Lu aposel ape mo Pol ne marepi taꞌi aꞌi toteteye.
2
Sosu aꞌi pe iyu menei ereti feni hesi lowe hesiyo hesiyo (14) i tepaꞌasiye su, ane, Barnabas aiwawe aꞌi omo Jerusalem maꞌe si tame yaneye. Notosi meni Taitus mase aiwawe heneti.a 2 Owane Sitewi lai ane maꞌe etiri ta au atuatuwe. Le ane maꞌe omo Jerusalem maꞌe lu owane maꞌe Jisas tu ei aniye ape, au teꞌeyei ne eimawesawi. Ane lu owane taꞌi taꞌi eresene aꞌi taꞌuweraiyewe, lowe maꞌe eiye, “Peri heneruwe wisere aꞌi ape ane au teꞌe areiyesiya ape, ane lu tewi tereꞌe maꞌe au teꞌe fiyarisiya.” Serai ane omo Jerusalem maꞌe fiyewe, lowe se apou teꞌe tiyatiye. “Ane lu tewi tereꞌe maꞌe Krais lo peri heneruwe wisere aꞌi au teꞌe fiyarisiya.” Wiyawi werese ano ane tu iroteye ape, sosu ane pereye irosiya ape, lowe ane meꞌiyeni maꞌe atati arurowa awere? Ane lu tewi tereꞌe maꞌe Krais lo peri teꞌe fiyariyei su, lu owane ape mo ane ne ai marepi toterowa awere? Serene ane atoweiyeyewe, ane lu owane ape mo eresene aꞌi au teꞌe tiyatiyei ne fi. 3 Meni ape Taitus, Pani Grik maꞌe fai ape, ane mase iroteye. Ane apou toteye, lowe Taitus lo tahe towei. Ahowa, lowe le maꞌe apou teꞌe taꞌame, “Ne Juda lo lu tewi fa heneraire.” Lowe Juda lo yo seni umasi taꞌame. Ahowa, lowe tahe lo tewi tou taꞌame. 4 Serene ane peri ape toteye. Ahowa, Lu tamo Krais lo yo seni umasi areareteye ape, lowe nomo mase erese aꞌi taꞌuwerai. Lowe Krais Jisas lo yo seni aseyaro aꞌi, nomo iroteye ape, siye etiyei ne toteye. Lowe apou totesiya, “Lu taune Krais ne tote tawesisiya ape, lowe werese Juda lo yaꞌariyei yo seni fa umasinamite. Serai lowe werese wiyawi yahowaꞌi siye lu taune fa henerairowa.” Ahowa, nomo Krais ne tote tawesiyei su, nomo Juda lo yo peri lo kairefi unahi iro te taꞌame.b 5 Ahowa, nomo marepi lowe lo mi mi werese se tote umasi taꞌame. Krais lo peri heneruwe wisere aꞌi pefine aꞌi fa ironamite. Serene nomo lowe maꞌe teꞌe kairefiyeye. “Nomo marepi fene lo umasirowata.” Serai fene Krais lo peri heneruwe ape wanuwei su, peri waraꞌi aꞌi fene mase ironamirowa. 6 Lu owane werese ne, marepi ano apou aꞌi totesiya. Lowe iyape erasi totesiya ape, etiri yahowaꞌi ne. Owane Sitewi lu taune lo yo seni au hese ereirowa su, le nihari tahe siye taꞌame. Ahowa, le marepi papu au hese ereirowa. Lu owane ape mo ane maꞌe teꞌe tiyatiye su, lowe peri heꞌi aꞌi au teꞌe taꞌame. 7 Ahowa, lowe marepi tereꞌe toteye. Lowe etiri ape siye soꞌoruweye. Owane Sitewi lai ane lu tewi tereꞌe werese maꞌe peri heneruwe wisere aꞌi lo au teꞌe fiyariyei ne ei aniye. Apou wou aꞌi le meni Pita, Juda lo lu tewi werese maꞌe au teꞌe fiyariyei ne ei aniye.c 8 Serai Owane Sitewi lai kairefi lo se ane lu tewi tereꞌe maꞌe eimawesai. Sosu aiwawe aꞌi le meni Pita kairefi lo se Juda lo lu tewi maꞌe eimawesawi. 9 Lu owane ape mo Jems, Pita, Jon, lu taune tamo lowe ne apou toteteye. Lu taune Krais ne tote tawesisiya ape, taꞌuweyei su, lu hesi heta lu owane pefine aꞌi ne. Lowe Owane Sitewi lo marepi notosi ne siye soꞌoruweye. Owane Sitewi lai ane wiyawi ape irowei ne auwe. Serene lowe ereti se Barnabas, ane notosi eriteye. Notosi lowe maꞌe ereti se eriteye su, nomo Owane Sitewi lo wiyawi lefeifo henerai tepaꞌasiye. Nomo marepi taꞌi aꞌi toteteye. Barnabas ane, notosi lu tewi tereꞌe maꞌe au teꞌe fiyarirowa. Sosu lowe Juda lo lu tewi maꞌe au teꞌe fiyarirowa. 10 Sosu lowe notosi maꞌe peri ta teꞌe toweriye. “Fenesi lu taune maꞌaru etiri ariye ape au pati anire.” Etiri ape ane aiwawe aꞌi tote ironamisiya.dPol lai Pita lo marepi luwaru aꞌi au fareraiyeye.
