Owane Sitewi lai Pol lu tewi tereꞌe maꞌe au teꞌeyei ne eimawesawi.
3
Sosu aꞌi pe ane Pol Krais Jisas lo peri ta teꞌeteye su, lowe ane kalabus wesi maꞌe ti tawesisiya. Serai ane fene maꞌe, Juda lo yo seni umasi taꞌame ape, au teꞌesiya. Ane kalabus wesi sahe fene ne au ferafereiyei ne irosiya.a 2 Fene peri wiyeme aꞌi eite wanu soꞌoruwe tepaꞌasiye. Owane Sitewi lo ferafereiyei se le lai ane wiyawi ape fene ne au pati aniyei ne auwe.b 3 Owane Sitewi lai marepi fareyareye aꞌi lo ane maꞌe au atuatu areiyeye. Ane tu fene maꞌe marepi tewi aꞌi lo lese tepaꞌasiye.c 4 Sosu fene peri ape, ane tu leseye ape, siye teꞌeye su, sosu fene etiri ape siye soꞌoruweye. Ane Krais lo marepi pefine aꞌi, fareyareteye ape, siye soꞌoruwe tepaꞌasiye. Peri ano ape wiyeme aꞌi tene. 5 Lu taune tu naifa awei sahe iroteye ape, Owane Sitewi lowe maꞌe marepi fareyare aꞌi lo atuatu taꞌame. Ahowa, pereye nowe eite se Owane Sitewi lai Hepene Waraꞌi aꞌi lo se au teꞌeye ape, Krais lo lu feni pefine aꞌi maꞌe sosu lu tamo tu Krais lo peri au teꞌeteye ape, maꞌe marepi fareyare aꞌi lo au atuatu areiyeteye. 6 Owane Sitewi lo marepi pefine, fareyareteye ape, apou aꞌi ne. Lu tewi tereꞌe Juda lo yo peri umasi taꞌame ape, lowe Krais ne tote tawesirowa su, Owane Sitewi lai lowe maꞌe peri teꞌe naneiyei werese lo aurowawe, lowe maꞌe marepi hepene heꞌi aꞌi aurowa. Tu naifa le peri teꞌe naneiyei lo Juda lo lu tewi maꞌe auwe. Serai Krais Jisas lo peri heneruwe pefine aꞌi lowe maꞌe au teꞌe areiyeteye su, lowe lu tewi taꞌi pefine aꞌi Juda lo lu tewi mase aiwawe aꞌi henerairowa.d7 Sosu aꞌi pe Owane Sitewi lai ane maꞌe ferafereiyei pefine lo au atuatuwe su, ane wiyawi meni lo peri heneruwe wisere aꞌi ape au teꞌeyei ne henerai. Kairefi lo se le ane maꞌe ferafereiyei pefine aꞌi lo ape auwe.e 8 Owane Sitewi lo lu tewi werese ne, ane wiyawi meni lowe werese unahi sahe irosiya. Ahowa, Le lai ferafereiyei lo ane maꞌe auwe. Wiyawi lo ape, ane le maꞌe auwe ape, apou wou aꞌi ne. Ane lu tewi tereꞌe maꞌe Juda lo yo seni umasi taꞌame ape, au teꞌe areiyerowa. Krais lo peri heneruwe wisere aꞌi. Etiri erasi pefine aꞌi ape ne, nomo siye soꞌoruwerowata.f 9 Sosu Owane Sitewi lai ane maꞌe marepi sitewi fareyare aꞌi lo lu taune werese maꞌe au teꞌe areiyeyei ne auwe. Nowe tu naifa weriyei weriyei ape se le marepi sitewi pefine aꞌi lo ape fareyarenamiteye. Owane Sitewi lai awei etiri werese werese aꞌi taꞌaneye. 10 Marepi lo apou wou aꞌi ne. “Ane, Owane Sitewi, lu taune werese Krais ne tote tawesi umasirowa ape ne, wiyawi erasi pefine aꞌi taꞌaneteye.” Serai sepei Owane wisere aꞌi ape mo, sosu lowe werese kairefiyei se hire maꞌe irosiya ape, lowe Owane Sitewi lo marepi wisere pefine aꞌi ape siye soꞌoruwerowa. 11 Marepi sitewi lo tu naifa weriyei weriyei iroteye ape, marepi lo pereye nowe eite se irosiya ape, apou aiwawe aꞌi tene. Krais Jisas Meni Owane Pefine aꞌi nomo lo hi awei maꞌe itorai su, le Owane Sitewi lo marepi pefine aꞌi taꞌane ironamiteye. 12 Nomo Krais ne tote tawesi umasiyei su, nomo faraꞌu Owane Sitewi maꞌe aiyerowa. Nomo le ne atoweiyerowata. Sosu nomo soꞌoruwe tepaꞌasiye. Le peri werese nomo lo wanu etirowa.g 13 Sosu ane fene maꞌe teꞌesiya. Ane Krais lo wiyawi fene ne au iroteye. Ane kalabus wesi sahe irosiya su, ane fofowei erasi aꞌi teriteteye. Serai fene marepi orese aꞌi ane ne owe ape teritete. Ane fofowei erasi fene ne teriteyei su, ane Owane Sitewi lo iyape ei ani arowerowawe, fene le ne au nineꞌinamirowa.
