Owane Sitewi lai Krais lo hepene norohu aꞌi nomo maꞌe aurowa.
2
Tu fene yo seni luwaru aꞌi Owane Sitewi maꞌe ironamiteye. Aiwawe aꞌi yo seni luwaru werese, fene Owane Sitewi maꞌe iroteye ape, serai marepi hepene fene lo temeniyeteye. 2 Ei, tu naifa fene awei lo yo seni umasinamiteye. Fene sepei luwaru aꞌi tutawe iyape Satan umasinamiteye. Sepei luwaru Satan lai lu taune, Owane Sitewi lo peri arisisiya ape, papu ironamisiya.a 3 Tu naifa nomo werese marepi arisiyei lowe lo apou ape tote umasiteye. Nomo marepi luwaru aꞌi nomo lo nineꞌiyei ne umasinamiteye. Marepi luwaru aꞌi towafi nomo lo umasiye su, sosu aiwawe aꞌi tahe paꞌare nomo lo yo seni toteye su, nomo yo seni luwaru aꞌi apou ape umasiteye. Nomo yo seni luwaru aꞌi apou ape umasiteye su, Owane Sitewi lai nomo ne ai marepi totenamiteye. Nomo lu taune tereꞌe werese Owane Sitewi lo peri arisiteye ape aiwawe aꞌi ne!b 4 Ahowa, Owane Sitewi lo ferafereiyei wisere erasi aꞌi tene. Le nomo werese ne marepi erasi aꞌi tote wawesiyenamisiya. 5 Nomo yo seni luwaru aꞌi Owane Sitewi maꞌe iroteye su, marepi hepene nomo lo temeniyeye. Ahowa, nomo Krais ne tote tawesi umasiteye su, Owane Sitewi lai marepi hepene heꞌi aꞌi nomo maꞌe auwe. Owane Sitewi fene maꞌe ferafereiyei lo au atuatuwe su, fene marepi hepene temeniyeteye ape, aweraꞌiyenatiyewe, sosu le fene maꞌe marepi hepene heꞌi aꞌi aunamiye.c 6 Owane Sitewi lai Krais si tame au ani taꞌane norohuwe sineye su, le nomo aiwawe si tame au ani taꞌane norohuwe sineyewe, marepi hepene heꞌi aꞌi nomo maꞌe auwe. Nomo Krais Jisas papu ironamisiya ape, le nomo yaru Krais mase omo hire maꞌe au fu onuwe.d 7 Serene mi mi pasi pasi weriyei Owane Sitewi lo ferafereiyei lo erasi pefine wisere aꞌi au atuatunamitorowa. Le nomo maꞌe marepi wisere aꞌi lo au atuaturowawe, ferafereiyei lo atuatu fiyari areiyenamirowa. 8 Fene Krais Jisas ne tote tawesi umasisiya su, Owane Sitewi lai fene maꞌe ferafereiyei lo ape au atuatuwe. Sosu fene marepi hepene temeniyeteye ape aweraꞌiyenatiyewe, le nomo maꞌe marepi hepene heꞌi aꞌi aunamiye. Fene marepi hepene heꞌi aniyei ne taꞌanerowata. Ahowa, fene Krais Jisas ne tote tawesi umasisiya su, Owane Sitewi lai fene maꞌe neri aꞌi auwe. 9-10 Owane Sitewi lai nomo werese au taꞌaneye. Nomo Krais Jisas ne tote tawesi umasiyei su, Owane Sitewi lai nomo lu taune heꞌi aꞌi au ironamiteye. Serai nomo yo seni wisere aseyaro aꞌi fa ironamite. Tu naifa le yo seni wisere aseyaro aꞌi ape mo nomo irorowa ape, le marepi lo se ariariyeyei ne toteye. Nomo ne marepi lo se le apou toteye. Nomo mi mi werese yo seni wisere aꞌi ape mo fa ironamite. Fene peri ta apou teꞌerowata. “Ane yo seni aseyaro aꞌi ironamiteyei su, ane meni aseyaro aꞌi ne. Ane marepi hepene heꞌi aꞌi aniye.” Serai fene marepi kuseriyei owe ape totete. Serai fene iyape towafi fene lo owe ape ei ani arowete. Fene Krais Jisas ne tote tawesiyei su, Owane Sitewi lai marepi hepene heꞌi aꞌi fene maꞌe neri aꞌi aurowa.eKrais sahe nomo werese taꞌi aꞌi ne.