11 Sosu aꞌi pe Pita omo Antiok maꞌe henerai su, le marepi luwaru aꞌi toteye. Serai ane le maꞌe lu taune lo nihe se au teꞌe fareraiyeye. Le yo seni luwaru aꞌi irowe. 12 Nowe tu naifa Jems Juda lu tewi tamo omo Antiok maꞌe eimawesai. Pita lu tewi tereꞌe tamo mase mi mi werese ene ayei ne onuteye. Serai Juda lu tewi ape mo henerai su, le lowe ne atoweiyeye. Le apou toteye, “Juda lo lu tewi lai lu tewi tereꞌe werese lo tahe touwei ne toteye.” Serene le lu tewi tereꞌe ape mo meꞌiyeni maꞌe atati aruteye.e 13 Sosu aiwawe aꞌi Juda lo lu tewi tereꞌe tamo lai Krais ne tote tawesiteye ape, Pita lo marepi luwaru aꞌi tote umasiteye. Lowe aiwawe aꞌi marepi hesi aꞌi toteteye. Lowe lai Barnabas aiwawe aꞌi marepi luwaru aꞌi lowe lo tote tatai aniteye. 14 Yo seni luwaru aꞌi ape lowe iroteye ape, lowe Krais lo peri heneruwe wiyeme pefine aꞌi umasi taꞌame. Serai ane yo seni luwaru aꞌi lowe lo siyeteye su, ane lu taune lo nihe se Pita maꞌe eiye, “Mai no auteiye su, ne Juda lo meni pefine aꞌi ne. Ahowa, ne Krais ne tote tawesiye su, ne Juda lo yo peri lo kairefi unahi iro taꞌame. Ne lu tewi tereꞌe lo yo seni wou ironamisiya. Ne Juda lo yo seni pefine iro taꞌame. Serai ne piyene lu tewi werese maꞌe apou eisiya awere? ‘Fene Juda lo yaꞌariyei yo seni werese fa umasinamite.’ 15 Peri ape wiyeme aꞌi ne. Mai nomo lo nomo auteiye su, nomo Juda lo lu tewi pefine aꞌi henerai. Owane Sitewi lai yo peri lo nomo maꞌe auwe. Nomo lu tewi tereꞌe wou taꞌama. Owane Sitewi lai lowe maꞌe yo peri lo au taꞌame. 16 Nomo peri eite siye soꞌoruwe tepaꞌasiye. Lu taune ta mo Meni Owane Jisas Krais ne tote tawesiyei su, Owane Sitewi yo seni luwaru aꞌi lowe lo au sasari pamowerowawe, nihe lo sahe aseyaro aꞌi henerairowa. Meni ta Owane Sitewi lo yo peri tote umasinamiteyei su, le Owane Sitewi lo nihe se waraꞌi aꞌi henerairowata. Nomo aiwawe aꞌi Krais Jisas ne tote tawesiye su, Owane Sitewi lo nihe se nomo waraꞌi aꞌi henerai. Nomo Owane Sitewi lo yo peri pefine aꞌi umasirowata. Owe meni ta Owane Sitewi lo yo peri umasirowata. Serai Owane Sitewi lo nihe se, lowe waraꞌi aꞌi henerairowata.f
17 Sosu nomo Krais mase nate tawesisiya su, nomo Owane Sitewi lo nihe se lu taune waraꞌi aꞌi henerai. Serai nomo Juda lo yo peri meꞌiyeni maꞌe atati aruwei su, Krais lai nomo yo seni luwaru aꞌi au irorowa awere? Opiyai! Owe ape totete. 18 Ane Owane Krais Jisas lo ferafereiyei fene maꞌe au teꞌe areiyeye su, ane Owane Sitewi lo yo peri ani fu aro poꞌuteteye. Sosu ane Owane Sitewi lo yo peri taꞌane kairefiyeyei su, ane meni ta Owane Sitewi lo yo peri arisinamirowa ape, henerairowa. 19-20 Krais me tapeꞌi sahe temeniyeye su, le Moses lo yo peri au taꞌane poꞌuteye. Serai ane le ne tote tawesiye su, ane me tapeꞌi sahe wou temeniyeye. Serai Moses lo yo peri lo kairefiyeyei ane ne au noweinowei taꞌame. Ane meni temeniyeyei wou aꞌi ne. Ane Krais ne tote tawesiye su, le marepi hepene ano papu wiye. Marepi hepene tahe paꞌare ano irosiya ape, ane Jisas lo tote tawesiyei se ironamisiya. Le ane ne marepi erasi aꞌi tote wawesiyenamiteyewe, ane ne me tapeꞌi sahe temeniyeye.g 21 Serai ane Owane Sitewi lo ferafereiyei meꞌiyeni maꞌe atati arurowata. Ahowa, meni ta Owane Sitewi lo yo peri werese umasinamirowawe, Owane Sitewi lo nihe se aseyaro aꞌi henerairowa su, sosu Krais lai yahowaꞌi temeniyeye.”