Fene lu taune au feraferei tiyatite.
6
Sosu aꞌi pe kaiyemo mo, meni ta, Krais ne tote tawesisiya ape, le yo seni luwaru aꞌi irowe. Fene le yo seni luwaru aꞌi irowe ape, siyeye su, fene Owane Sitewi lo Hepene Waraꞌi aꞌi lo marepi umasinamisiya ape, fene meni ape yo seni luwaru aꞌi irowe ape, marepi eresene aꞌi se Krais lo yo seni si tame hene anire. Ahowa, fene weiyai! Satan lai tote tawesiyei fene lo au luwaruweyei ne totesiya. Serai fene yo seni luwaru aꞌi apou ape irowei ne toteyei.a 2 Fene lu taune lo marepi orese aꞌi au feraferei tiyatite. Fene marepi orese aꞌi au ferafereiyei su, fene Krais lo marepi umasinamirowa.b 3 Serai meni ta apou toteyei su, “Ane meni iyape erasi se.” Ahowa, le meni yahowaꞌi ne, topo aꞌi lai teꞌe arearesiya. 4 Fene wiyawi towafi fene lo werese ani fu ereite. Le apou ape owe ape toteye, “Ane meni tereꞌe lo wiyawi ani hese ereirowa. Wiyawi ano ape lai wiyawi tereꞌe lo faraꞌu hi ani ararosiya.” Fene wiyawi aseyaro aꞌi irowei su, fene marepi fene lo papu faraꞌu nineꞌinamitorowa. 5 Nomo taꞌi taꞌi aꞌi yo seni towafi nomo lo aseyaro aꞌi ironamite.c6 Sosu aꞌi pe meni ta Owane Sitewi lo peri au teꞌe areiyesiya. Lu taune tereꞌe peri lo wanuwei su, lowe etiri wisere aꞌi apou ape atuatu siye meni maꞌe isafiye noweinoweite.d 7 Fene towafi fene lo peri owe ape tame teꞌe arearete. Owe meni ta lai Owane Sitewi maꞌe au teꞌe arearerowata. Meni ta yo seni luwaru aꞌi irowei su, le apou toteyei, “Owe meni ta lai yo seni luwaru aꞌi ano siyeyei.” Ahowa, Owane Sitewi lai yo seni luwaru aꞌi ape amerame aꞌi siyerowawe, sosu meni ape maꞌe fofowei erasi ape itiyaꞌu aurowa. 8 Meni ta menitani ta marepi weriyei topo lo umasinamisiya su, marepi weriyei topo lo lai marepi hepene lo maꞌe au luwaruwe poꞌuterowa. Ahowa, meni ta menitani ta Owane Sitewi lo Hepene Waraꞌi aꞌi lo marepi tote umasinamirowa su, Owane Sitewi lo Hepene Waraꞌi aꞌi lai le maꞌe marepi hepene heꞌi aꞌi mi mi pasi pasi weriyei au ironamitorowa.e 9 Fene wiyawi wisere aꞌi iroteyei su, fene marepi orese aꞌi owe ape teritete. Nowe meꞌiye su, fene tahe onotaꞌano aꞌi terite taꞌame su, Owane Sitewi lai etiri wisere aꞌi lo fene maꞌe aurowa. 10 Serai marepi orese aꞌi heneraiyei su, fene nowe weriyei weriyei nomo lu taune werese yo seni wisere aꞌi lowe maꞌe fa au feraferei tiyatite. Lu taune Krais lo marepi tote tawesi umasisiya ape, nomo lowe maꞌe aiwawe aꞌi fu au ferafereinamite.
Owane Sitewi lai marepi heꞌi aꞌi nomo maꞌe taꞌanerowa.
11 Sosu aꞌi pe fene leseyei ereti ano erasi aꞌi lesesiya ape, siyere. 12 Juda lo lu tewi lai lu taune Krais lo me tapeꞌi sahe umasisiya ape au luwaruweyei ne totesiya. Serai lu tewi tamo, Jisas ne tote tawesi umasisiya ape, lowe fene maꞌe peri kairefi aꞌi se apou teꞌesiya. “Fene tahe fene lo fa tewi toure!” Lowe Juda lo lu tewi maꞌe au nineꞌiyei ne totesiya. Lowe Juda lo marepi tote umasirowa su, Juda lo lu tewi lowe maꞌe au luwaruwerowata. 13 Lu tewi ape mo tahe towafi lowe lo tewi touwe ape, lowe Moses lo yo peri werese arisinamisiya. Ahowa, lowe fene maꞌe apou teꞌesiya, “Fene Moses lo yo peri fa tote umasite. Sosu fene tahe fene lo toure!” Serai fene tahe fene lo touwei su, fene peri lowe lo wanu umasirowawe, lowe iyape towafi lowe lo fene ne ei ani arowerowa. 14 Ahowa, ane lai iyape ano mi mi weriyei weriyei ei ani arowerowata. Ahowa, ane Meni Owane Jisas Krais lo me tapeꞌi ne toteyei su, ane faraꞌu me tapeꞌi lo ape ei ani arorowa. Jisas Krais me tapeꞌi sahe temeniyeye su, le marepi weriyei ano Krais mase me tapeꞌi sahe aine tawere tawesinamiye. Serai ane awei lo yo seni luwaru werese aꞌi irorowata. 15 Fene tahe fene lo touwei su, etiri ape yahowaꞌi ne. Aiwawe aꞌi meni ta tahe lo tou taꞌame su, etiri aiwawe yahowaꞌi ne. Ahowa, marepi hepene heꞌi aꞌi Owane Sitewi lai nomo maꞌe auwe ape wisere pefine aꞌi ne.f 16 Sosu lu taune Krais lo yo peri ape tote umasisiya ape, ane lowe ne Owane Sitewi maꞌe ei towerisiya. Owane Sitewi lai lowe maꞌe marepi fetane pefine aꞌi sosu ferafereiyei lo mi mi weriyei weriyei au ironamitorowa. Ei, Owane Sitewi lai marepi fetane aꞌi lo, sosu ferafereiyei lo lu tewi pefine aꞌi lo maꞌe weriyei weriyei au ironamitorowa. 17 Serai ane peri yeꞌewi fene maꞌe eisiya. Ane Jisas lo marepi umasisiya su, nowe tase lu tamo meꞌiyeni ano sahe aine nateye. Enite niyame yaro tahe ano sahe irosiya. Serai fene meni ta ane maꞌe owe ape au luwaruwete.g 18 Serai kaiyemo mo, Owane Jisas Krais lo ferafereiye marepi hepene fene lo mase ironamite. Peri wiyeme aꞌi tene!