Pol hamehameyei tamo siyeye.
12
Ane iyape topo ano ei ani aroweyei ne totesiya. Ahowa, ane iyape ano ei ani aroweyei su, ane meni meremereye aꞌi wou teꞌesiya. Ahowa, ane peri tereꞌe ne fene maꞌe au teꞌe areiyesiya. Ane hamehameyei ta ne Meni Owane Pefine aꞌi lai ane maꞌe au atuatuwe ape, fene maꞌe au teꞌesiya. Sosu suwou peri tamo aiwawe fene maꞌe au teꞌesiya. 2 Tu naifa iyu menei ereti hesi werese lowe hesiyo hesiyo (14) i tepaꞌasiye su, meni ta Owane Sitewi lai omo lo hire pefine aꞌi maꞌe heneti ape, ane, meni ape siye soꞌoruwesiya. Meni ape Owane Sitewi lo omo pefine aꞌi siyeye awere? Piyete awere? Meni ape hamehameyei sahe iroteye awere? Ane soꞌoru taꞌama. Owane Sitewi aꞌi lai siye soꞌoruwesiya! 3 Sosu ane fene maꞌe teꞌesiya. Wiyeme aꞌi meni ape Owane Sitewi lai omo hire pefine aꞌi lo maꞌe hene ani tepaꞌasi aniye. Tahe paꞌare aiwawe siyeye awere? Hepene lo aꞌi siyeye awere? Ane soꞌoru taꞌama. 4 Ane aꞌi lai meni ape ne. Owane Sitewi lai meni ape omo lo hire maꞌe hene wiye. Ane peri tomu neꞌese wisere aꞌi ne wanuwe. Etiri werese ane siyeteye ape, ane fene maꞌe au teꞌeyei ne amouwesiya. 5 Meni ape ne, ane iyape lo ne ei ani arowesiya. Ahowa, ane iyape topo ano ei ani arorowata. Ane tahe pereꞌe werese ano faraꞌu ei ani arowerowa. 6 Ane iyape ano topo ei ani aroweyei ne toteyei su, ane meni meremereyeyei wou taꞌama. Ahowa, ane peri wiyeme aꞌi au teꞌeyei. Ahowa, ane iyape topo ano ei ani arowe taꞌame. Lu taune ta mo iyape ano ei ani aroweyei su, yo seni lowe lo luwaru aꞌi ne. Ahowa, lu taune tamo etiri tamo, ane iroteye ape, siyeye su, sosu peri ano wanuteye su, lowe faraꞌu iyape ano Owane Sitewi maꞌe ei ani aroweyei. Lowe iyape ano ei ani aroweyei su, yo seni ape wisere aꞌi ne.7 Owane Sitewi lai hamehame ape ane maꞌe au atuatuwe. Ane Owane Sitewi lo etiri erasi aꞌi siyeye. Marepi lo apou toteye. Ahowa, Ane aꞌi lai iyape topo ano ei ani arowerowata. Serai Owane Sitewi lai tahe ano sahe wafei niꞌari se au tewiye. Mi mi werese ane wafei niꞌari ape tahe ano sahe fofowei erasi teriteteye. Fofowei ape Satan ane maꞌe aineteyewe, ane maꞌe au luwaruweteye. Serai hamehameyei ape ne, ane iyape ano ei ani arowerowata.a 8 Nowe hesi heta ane Meni Owane Pefine maꞌe ei toweriteye. “Ne faraꞌu wafei niꞌari ape ani tahe anire.” 9 Sosu le ane maꞌe itiyaꞌu eiye, “Ahowa, ferafereiyei ano ne ne faraꞌu aꞌi ne. Ne tahe pereꞌe aꞌi irosiya su, kairefi ano marepi no pefine aꞌi heneraiyei.” Sosu marepi ano wisere aꞌi totesiya. Ane tahe pereꞌe aꞌi irosiya su, Krais lo kairefi ane maꞌe napetunamisiya.b 10 Serai ane Krais lo marepi umasiyei su, ane faraꞌu tahe pereꞌe aꞌi teriteyei. Sosu lu tamo ane ne teꞌe naruwei su, marepi ano nineꞌirowa. Sosu lowe ane maꞌe marepi orese aꞌi au irowei su, ane marepi wisere aꞌi toterowa. Sosu lowe ane maꞌe au luwaruweyei su, ane marepi fetane aꞌi teriterowa. Sosu etiri luwaru aꞌi ane maꞌe heneraiyei su, ane marepi momotei aꞌi teriterowa. Serai ane tahe pereꞌe aꞌi irosiya su, ane kairefi aꞌi henerairowa.
Pol Korin lo lu taune ne marepi erasi toteteye.