11 Serai etiri ape tote tawesire, mai fene lo auteiye su, fene lu tewi tereꞌe maꞌe fai. Fene Juda lo lu tewi taꞌama. Lu Juda werese lowe meneꞌe se tahe lowe lo yaru tewi touwe. Serai lowe fene maꞌe apou teꞌeye, “Fene lu tahe yaru tewi tou taꞌame su, fene Juda lo lu taꞌama. Serai fene Owane Sitewi lo lu tewi pefine aꞌi taꞌama.” 12 Tu naifa fene Krais eyeri maꞌe iroteye. Pani Israel lai omo pani sitewi fene lo taꞌama. Owane Sitewi lai fene maꞌe peri teꞌe naneiyei lo au teꞌe nanei taꞌame. Ahowa, le Juda lo lu tewi maꞌe peri teꞌe naneiyei werese au teꞌe naneiteye. Tu naifa fene teꞌe naneiyei lo ninawe te taꞌame. Tu naifa fene hi awei sahe iroteye ape, fene Owane Sitewi pefine soꞌoru taꞌama.f 13 Ahowa, pereye nowe eite se fene Krais Jisas ne nate tawesisiya. Krais me tapeꞌi sahe temeniyeye su, Owane Sitewi lai fene le maꞌe atahe aꞌi henetai.g 14 Juda lo lu tewi, sosu lu tewi tereꞌe lowe ai marepi tote tiyatiteye. Krais aꞌi lai marepi fetaneyeyei nomo lo ne. Le Juda lo lu tewi, sosu lu tewi tereꞌe marepi taꞌi aꞌi hene taꞌuwe aniye. Fisahe ape peri anowe apou wou aꞌi, ai marepi totenamiteye. Serai fisahe ape lu tewi werese werese ponei sahe erauwiteye ape, le lai ani erau tapeti fiyarisawi.h 15 Juda lo yo peri sahe, Moses leseye ape, peri amou tomu neꞌese iroteye. Peri tereꞌe tomu neꞌese, lu werese fa wanu umasite. Ahowa, Krais yo peri werese ape iro poꞌutesawi. Krais lo marepi sitewi apou aꞌi ne. “Ane Juda lo lu tewi sosu lu tewi tereꞌe lowe lu tewi pefine taꞌi heꞌi aꞌi hene taꞌuwe anirowa.” Serai Krais lai lowe werese maꞌe marepi fetane aꞌi aitairowa.i 16 Krais me tapeꞌi sahe temeniyeye su, le lu tewi hesi lo ai marepi tote tiyatinamiteye ape, iro poꞌutenamiteye. Sosu moꞌo le lu tewi hesi aꞌi ape lu tewi heꞌi pefine taꞌi aꞌi iro henerai. Le lowesi Owane Sitewi maꞌe si henetaiyei ne toteye. Serai le me tapeꞌi sahe temeniyeye su, le lu tewi hesi werese Owane Sitewi maꞌe si henetai.j 17 Serene le marepi fetaneyeyei lo peri fene maꞌe Owane Sitewi eyeri maꞌe iroteye ape, au teꞌe fiyari areiyeyei ne fai. Sosu aiwawe aꞌi le marepi fetaneyeyei lo peri Juda lo lu tewi maꞌe, Owane Sitewi atahe aꞌi iroteye ape, au teꞌe fiyari areiyeyei ne fai.k 18 Serene nomo Krais ne tote tawesiyei su, nomo, lu tewi hesi aꞌi Owane Sitewi lo hepene taꞌi se aꞌi faraꞌu Owane Sitewi Tai Pefine aꞌi maꞌe aiyerowa. 19 Serai Owane Sitewi lo nihe se fene ipari lu omo eyeri maꞌe fai ape taꞌame ne. Ahowa, fene lu tewi taꞌi aꞌi, lu taune Krais ne tote tawesiteye ape, aiwawe aꞌi henerai. Fene Owane Sitewi lo lu tewi pefine aꞌi henerai.l 20 Fene Owane Sitewi lo wesi tewi aꞌi wou henerai. Owane Sitewi lo wesi ape sahe Krais Jisas lai me tou sitewi aꞌi ne. Sosu lu tamo tu Krais lo peri au teꞌeteye ape, sosu lu feni pefine aꞌi lo lowe wesi ape lo me tou tereꞌe tereꞌe henerai.m 21 Serai nomo werese Owane Sitewi lo wesi ape tewi aꞌi tewi aꞌi henerai. Owane Sitewi lai nomo werese wesi lo sahe funati. Nomo werese Krais ne tote tawesi umasisiya ape, taꞌuweraiyei su, nomo Owane pefine sahe wesi tutawe aseyaro waraꞌi aꞌi henerai tepaꞌasirowa.n 22 Sosu aiwawe aꞌi fene, Krais sahe irosiya ape, sosu Juda lo lu tewi Krais sahe irosiya ape, Owane Sitewi lai wesi pefine lo taꞌuwe taꞌanerowa. Serai le wesi pefine lo ape sahe Hepene Waraꞌi aꞌi lo se ironamitorowa.o