye soꞌoruwe tene! Ane fene ne marepi erasi aꞌi tote wawesiyenamisiya.

12 Serai wiyawi ano ape, ane mi mi werese taꞌanesiya ape, lu ape tereꞌe mo iyape towafi lowe lo ei ani aroweyei su, ane yo seni lowe lo ape einamiyei ne tohoteyei. Lowe apou teꞌeyei, “Wiyawi ape nomo taꞌanesiya ape, Pol lo wiyawi aiwawe aꞌi ne.” Wawero aꞌi. Ane peri lowe lo ne teꞌe naruwei. Ane maꞌaru tamo fene maꞌe ei towerirowata. 13 Lu ape ne, Owane Sitewi lai peri lowe lo au teꞌeyei ne eimawe taꞌame. Aiwawe aꞌi lowe Owane Sitewi lo wiyawi siye lu wawero aꞌi ne. Lowe wiyawi lowe lo taꞌanesiya su, lowe lu taune werese maꞌe au arearesiya. Lowe atati aweto arearesiyawe, sosu Krais lo wiyawi lu pefine aꞌi heneraiyei ne totesiya.

14 Sawi amou! Wanure! Marepi ano hepene se suꞌari taꞌame. Piyene awere? Satan lai sepei luwaru aꞌi ne. Le aꞌi lai ipari nihari wisere wou aꞌi mi erasi tewi mitaiyeyei ne atati arunati. 15 Serai Satan lo wiyawi lu ape mo, lowe faraꞌu wiyawi wisere aꞌi lu tamo heneraiyei. Lowe wiyawi wisere aꞌi taꞌaneyei su, lowe lu taune tomu neꞌese aꞌi au teꞌe arearerowa. Etiri ape ne erasi aꞌi taꞌama. Lowe yo seni luwaru aꞌi ironamisiya su, nowe yeꞌewi su, Owane Sitewi lai lowe werese maꞌe fofowei erasi aiwawe aꞌi itiyaꞌu aurowa.

