4
Sosu aꞌi pe ane fene maꞌe teꞌesiya. Meni eime ta oso aꞌi irosiya su, le aite lo etiri iyami anirowata. Le wiyawi yahowaꞌi siye meni wou aꞌi ne. Nowe meꞌiye su meni eime erasi heneraiyei su, le aite lo etiri iyami werese anirowa. 2 Meni eime ape oso aꞌi irosiya su, aite paꞌise lo ape lai au noweinoweinamirowa. Etiri iyami werese meni tereꞌe ta lai au noweinoweirowa. Nowe ta se aite pefine nowe ta ariariyeye ape, henerairowa su, meni eime ape erasi aꞌi henerai. Serai aite paꞌise lai le maꞌe etiri iyami werese ape aurowa. 3 Sosu aiwawe aꞌi nomo eimane osu wou aꞌi ne. Nomo hepene lo kairefi aꞌi unahi iroteye. Nomo lowe lo wiyawi yahowaꞌi lu taune wou aꞌi ne.a 4 Nowe ta Owane Sitewi ariariyeye ape, henerai su, le meni eime taꞌi aꞌi lo hi awei sahe eimawe arosai. Menitani ta lai le auteiye. Le Moses lo yo peri unahi iroteye.b 5 Le Moses lo yo peri unahi iroteye su, le faraꞌu lu taune tereꞌe Moses lo yo peri unahi ironamiteye ape, si ete hene aniye. Serai nomo Owane Sitewi lo eimane pefine aꞌi henerai. 6 Serai fene eimane pefine lo henerai tepaꞌasiye su, Owane Sitewi lai meni eime lo Hepene Waraꞌi aꞌi fene maꞌe eimawe arosai. Le marepi hepene fene lo papu fa ironamite. Sosu Hepene Waraꞌi aꞌi lo peri apou utesiya. “Owane Sitewi Tai Pefine aꞌi, ne Tai Pefine aꞌi nomo lo ne.” 7 Tu naifa fene wiyawi yahowaꞌi lu taune wou aꞌi iroteye. Ahowa, pereye nowe eite se fene wiyawi yahowaꞌi lu taune taꞌama. Fene eimane pefine aꞌi lo wou aꞌi henerai. Serai fene eimane pefine aꞌi lo irosiya su, Owane Sitewi lai fene maꞌe au ferafereiyewe, fene maꞌe etiri werese lo aurowa.cPol Galesia lo lu taune ne marepi erasi aꞌi toteteye.
8 Sosu aꞌi pe tu naifa weriyei fene Owane Sitewi pefine soꞌoru taꞌama su, fene god wawero aꞌi tomu neꞌese ape mo tote umasinamiteye. Fene god wawero lo wiyawi yahowaꞌi anisiye siye lu taune. Fene lowe ne arunatirowata. 9 Ahowa, pereye nowe eite se fene Owane Sitewi pefine soꞌoruwe tepaꞌasiye. Ei, Owane Sitewi lai fene soꞌoruwe tene! Serai fene peri ano wanure! Fene piyene sepei lo kairefi wawero aꞌi ape si tame atati umasisiya awere? Fene piyene kairefi wawero yahowaꞌi lowe lo unahi irotereme awere? 10 Serai fene yaꞌariyei lo peri tote umasinamisiya. Fene nowe mi lo yo peri, yame lo yo peri, nowe mi mi, saꞌi lo yo peri, sosu iyu menei lo yo peri fene lai tote umasinamisiya.d 11 Ane fene ne atoweiye irosiya. Wiyawi ape ane fene maꞌe au taꞌaneteye ape, yahowaꞌi henerairowa.
12 Kaiyemo mo, ane fene maꞌe peri kairefi aꞌi ta eisiya. Fene pereye nowe eite se ane wou aꞌi fa heneraire. Ane fene aiwawe aꞌi irosiya. Nomo Moses lo yo peri unahi iro taꞌame. Fene ane maꞌe au luwaruwe taꞌame. 13 Sosu fene peri eite soꞌoruwe tepaꞌasiye. Tu naifa ane tutawe fene maꞌe henerai su, ane u tahe se iroteye. Serai ane fene maꞌe Krais lo peri heneruwe pefine aꞌi au teꞌe areiyeyei. 14 Ane u tahe se iroteye su, fene ane ne marepi orese aꞌi tote ewiteteye. Fene ane ne marepi luwaru aꞌi toteye taꞌama. Aiwawe aꞌi fene ane meꞌiyeni maꞌe atati arunati taꞌame. Ahowa, fene ane se tote erite wisereyeteye. Fene ane Owane Sitewi lo ipari wisere aꞌi wou omo hire maꞌe eritesai. Sosu fene ane Owane Krais Jisas wou eritesai. 15 Serai ane fene maꞌe ei towerisiya. Tu naifa fene marepi erasi aꞌi nineꞌinamiteye. Ahowa, marepi nineꞌiyei fene lo poꞌutesiya awere? Sosu ane peri pefine aꞌi fene maꞌe teꞌesiya. Tu naifa fene ane ne aiwawe ferafereiyei ne toteye. Serai fene faraꞌu nihe fene lo ani tahe aniyei ne toteyewe, ane maꞌe aurowa. 16 Ane peri werese pefine aꞌi fene maꞌe teꞌesiya su, ane piyene fene se airame wou henerai awere?
