3 Owane Sitewi Pefine aꞌi, Owane Jisas Krais lo tai, nomo le maꞌe au teꞌe wisereye nineꞌite. Krais le nomo maꞌe etiri wisere waraꞌi aꞌi lo omo hire maꞌe irosiya ape, aunamiteye.^b 4 Tu naifa weriyei weriyei etiri awei pani ariye aꞌi su, le nomo taꞌi taꞌi aꞌi Jisas umasiyei ne ariariyeye. Serene nomo Krais lo marepi tote wawesiyeyei se yo seni aseyaro waraꞌi aꞌi umasinamirowa.^c 5 Le nomo eimane pefine aꞌi lo heneraiyei ne ariariyeye. Serai le Jisas Krais hi awei maꞌe nomo ne eteyei ne eimawesai. Le nomo Owane Sitewi Tai Pefine aꞌi lo maꞌe henetirowa. Le Tai Pefine aꞌi lo marepi wisere aꞌi lo umasiyei ne toteye.^d 6 Sosu nomo Owane Sitewi maꞌe au teꞌe wisereyenamite. Owane Sitewi lai meni eime lo marepi tote wawesiyenamisiya ape, nomo maꞌe ferafereiyei lo ape aitai. Le ferafereiyei lo ape nomo maꞌe neri aꞌi auwe.

7 Krais me tapeꞌi sahe temeniyeye su, le nomo ne ete hene aniyewe, yo seni luwaru aꞌi nomo lo au ani sasari pamoweye. Serai le nomo maꞌe aseyaro aꞌi au irowe. Serai Owane Sitewi nomo maꞌe ferafereiyei pefine aꞌi lo auwe su, le yo seni luwaru aꞌi nomo lo tote iꞌanenamiteye.^e 8-9 Le ferafereiyei lo ape nomo maꞌe erasi pefine neri aꞌi auwe su, le marepi wisere aꞌi lo se sosu marepi tote soꞌoruweyei se, le nomo maꞌe, marepi fareyareye ape, au atuatu areiyeteye. Tu naifa weriyei le Krais se marepi werese lo nomo maꞌe atuatuwei ne toteye. Serai le meni eime lo nomo ne temeniyeyei ne eimawesai.^f 10 Serai marepi sitewi lo apou aꞌi ne, Nowe pefine aꞌi henerairowa su, le marepi werese lo lu taune atuatu areiyerowa. Marepi pefine aꞌi lo apou aꞌi ne. Etiri werese hire maꞌe irosiya ape, sosu etiri werese hi awei sahe irosiya ape, etiri werese werese lefeifo taꞌuwerairowa. Serai Owane Sitewi lai Krais etiri werese lo sitewi pefine aꞌi au iro henerairowawe, etiri werese au noweinoweirowa.^g

11 Sosu aꞌi pe Krais se Owane Sitewi lai nomo ariariyeyewe, lu tewi pefine lo henerairowa. Marepi lo apou wou aꞌi totenamiteye. Sosu Owane Sitewi lai etiri werese marepi taꞌi aꞌi lo umasiyei ne au irowe.^h 12 Serai nomo lu tewi tutawe Owane Sitewi nomo maꞌe teꞌe naneiteye ape, Krais ne ninaweteye. Owane Sitewi lai nomo mitaiyeyei erasi lo maꞌe au teꞌe nineꞌinamiyei ne ariariyeye.