16 Ane fene maꞌe tame teꞌesiya. Owe meni ta lai apou totere, “Pol meremereye aꞌi ne.” Ahowa, meni ape ane ne meremereyeyei toteyei su, ane faraꞌu fene maꞌe meni meremereye aꞌi wou au teꞌeyei. Fene peri ano wanuwei su, fene yo seni fene lo ne neritaseyerowa. Sosu le ane meni meremereyeyei se wou aꞌi wanure. Sosu ane faraꞌu iyape ano oso aꞌi ei ani aroweyei. 17 Peri ano ape ane fene maꞌe au lesesiya ape, marepi topo ano ne. Meni Owane Pefine aꞌi ane maꞌe peri ape au teꞌe taꞌame. Serai ane peri ape meni meremereyeyei wou aꞌi au teꞌesiya. 18 Lu taune tomu neꞌese omo pani werese sahe iyape towafi lowe lo aꞌi ei ani aroweisiya. Serai ane, lowe aiwawe aꞌi ne, ane iyape ano ei ani aroweyei. 19 Fene marepi apou toteye, “Marepi nomo lo wisere aꞌi tene!” Ahowa, fene marepi wisere aꞌi totesiya su, fene piyene lu meremereye aꞌi lo peri wanu umasisiya awere? 20 Wiyeme aꞌi ne. Meni ta fene maꞌe peri kairefi aꞌi se au teꞌesiya su, fene peri lo wanu umasi nineꞌisiya. Sosu lowe marepi fene lo tore anisiya su, fene marepi lowe lo umasisiya. Lowe maꞌaru fene lo taꞌarei aniyei. Sosu lowe fene ne peri teꞌe naruwei. Lowe yo seni ape irowei su, yo seni lowe lo apou wou nihari fene lo ereti se ainerowa. Sosu nihari fene lo ereti se ainesiya su, fene lowe ne marepi wisere aꞌi totesiya. 21 Ahowa, ane yo seni apou ape fene maꞌe au irorowata. Ane yo seni apou ape ne neritaseyeye. Ane yo seni ape apou irorowata. Ahowa, meni ta lai yo seni apou ape mo ne ei ani aroweyei su, ane aiwawe peri tomu neꞌese aꞌi ei ani arowerowa. Ane peri meni meremereye aꞌi wou teꞌesiya. 22 Ane lu aposel wawero aꞌi ne teꞌesiya. Lowe Hibru lo lu tewi maꞌe fai awere? Ane pefine aiwawe aꞌi ne. Lowe Israel lo lu tewi, Owane Sitewi lai ariariyeye ape, awere? Ane aiwawe tene! Lowe Abraham lo lu tewi awere? Wanure! Ane aiwawe aꞌi ne.ⁱ 23 Lowe Krais lo wiyawi yahowaꞌi siye lu awere? Ane peri meni meremereyei wou teꞌesiya. Ahowa, ane aiwawe Krais lo wiyawi yahowaꞌi siye meni owane pefine aꞌi ne. Ane wiyawi lo taꞌane tohotesiya. Nowe tomu neꞌese lu tamo ane kalabus wesi maꞌe heneti. Lowe nowe tomu neꞌese tahe ano wafei se aineteye. Nowe tomu neꞌese lowe ane aine teraꞌeyei ne toteteye.^j 24 Nowe ereti feni werese Juda lo lu owane ane neꞌese wafei se meꞌiyeni sahe (39) aineteye.^k 25 Nowe hesi heta Rom lo lu owane ane me au se aineteye. Nowe taꞌi aꞌi se lu tamo ane maꞌe tapiye se aine teraꞌeyei ne ani fusawi. Nowe hesi heta ane wai erasi papu iroteye su, wai ape tapiye se aine erauwiye. Mi taꞌi pasi taꞌi ane saꞌi erasi sahe fetaneteye.^l 26 Ane omo omo tereꞌe maꞌe iteye su, nowe tomu neꞌese saꞌi ei erasi ane atahe aꞌi ani aporuwei ne toteye. Taꞌarei lu tamo ane aineyei ne toteye, etiri ano taꞌarei aniye. Juda lo lu tamo ane au luwaruweyei ne toteye. Sosu lu tewi tereꞌe aiwawe au luwaruweyei ne toteye. Ane omo omo tereꞌe sahe marepi luwaru aꞌi teriteye. Sosu ane ipo erasi sahe marepi luwaru aꞌi teriteye. Ane saꞌi erasi sahe iroteye su, tahe ano luwaru aꞌi teriteteye. Sosu kaiyemo wawero aꞌi ane maꞌe au luwaruweteye.^m 27 Ane wiyawi erasi taꞌaneye su, ane taꞌane tohoteteye. Sosu tahe ano orese nonoꞌoweye teriteye. Pasi tomu neꞌese ane nihe howei te taꞌame. Ane lau erasi teriteteye. Ane saꞌi wawe teriteteye. Nowe tomu neꞌese ayei werese poꞌuteteye. Wesi ariye, sosu ipari tahe ariye. 28 Etiri tomu neꞌese ane maꞌe henerai. Mi mi werese lu taune, Jisas lo peri umasisiya ape, lowe marepi orese aꞌi teriteteye su, ane aiwawe aꞌi lowe ne marepi orese aꞌi teriteteye. 29 Lu taune tamo marepi kairefi aꞌi poꞌuteyei su, ane aiwawe aꞌi marepi kairefi aꞌi ano poꞌuteyei teriterowa. Sosu meni ta fene yo seni luwaru aꞌi irowei ne tatai aniyei su, ane aiwawe aꞌi le ne ai marepi toterowa.

30 Ane iyape ano ei ani aroweyei su, ane faraꞌu tahe pereꞌe aꞌi ano ne ei ani arowerowa. 31 Owane Sitewi lai, Meni Owane Jisas lo aite pefine aꞌi, marepi orese aꞌi ape mo siye soꞌoruweye tene! Wiyeme! Ane peri wawero se fene areare taꞌame. Nomo mi mi pasi pasi weriyei iyape lo ei ani arowenamite. 32 Ane omo Damaskus saro iroteye su, awei lo meni owane pefine aꞌi ta lu taune omo ape sahe au noweinoweiteye ape, le awei lo meni owane tutawe iyape Aretas unahi iroteye. Meni owane tutawe lo ai atu siye lu tamo omo lo yo tewiye werese einamiteye. Le ane ereti wafei se ti tawesiyei ne toteteyewe, kalabus wesi maꞌe heneti. 33 Ahowa, ane omo ape arunatiyei ne toteye su, kaiyemo ano tamo ane ipi papu wiye sosu lowe eresene aꞌi ipi topeꞌe yo ani aro itowe. Serai ane meni owane ape atowei aꞌi arunati iteroti.ⁿ