6 Ane peri ta fene ne wanuwe. Fene witane aꞌi se Owane Sitewi meꞌiyeni maꞌe atati arunatiyewe, peri heneruwe tereꞌe aꞌi ta tote umasiteye. Le fene Krais lo ferafereiyei se ei aniye. Serene ane fene ne hepene se suꞌariye. 7 Wanure! Krais lo peri heneruwe pefine aꞌi ne. Peri heneruwe tereꞌe tereꞌe werese aꞌi wawero aꞌi tene! Lu tamo lai marepi fene lo au areare meremereyeyei ne totesiya. Lowe Krais lo peri heneruwe waraꞌi aꞌi au atati luwaruweyei ne totesiya.^b 8 Nomo fene maꞌe fai su, nomo peri heneruwe waraꞌi pefine aꞌi fene maꞌe au teꞌe fiyari areiyeteye. Ahowa, nomo lai peri heneruwe wawero aꞌi fene maꞌe au teꞌe fiyariyei su, sosu aiwawe aꞌi Owane Sitewi lo ipari wisere aꞌi tamo peri heneruwe wawero aꞌi fene maꞌe au teꞌe fiyariyei su, Owane Sitewi lai lowe werese yehe omo maꞌe weriyei weriyei itomu ti seroꞌowei ne ani fu arosawirowa.^c 9 Ane nowe tu naifa peri ta fene maꞌe au teꞌeye. Serai ane peri ape fene maꞌe tame teꞌesiya. Peri heneruwe wisere aꞌi aꞌi ape nomo lai fene maꞌe au teꞌe areiyeteye ape, wiyeme pefine aꞌi tene! Meni ta peri heneruwe wawero aꞌi fene maꞌe au teꞌeyei su, Owane Sitewi lai le yehe omo maꞌe weriyei weriyei itomu ti seroꞌowei ne ani fu arosawirowa. 10 Ane peri eito eite au teꞌeyei su, ane lu lo marepi nineꞌiyei wanuwei ne totesiya awere? Opiyai! Ane Owane Sitewi lo marepi nineꞌiyei wanuwei ne totesiya awere. Ane lu taune maꞌe marepi wisere aꞌi wanuwei ne totesiya awere? Ahowa, ane lu taune lo nineꞌiyei wanuwei ne toteyei su, ane Krais lo wiyawi yahowaꞌi siye meni irorowata.^d

11 Kaiyemo mo, Krais lo peri heneruwe ne, ane fene maꞌe peri wiyeme aꞌi au teꞌesiya. Serai fene peri ano wanu etire. Peri heneruwe ape ane au teꞌe areiyesiya ape, lu lo marepi maꞌe fai taꞌama.^e 12 Lu tamo peri heneruwe ape ane maꞌe au teꞌe taꞌame. Aiwawe aꞌi lowe peri heneruwe ape ane maꞌe au atuatu taꞌame. Ahowa, Owane Jisas Krais lai peri heneruwe wisere aꞌi lo ane maꞌe au atuatu areiyeteye.

13 Yo seni ano, ane tu naifa iroteye ape, fene wanu soꞌoruwe tepaꞌasiye. Tu naifa ane Juda lo meni owane pefine aꞌi ne. Ane Juda lo yo peri werese umasinamiteye. Ane lai lu taune Krais lo yo seni tote umasiteye ape, au luwaruwe etinamiteye. Ane lowe maꞌe au feraferei taꞌame.^f 14 Ane Juda lo yo seni iroteye su, ane Juda lu tewi tereꞌe werese ane ponei sahe iroteye ape, ani fu arowe. Ane Juda lo meni owane pefine heneraiyei ne toteye. Ane mi mi weriyei Juda lo yaꞌariyei lo yo seni iro etinamiteye.^g 15-16 Ahowa, Owane Sitewi lai tu naifa weriyei weriyei ane le ne au teꞌe areiyeyei ne ariariyeye. Tu mai ano ane autei taꞌame su, le ane ferafereiyei lo se ei aniye. Nowe meꞌiye su, le meni eime lo ane maꞌe au atuatuwei ne nineꞌiye. Le ane lu tewi tereꞌe maꞌe peri lo au teꞌe areiyeyei ne ei aniye. Le ane ei aniye su, ane lu tereꞌe tamo ane maꞌe Krais lo peri au atuatuwei ne ei toweri taꞌama.^h 17 Ane omo Jerusalem maꞌe lu ape Jisas tu ei aniye ape, ei toweriyei ne i taꞌame. Le ane meꞌiye su ei aniye. Ahowa, ane omo pani Arebia maꞌe fi. Nowe meꞌiye su ane omo Damaskus si tame fi. 18 Iyu menei hesi heta i tepaꞌasiye su, ane omo Jerusalem maꞌe Pita siye soꞌoruweyei ne yaneye. Ane le mase poweiye mi ereti feni hesi lowe feni werese teꞌe tiyatiteyei ne iroteye.ⁱ 19 Ahowa, ane Meni Owane Jisas lo paꞌise Jems siyeye. Ane lu tereꞌe, Jisas tu ei aniye ape, siye taꞌame. 20 Serai peri eite ane fene maꞌe lese ausawisiya ape, Owane Sitewi soꞌoruwe tepaꞌasiye. Peri werese ano wiyeme pefine aꞌi tene! Ane fene maꞌe areare se taꞌame. 21 Ane omo Jerusalem arunati su, ane omo pani Siria, sosu omo pani Silisia maꞌe fi.^j 22 Lu taune Krais lo yo seni umasinamiteye ape, omo pani Judia sahe, lowe nihari ano siye soꞌoru taꞌama. 23 Ahowa, lowe peri ta ane ne wanuwe. “Meni ape, Pol, nomo werese Krais lo yo seni umasisiya ape, au luwaruwenamiteye. Le lu taune maꞌe Krais ne tote tawesiyei ne au teꞌe areiyeteye. Nowe tu naifa le Krais ne tote tawesiyei ape au luwaruweyei ne toteye.” 24 Serene, lowe Owane Sitewi Pefine maꞌe ane ne au teꞌe wisereyenamiteye.