Tote tawesiyei ape lai yo peri weriyei ape hi ani ararowe.
3
Lu taune Krais ne umasisiya ape, omo pani Galesia sahe irosiya ape, marepi fene lo meremereye aꞌi ne. Lu ape mo lai fene maꞌe areareteye. Fene peri nomo lo wanu areiyeteye. Jisas Krais me tapeꞌi sahe temeniyeye. Fene wanu soꞌoruwe areiye tepaꞌasiye. 2 Ane peri taꞌi fene maꞌe ei towerisiya. Fene Owane Sitewi lo Hepene Waraꞌi aꞌi aniye su, fene Moses lo yo peri umasiteye awere? Fene Krais lo peri heneruwe wanu tote tawesi umasinamiteye awere? Fene Krais lo peri heneruwe wanu tote tawesi umasiteye su, Owane Sitewi lai Hepene Waraꞌi aꞌi lo marepi hepene fene lo papu maꞌe eimawe arosai. 3 Marepi fene lo meremereye aꞌi ne. Fene tu Krais lo peri heneruwe wanuwe su, fene Owane Sitewi lo Hepene Waraꞌi aꞌi umasinamiteye. Pereye fene hepene waraꞌi aꞌi lo meꞌiyeni maꞌe atati aruwewe, marepi towafi fene lo tote umasisiya. 4 Fene Krais ne tote tawesiteye su, lu tamo fene maꞌe fofowei erasi auwe. Serai fofowei ape mo fene teriteye ape, yahowaꞌi henerai awere? Ane marepi sitewi fene lo soꞌoru taꞌama. 5 Owane Sitewi lai Hepene Waraꞌi aꞌi lo fene maꞌe auwe. Serai ane fene maꞌe ei towerisiya. Le wiyawi erasi pefine tomu neꞌese aꞌi fene maꞌe au taꞌaneteye. Fene Moses lo yo peri tote umasiteye awere? Ahowa, fene Krais lo peri heneruwe wanu tote tawesi umasiteye.Abraham Owane Sitewi ne tote tawesi umasinamiteye.
6 Abraham lo yo seni tote etire. Owane Sitewi lo peri apou teꞌesiya,
“Le Owane Sitewi ne wanu tote tawesi umasiteye. Serene Owane Sitewi lai tote tawesiyei lo siyeye su, le Owane Sitewi lo nihe se meni aseyaro aꞌi henerai.” Stt 15:6
7 Serai fene peri wiyeme aꞌi wanu etire. Abraham lo lu tewi pefine werese aꞌi, lowe Owane Sitewi ne tote tawesi umasinamiteye. 8 Tu naifa weriyei Owane Sitewi lai one towe sahe apou teꞌe areiyeye. “Lu tewi tereꞌe werese Ane ne tote tawesiyei su, lowe nihe lo se lu taune aseyaro aꞌi henerairowa.” Serai Owane Sitewi lai peri heneruwe lo Abraham maꞌe apou au teꞌe areiyeye.
“Ane Owane Sitewi lai eime auwe no se lu taune werese maꞌe au wisereyenamirowa.” Stt 12:3
9 Abraham lai Owane Sitewi ne tote tawesinamiteye. Serai Owane Sitewi lai le maꞌe marepi wisere erasi aꞌi au totenamiteye. Serene lu taune werese Owane Sitewi ne tote tawesiyei su, Owane Sitewi lai lowe maꞌe aiwawe aꞌi marepi wisere erasi aꞌi totenamitorowa.
10 Lu taune werese Moses lo yo peri umasiyei ne toteyei ape, lowe Owane Sitewi lo ai marepi unahi ironamitorowa. Lowe yo peri werese ape mo umasirowata. Owane Sitewi lo peri one towe sahe apou leseye.
“Lu taune werese Moses lo yo peri werese umasi taꞌame su, Owane Sitewi lo ai marepi lowe maꞌe ironamitorowa.” Lo 27:26
11 Owe meni ta Moses lo yo peri umasinamiteye. Serai Owane Sitewi lo nihe se owe meni ta aseyaro waraꞌi aꞌi ironamitorowata. Owane Sitewi lo peri one towe sahe apou leseye.