13 Fene aiwawe aꞌi, omo Efesus sahe irosiya ape, fene peri heneruwe wisere aꞌi ape wanu tote tawesi umasiye su, fene lu tewi pefine lo henerai. Serai Krais fene papu wiye su, Owane Sitewi lai fene maꞌe yaru pefine aꞌi ta au teꞌe naneiye. Le Hepene Waraꞌi aꞌi lo fene maꞌe eimawesai. 14 Sosu fene, Juda lo lu tewi taꞌama ape, fene lu tewi pefine aꞌi lo ne. Etiri werese ape mo Owane Sitewi lai lu tewi werese lo maꞌe au teꞌe naneiye ape, Hepene Waraꞌi aꞌi lo ape lai nomo maꞌe peri teꞌe naneiyei ape mo pefine wiyeme aꞌi henerairowa ape, au atuaturowa. Serai Hepene Waraꞌi aꞌi lo nomo papu wiyei su, nomo Owane Sitewi lo lu tewi pefine henerai ape, nomo yaru amerame aꞌi sahe mitaiyeyei pefine aꞌi lo maꞌe au teꞌe wisereyeyei ne aitairowa.ⁱ

15-16 Fene Owane Sitewi lo lu tewi pefine aꞌi su, serene ane fene werese ne le maꞌe au ei towerinamisiya. Ane le maꞌe fene ne au teꞌe wisereyenamisiya. Fene Meni Owane Jisas ne tote tawesiye su, fene Owane Sitewi lo lu tewi werese tote wawesiyenamiteye. Ane tote tawesiyei fene lo, sosu tote wawesiyeyei fene lo wanuwe su, ane mi mi weriyei fene ne Owane Sitewi maꞌe au teꞌenamiteye. 17 Mi mi weriyei ane Owane Jisas Krais lo Owane Sitewi pefine maꞌe, sosu mitaiyeyei pefine aꞌi lo sitewi maꞌe au ei towerinamisiya. Ane le fene maꞌe Hepene Waraꞌi aꞌi lo auwei ne ei towerisiya. Le fene maꞌe aiyerowa su, le marepi wisere aꞌi, Owane Sitewi lo marepi siye soꞌoruweyei ne aurowa. Le marepi werese lo fene maꞌe au atuatu tepaꞌasiye.^j 18 Ane le maꞌe fene lo siye soꞌoruwenamiyei ape auwei ne ei towerisiya. Sosu fene teꞌe naneiyei lo ape mo le nomo maꞌe auwei ne ariariyeye ape siye soꞌoruwerowa. Peri teꞌe naneiyei lo ape mo nomo mi mi weriyei ninawenamisiya. Etiri werese Owane Sitewi lai lu tewi aseyaro lo maꞌe aurowa ape, lowe wisere pefine aꞌi tene. Ane le maꞌe apou ei towerinamisiya. Fene etiri ape mo marepi fene lo se siye soꞌoruwerowa. 19-20 Ane le maꞌe apou ei towerisiya, Nomo le ne tote tawesisiya ape, le kairefiyei lo nomo ne erasi pefine aꞌi au atuatunamirowa. Owane Sitewi lai Jisas si tame taꞌane norohuwe sineye su, le kairefiyei erasi pefine aꞌi se au taꞌaneye. Kairefiyeyei lo ape aiwawe aꞌi nomo maꞌe au atuatusiya. Kairefiyeyei lo ape se le Meni Owane Jisas yaru eyate feni lo hire maꞌe fu onuri.^k 21 Owane Sitewi lai Krais meni Owane tutawe iro henerai. Awei lu owane, awei lu owane tutawe, yaꞌariyei lu owane werese, lu kairefi aꞌi se le lai lowe werese hi ani araronamisiya. Etiri werese hi awei sahe irosiya ape, etiri werese moꞌo henerairowa ape, Krais lai meni tutawe pefine aꞌi lowe werese ani araronamitorowa. 22 Owane Sitewi lai etiri werese werese Krais lo kairefiyei unahi funati. Owane Sitewi aiwawe aꞌi meni tutawe Krais, etiri werese lo meni tutawe irosiya ape, lu tewi lo maꞌe auwe.^l 23 Lu tewi lo apou aꞌi ne. Lu taune werese Owane Sitewi lo marepi wanu tote umasisiya ape, lowe Krais lo tahe paꞌare henerai. Serai le meni tutawe lowe lo henerai. Krais lai lu taune werese lo marepi hepene papu wi temeꞌeriyenamisiya.^m