17 Lu tewi ape mo lai fene maꞌe au atuatu ferafereiteye. Lowe marepi fene lo au luwaruweyei ne totesiya. Marepi lowe lo apou totesiya. Fene nomo fu arunatirowawe, marepi lowe lo tote tawesi umasite. Sosu fene lowe mase marepi taꞌi aꞌi totenamite. 18 Fene lu taune tamo maꞌe ferafereiyei au atuaturowa su, fene yo seni wisere aꞌi umasirowa. Yo seni apou ape mi mi weriyei wisere pefine aꞌi tene! Ane fene mase irorowa su, peri ape pefine aꞌi tene! Sosu aiwawe aꞌi ane fene eyeri maꞌe irorowa ape, peri ape pefine aꞌi tene! 19 Serai eimane ano, ane fene ne fofowei erasi marepi ano sahe papu teritesiya. Fofowei ape taune eimane auteiyei lo fofowei teriteyei wou aꞌi ne. Fofowei ape marepi ano sahe ironamitorowa. Serai Krais lo marepi fene maꞌe henerairowa su, fofowei ape marepi ano sahe irosiya ape, poꞌuterowa. 20 Ane pereye nowe eite se fene mase iroreme. Ane nihari fene lo siyeyei su, ane fene maꞌe ai peri ta teꞌerowata. Ane fene eyeri maꞌe irosiya su, ane fene ne marepi orese aꞌi irosiya.
Menitani Hagar sosu Sara lo peri anowe.
21 Fene ane maꞌe peri si itiyaꞌu au teꞌere! Fene Moses lo yo peri unahi irowei ne totesiya ape, fene Moses lo yo peri pefine wanu eti umasisiya awere? 22 Owane Sitewi lo one towe sahe peri ta apou leseye, “Yaꞌariyei Abraham lo eimane hesi iroteye. Meni eime ta wiyawi yahowaꞌi siye menitani ape lai auteiye. Meni eime tereꞌe menitani iyape se lai auteiye.”e 23 Meni eime ape wiyawi yahowaꞌi siye menitani lai auteiye ape, le awei lo yo seni umasiyewe, serai meni eime lo auteiye. Meni eime tereꞌe Owane Sitewi lai Abraham maꞌe peri ta au teꞌe naneiye. “Tani pefine tutawe no meni eime ta auteirowa.” Serai tani pefine lo meni eime ape auteiye.f
Nomo tote tawesiyei su, nomo eimane pefine aꞌi henerai.
24 Taune hesi ape ne peri anowe ta nomo maꞌe au atuatusiya. Taune hesi ape teꞌe naneiyei hesi apou ape wou iroteye. Teꞌe naneiyei taꞌi ape omo Sainai maꞌe fai. Lu taune werese Moses lo yo peri tote wanu umasinamiteye ape, lowe wiyawi yahowaꞌi siye lu taune ironamiteye. Menitani ape lo iyape Hagar. 25 Sosu menitani Hagar omo Sainai aiwawe wou aꞌi ne. Omo ape Pani tewi Arebia sahe iroteye. Menitani Hagar omo Jerusalem apou wou aꞌi ne. Lu taune werese omo ape sahe iroteye ape, lowe werese wiyawi yahowaꞌi siye lu tewi aꞌi ne. 26 Ahowa, omo Jerusalem niꞌarawe hire maꞌe ironamisiya ape, le wiyeme pefine aꞌi ne. Omo ape menitani pefine wou aꞌi ne. Menitani ape lai mai pefine nomo lo ne.g 27 Owane Sitewi lo one towe sahe apou leseye,
“Menitani waiyari ta, ne marepi erasi aꞌi nineꞌinamite. Ne menitani waiyari, ne meni eime auteiyei lo fofowei terite taꞌame ape, ne peri erasi ute nineꞌinamite. Ne eimane tomu neꞌese auteirowa. Taune meni mo se fene eimane werese fene lo taꞌi taꞌi aꞌi auteirowa.” Ais 54:1
28 Sosu kaiyemo mo, fene meni Aisak wou aꞌi ne. Owane Sitewi lai Abraham maꞌe teꞌe naneiye. Serai tani lo meni eime ape auteiye. Fene maꞌe Owane Sitewi apou teꞌe naneiye. Serai fene Owane Sitewi lo eimane pefine aꞌi henerai.h 29 Nowe ape se tu naifa weriyei meni ape awei lo yo seni se auteiye ape, le meni ape Owane Sitewi lo Hepene Waraꞌi aꞌi se auteiye ape, au luwaruwenamiteye. Sosu pereye nowe eite se lu tewi awei lo yo seni auteiye ape, lowe Owane Sitewi lo eimane aiwawe aꞌi au luwaruwenamisiya. 30 Owane Sitewi lo peri piye teꞌesiya awere?
“Fene wiyawi yahowaꞌi siye menitani naiyari, meni eime lo aiwawe aꞌi, pani eyeri tewi maꞌe eimawesawire! Wiyawi yahowaꞌi siye menitani lo meni eime, le mi mi weriyei weriyei etiri iyami anirowata. Menitani pefine aꞌi lo meni eime lai etiri iyami werese anirowa.” Stt 21:9-10
31 Serai kaiyemo mo, nomo menitani yahowaꞌi lo eimane taꞌama. Ahowa, nomo menitani pefine aꞌi lo eimane tene!