“Meni ta, menitani ta Owane Sitewi ne tote tawesiyei su, lowe Owane Sitewi lo nihe se lu taune waraꞌi aꞌi henerairowa.” Hab 2:4
12 Meni ta Moses lo yo peri wanu tote umasiyei su, le mi mi weriyei yo peri ape mo umasiyei ne toteye. Ahowa, le Owane Sitewi lo marepi pefine tote tawesi taꞌame. Moses lo yo peri apou teꞌesiya.
“Fene yo peri werese tote umasiyei su, fene mi mi pasi pasi ironamitorowa.” Wkp 18:5
13 Serai Moses lo yo peri ape nomo maꞌe au luwaruweteye. Ahowa, Krais lai nomo si tame ete hene aniye. Le yaru nomo lo atati aniye. Serai yo seni luwaru werese aꞌi nomo lo le lai aniye. Owane Sitewi lo peri one towe sahe apou leseye,a
“Meni ta me tapeꞌi sahe aine tawere tawesiye su, le Owane Sitewi lo ai marepi unahi iroteye.” Lo 21:23
14 Serene Krais me tapeꞌi sahe temeniyeyewe, nomo si ete hene aniye su, le Owane Sitewi lo teꞌe naneiyei ape lu taune maꞌe Moses lo yo peri umasi taꞌame ape, aitai. Teꞌe naneiyei ape Owane Sitewi lai Abraham maꞌe au teꞌeye. Teꞌe naneiyei ape Krais Jisas se fai. Jisas me tapeꞌi sahe temeniyeye su, Owane Sitewi lai Hepene Waraꞌi aꞌi lo nomo maꞌe auwei ne teꞌe naneiye. Nomo Jisas ne tote tawesiyei su, nomo Owane Sitewi lo Hepene Waraꞌi aꞌi anirowa.
Owane Sitewi lai teꞌe naneiyei lo Abraham maꞌe auwe.
15 Kaiyemo mo, ane fene maꞌe peri ta au teꞌe areiyesiya. Lu hesi peri ta one towe sahe peri pefine teꞌe naneiyei su, lowesi marepi taꞌi aꞌi apou teꞌerowa. “Notosi peri pefine teꞌe naneinamiyei ape, wanu umasirowa.” Lowesi peri ape teꞌe tepaꞌasiyei su, owe meni ta peri ape einamirowata. Aiwawe aꞌi owe meni ta peri heꞌi aꞌi peri pefine teꞌe naneinamiyei ape, papu leserowata. 16 Owane Sitewi lai peri teꞌe naneiyei tamo Abraham sosu eime auwe lo maꞌe au teꞌe areiyeye. Owane Sitewi apou ei taꞌame. “Ane peri teꞌe naneiyei Abraham sosu eimane auwe werese nowe meꞌiye maꞌe henerairowa ape, au teꞌe naneiye,” Eimane auwe werese lu taune tomu neꞌese aiwawe aꞌi ne. Ahowa, le peri teꞌe naneiyei meni taꞌi ne au teꞌeye. Meni ape Krais tene!b 17 Peri ano lo eti ane fene maꞌe teꞌeye. Owane Sitewi lai meni Abraham maꞌe peri teꞌe naneiyei ta au teꞌeye. Sosu Owane Sitewi le maꞌe eiye. “Ane peri teꞌe naneiyei werese ano umasinamirowa.” Moses lo yo peri iyu menei 430 meꞌiye su henerairowa. Moses lo yo peri ape lai Owane Sitewi lo peri teꞌe naneiyei atati arurowata.c 18 Sosu nomo Moses lo yo peri werese wanu umasinamiyei su, nomo Owane Sitewi lo etiri nomo maꞌe au teꞌe naneiye ape anirowa awere? Opiyai! Nomo yo peri ape umasiyei su, nomo Owane Sitewi lo etiri anirowata. Sosu Owane Sitewi lo peri nomo ne au teꞌe naneiyei ape, nomo anirowata. Ahowa, Owane Sitewi lai peri teꞌe naneiyei lo Abraham maꞌe au teꞌe areiyeye su, le marepi wisere aꞌi Abraham maꞌe erasi aꞌi auwe.d 19 Serai Piyene Owane Sitewi nomo maꞌe yo peri lo auwe awere? Yo peri ape lu taune werese maꞌe nomo mase yo seni luwaru aꞌi lowe lo au atuatunamiteye. Sosu Abraham lo eime auwe henerairowa su, Moses lo yo peri iro poꞌuterowa. Owane Sitewi lai yo peri lo ipari wisere aꞌi tamo Moses maꞌe auwei ne eimawe arosai. Sosu Moses lai Owane Sitewi lo yo peri lu taune maꞌe auwe.e 20 Owane Sitewi Juda lo lu taune maꞌe yo peri lo auwe su, etiri hesi heta iroteye. Owane Sitewi yo peri ape auwe. Juda lo lu taune yo peri ape fu tote umasite. Sosu Meni ta ponei sahe teiteye. Ahowa, Owane Sitewi peri teꞌe naneiyei lo au teꞌeye su, le taꞌi aꞌi etiri ape irowe. Serai meni ta ponei sahe teiteye ape iro taꞌame. Piyene awere? Lu taune le peri teꞌe naneiyei au teꞌeye ape, lowe etiri ta ironamirowata.
