2 Wanure! Ane Pol fene maꞌe teꞌesiya. Fene yo peri si tame umasirowawe, sosu tahe fene lo tewi touwei su, Krais fene ne yahowaꞌi henerairowa. 3 Sosu ane lu werese maꞌe peri kairefi aꞌi se tame au teꞌesiya. Fene tahe fene lo touwei su, fene yo peri werese werese fa umasinamite. 4 Fene apou totesiya su, “Ane yo peri werese umasiyei su, ane Owane Sitewi lo nihe se meni aseyaro aꞌi heneraiyei.” Opiyai! Fene lai Krais marepi hepene fene lo sahe au ani sasarisawi arunati. Fene Krais lo ferafereiyei nowe maꞌe teinamitorowa. 5 Nomo Krais ne tote tawesiye su, nomo Owane Sitewi lo nihe se nomo waraꞌi aꞌi heneraiyei. Owane Sitewi lo Hepene Waraꞌi aꞌi lai le yo seni waraꞌi aꞌi nomo maꞌe tote tawesiyei nomo lo au kairefiyesiya. Serai nomo Owane Sitewi lo nihe se lu taune waraꞌi aꞌi heneraiyei ne ninawenamisiya. 6 Nomo Krais Jisas ne tote tawesi umasiyei, sosu le ne nateyei su, tahe touwei lo yo seni yahowaꞌi irorowa. Sosu aiwawe aꞌi fene tahe fene lo tou taꞌame su, etiri aiwawe yahowaꞌi irorowa. Krais ne tote tawesi umasiyei ape, etiri tutawe pefine aꞌi ne. Tote tawesiyei se, fene lu taune werese maꞌe marepi erasi aꞌi tote wawesiye tiyatitorowa.^a

7 Fene Krais ne tote tawesiteye su, marepi hepene fene lo wisere aꞌi ironamiteye. Nowe pereye eite se fene marepi hepene fene lo luwaru aꞌi irosiya. Eiwerai fene maꞌe peri wawero au teꞌe areareye awere? Serene fene Owane Sitewi lo peri pefine aꞌi arisiteye. 8 Marepi luwaru lowe lo ape Owane Sitewi maꞌe fai taꞌama. Ahowa, le aꞌi lai fene ariariyeyewe, sosu ei aniye. 9 Fe wawe saꞌi horuse aꞌi ape tou poruneiye su, fe loꞌu wisere aꞌi ape horuse luwaru aꞌi irorowa.^b 10 Ane marepi kairefi aꞌi se fene ne totesiya. Ane soꞌoruwesiya tene! Fene peri werese ano wanu umasirowa. Meni Owane Pefine aꞌi lai fene maꞌe au ferafereirowa. Serai peri wawero, fene maꞌe au teꞌe areiyeteye ape, fene peri lowe lo wanu tote tawesi umasirowata. Ahowa, meni ape marepi fene lo au luwaruweteye ape, ane le soꞌoru taꞌama. Ahowa, Owane Sitewi lai le maꞌe fofowei erasi aꞌi ta aurowa.^c 11 Kaiyemo mo, ane peri wawero ta fene maꞌe au teꞌe areiyenamiyei su, “Fene tahe fene lo tewi toure.” Ane peri wawero ape au teꞌeyei su, Owe meni ta lai ane maꞌe au luwaruwerowa. Ahowa, lowe ane maꞌe erasi aꞌi au luwaruwenamisiya. Serai ane peri wawero ape au teꞌeyei su, fene tahe fene lo touwei. Krais me tapeꞌi sahe temeniyeye su, temeniyeyei lo ne, lu taune tomu neꞌese Krais ne ninapune winetai taꞌame. 12 Marepi ano apou aꞌi totesiya. Lu tewi ape mo marepi fene lo au luwaruweteye ape, lowe tahe towafi lowe lo werese toute.

13 Sosu aꞌi pe kaiyemo mo, Owane Sitewi lai fene marepi fetane aꞌi se ei aniye. Serai marepi hepene fene lo yo peri lo kairefi unahi ironamitorowata. Ahowa, fene apou owe ape totere, “Nomo marepi fetane aꞌi irosiya su, nomo faraꞌu yo seni luwaru aꞌi irorowa.” Ahowa, fene lu taune tereꞌe maꞌe tote tiyati wawesiye ferafereite.^d 14 Moses lo yo peri lo sitewi apou aꞌi teꞌesiya. Peri sitewi ape tutawe pefine aꞌi ne. Fene lu tewi towafi fene lo marepi erasi aꞌi tote wawesiyeteyei su, fene lu taune tereꞌe maꞌe aiwawe aꞌi fa tote wawesiyenamite.^e 15 Fene lu tewi fene lo au tiyati luwaruwenamirowawe, sosu lowe maꞌe ai marepi totenamiteyei su, fene werese weiyai! Fene yo seni apou ape ironamitorowa su, fene marepi hepene fene lo au tiyati luwaruwe poꞌuterowa.

