Peri yeꞌewi kairefi aꞌi au teꞌeye.
13
Tu naifa ane nowe hesi aꞌi fene maꞌe sewiyeye. Sosu nowe pereye eite se, ane fene maꞌe tame sewiyeyei ne totesiya. Ane aiyeyei su, ane yo seni luwaru werese aꞌi, lu taune tamo iroteye ape, siye etiyei. Tu naifa Owane Sitewi, one towe lo sahe, peri ta apou leseye. Peri ape wanu etire!“Lu taune tamo yo seni luwaru aꞌi iroteye su, lu hesi, lu hesi heta marepi taꞌi aꞌi yo seni luwaru aꞌi ne au teꞌerowa.” Lo 19:15
Lu taune werese marepi taꞌi aꞌi siye soꞌoruweye. Lowe yo seni luwaru aꞌi iroteye.a 2 Ane peri ta fene yo seni luwaru aꞌi tu iroteye ape, sosu fene werese maꞌe aiwawe peri kairefi aꞌi se au teꞌeye. Tu ane nowe toꞌuresi fene maꞌe sewiyeyei ne fai su, ane peri kairefi aꞌi se fene maꞌe teꞌeye. Sosu pereye nowe eite se ane, omo eyeri maꞌe irosiya ape, peri eite tame teꞌesiya. Lu taune werese maꞌe yo seni luwaru aꞌi iroteye ape, ane lowe werese aweraꞌiyenati taꞌame. Fene ai marepi ano teriterowa. 3 Ane aiyeyei su, fene werese etiri ape siye soꞌoruweyei. Krais lai peri lo fene maꞌe ahi ano se au teꞌesiya. Le yo seni luwaru aꞌi fene lo siye etiyei su, le tahe lo pereꞌeye taꞌame. Ahowa, le fene maꞌe kairefi erasi aꞌi lo au teꞌe atuatuwei. 4 Wiyeme aꞌi. Lowe Jisas me tapeꞌi sahe aine ti tawesi heriye su, le tahe pereꞌe aꞌi se temeniyeye. Ahowa, Owane Sitewi lai kairefi erasi aꞌi se le ne si tame taꞌane norohuwe hene aniye. Serai nomo marepi hepene taꞌi aꞌi le mase irosiya su, nomo aiwawe tahe pereꞌeyesiya. Ahowa, nomo fene mase irowei su, nomo Owane Sitewi lo kairefi aꞌi se mi mi weriyei marepi hepene lo umasinamirowa.b
5 Serai ane fene maꞌe au teꞌesiya. Fene werese yo seni werese towafi fene lo au hese ereite. Fene Krais lo marepi umasisiya awere? Piyete awere? Krais lo marepi hepene fene papu irosiya awere? Fene Krais lo marepi siye soꞌoru taꞌame su, Krais marepi hepene fene lo papu iro taꞌame.c 6 Ane lai yo seni werese topo ano au hese ereiye su, serai ane etiri ape soꞌoruwesiya. Krais marepi hepene ano papu irosiya. 7 Ahowa, nomo Owane Sitewi maꞌe fene ne apou au teꞌe towerisiya. “Fene werese yo seni luwaru aꞌi owe ape irote.” Nomo fene mase wiyawi taꞌaneye su, nomo lu taune maꞌe iyape nomo lo ei ani arowe wou taꞌama. Ahowa, fene yo seni farere aꞌi fa irote. Fene wiyawi nomo lo ne apou totesiya su, nomo wiyawi nomo lo sahe winetaiyei. Fene marepi apou aꞌi totesiya su, faraꞌu aꞌi ne. Fene mi mi weriyei farere aꞌi fa irote. 8 Nomo werese peri pefine maꞌe ai atu tiyatirowata. Ahowa, nomo mi mi weriyei peri pefine fa au teꞌe fiyarite. 9 Nomo tahe pereꞌe aꞌi irosiya su, sosu fene tahe kairefi aꞌi irosiya su, nomo marepi wisere aꞌi totesiya. Sosu nomo Owane Sitewi maꞌe fene ne au teꞌe toweriyei. Fene werese Jisas lo marepi pefine aꞌi maꞌe si tame aiyerowawe, le ne tote tawesi umasirowa. 10 Serai ane eyeri maꞌe one towe eite fene maꞌe lese ausawi. Ane fene maꞌe sewiyeyei su, ane fene maꞌe kairefi se au teꞌeyei wou taꞌama. Owane Sitewi lai ane maꞌe kairefi lo ape auwe. Ane Owane Sitewi lo kairefi se fene maꞌe au luwaruweyei wou taꞌama. Ahowa, ane tote tawesiyei fene lo au kairefiyeyei ne toteyei.d
Peri yeꞌewi eritesiya.
11 Peri yeꞌewi ane fene maꞌe au teꞌesiya. Fene marepi fene lo sahe tote iro nineꞌinamite. Fene yo seni waraꞌi aꞌi tohote ironamite. Peri werese ano wanu umasite. Fene werese marepi taꞌi aꞌi tiyati totete. Fene werese ai peri owe ape tiyati teꞌete. Serai fene peri eite wanu umasiyei su, Owane Sitewi lai, lu taune werese marepi erasi aꞌi tote wawesiyesiya ape, sosu lu taune werese maꞌe marepi fetane aꞌi ausiya ape, le lai fene mase mi mi weriyei ironamitorowa.
12 Fene werese taꞌi taꞌi aꞌi tote wawesiyeyei lo se, lu taune maꞌe, Jisas ne umasisiya ape, tiyati eritete. Lu taune Krais lo marepi umasisiya ape, lowe ane mase irosiya ape, lowe fene maꞌe au eritesawisiya.
13 Meni Owane Jisas Krais lo ferafereiyei, sosu Owane Sitewi lo marepi erasi tote wawesiyeyei, sosu aiwawe aꞌi Owane Sitewi lo Hepene Waraꞌi aꞌi, fene papu ironamisiya ape, lowe fene werese mase ironamitorowa.