Moses lo yo peri lo sitewi.
21 Sosu aꞌi pe fene eiwerou totesiya awere? Moses lo yo peri ape lai Owane Sitewi lo peri teꞌe naneiyei ape se ai atu tiyatisiya awere? Opiyai! Yo peri ta nomo maꞌe marepi hepene heꞌi aꞌi aurowa ape, irorowa su, sosu nomo yo peri ape umasiyei su, Owane Sitewi lo nihe se nomo lu taune aseyaro aꞌi ironamitorowa.f 22 Peri ape wawero aꞌi ne. Owane Sitewi lo peri one towe sahe nomo maꞌe apou atuatu areiyesiya, “Lu taune omo werese sahe yo seni luwaru aꞌi ti tawesinamitorowa. Serene nomo le ne tote tawesiyei su, Owane Sitewi lai peri teꞌe naneiyei lo nomo maꞌe au teꞌerowa. Owane Sitewi lo peri teꞌe naneiyei ape lu taune werese maꞌe Jisas Krais tote tawesisiya ape auwe.”
23 Sosu aꞌi pe tote tawesiyei lo henerai taꞌame su, Moses lo yo peri ape lai nomo ti tawesinamiteye. Meꞌiye su Owane Sitewi lai nomo maꞌe Krais ne tote tawesiyei lo ape amerame aꞌi aiyerowa ape, au atuatuwe. Serai nomo le ne tote tawesiyei su, nomo marepi fetane pefine aꞌi ironamitorowa.g 24 Serai tu naifa nomo Moses lo yo peri unahi teiteye. Moses lo yo peri ape nomo maꞌe nomo Krais au atuatuteye. Serai Krais henerai su, le tote tawesiyei nomo maꞌe au atuatu areiyeye. Sosu nomo le ne tote tawesiyei su, nomo Owane Sitewi lo nihe se lu taune waraꞌi aꞌi ironamitorowa.h 25 Sosu nomo le ne tote tawesiyei su, nomo Moses lo yo peri ape unahi iro se taꞌame ne. 26 Fene Krais Jisas ne tote tawesiye su, fene Owane Sitewi lo eimane henerai.i 27 Serene Meni ta fene saꞌi au huwe su, fene lu taune maꞌe apou atuatu areiyeye, “Nomo Owane Sitewi lo eimane pefine aꞌi ne. Sosu nomo Krais lo yo seni waraꞌi aꞌi tote umasinamitorowa.”j 28 Juda lo lu taune Krais ne tote tawesiyei su, Juda lo yo seni yahowaꞌi henerairowa. Sosu meni ta omo pani Grik maꞌe fai ape Krais ne tote tawesiyei su, Grik lo yo seni yahowaꞌi henerairowa. Lu taune wiyawi yahowaꞌi iroteye ape, Krais ne tote tawesiyei su, yo seni lowe lo yahowaꞌi henerairowa. Lu taune iyape se Krais ne tote tawesiyei su, marepi lowe lo aiwawe yahowaꞌi henerairowa. Sosu lu werese, sosu taune werese, lowe taꞌi taꞌi aꞌi Krais ne tote tawesiyei su, lowe aiwawe aꞌi henerairowa. Fene werese Krais Jisas ne tote tawesiyei su, fene lu taune tereꞌe aiwawe wou henerairowa.k 29 Fene Krais lo lu tewi pefine aꞌi iroteye su, fene Abraham lo eimane auwe wou aꞌi ne. Serai etiri Owane Sitewi lai Abraham au teꞌe naneiye ape, fene Owane Sitewi lo etiri aiwawe aꞌi anirowa.l