16 Ahowa, ane fene maꞌe teꞌesiya. Fene Owane Sitewi lo Hepene Waraꞌi aꞌi se Krais lo yo seni tote umasite. Owane Sitewi lo Hepene Waraꞌi aꞌi fene papu ironamisiya su, fene lu marepi tote umasirowata. 17 Marepi weriyei nomo lo Owane Sitewi lo Hepene Waraꞌi aꞌi maꞌe ai atunamisiya. Sosu aiwawe aꞌi Owane Sitewi lo Hepene Waraꞌi aꞌi marepi weriyei nomo lo maꞌe ai atunamisiya. Serai lowesi ai atu tiyatinamisiya. Serai Owane Sitewi lo Hepene Waraꞌi aꞌi yo seni luwaru aꞌi fene iroreme ape, einamisiya.^f 18 Ahowa, fene Owane Sitewi lo Hepene Waraꞌi aꞌi unahi irosiya su, fene Moses lo yo peri unahi ironamirowata.

19 Lu marepi nomo maꞌe amerame aꞌi henerai ape, aiwawe aꞌi ne. Tafaꞌe yo seni luwaru aꞌi, yo seni unou aꞌi, tafaꞌe marepi luwaru aꞌi, etiri ape mo lu taune ironamirowa.^g 20 God wawero au tote wisereye nineꞌiyei. Sinariyei marepi toteyei. Lu taune maꞌe ai marepi totenamiyei. Lu taune maꞌe marepi luwaru aꞌi au tote luwaruweteyei. Etiri neꞌese ape ne siye wisereyeyei. Ai peri erasi lu taune maꞌe toteyei. Ai peri au teꞌe tiyatiyei. Marepi towafi lowe lo tote umasinamiyei. Ai peri morose lu tiyati teꞌeyei. Peri wawero umasiyei. Lu weneri oso ai marepi toteyei ne taꞌuweraiyei. 21 Meni tereꞌe lo etiri siye tote wisereyeyei. Meremereye saꞌi ene anamiteyei. Lu taune weneri oso tafaꞌe yo seni luwaru aꞌi irowei ne taꞌuweraiyei. Yo seni luwaru aꞌi ironamiteyei. Yo seni luwaru tereꞌe apou ape ne. Tu naifa ane fene mase iroteye su, ane yo seni luwaru aꞌi apou ape fene maꞌe au teꞌe amouweteye. Sosu ane fene maꞌe tame au teꞌe areiyerowa. Lu taune ta yo seni luwaru aꞌi apou ape iroteyei ape, lowe mo etiri Owane Sitewi lo omo hire maꞌe irosiya ape, anirowata.

22 Ahowa, Owane Sitewi lo Hepene Waraꞌi aꞌi lo marepi apou aiwawe aꞌi ne. Lu taune tiyati tote wawesiyeyei. Marepi nineꞌiyei. Marepi fetaneye iroteyei, marepi momotei aꞌi ironamiteyei, marepi ferafereiyei. Marepi tote wisereyeyei. Marepi wisere pefine aꞌi tote umasinamiteyei. 23 Marepi eresene aꞌi ironamiteyei. Marepi luwaru tote einamiteyei kairefiyenamiteyei. Owane Sitewi lo Hepene Waraꞌi aꞌi lo marepi apou ape yo peri ta lai au itawi amouwerowata. 24 Serai lu taune Krais Jisas lo peri wanu tote tawesi umasisiya ape, lowe marepi weriyei lowe lo me tapeꞌi sahe ti tawesi poꞌuteye. Yo seni luwaru aꞌi ape lowe lo sosu marepi luwaru aꞌi aiwawe aꞌi me tapeꞌi sahe ti tawesi poꞌuteye.^h 25 Owane Sitewi lo Hepene Waraꞌi aꞌi fene papu ironamisiya su, fene marepi lo tote umasinamite. 26 Serai nomo lo iyape yahowaꞌi owe ape ei ani arowete. Nomo lu taune maꞌe Krais ne tote tawesisiya ape, ai marepi owe ape tote oreseye tiyatite. Nomo lu tereꞌe lo etiri owe ape siye wisereyete.ⁱ