Pol lu taune ne Owane Sitewi maꞌe au teꞌe towerinamisiya.
14 Serene, peri ape mo ane tu fene maꞌe teꞌeye ape, ane Owane Sitewi Tai Pefine aꞌi maꞌe lowe uporo apeꞌi onusiya. 15 Lu tewi werese omo hire sahe iroteye ape sosu hi awei sahe iroteye ape, lowe iyape towafi lowe lo tai maꞌe aniye. 16 Ane Owane Sitewi Tai Pefine aꞌi nomo lo maꞌe mitaiyeyei pefine aꞌi irosiya ape, ei towerisiya. Le fene maꞌe kairefi lo aurowa. Serai fene marepi kairefi aꞌi teinamirowa. Le marepi hepene fene lo papu maꞌe kairefi lo ape Hepene Waraꞌi aꞌi se aurowa. 17 Aiwawe aꞌi ane peri tereꞌe ta le maꞌe ei towerisiya. Fene le ne tote tawesi umasisiya su, Krais lai marepi hepene fene lo papu ironamitorowa. Sosu marepi hepene lo sitewi fene lo fa heneraire. Fene lu taune tereꞌe ne tote wawesiye tiyatinamite.h 18 Sosu ane le maꞌe apou ei towerisiya. Fene sosu lu taune werese Krais ne tote tawesisiya ape, aiwawe aꞌi, Owane Sitewi lai fene werese maꞌe kairefiyeyei lo aurowawe, serai fene lai Krais lo tote wawesiyeyei erasi pefine aꞌi siye soꞌoruwe areiyenamitorowa. Tote wawesiyeyei lo lai hire pefine maꞌe, hi pefine maꞌe, Pite aꞌi pefine maꞌe, sosu feni potu hesi pefine maꞌe ironamisiya. Ane le maꞌe apou ei towerisiya. Fene tote wawesiyeyei lo ape siye soꞌoruwerowa. 19 Krais lo marepi tote wawesiyeyei ape lai erasi pefine aꞌi ironamisiya. Owe meni ta lai tote wawesiyeyei apou ape siye soꞌoruwerowata. Ahowa, ane le ne apou ei towerisiya. Fene marepi tote wawesiyeyei lo ape siye soꞌoruwenamitorowa. Fene marepi tote wawesiyeyei lo siye soꞌoruwerowa su, Owane Sitewi lai fene maꞌe marepi werese pefine aꞌi lo au temeꞌeriyerowa.
20-21 Ane Owane Sitewi maꞌe au teꞌe wisereye nineꞌinamitorowa. Owane Sitewi lo kairefiyeyei marepi hepene nomo lo papu ironamisiya. Etiri werese le irosiya ape, erasi pefine aꞌi tene. Etiri werese ape mo ne nomo toterowata. Sosu aiwawe aꞌi etiri werese nomo le maꞌe teꞌe toweriyei su, le erasi pefine aꞌi taꞌanerowa. Nomo kairefi erasi aꞌi lo ape siye soꞌoruwerowata. Serai lu taune werese tu naifa Krais ne tote tawesiteye ape, sosu nomo werese le ne tote tawesi umasisiya ape, nomo Krais Jisas lo kairefi se Owane Sitewi lo iyape pefine ape mi mi pasi pasi weriyei se teꞌe ani arowenamitorowa. Serai ane le ne au teꞌe nineꞌi wisereyerowa. Peri ape wiyeme aꞌi tene!