11 Ane meni meremereyei wou aꞌi au teꞌesiya. Ahowa, fene ane maꞌe peri apou ape teꞌeyei ne au irowe. Fene iyape ano Owane Sitewi maꞌe ei ani aroweye su, etiri ape wisere aꞌi ne. Wiyeme aꞌi. Ane meni yahowaꞌi. Ahowa, lu ape mo, meni owane tereꞌe lo peri wawero au teꞌeteye ape, ane lowe lo unahi iro se taꞌame. Lu ape mo lu yahowaꞌi pefine aꞌi ne.c 12 Owane Sitewi lai ane peri heneruwe pefine aꞌi lo au teꞌe areiyeyei ne ariariyeye. Etiri werese ape mo, Owane Sitewi maꞌe fai ape, ane fene maꞌe au atuatuteye. Ane etiri werese ape mo ane fene mase taꞌane tohoteye ape, ane marepi momotei eresene aꞌi se taꞌaneteye. Serai Owane Sitewi lo wiyawi erasi pefine aꞌi, sosu etiri yaru erasi aꞌi, fene siyeteye ape, ane lai taꞌaneye.d 13 Ane wiyawi ano lu taune werese mase, Jisas lo yo seni umasiye ape, taꞌaneteye. Ane fene maꞌe wiyawi aiwawe aꞌi taꞌaneteye. Etiri taꞌi ane fene ne teꞌe aꞌi au irowe. Ane etiri maꞌaru werese fene lo ei toweri taꞌame. Ane fene maꞌe maꞌaru tamo ei toweri taꞌame su, yo seni ano luwaru aꞌi awere? Ane yo seni luwaru aꞌi ta fene ne irowe su, fene yo seni luwaru aꞌi ano tote iꞌanere.e
14 Tu naifa ane nowe hesi aꞌi fene maꞌe sewiyeye. Sosu nowe pereye eite se, ane fene tame sewiyeyei ne totesiya. Ane fene werese maꞌe marepi orese aꞌi au iro wou taꞌama. Ahowa, ane etiri maꞌaru werese fene lo aniyei ne ei toweri taꞌame. Ahowa, ane marepi fene lo tataiyei ne totesiya. Eimane oso wiyawi erasi aꞌi taꞌane tohoterowa su, lowe maꞌaru lowe lo tai mai maꞌe aurowata. Ahowa, tai mai lowe lo faraꞌu wiyawi erasi taꞌane tohoterowawe, sosu maꞌaru lowe lo eimane lowe maꞌe aurowa. 15 Ane maꞌaru werese ano faraꞌu fene ne au pati aniyei ne ani fusawirowa. Aiwawe aꞌi ane marepi hepene ano fene ne au pati aniyei ne temeniyerowa. Ane fene ne marepi erasi aꞌi tote wawesiyenamisiya. Ane fene marepi erasi aꞌi tote wawesiyenamisiya su, fene piyene ane ne ai marepi totenamisiya awere? 16 Fene marepi ano aiwawe toteye. Ane fene maꞌe marepi orese aꞌi au iro taꞌame. Ahowa, meni ta ane ne apou eiyei, “Pol peri wawero nomo maꞌe au teꞌe areareye. Sosu le marepi nomo lo tatai aniyei ne mariwe wou aꞌi taꞌaneye. Le maꞌaru nomo lo taꞌarei aniyei ne totesiya.” 17 Serai ane fene maꞌe itiyaꞌu ei towerisiya. Piyene fene apou aꞌi teꞌesiya awere? Ane kaiyemo mo ano fene maꞌe eimawesawi su, ane ereti lowe lo se maꞌaru werese fene lo ei toweri aniye awere? Piyete! 18 Ane lai meni Taitus kairefi aꞌi se ei toweriye, “Ne omo Korin maꞌe sewiyenarire.” Ane kaiyemo tereꞌe ta le mase fene maꞌe eimawesawi. Lowesi etiri maꞌaru fene lo ei toweri aniye awere? Piyete awere? Meni ape marepi ano aiwawe aꞌi totesiya. Sosu nomo wiyawi aiwawe aꞌi taꞌanesiya tene! Sosu yo seni nomo lo aiwawe aꞌi ironamisiya.f
19 Fene one towe eite ano siye teꞌeyei su, fene nomo ne marepi erasi apou aꞌi toteyei. Nomo peri nomo lo nihe fene lo se au fareraiyeyei. Ahowa, nomo fene maꞌe Owane Sitewi lo nihe se Krais lo marepi wou au teꞌeyei. Kaiyemo mo ano, etiri werese, nomo taꞌanesiya ape, nomo fene ne au pati aniyei ne taꞌanesiya. 20 Ane fene ne atoweiyesiya. Ane fene maꞌe sewiyeyei su, ane yo seni luwaru aꞌi tamo fene irowe ape, siyeyei awere? Ane yo seni luwaru aꞌi fene lo siyeyei su, ane fene ne ai marepi erasi aꞌi toteyei. Sosu fene marepi ano ne orese aꞌi teriterowa. Ane fene ne marepi pereꞌe aꞌi iro taꞌame. Piye yo seni apou ape ane siyeyei awere? Ai peri tiyati teꞌe teꞌeyei, lu taune maꞌe au luwaruweyei, lu taune ne peri teꞌe naruwei, peri wawero aꞌi au teꞌeyei, iyape towafi fene lo ei ani aroweyei. Peri luwaru aꞌi teꞌeyei. Peri luwaru meꞌiyeni maꞌe tiyati teꞌeyei, peri arisiyei teꞌeyei. Ane yo seni luwaru aꞌi apou ape mo atoweiyesiya. 21 Etiri tereꞌe ta ane fene ne atoweiye aꞌi totesiya. Ane fene maꞌe tame sewiyeyei su, Owane Sitewi lai ane maꞌe fene lo nihe se ani ararowei. Sosu ane lu taune tomu neꞌese, yo seni luwaru aꞌi irowe ape, ane lowe ne luwei erasi aꞌi irowei. Yo seni luwaru aꞌi lowe lo mi mi werese ironamisiya. Owane Sitewi lai yo seni luwaru aꞌi lowe lo au sasari taꞌame. Lowe meꞌiyeni maꞌe yo seni eite atati arunati taꞌame. Yo seni unou aꞌi, tafaꞌe yo seni luwaru aꞌi, yo seni siye wisereyeyei. Lowe yo seni apou ape meꞌiyeni maꞌe atati arunati taꞌama.g